الكاتب: Mohamed Ali

كل غرفة فى بيتك محددة لغرض ما ، زى المطبخ للطهى ، و الحمام للاستحمام ، وغرفة النوم للراحة ، إلا غرفة المعيشة تشمل أنشطة كتير لكل فرد فى البيت ، ممكن تسترخي على الكنب أو كرسي الاسترخاء وتقرأ كتاب عجبك ، بالاضافة لمشاهدة الأفلام المفضلة وتناول الطعام من وقت للتانى ، وعشان كل الأنشطة دى تتم صح ، لازم تختار اضاءة غرفة المعيشة بدقة ، بداية من وضع  كشافات السقف والنجفة فى المنتصف لعمل شكل جمالى ، لحد الابليك على الحيطة لإضاءة تابلوهات فنية رائعة ، بالإضافة للاضاءة المخفية فى السقف.

انواع اضاءة غرفة المعيشة

إضاءة وظيفية

أهم خطوة فى اضاءة غرفة المعيشة ، هى مساحة الغرفة ، وتركب اضاءة تساعدك فى القراءة أو الاسترخاء ، لو بصينا لمكان التلفزيون فى غرفة المعيشة ، لازم تتأكد أن ضوء الغرفة مش متعارض مع مكان الشاشة ، عشان ميكونش فيه ضوء مسلط مباشرة على الشاشة يضايقك.

السطوع ممكن يكون من مجموعة متنوعة من مصادر الإضاءة زى كشافات السقف أو النجفة ، او الضوء النازل والموجه من الشبابيك ، فلازم تاخد بالك من مكان التلفزيون والاضاءة.

الاضاءة الخلفية هى الأنسب لتجنب سطوع الضوء على الشاشة ، و لتقليل اجهاد العين الناتج عن طول تعريضها للشاشة فى الغرف المظلمة ، الاضاءة دى ممكن تكون شريط LED خلف التلفزيون ، عشان تحقق رؤية اكتر وضوحا حول الشاشة ، من غير ما يسلط ضوء مباشر على عين الجالس.

عشان يكون عندك ضوء مناسب للقراءة ، فلازم تختار إضاءة مميزة تعطي نور كافى ، واللى مش هتوفره لك إضاءة الديكور ، يبقى تدور على مصدر تانى للضوء زى الأباجورات المكتبية أو اللمبادير ، عشان ضوئهم الساطع والمركز يقلل من إجهاد العين ، ويسلط الضوء أكثر على أوراق الكتاب بدل ما يفرش اضاءته فى مكان اكبر.

إضاءة الديكور

النوع ده من اضاءة غرفة المعيشة وظيفتها تسليط الضوء على اللوحات والديكور ونقط الجمال فى الغرفة ، ولو أنت بتعيد تصميم غرفتك أو بتبنيها من جديد ، ممكن تختار اسبوتات متغيرة الاتجاه او Track light ، هتؤدى الغرض ده بشكل جيد جدا ،  فى الحالة دى لازم تراعى طول السقف لو كان 250 سم ، يفضل أن اضاءة السقف تكون بعيدة عن الحائط بحوالى 60 سم ، عشان تكون فى مستوى النظر.

ممكن تركب شريط LED من فوق بيت الستارة لتركيز الاضاءة على الستائر ، او ممكن تركبه فوق جزء من السقف المعلق (بيت النور) لعمل اضاءة خافتة لو تعبت من سطوع الضوء العالى.

ولو عايز تعمل اضاءة تمييز على تمثال أو قطعة فنية معينة او حيطة فيها ديكور مبتكر ، اختار اضاءة أرضية Uplight من تحت التمثال ، او سبوت موجه ناحيته ده يعطيه ظل ونور فى منتهى الروعة.

فيه أساليب أخرى للاضاءة تقدر توظف بها الاضاءة الاساسية ، وتخفف من شدتها عن طريق استخدام مفتاح ديمر للتحكم فى شدة الضوء ، ولكن خلى بالك لازم تكون الكشافات قابلة للتحكم مش اى نوع يصلح للمهمة دى.

اضاءة غرفة المعيشة الاساسية

مهمة النوع ده هى اظهار ملامح المكان الرئيسية ، وليس اظهار بعض التفاصيل الدقيقة او اجزاء معينة.

كشافات السقف المعتادة تمثل اختيار مثالى للنوع ده ، وخاصة لو يمكنك تركيبها بنفسك  اذا كانت فى الخرسانة مباشرة او فى سقف معلق ، لكن خلى بالك من نقطة مهمة ، وهى أنك تنوع  فى اختيار أشكال النوع ده من الاضاءة.

يعنى مش من المنطقى انك تخلى كل اضاءة السقف كشافات ضوء ابيض ، لكن لازم يكون فيه جزء منهم ضوء دافى او حتى ذهبى لعمل جو نفسى مختلف فى المكان او اذا كنت تستخدم غرفة معيشتك فى عمل حفلات لاعياد ميلاد او غيرها.

بعض الناس تستخدم بيوت النور او الاضاءة المخفية بديلة لكشافات السقف ، كنوع من الخروج عن المألوف ، لكن عشان ده يحقق الغرض منه لازم يكون فيه كمية اضاءة كبيرة من شرايط LED عشان تغطى اضاءة غرفة المعيشة بأكملها.

من ضمن انواع الاضاءة الاساسية ابليك على الحوائط وده من مميزاته انه مش بيعمل ظل غامق على الحوائط ، وده سبب انه مفضل من ناس كتير لان الظلال الغامقة هى اللى بتعطى احساس بالضيق ، عشان كده النوع ده بيعطى احساس بالاتساع وخاصة لو كان فى اجزاء سفلية من الحيطة يعطيك احساس بالارتفاع.

اخر نوع من اضاءة السقف واللى بنهتم بيها اكثر من اى نوع تانى هى النجفة او الوحدات المتدلية ، ودى تعتبر مصدر ديكور السقف كله فى غرفة المعيشة ، عشان كده لازم تتأكد ان اضائتها كافية بالنسبة لك وتشوف عدد الاذرع او اللمبات الموجودة فيها ، لان مهما كانت كشافات السقف كثيرة ومغطية المكان مش هتغنى عن وجود النجفة.

تقنيات اضاءة غرفة المعيشة

تأثير الاضاءة على حياتنا اليومية

جزء من ساعتنا البيولوجية ، أنه تمت برمجتنا على الاستيقاظ فى الصباح على درجات الأزرق اللامع الموجود مع شروق الشمس ، ونميل للاسترخاء على الضوء الأصفر الدافى الخاص بغروب الشمس ، عشان كده خبراء صناعة الاضاءة طوروها بحيث تتوافق مع ايقاعنا اليومى.

عشان كده التكنولوجيا تطرقت لموضوع ده اكثر من اى وقت قبل كده ، وده بيسميه الخبراء الاضاءة المتمركزة حول الانسان ، واثبتت الدراسات الحديثة الخاصة بالطاقة ان الاضاءة تلعب دور مهم جدا فى حياة الانسان اليومية ، ولها بعض الفوائد للصحة والحالة المزاجية.

شدة الاضاءة ودرجة حرارة اللون لهم دور فعال فى ضبط الحالة المزاجية وفيه طرق متنوعة عشان تحقق كل ده.

تطور اللمبات LED

فى الأيام دى اللمبات LED هى الأشهر ، بسبب السعر المنخفض وتوفر حرارة الضوء بكذا درجة ، لاعطاء حالات مزاجية مختلفة مع كل لون ، وكمان جودتها أصبحت اعلى ،  إلى جانب عمرها الافتراضى الطويل ، عشان كده بقت الوسيلة المثالية فى اضاءة غرفة المعيشة .

جزء من تطور لمبات LED أنها اصبحت تحتوى على مفاتيح تحكم فى شدة الاضاءة Dimmer وكمان مفاتيح للتحكم فى لون الاضاءة ودى تقنيات جديدة ولكن سعرها اغلى من لمبة اللون الواحد ، وتم ابتكار النوع ده عشان تقدر تحاكى الضوء الأزرق الخفيف وقت الصباح عشان ، والضوء الابيض طول وقت النهار لمزيد من النشاط ، والضوء الاصفر الدافىء وقت الغروب او وقت الليل لاضفاء جو من الراحة والهدوء.

غرفة المعيشة هى اللى بتجمع كل عائلتك وأصحابك ، فلازم تختار فرشها بدقة ، وبالتحديد الكنبة أو ما تسمى فى السوق الركنة لو كان لها زاوية ، فأساس أى اختيار بيكون المتانة وخاصة أن ركنة غرفة المعيشة بتستخدمها كل يوم ، وبسبب تكلفتها العالية بتغيرها كل فترة طويلة ، واحيانا مش بتغيرها ، عشان كده جمعنا لك معلومات كاملة عن اختيار افضل ركنة فى غرفة المعيشة بحيث تعيش معاك وتناسب ستايل بيتك.

مقاس ركنة غرفة المعيشة

تحديد مقاس ركنة غرفة المعيشة مسألة بسيطة تعرفها من مقاس الحائط اللى هتحط امامه الكنب ، وده عشان تعمل فرش مناسب للمساحة المتاحة عندك ، وفى غرفة المعيشة المفتوحة يفضل أنك تستخدم الركنة وتدمج فى نهايتها puff ، عشان تحدد لك منطقة الجلوس.

ولشكل أنيق أكتر رتب الكنب بشكل زاوية بحيث يكون لك قعدة جماعية جيدة بحيث يتواصل كل الموجودين ، وفى نفس الوقت يكون لكل واحد منهم فرصة لمشاهدة التلفزيون.

ولو بتدور على قعدة شكلها رسمى بدل القعدات الجماعية ممكن تخلى الكنب مواجه لبعضه وده مناسب لمشاهدة التلفزيون اكتر واللعب.

لو غرفة المعيشة عندك ضيقة هيكون الكنب اللى ظهره صغير ممتاز بالنسبة لك ، لانه يبدو للعين انه مش مستهلك مساحة كبيرة ، ويفضل انه يكون قطع منفصلة ، فى حين ان قطع الكنب المتكاملة الغير منفصلة تناسب الأماكن الواسعة.

الفوتيه (كرسى)

بجانب وجود كنبة فى الغرفة ، فممكن تجيب الفوتيه (كرسى) وتعمل بيه جلسة منفردة ، ويمكنك وضعه فى ركن هادى زى ركن القهوة عشان تشرب مشروباتك المفضلة ، ولو المساحة عندك متاحة حط كرسيين فوتيه ، وممكن لو بتدور على شكل مختلف وجديد تخلى الكرسيين مش متطابقين.

خامة كسوة ركنة غرفة المعيشة

لازم تختار قماش تنجيد كنب الغرفة بحيث يكون ملائم لذوقك ، ويكون ملمسه مريح ، اول خطوة تعملها تتأكد من جودة القماش ، عشان مع مرور الوقت هيتعرض لحاجات كتير تؤثر فيه زى الأطفال ، وطريقة استخدامك لغرفة المعيشة ، وحتى وجود حيوانات أليفة ، بالإضافة لتعرضه لأشعة الشمس يوميا.

خامة الجلد متينة وبتعيش كتير ، و لكن مع الوقت هيحصل فيها تجاعيد وممكن تقشر لو جودتها سيئة ، لو بصيت مثلا على النوع المصبوغ هتلاقيه بيقاوم الاوساخ ، لكن شكله مش طبيعى يشبه جلد الانيلين ، فالجلد المصبوغ مرن لكن مصنوع باضافات تحميه ، أما جلد الأنيلين ناعم لكن له قدرة على تحمل كثرة الاستخدام ، وحاليا متوفر بألوان كثير.

الكنب المصنوع من الكتان لونها مش بيبهت مع الوقت ، ولكن بيحصلها تجعيد وده طبعا بعد سنين من الاستخدام ، والكنب المصنوع من القطن صعب أنه يبلى أو يتآكل عشان كده بيعتبر من افضل الخامات ، اما بالنسبة للصوف فهى مريحة على مدار السنة ، و كمان طاردة للأوساخ بشكل طبيعى ، لكن يعيبها انها ممكن تحتفظ بالحرارة اثناء الجلوس.

أما عن قماش الحرير فشكله شيك ، ولكن يتأثر بأشعة الشمس ويحتاج للتنظيف بعناية ، عشان كده لو قررت تشتريه خليه فى مكان بعيد عن الاستخدام الكثيف.

اختار القماش المفضل لك وعشان تتأكد من ملمسه وتعرف انه متين مرر عليه ايدك هتحس بيه ، و لاحظ أن كل ما ضاقت الانسجة وزادت عدد الخيوط فيها بتزيد قوة القماش ويصعب تآكله زى ما قلنا فى اختيار المرتبة.

وعشان تحمى الكسوة الخارجية لكنب غرفة المعيشة يفضل انك تشترى لها كسوة لحماية الكنب من عبث الاطفال وكمان لو فيه حيوانات أليفة فى البيت.

خامة تنجيد ركنة غرفة المعيشة

لو عايز الراحة أثناء جلوسك على الكنب ، يبقى تختار تنجيد ريش خفيف وده مش منتشر اوى فى بلادنا العربية لكنه موجود وسعره اغلى من الخامات التانية ، وخد بالك أنك هتحتاج إعادة  تنجيد كل فترة عشان يرجع للكنبة شكلها الأصلي.

طبعا احنا عارفين ان القطن افضل حشو على الاطلاق سواء فى المخدات او فى بطانة المراتب لكن لو فكرت تعمل ركنة غرفة المعيشة من القطن ، هتتجنب السخونة اثناء الجلوس ، لكن هتلاقى ان وزن الركنة اصبح ثقيل جدا وعشان كده تنجيد القطن مش منتشر للكنبة.

ولكن نفضل انك تختار الخامة الاكثر انتشارا وهى الاسفنج لو عايز جلستك على الكنب تكون مريحة ، وتجنب شراء الأنواع الرخيصة لأنه هيهبط مع كثرة الاستخدام ، وبالنسبة للمخدات او ما تسمى التكاوى دى لها خامات حشو كتير منها المايكروفايبر او قطع الاسفنج المفروم واحيانا البعض يفضل القطن عشان تخفيف الحرارة.

الكنبة الجيدة هتخليك ما تحسش بهيكلها الخشبى وأنت جالس على الحشوة ، أما الجودة السيئة فالعكس تماما هتحس ان ظهرك هيتعب من صلابة الخشب لان مفيش وسط مرن تسند عليه اللى هو التنجيد السىء ، ولو كانت الميزانية معاك مفتوحة اكثر ، فاختار اللى بتكون بسلك معدنى مربوط يدويا من الجزء السفلى ، فالأسلاك اللى على شكل S  تخلي الكنب أقوى وكمان أكتر مرونة وامتن بكثير من شريط الكتان اللى نعرفه.

جودة المخدة مهمة ، لازم تبقى محتفظة بشكلها حتى وأنت جالس عليها ، ومتكونش منحنية لأعلى ، ولو كنت بتدور على مخدات تعيش معاك اطول فترة ممكنة ، ممكن تنجدها باسفنج كثافة عالية مع اسفنج كثافته منخفضة.

خشب الركنة

طريقة صناعة هيكل الركنة هى اللى هتحدد قوة التحمل الخاصة بها ، وبما أنك مش هتشوف هيكلها الداخلى ، يفضل انك تسأل صنايعى محترف عن الخشب المستخدم لو كنت بتشتريها جاهزة.

لازم تتأكد أنها مصنوعة من خشب صلب زى الزان او الارو او الجوز ، ومدقوق بمسامير وغراء قوية مش مجرد تدبيس زى ما بنشوف دلوقتى وعشان تعرف ركنة غرفة المعيشة اللى جودتها عالية هتلاقى وزنها أثقل وده لانها مصنوعة من خشب صلب ، وهنا بقى نعطيك نصيحة من الخبراء انك حاول تختار خشب مجفف ومعالج فى الافران وخالى من العقد لضمان صلابته ، وهنا نصيحة تانية بخصوص التصنيع وحتى لو كنت بتشترى جاهز ، حاول تختار كنب أرجله جزء من الهيكل ، ومش مدقوقة أو ملزوقة فيه.

اختيار شكل الكنب

اختيار الركنة المناسبة يتم تحديدها على أساس احتياجاتك وعشان كده ظهر 3 أنواع رئيسية لاشكال الكنب :

الكنبة العادية

النوع ده من الكنب يستخدم لمزيد من الراحة لأنه يتميز بعمق اكبر من اى نوع اخر وعشان كده هنلاحظ وجود مخدات مرنة بكثرة فى الظهر ، وظهر لها أشكال مختلفة منها بمسند فى اليمين والشمال ومنها نوع يستخدم لقعدات رسمية وغير رسمية.

كنبة ظهر الجمل

تتميز بشكل ظهرها المنحني والغير تقليدى ومتانة الظهر نفسه ولكن يعيبها ان مساحة الجلسة فيها مش كبيرة وتستخدم فى القعدات الرسمية وبعض الاستخدامات المنزلية.

ركنة قطع

ودى تعتبر اشهر الانواع فى السوق ، من اهم مميزاتها تعدد القطع الموجودة وده اللى بيخلى لها استخدامات كثير ، احيانا تعملها كنبة يجلس عليها افراد الاسرة ، او تاخد قطعة منها وتسترخى عليها بطول جسمك ، او تاخد قطعة صغيرة تجلس عليها فى مكان تانى.

الوان ركنة غرفة المعيشة

الوان محايدة أم قوية

لو كنت بتفرش شقة جديدة ، يفضل أنك تشترى الكنب الأول ، وده عشان تدهن الحوائط  بألوان تليق عليه ، وكمان فى وجودها تقدر تظبط بقية الفرش ويكون شكل غرفة معيشتك شيك ، وممكن تنجد الكنب بقماش فاخر ، أو قماش مطبوع بألوان زاهية ، لأن ركنة غرفة المعيشة هى اهم عنصر فيها ، عشان كده شوف هتختار لها ألوان محايدة ولا قوية.

بعض مصممين الديكور الداخلى يفضلوا أن تتوافق ألوان الكنب مع ألوان الحوائط ، عشان تعطي الغرفة مساحة أكبر ، وتحقق تناغم فى المكان ، ولو اخترت النمط ده ممكن فى المستقبل تقابلك مشكلة تغيير لون الحوائط لو حبيت تغير ديكور المكان ، عشان كده الاختيار السائد هي الألوان المحايدة لأنها تتماشى مع عدد ألوان أكثر زى البيج ، والرمادى ، والرمادي الداكن ، واللون الكريمي.

كنب فاتح أم غامق

بعد ماتحدد اللون سواء كان محايد أم قوى تحدد درجة اللون فاتح أو غامق ، قبل ما تشترى الكنبة شوف هل هتليق بأرضية الغرفة ، ولا هيحصل تنافر مع الأرضية وخصوصا لو كانت من الباركيه الغامق أو السجاد ، وده لأن الكنب حجمه كبير وأقمشته المنجدة تمتص اللون ، و تغمق لك لون الغرفة كلها.

لو جبت ركنة غامقة على أرضية غامقة مش هتظهر تفاصيلها ، ولو مصمم على الألوان الغامقة ممكن تغير  فى تفاصيل الركنة ، بأنك تختارها بأرجل معدنية أو خشبية ألوانها فاتحة ، وبكده يكون عندك اختلاف يميز لك الركنة من الأرضية ، وممكن تضيف ترابيزة خشب تميز وجود الركنة بردو ، او سجادة فاتحة تحت اطراف الركنة هتبينها أصغر وتفصل ما بين الألوان الغامقة.

الركنة الفاتحة الوانها هادية لكن عيبها أنها تمتص الأوساخ بسرعة ، عشان كده لازم تفكر فى طريقة استخدام الغرفة خاصة مع وجود أطفال ، ولو كنت من هواة الالوان الفاتحة فى الركنة ، ممكن تختار لها غطاء قابل للغسيل.

لو كانت الغرفة بتستعمل طول اليوم ، يفضل أنك تختار قماش مشجر ، وده عشان يخفى البقع الصغيرة أو الأوساخ البسيطة.

إضافة اللمسات النهائية

لا يشترط انك تشترى كراسى متطابقة مع ركنة غرفة المعيشة ، يعنى مش ضرورى أن الكراسي تماثل الكنبة تماما ، لكن ممكن يتشابهوا في الملمس ولون الرسومات ، فاختيار كراسى غير متطابقة مع الركنة ، يعطيك الفرصة  لاضافة مزيد من الفرش المتنوع وده الاتجاه الحديث فى الديكور.

أما لو كنت بتجدد فرش الغرفة ، من الضرورى انك تراعى الوانها وباقى الفرش الموجود فيها ، قبل ماتختار لون الكنب وقماشه ، فالألوان المحايدة تناسب كل الغرف ، وعشان تكسر حدة اللون المحايد سواء فى الركنة نفسها او حتى فى الحوائط ، ممكن تضيف تكاوى ومخدات بألوان مشبعة على الركنة والارض.

لأن غرفة النوم هى أهم غرفة فى بيتك بتستريح فيها من تعب اليوم ، عشان كده لازم تهتم بعمل اضاءة غرفة النوم بشكل مثالى ، عشان تكون الغرفة مريحة لك وقت الليل ، وتستيقظ فى الصباح نشيط وتستمتع ببقية اليوم ، وعشان كده عملنا لك دليل كامل لاضاءة غرفة نومك ، بداية من الاضاءة الأساسية ، والجانبية زى الأباجورات ، والاضاءة الوظيفية.

انواع اضاءة غرفة النوم

الإضاءة الأساسية

معرفة انواع الاضاءة هو المفتاح لتصميم أفضل إنارة لغرفتك ، لان من خلاله تقدر تعمل توازن بين الاضاءة الاساسية والفرعية والوظيفية ، وبالتالى تعمل انوار تلائم اى نشاط ، من خلال توزيعهم على مجموعات.

عشان تكون غرفتك مضيئة بطريقة سليمة ، حدد أنواع الاضاءة عن طريق كل نشاطاتك فيها ، ولو معندكش خبرة وانت بتصمم الاضاءات الخاصة بك ، ابدأ بالاضاءة الاساسية.

فالاضاءة الأساسية اللائقة تشمل اضاءة طبيعية من الشبابيك الكبيرة ، وكمان الاضاءة الصناعية ، اللى هتوفر لك ضوء مناسب تمارس فيه أنشطتك اليومية من تنظيف و ترتيب ملابس ، وتساعدك فى ترتيب فرش السرير.

عندك مثلا كشافات السقف هى الأفضل فى أنواع الاضاءة الاساسية الصناعية زى الكشافات LED ، والنجف ، والوحدات المتدلية ، وكشاف لمبادير ، وكل من النوعين هيوفر لك اضاءة مناسبة لنشاطك اللى مش محتاج ضوء ساطع أو مركز.

الإضاءة الوظيفية

فى حالة أنك هتقوم بنشاط محتاج ضوء مركز أكتر ، زى القراءة او تخليص شغل مهم او عمل المكياج ، يبقى لازم تدرج الاضاءة الوظيفية فى نظام اضاءة غرفة النوم عندك ، خلى بالك ان الاضاءة الوظيفية مش على المكتب بس ، لا بتكون موجودة فى  شكل أباجورات على الكومود ، والوحدات المتدلية على جوانب السرير ، وممكن لمبادير فى اى جانب من الجوانب.

وعشان تعطى منظر جميل يبقى يفضل انك تختار الوحدات دى بتصميم يتماشى مع ستايل ديكور بيتك.

إضاءة التمييز

مهمة اضاءة التمييز هى تركيز الضوء على الاكسسوارات وخاصة اللوحات الفنية ، الموضوعة فى مكان معين ، ولو عايز أجواء مريحة فى غرفتك ، يبقى اضاءة التمييز لوحدها تعطيك الاحساس ده ، لانها نسخة خافتة من اضاءة غرفة النوم الرئيسية.

استخدام الابليك فى الحوائط او على جوانب السرير ، واضاءة الشموع ، وشرائط LED هى طرق لدمج اضاءات خافتة لاضفاء هدوء لغرفة نومك.

اختيار اضاءة غرفة النوم

شدة اضاءة اللمبات

اهم شىء أنك تختار لمبة من نوع كويس ، وده فى كل انواع الاضاءة ، جودة اللمبة هتأثر عليك سلبا أو ايجابا أثناء نشاطك وبعده ، وده وفقا لشدة اضاءتها ودى تقاس بالليومن و ولون الضوء الخارج منها ، لكن قبل ما تستخدم أى لمبة قديمة موجودة عندك او حتى تشترى جديد ، نحب ننصحك ان شدة الاضاءة المقترحة فى غرفة النوم ما بين 2000 إلى 4000 ليومن ، وده ممكن يغير قرارك وانت بتشترى.

وبعد اختيار السطوع الاقصى للمبة ، تاكد ان نوع اللمبة اللى  انت عاوزها قابلة للتحكم بمفتاح ديمر لانك هتلاقى اللمبات الفلورسنت مثلا غير قابلة للتحكم ، وبعض انواع اللمبات LED ، وفى الحالة دى هتحتاج مفتاح ديمر من نوع خاص.

لون اضاءة غرفة النوم

لون الضوء له تأثير كبير على نشاطاتك فى الغرفة ، عشان كده شوف نوع اللمبات الأول ، يعنى فيه لمبات اضاءتها قوية تعطى ضوء أبيض ناعم ، ولمبات الفلورسنت بيميل ضوئها إلى اللون  الأزرق ، برغم أنها تطورت عشان يكون منها أضواء بألوان كتير ، ولمبات LED البيضاء الوانها ما بين الأبيض والبيج.

فى اضاءة غرفة النوم الأبيض والأزرق من الالوان اللى بتشجع على اليقظة ، لذلك تستخدم الالوان دى فى الانشطة اللى تحتاج لقوة تركيز عالية ، وده بسبب ان الالوان دى تقلل إفراز هرمون الميلاتونين وده المسئول عن الاسترخاء والهدوء ، لذلك لا ينصح بإضاءة الالوان دى وقت النوم.

فى حين ان اضاءة الألوان الدافئة زى الأصفر لاتتدخل فى إفراز الميلاتونين اللى بيساعدك على النوم ، عشان كده الاضاءات الدافئة تستخدم فى حالة مشاهدة التلفزيون ، أو القراءة او الاسترخاء.

مراعاة الفرش فى اضاءة غرفة النوم

قبل ما تختار اضاءة غرفة النوم الخاصة بك ، لازم تشوف الفرش الأول وتعرف مقاساته بالنسبة للمكان ، يعنى مثلا لو فيه لوحة فنية على الحيطة ، ركب كشاف فى السقف واترك مسافة 60 سم من الحيطة لو كان طول السقف الاعتيادى 250 سم ، ولو كان أطول من كده ابعد الكشاف اكتر.

وده لان الضوء لازم يكون فى مستوى النظر ، عشان كده بتختلف المسافة من السقف العادى للسقف المرتفع ، ولو استخدمت وحدات متدلية حاول تخليها فى منتصف الغرفة ، وعادة بتكون فوق السرير ، وهنا فى نقطة مهمة ، أنك متعلقش اللمبات منخفضة أوى ، لكن خلي المسافة بينها وبين السقف من 20 – 30 سم .

وهنا ينصحك الخبراء بتركيب وحدات اضاءة بحجم كبير ، لان الحجم الكبير بيعطى شكل افضل فى الاستايل المودرن بدل الوحدات الصغيرة اللى تبدو شبه اللعب.

خامات مصابيح غرفة النوم

من المهم انك تختار وحدات الاضاءة من خامات طبيعية لها ملمس وشكل ، زى الخشب والرخام والاحجار الطبيعية وحاليا بدأ يظهر استخدام الكتان والاقمشة القوية ، ولو كنت من هواة المعادن عشان التصميم المودرن ممكن تختار الاستانلس او الزجاج او المعادن المطلية طلاء جيد ، والا يحصل لها تآكل ويبقى شكلها سىء جدا.

مفتاح ديمر Dimmer

مفتاح ديمر مهم جدا فى اضاءة غرفة النوم ، وده وظيفته انه يخفض شدة الاضاءة على حسب رغبتك ، لو عندك مصدر ضوء ساطع وعايزه يكون خافت ، ممكن تستعين بمفتاح ديمر عشان تخفض شدة الاضاءة ، وده تقدر تستخدمه لو عندك أباجورة أو لمبادير جانبى ، عشان تسترخى وقت النوم ، ولما تستيقظ متلاقيش ضوء ساطع يضايقك.

لكن طبعا فيه ملحوظة مهمة جدا وهى انك لازم تتأكد ان اللمبات الموجودة من النوع القابل لخفض شدة اضاءته Dimmable لان مش كل الانواع متاح فيها الخاصية دى.

نصائح عامة فى اختيار اضاءة غرفة النوم

تنوع مصادر الاضاءة

• مهم جدا أن يكون فيه توازن بين أنواع الاضاءة المختلفة فى غرفة النوم ، ممكن تضيف أباجورة صغيرة على الكومود ، وممكن تستخدم اضاءة للزينة على دولاب تخزين الملابس.
• حاول تعمل تنوع فى الاضاءة وتستخدم الاضاءة الغير مباشرة زى مثلا ابليك على الحوائط ينعكس ضوءه من الحيطة للمنطقة المحيطة به او اضاءة مخفية فى السقف المعروفة باسم بيت النور ودى لها رونق خاص ، وممكن اضاءة من ابليك مركز على لوحة فنية.
• ولان الهدف مش بس التركيز على السرير ولكن اضاءة كذا منطقة فى الغرفة باشكال متعددة على حسب اهمية وشكل كل منطقة ، مش مجرد توزيع متساوى للاضاءة فى الغرفة ، لكن وظيفة الاضاءة هنا انها تنقل عينك من نقطة لنقطة تانية.
• لعمل اضاءة مميزة ومتكاملة فى غرفتك ، هات لمبادير جمب كرسى الشيزلونج فى زواية الغرفة ، وكمان تعلق وحدات متدلية بمسافة من 45 – 60 سم من السقف كقطعة اضاءة تجميلية ، وكملها بزوج من الاباجورات على كل كومود.

غرفة النوم مشتركة

• مهم جدا وأنت بتختار الاضاءات لغرفتك ، أنك تتأكد من مرونتها ، وكمان تقدر تتحكم بمستويات نورها ، بحيث لو الغرفة مشتركة وفيه انسان هينام والتانى هيكمل شغله ، يبقى مفيش حد منهم يكون منزعج من خفض أو سطوع الاضاءة ، وده بدل ما تختار مصباح علوى كبير ، بردو تقدر تستخدم اضاءة مختلفة لكل منطقة  ، يعنى فى المكتب هتستخدم اباجورة مكتبية ، عشان تلبى احتياجه.
• فى تصميم اضاءة غرفة النوم فيه خطأ شائع ناس كتير بتقع فيه وهو تعدد مصادر الاضاءة فى الغرفة بشكل مبالغ فيه ، وده طبعا يعطى فوضى وشكل غير مبهج للغرفة ، هتحس ان الوان الغرفة باهتة من كتر الاضاءة ، ده غير انه هيشتت انتباه الجالس فيها لو فتح كذا مصباح فى وقت واحد.

تخيل لو بعد ما خلصت تشطيب شقتك عملتها بإضاءة سيئة مش هنقول بدون اضاءة لان ده مستحيل طبعا ، هيبقى شكلها عامل ازاى وقتها ، هتلاقى نفسك تعبان مش مستريح وكل شوية تتنقل من غرفة للتانية ، وده للاسف اللى بيحصل فى بيوت كتير ، عشان كده احنا جمعنا لك كل انواع الاضاءة وأشكالها وازاى تقدر تستخدمها بشكل جيد ، وتخلى ديكور بيتك روعة.

ممكن تكون عامل اثاث فى منتهى الجمال والفخامة والوان الدهان اكثر من رائعة وورق حائط جميل واكسسوارات محصلتش ، وتلاقى الاضاءة ضعيفة تدمر لك كل اللى انت عملته.

اول نقطة بتفكر فيها هى ازاى اختار نجفة شكلها يتماشى مع الديكور الموجود ، ياترى اجيبها كلاسيك بلون ذهبي او برونزى عشان تمشى مع الصالون ، ولا نجيبها بقطع كريستال كتير عشان تعمل ابهار ، ولا نجيبها بأجزاء استانلس عشان تمشى مع المكان المودرن.

للاسف مش ده اللى المفروض تبحث عنه في المقام الاول ، لازم يكون عندك خطة وتصميم لشكل الاضاءة اللى هتلبى احتياجاتك.

عشان تعمل اضاءة بيتك بشكل صحيح لازم تضيف انواع الاضاءة الثلاثة وهما عبارة عن 3 انواع ( الاضاءة الاساسية – اضاءة الوظيفة المحددة – اضاءة التمييز )

انواع الاضاءة الأساسية

احيانا تسمى الاضاءة العامة ، ودى النوع الاساسى اللى لا يمكن الاستغناء عنه نهائى ، وبتكون نوع من اتنين اما الاضاءة الطبيعية او الاضاءة الصناعية اللى بتحل محلها وقت الليل ، وهنا هنتكلم عن الاضاءة الصناعية.

الوحدات اللى بتوفر النوع ده من الاضاءة كثير منها :

النجفة او الثريا

الوحدة دى عامة الناس بتشتريها بغرض تجميل المكان اكثر منها للاضاءة ، ولكن الغرض الرئيسى هو الاضاءة مش التجميل يعنى مش لازم تجيب نجفة بمجموعة كريستالات كتير الا لو كان ده ذوقك الشخصى.

لازم تشوف اذرع النجفة اللى هتشتريها هل تكفى اضاءة المكان او لا ، وكمان تشوف عدد اللمبات الموجودة فيها ، من مميزات النجف التحكم فى الارتفاع عشان ميحصلش اى اصطدام سواء مع الاشخاص او الاشياء الموجودة تحتها.

لكن عيبها الوحيد انها غالية وده طبعا لان داخل فى تصنيعها كذا خامة بداية من المعدن المستخدم وطريقة طلاؤه والحفر الموجود وخاصة لو كانت هاند ميد او صنع يدوى ده غير الكريستال ، وعدد اللمبات ، كل دى تكاليف كتير وده اللى بيخلينا نركبها فى غرفة واحدة فى المنزل وغالبا بتكون الريسبشن او المعيشة.

اضاءة مروحة السقف

وده من انواع الاضاءة المنتشرة فى اغلب انواع مراوح السقف ، بحيث وانت جالس مع اسرتك تحت المروحة تكون الاضاءة شغالة بدل ما تستهلك اضاءة الغرفة بالكامل.

اضاءة المسطرة المتحركة Track Light

ظهر النوع ده من الاضاءة فى فترة السبعينات كشكل جديد لبعض الأغراض ، من مميزات النوع ده انه ترك مساحة فاضية على الارض لوضع وحدات اضاءة ارضية وكمان قلل من وجود الطاولات اللى كانت مخصصة للاباجورات ، وكمان فيه ميزة اساسية وهى التحكم فى اتجاهه.

التراك لايت من انواع الاضاءة اللى ممكن تركبها فى اى مكان فى بيتك ( المطبخ – المعيشة – غرفة الاولاد – الممرات وغيرها ) وطبعا ممكن تتحكم فى اتجاهها على لوحة فنية على الحيطة مثلا او على ديكور لحيطة عايز تظهره وواحد يكون على الارض.

كشافات السقف ( اشهر انواع الاضاءة )

ودى انتشرت فى فترة السبعينات وتقريبا دخلت كل البيوت وخاصة اللى كانت بتتبنى فى الفترة دى ، تسمى فى لغة السوق كشافات دفن ، لان الجزء الغاطس منها بيتم دفنه اما فى السقف المعلق او فى السقف الخرسانة نفسه.

يتكون الكشاف من الجزء المعدنى (العلبة) واللمبة نفسها ، وبيتم دفن الجزئين مع بعض داخل السقف ، وده من اشيك انواع الاضاءة اللى ممكن تركبها عندك وهو ده سبب انتشاره لحد الان ان مفيش اجزاء بارزة منه تحت السقف.

الاضاءة الارضية Torchiere

تعتبر واحدة من انواع الاضاءة المنتشرة جدا ، ترجع تسميتها بالاسم ده نسبة لكلمة Torch الفرنسية ولان طريقتها فى الاضاءة تشبه اضاءة كشاف Torch من حيث خروج الضوء من الشكل المخروطى العلوى لها.

ميزة النوع ده انه مش بيحتاج مساحة كبيرة على الأرض ويعطي اضاءة كبيرة جدا للسقف تنعكس على الغرفة كلها ، وطبعا يتوفر منه كل الاستايلات اللى تناسب اى ديكور سواء كلاسيك او مودرن او غيره.

اضاءة الحوائط الابليك ( اقدم انواع الاضاءة )

ده يعتبر اقدم نوع موجود ، وهو من الانواع اللى بيتم تركيبها على الحوائط وممكن تتحكم فيها بمفتاح مدمج بدل ما تتحكم فيها بمفتاح على الحيطة نفسها.

من مميزات النوع ده ان له استخدامات كتيرة وده طبعا على حسب نوع الغرفة او المكان الموجود فيه وكمان شدة اضاءته ، ده غير انه يختلف عن باقى الانواع زى اضاءة السقف او الاباجورات لانه مش بيشغل اى مساحة من السقف او الارضية او حتى الطاولات.

استخدامات الابليك كتير جدا ، ممكن مثلا تستخدمه فى الممرات لعمل اضاءة رائعة على اللوحات ، وممكن تستغلها فى ركن للقراءة فى غرفة المعيشة ، وممكن يستخدم كاضاءة جانبية لغرفة النوم وده يفيد جدا انك تترك الكومود فاضى لاى اغراض تانية او اذا كانت غرفة نومك ضيقة ومش مستوعبة وجود كومود بجانب السرير فيها.

بالاضافة كمان انك ممكن تستخدمه فى المدخل بحيث يعطى اضاءة على طاولة المفاتيح ، او على حوائط المدخل نفسها او اللوحات الفنية الموجودة فيها.

كتير من الناس فاهمة وظيفة الاضاءة الاساسية ، ولكن بتقف عند النوع ده ومتفكرش فى اى نوع غيره ، فى حين انه الاساس فقط ومن الضرورى انك تضيف باقى انواع الاضاءة عشان يكتمل ديكور بيتك.

انواع الاضاءة الوظيفية

من اسمها نقدر نفهم انها صممت لأداء وظائف معينة زى القراءة على مكتب او المذاكرة او تجهيز الطعام فى المطبخ او تناوله على السفرة او عمل المكياج على التسريحة ، كل دى من ضمن الوظائف اللى ممكن تؤديها بالنوع ده من الاضاءة.

لو بصينا على الوحدات اللى ممكن تستخدم لعمل الاضاءة الوظيفية هنلاقى كتير جدا منها :

الاباجورات العادية

ودى من ضمن انواع الاضاءة اللى ممكن تخدم وظيفة معينة زى القراءة مثلا ، ومش بس تعطى اضاءة لا كمان بتعمل شكل جمالى وتظهر ديكور المكان لما تخرج اضائتها من منطقة معينة فى الغرفة.

برغم ان الاباجورات من انواع الاضاءة القديمة ، الا انها يتوفر منها اشكال كتير جدا فى الاسواق منها المودرن والكلاسيك وغيرها اللى تتماشى مع اى ديكور ، ومن مميزاتها انك ممكن تخليها فى غرفة النوم على الكومود او على طاولات جانبية للكنبة فى غرفة المعيشة.

الاباجورات المكتبية

اغلب بيوتنا اللى فيها مكتب للمذاكرة او حتى لتخليص ورق الشغل او الجلوس على الكمبيوتر بيكون فيها مصادر اضاءة من السقف واحيانا ابليك على الحيطة ، ولكن من الخطأ انك تظن ان المصادر دى كفاية ، لان انواع الاضاءة دى مش مخصصة لأداء مهام القراءة والكتابة.

من الضروري انك تجيب اباجورة مكتب لأداء النوع ده من الوظائف لانها تحتاج اضاءة مركزة مش اضاءة الغرفة بشكل عام.

اضاءة علب المطبخ ( من انواع الاضاءة المبتكرة )

تخيل معايا ان مطبخك اضاءته فى السقف كافية جدا لكن لما تيجى تشوف الكاونتر الرخام تلاقى الاضاءة فيه مش كفاية وخاصة اثناء تجهيز الطعام بتكون ست البيت محتاجة اضاءة اكتر ، عشان كده ظهرت اضاءة علب المطبخ كنوع جديد من انواع الاضاءة اللى تساعد على رؤية اوضح.

من مميزات النوع ده انه سهل جدا فى التركيب وله اشكال والوان متعددة ، فيه منه اللمبات الفلورسنت وفيه منه شريط LED وفيه كمان كشافات تشبه كشافات السقف ، وبيتم تركيب اى نوع من دول اما على مصدر الكهرباء الرئيسي أو على بطاريات.

وحدات الاضاءة المتدلية

وتسمى احيانا فى السوق المعلقات ، ودى من انواع الإضاءة المبتكرة حديثا ، وظهرت فى اواخر التسعينات كتطوير لاضاءة السقف العادية ، وبيتم تركيبها من السقف بقضيب معدنى او سلسلة او احيانا 3 سلاسل لو كانت بـ 3 لمبات.

متوفر منها اشكال كتير جدا ، احيانا تلاقى لمبة واحدة واحيانا تلاقى اتنين واحيانا اكتر من كده وتصاميم بكميات ماهولة تناسب كل الاذواق ، واللى بيميز النوع ده من الاضاءة انها ممكن تتركب فى المطبخ او الممرات او فوق طاولة السفرة واحيانا فوق المكتب ، لانها من انواع الاضاءة الوظيفية يعنى المركزة بهدف معين.

اضاءة الزينة

ودى تشبه الى حد كبير الابليك ولكنه مخصص لاضاءة مرايا الحمام او التسريحة فى غرفة النوم ، وبما ان المرايا وكاونتر الحمام هما اهم نقطتين فكان لازم يبقى فيه اضاءة تركز على المنطقة دى وتظهرها.

متوفر منها فى الاسواق اشكال ومقاسات والوان كتير جدا بحيث تتناسب مع جميع اشكال الحمامات ، وهنلاحظ فى الفترة الاخيرة ظهرت بعض المرايات المدمج فيها لمبات كتير زى الموجودة فى كواليس السينما ، النوع ده من الاضاءة هو تحديث للشكل ده.

الاضاءة الارضية Lampadaire

طبعا دى من انواع الاضاءة المنتشرة جدا فى بيوت كتير ولو لاحظنا هنلاقيها تشبه الى حد كبير اضاءة Torchiere ولكن بتغيير فى الاتجاه بدل ما كانت لفوق وتنعكس من السقف لكل انحاء الغرفة دى بتكون مركزة فى اتجاه معين.

وزيها زى الاباجورات الجانبية ممكن تخليها على اى جانب من جوانب الكنبة فى غرفة المعيشة لو كنت مثلا من هواة القراءة أو الجلوس أمام الكمبيوتر الخاص بك.

اضاءة التمييز

بعض الناس تظن ان النوع ده من الاضاءة متخصص لاضفاء جو معين زى الجو الرومانسى او التحفيزى لنشاطات معينة ، لكنه فى الحقيقة أكثر من كده.

السر وراء النوع ده من الاضاءة هو اظهار بعض التفاصيل المعمارية والعناصر المهمة فى المكان ، وعشان كده سميت اضاءة التمييز لأن وظيفتها تجذب انتباهك من النقط العادية الى النقطة المهمة.

وبرغم ان دى من اهم انواع الاضاءة فى اخفاء الاخطاء والثغرات الموجودة فى الديكور ، الا انها مهملة بشكل كبير جدا فى الثلاث انواع المذكورين ، ويتوفر منها انواع كتير جدا هنذكر منها بعضها :

الاضاءة الارضية السفلية Uplight

اول حاجة كانت تخطر على بالنا لما نحب نظهر اى جزء مهم سواء كان لوحة فنية او حيطة فيها تصميم جديد ، كنا نركب عليها ابليك ، ولكن ظهرت فكرة جديدة ان الاضاءة تكون طالعة من الارضية نفسها مش من الحوائط ولا السقف ودى تعتبر فكرة مبتكرة جدا وزاوية محدش فكر فيها قبل كده.

وعشان كده هنلاحظ فى واجهات مبانى كتير المهندس المعماري او المصمم بيخلى بعض أجزاء الواجهة مضيئة من تحت مش من فوق بشكل تقليدى ، لذلك هنلاقى شكل الواجهة اصبح مختلف تماما بتغيير اتجاه الاضاءة.

اضاءة الشموع

ودى طبعا اكتر نوع مشهور جدا فى خلق اجواء رومانسية وهادية فى بعض المطاعم او الكافيهات او على طاولات السفرة فى بيوتنا.

الاضاءة الموجهة

ودى فيه منها اشكال كتير زى بعض الاسبوتات الموجهة لنقطة معينة ، وهنلاحظ واحنا بنشترى النوع ده ان فيه محور داخلى واللمبة بتلف مع اتجاه المحور ده ، وفيه كمان إضاءة مساطر Track Light موجهة لزوايا معينة ، ودى بردو تستخدم لنفس الغرض ، يعنى ممكن مثلا توجهها لحيطة معينة عندك او لوحة شكلها جميل او لمكتبة الشاشة.

اضاءة البانوهات

طبعا كلنا شفنا النوع ده من الاضاءة فى البانوهات للمدخل او الغرف ، وده بهدف اظهار المحتوى الموجود داخل المربع او الدائرة للبانوه سواء كان دهان جديد او لوحة مرسومة او ملمس مختلف بارز للحيطة.

تعتبر اضاءة البانوهات من انواع الاضاءة المميزة جدا واللى انتشرت بشكل واسع فى كل ستايلات الديكور.

من انواع الاضاءة ( المخفية )

وده من انواع الاضاءة اللى تم استحداثها فى الفترة الاخيرة واستخدمت فى اماكن كتير جدا منها المطابخ ، وهنلاحظ وجودها فى كاونتر المطبخ سواء كان رخام او خشب فى الاطار الخارجى له وفى علب التخزين من الداخل ، لذلك هنلاحظ انتشارها عند محلات بيع اكسسوارات المطبخ لأنها تخدم الغرض ده.

من ضمن استخدامات النوع ده طبعا بيت النور فى السقف لعمل جو هادى بدل استخدام الإضاءة الأساسية والمباشرة ،  فلو كنت بتدور على شكل جمالى يبقى النوع ده من الاضاءة يناسبك جدا وخاصة مع توفر الوان كتير جدا منه.

دى باختصار انواع الاضاءة الموجودة ، وهنا ممكن نقولك ملاحظة ، ممكن نوع واحد منهم يؤدى كذا وظيفة ، يعنى مثلا كشافات إضاءة السقف واضاءة المسطرة Track ممكن يؤدوا وظيفة الثلاث انواع وده على حسب ما انت توجههم.

لما تيجى تضيف اضاءة التمييز لازم تسأل نفسك سؤال ، انت محتاج الجو العام لكل غرفة يكون ازاى ؟ وايه العناصر اللى تحب انك تظهرها وايه العناصر اللى تحب انك تخفيها.

وخلى دايما فى اعتبارك القطع المهمة زى لوحة فنية او كرسى شكله جميل أو حيطة فيها تجليد شكله جديد وعايز تظهره او ستارة مبتكرة او بلاطات 3D ، كل دى عوامل تخليك تختار افضل اضاءة عشان تبين ديكور بيتك.

لو كانت مساحة بيتك واسعة وتسمح بوجود غرفة الملابس (دريسنج رووم) ، فى الوقت ده يفضل انك متعملش دولاب فى اثاث غرفة النوم وتستبدله بالغرفة دى ، لأنك وقتها مش هتكون محتاج الدولاب نفسه ، ومش هيبقى فيه داعى انك تترك ملابسك متعلقة بطريقة عشوائية فى الدولاب او حتى على عليقات فى ظهر الباب او شماعة على الارض.

ده بالاضافة انك مش هتحتاج تخزن الأحذية فى مكان تانى زى بعض علب التخزين ، وعشان تجمع كل متعلقاتك الشخصية فى مكان واحد ، لازم تكون عندك غرفة ملابس بمساحة وتصميم أنيق ، يخلى شكل غرفة نومك أكثر أناقة ومتبقاش مكان للتخزين يفقدها شكلها المرتب  ، إلى جانب أنها بتعطيك مكان واسع يسمح لك بارتداء الملابس براحتك.

اهمية غرفة الملابس

تختلف مساحة غرفة الملابس على حسب مساحة البيت ، منها الغرف الصغيرة ومنها الكبيرة ، و ترجع أهميتها لأنها بتعطيك مساحات تخزين لكل ملابسك واكسسواراتك زى الساعة وغيرها واحذيتك وكمان مرايا عشان اناقة اللبس ، بالاضافة انه ممكن تخزن فيها الشنط الحريمى لزوجتك وكل متعلقاتها الشخصية ، وتتجنب كل الزحمة اللى ممكن تعملها فى غرفة النوم نفسها فتظهر غرفتك مترتبة وشكلها شيك.

فرش غرفة الملابس

نيجى بقى لفرش غرفة الملابس (دريسنج رووم) ودى تعتبر اهم نقطة فى الموضوع ازاى نفرش الغرفة عشان تناسب احتياجاتنا بدون زحمة او تكدس وهنا فيه اختيارات كثير ولكن اشهرهم اما الفرش الجاهز او التفصيل تعالوا نوضح الكلام ده.

الفرش الجاهز هو عبارة عن وحدات ادراج ورفوف بتباع جاهزة فى الاسواق ممكن تشتريها وتجمعها بنفسك او بمساعدة نجار ، لكن الفرش التفصيل ده بالظبط يشبه عمل دولاب عن طريق نجار ولكن بيكون اكبر من الدولاب بكثير لانه هيغطى لك مساحة الغرفة كلها بالشكل اللى يناسب احتياجاتك.

كل نوع منهم له مميزاته وعيوبه ، يعنى مثلا النوع التفصيل اغلى من الجاهز لكنه بيعطى فخامة كبيرة فى غرفتك ، فى حين ان الرفوف الجاهزة سعرها اقل وتقدر تتحكم فى ترتيبها بالشكل اللى يناسبك وتترك مساحة فاضية فى الارض او من فوق لو كنت محتاجها لغرض تانى.

طب دلوقتى فيه سؤال مهم ، ياترى ايه انسب نوع منهم ؟ نقولك حاول تعمل مزيج بين الاتنين ، ولكن خلى بالك طبعا ان الاجزاء المتحركة زى الدلف والادراج اغلى من الرفوف وشماعات التعليق بحكم وجود ميكانيزم الحركة او المفصلات ، فلو كانت الميزانية محدودة ممكن تستخدم الرفوف بدل الادراج.

يفضل أن يصل ارتفاع خزنة الملابس للسقف ، وده عشان تقدر تخزن مستلزماتك من ملابس وغيرها بداية من أعلى الخزنة ، وبالتالى شكلها يكون مرتب ومش متكدسة وكل حاجة فوق بعضها ، وبردو تقدر تضيف قضبان حديد يمكن سحبها وتظبط بيهم الارتفاع ، اذا كنت بتبخدم الرفوف الجاهزة المتحركة.

ازاى تعمل غرفة ملابس (دريسنج رووم) مثالية

موقع الغرفة

الموقع المناسب أنها تكون بجوار غرفة النوم  أو الحمام الخاص ، لانه مش من المنطقى انها تكون بعيد عن غرفة نومك عشان مش معقول هتخرج من غرفتك عشان تلبس فى مكان تانى ، وكمان يفضل انك تجهز المسألة دى فى التخطيط المعمارى لبيتك بحيث يكون بينها وبين غرفة نومك باب مشترك  ولو مكانتش موجودة ممكن تاخد جزء من مساحة غرفتك وتعملها وده طبعا لو المساحة تسمح بكده.

مساحة غرفة الملابس

ركز على احتياجاتك ، وحدد بدقة المحتويات اللى ناوى تخزنها فى الغرفة ، وشوف أنت هتحتاج المزيد من الخزائن ولا الرفوف ، وكمان حدد إن كنت هتدمج كل متعلقاتك مع الملابس أو لا ، وبردو اعمل مراجعة لمكان التخزين الحالى ، عشان على أساسه تخطط لانشاء غرفة الملابس (دريسنج رووم) بحيث تلبى كل طلباتك وميكونش فيها حاجة ناقصة.

لو أنت هتعمل الغرفة فى بيت جديد ، فتقدر تختار حجم الغرفة فى التصميم المعمارى قبل الانشاء ، ولو مش قادر تعرف مساحتها ممكن تكون كام خليها حوالي 4 متر مربع ، ودى تعتبر المساحة القياسية لها (استاندرد) ، عشان تخزن فيها الملابس وبقية الأغراض اللى مش بتستخدمها إلا فى أوقات معينة وتتحرك فيها بسهولة.

ستايل الغرفة

ركز على اختيار الاستايل اللى يتوافق معك ، يعنى أنت عايز الغرفة يكون شكلها ايه ، وعايز مساحة تبينها فاخرة ، وهل عايز ستايلها مودرن ولا كلاسيك ، يعنى خليها على حسب ذوقك الشخصى ، عشان تعطيك الراحة و تنسجم فيها.

ألوان غرفة الملابس

اختيار ألوان غرفة الملابس بيكون على حسب الشخص اللى هيستخدمها ، فلو كانت غرفة رجالية فيفضل أنك تختار ألوان غامقة لإعطاء الغرفة منظر دافىء وذوقه عالى.

أما فى غرفة ملابس السيدات فيفضل اختيار الألوان الفاتحة ، اللى بتعطى أناقة للمكان ولانها الألوان اللى بتفضلها المرأة.

الاضاءة

الاضاءة اللى هتختارها فى غرفه الملابس (دريسنج رووم) لازم تكون اضاءة قوية وكافية ، لانك هتشوف فيها تفاصيل كتير فى ملابسك ، بس خلى بالك عشان ميحصلش انعكاس كبير للضوء الزيادة على المرايات ، وكمان وضع اضاءات معلقة زى النجف ، بيعطى المكان شكل مميز ، وضرورى تركب لمبات أو أى مصدر ضوء حول مرآة المكياج عشان تعطى ضوء كويس.

اشكال الابواب المناسبة

ممكن متعملش غرفة ملابس بأبواب توفيرا للمساحة ، ولو كنت مضطر تعمل ابواب يبقى ممكن تلجأ لأبواب الاكورديون لأنها مش بتستغل مساحة لفتحها ، لكن بالنسبة لأبواب خزنتها فيه عندك خيارات زى الأبواب المفصلية او الجرار (السحاب) .

وبالنسبة للأبواب المفصلية فيفضل أنك تسيب بينها وبين الرفوف مساحة متقلش عن 90 سم ، ولو اخترت باب منزلق فاختار له جرار جودته عالية لان استخدامه هيكون متكرر.

أفكار حول غرفة عملية

عشان يكون عندك غرفة ملابس عملية (دريسنج رووم) صح ، يعنى تخدم كل اغراضك ، يبقى لازم تفكر فى الجوانب اللى تخلى الغرفة عملية أكتر ، وكمان استغل الفراغ بطريقة صحيحة ، يعنى هل هتكون غرفك ملابسك لوحدك ، ولا هتشاركها مع حد من أفراد أسرتك زى الزوجة مثلا ، وهتخصص فيها جزء للمكياج ولا لا.

كمان لو كان اللى فى الغرفة اتنين اخوات لازم تتأكد ان مساحة تخزين الملابس كافية ، وفى وقت ارتداء الملابس شوف المساحة إن كانت ضيقة ولا لا ، بردو من ضمن الاعتبارات ملابسك اللى بتستخدمها هل هى كثيرة ، وهل أنت عندك مجموعة متنوعة وكبيرة من الأحذية ، أو مجموعة ضخمة من حقائب اليد.

اكسسوارات الغرفة

ضيف قطع الاكسسوارات اللى بتكمل ديكور الغرفة ، و اختارها بحيث تكون عملية ، وتتماشى مع بعضها ، وفى نفس الوقت تسمح لك بمساحة تخزينية ، والاكسسوارات تشمل عناصر كتير زى :

المرايات

عشان تقدر تستفيد من وجود المرايات فى المكان ، يبقى أساسى أنها تكون طويلة ، لأن أنت أو من يشاركك فى الغرفة ، بتستخدموها يوميا سواء لارتداء الملابس أو عمل المكياج ، ده غير أنها بتعطى حيوية كبيرة للمكان ، كمان ممكن تضيف مرايا كبيرة تخلى لك غرفة الملابس ساطعة أكتر.

البرافان فى غرفة الملابس

فى حالة أنك مشارك أحد فى الغرفة ، حط برافان عشان خصوصيتك وعشان تقدر تستغل مساحتها احسن ، واللى ميعرفش البرافان ده اللى كنا بنشوفه فى الافلام المصرية زمان كانوا بيغيروا وراه هدومهم عبارة عن حاجز بمفصلات واقف على الارض.

علب تخزين إضافية

ضيف مزيد من الأدراج المتقسمة بحيث تخزن فيها أشياء كتير ، وبردو حط شماعات لربطات العنق (الكرفتات) ، وشماعات أخرى  للبناطيل ، كمان لازم تحط كذا شماعة عشان تكفى الأحزمة ، ولو مش قادر تظبط تقسيمة الملابس صح ، خد استشارة منسق فرش وده هيفيدك فى تصميم خزانة ملابس أنيقة.

مقابض خزانة الملابس

مقابض أدراج او ضلف الخزانة هى اللى هتكمل الدهان اللى انت اخترته لها ، أو حتى لون الخشب الطبيعى ، وكمان عشان تمنع بصمات أصابعك أنها تترك علامات تشوه شكلها وتغير لون الدهان مع الوقت.

اكسسوارات اخرى

من الافكار الجميلة فى تصميم غرفة الملابس (دريسنج رووم) ، وضع خزائن شكلها مناسب فى منتصف الغرفة ، عشان تستوعب تخزين مستلزمات ضرورية زى أدوات المكياج ، ومنظفات العناية الشخصية ، وكمان لتخزين المجوهرات ، وممكن بردو أنك تضيف لها أرفف للأحذية او الشرابات.

اتساع غرفة الملابس

يفضل أن الغرفة ما تبقاش مشغولة بأكثر من 70 % من حجمها ، ونسبة 30% بتكون مساحة لك عشان حرية الحركة فيها ، وكمان اترك مساحة تخزين تكفى كل متعلقاتك الشخصية ، مع الاخذ فى الاعتبار أنها غرفة تبديل ملابس ، مش غرفة تخزين لكل البيت ، متخزنش فيها كل حاجة وأى حاجة ، لا نظمها ورتبها ، عشان تقدر تستفيد من وجودها فى غرفة نومك.

كتير مننا بيهتم وهو بيشترى المرتبة ، لكن مش بيهتم اثناء شراء مخدات السرير لكن لو ركزنا اكتر هنلاقى ان اغلب مشاكل آلام الرقبة والظهر والارق واحيانا الصداع بسبب المخدات الغير مريحة.

هنتعرف مع بعض على نقط مهمة واحنا بنختار ، وكمان هنعرف امتى تكون محتاج تغير مخداتك القديمة وتعرف انها اصبحت متهالكة.

الوقت الملائم لتغيير مخدات السرير القديمة

فيه قاعدة عامة لازم تعرفها وهى أن تغيير المخدات يفضل كل سنة ونصف ، باستثناء بعض الانواع زى الاسفنج بتقعد فترة أطول تصل لثلاث سنوات ، أما المخدات الصناعية فعمرها الافتراضى أقل من الطبيعية ، ولو زاد استخدامها أكتر من كده هتصبح المخدة متهالكة.

تقدر تعرف من خلال اختبارات بسيطة ان عمر المخدة الافتراضى انتهى :

إختبار الشم واللمس

فى البداية اخلع غطاء المخدة واعمل لها فحص ، شوف هل تغير لونها من العرق ، أو تمزقت من ناحية ، وتأكد أن رائحتها تغيرت لرائحة غريبة أو كريهة ، فكل الأمور دى تخليك تغيرها فورا ، لان المخدات مع مرور الوقت بتجمع خلايا الجلد الميتة ، وكمان العفن الفطرى على شكل قوالب ، إلى جانب تراكم الغبار ، وبالنسبة لحجمها لو قل عن نصفها حاول تتخلص منها.

لو نجحت المخدات فى إختبار الشم واللمس ، فجرب عليها الإختبار التالى.

إختبار الطى أو الثنى

اطوى مخدة السرير بالنصف ، لو مرجعتش لشكلها الأصلى او شفت علامات الثنى عليها بعد ما ترجع ، يبقى انتهى عمرها الافتراضى وهتحتاج تغيرها ، اما لو رجعت لطبيعتها بسرعة تبقى حالتها جيدة.

وممكن تجرب مع اضافة وزن فوق المخدة نفسها اثناء الطى وتشوف هل رجعت لوضعها الطبيعي بسرعة ولا اخدت وقت طويل ، لو رجعت بسرعة تبقى حالتها جيدة ولو تأخرت واخدت وقت طويل تبقى مستهلكة.

دليلك لاختيار مخدات السرير

فيه انواع واشكال كتير جدا فى السوق ومن الصعب انك تلاقى نوع واحد يناسب كل الخامات والاذواق والالوان ، افضل وسيلة انك تراعى المعايير اللى هنذكرها.

حشو مخدات السرير

فيه خامات كتير لحشو المخدات ، ومفيش خامة أفضل من الأخرى ، لأن لكل خامة فيهم مزايا وعيوب ، فيه حشوات ممكن تسبب حساسية زى الريش أو المطاط أو الصوف ، وفيه الحشو المضاد للحساسية ودى بتكون من خامات معالجة لمقاومة تطور الغبار ، حاول اختيار النوع ده وخاصة لو أنت مصاب بالأكزيما أو الربو ، أو إلتهاب الأنف ، عشان مسببات الحساسية هتزيد الوضع سوء.

أيا كان إختيارك فممكن تقضى على الغبار بغسل المخدة فى درجة حرارة 60 مئوية أو أعلى كل شهر أو شهرين ، لكن تأكد أنها تتحمل الغسيل المتكرر فى درجة الحرارة دى أو اعلى ، وقبل التفكير فى شراء مخدات سرير مضادة للحساسية ، تأكد من اصابتك باحد اعراض الحساسية وهى :

• عيون حمراء دامعة بعد الإستيقاظ.
• وأنت جالس على السرير بتحس بحكة فى الأنف بالاضافة للعطس.
• الشعور بإلتهاب فى الحلق وصوت خشن.
• سعال ومشاكل فى التنفس.
• حكة فى الجلد إلى جانب طفح جلدى.

مخدات الحشو الطبيعى

مخدات الريش

لو بتدور على افضل وسيلة لراحتك يبقى النوع ده هو الانسب لك ، لانه بيتم تصنيعه من ريش البط أو الأوز ، فمخدات ريش الأوز أنعم من ريش البط إلى جانب أنها اغلى فى السعر.

اغلب المخدات الطبيعية فى جزء من مكوناتها مصنوع وده بسبب ان بعض الناس بتشتكى من الحساسية بسبب ريش الطيور نظرا لتراكم بقايا الاوساخ من الالياف الحيوانية ، عشان كده لجأت الشركات المصنعة لعمل مزج بين الخامات الطبيعية وبعض الخامات الصناعية المعالجة ضد الحساسية.

مخدات الصوف

المخدات المصنوعة من الصوف تتميز بمقاومة الحساسية والعفن والغبار ، غير أنها بتبعد الرطوبة عن رأسك وعنقك ، وفعالة فى ضبط درجة حرارتك أثناء النوم ، وكمان بتعطيك احساس دفء فى الشتاء ،  وتتميز بمظهر انيق ، إلى جانب صلابتها وده بيعطيها عمر افتراضى طويل.

ومن عيوبها أن وزنها ثقيل ، وسطحها بيهبط بسرعة ، عشان كده بتحتاج اعادة تنجيد كل فترة.

مخدات السرير القطن

النوع ده يعتبر افضل نوع على الاطلاق ، لأنها مخدات طبيعية شبه الصوف ومضادة للحساسية ، و مقاومة للعفن والغبار ، وهى إختيار ذكى للناس اللى بتعانى من الحساسية عموما عشان كده هنلاقيها فى وصف بعض الاطباء للناس اللى بتعانى من الحساسية.

من مميزات النوع ده من المخدات انها تناسب الاشخاص اللى بتنام على الجانب اكتر من اللى بتنام على ظهرها ، ده غير انها مش بترفع درجة الحرارة أثناء نومك لان القطن مادة طبيعية 100% عشان كده يوصى بها فى اختيار المرتبة ، لكن عيبها الوحيد أنها أغلى من المخدات المصنعة.

مخدات الحشو الصناعى

مخدات السرير المصنعة أقل فى التكلفة من الطبيعية ، ومن المخدات المضادة للحساسية ، لان حشوها هيهبط أكتر من الأنواع التانية بمرور الوقت.

النوع ده من المخدات تم تصنيعه من خلال عمليات كيميائية ، وكثير منها دخل عمليات معالجة ضد الميكروبات ، فلازم تعرف إيه هى المواد الكيميائية اللى دخلت فى صناعة مخدتك ، عشان تشترى منتج ميضرش بصحتك.

مخدات المطاط

مخدات المطاط تميل للصلابة أكتر من الطبيعية ، وبردو بتكون مريحة جدا ، وبتحتفظ بشكلها لأنها مش من النوع اللى ياخد شكل الجسم ويهبط على اساسه ، بالإضافة أنها بتقاوم العفن والغبار ، وفى الغالب بتكون مصممة عشان توفر دعم إضافى للرأس والعنق ، ولتقييد الحركة أثناء نومك لتجنب حدوث بعض الاصابات نتيجة انحناء الرقبة بشكل خاطىء.

ومن مميزاتها أنها متينة بتريح الظهر والعنق ، ومش بترفع درجة الحرارة ، وبتعيش فترة طويلة لكن عيبها ان سعرها غالى جدا.

مخدات السرير الاسفنج

النوع ده من المخدات انتشر كتير فى الفترة الاخيرة ، بعض الناس فضلته لانه بياخد شكل الجسم يعنى مع اول ايام نومك هتاخد المخدة شكل راسك وعنقك وكتفك وتفضل متشكلة بالطريقة دى ، وبتوزع وزن الجسم على مساحة سطحها.

وده اللى خلاها الاختيار الشائع عند الناس اللى بتعانى من الام الظهر والرقبة ، لكن يعيب النوع ده من المخدات ان خامة الاسفنج بتحتفظ بالحرارة وده اللى بيخليك تعرق كتير اثناء النوم عشان كده بعض الشركات طورت التصميم وعملت فيه فتحات تهوية ولكن فى النهاية هو اسفنج هيحتفظ بالحرارة.

من ضمن عيوب مخدات الاسفنج انبعاث بعض الغازات الكيميائية اثناء فترة النوم وخاصة لو كانت جديدة فى اول ايام شراءها.

مخدات الميكروفايبر

اقل الانواع تكلفة ، إلى جانب أنه يمكن تنظيفها فى البيت ، ويتوفر منها بعض الانواع مضادة للحساسية ، وتتميز بخفة وزنها ،وسعرها الاقتصادى ، ولكن عيبها ان عمرها الافتراضى قصير ، وبعض الناس تعتبر النقطة دى ميزة لانها تتيح فرصة تغييرها كل فترة قريبة.

وزن حشو مخدات السرير

بالنسبة لكل الانواع وزنهم خفيف ، لكن مخدات المطاط بتكون أثقل فى الوزن ، واختيارك مخدة بوزن خفيف أو تقيل ده يرجع لذوقك الشخصى ، فيه بعض الأشخاص بيحب يحرك المخدة وهو نايم عشان راحته ، لكن بننصحك انك تختار المخدة اللى وزنها اخف.

قوة الحشو

قوة الحشو ، مهمة جدا وفيه بعض الشركات بتعلن عن مقدار القوة بالأرقام ، وايه هى الجودة العالية لنوع الحشوة ، وكمان هتقعد معك قد ايه وقت ، فقوة حشو المخدة من 600 فأكثر يدل على ان جودتها عالية سواء كانت طبيعية أو صناعية ، لكن خد بالك فيه ملحوظة مهمة مش معنى أن الحشو 800 أو اكتر أنها هتعمر معك 10 سنين مثلا.

جودة الحشو

فى جميع الانواع ، جودة الحشو مهمة عشان توفر لك الراحة ، وتعيش معك أطول فترة ممكنة ، وطبعا الجودة هى اكبر عامل يؤثر على السعر ، عشان كده بننصحك تشترى أعلى جودة تسمح بها ميزانيتك ، لانك هتنام عليها آلاف الساعات.

حجم مخدات السرير

معظم الناس بتفضل حجم المخدات يكون كبير وده شىء كويس ، شرط أن يكون نومك فى خط مستقيم ، وأن سمكها  يخلى عمودك الفقرى فى خط واحد مع رأسك وعنقك أثناء النوم ، يعنى تبقى مرتاح فى وضعية جسمك ، وتأكد أن غطاء المخدة متناسق مع حجمها.

لاحظ أنك ممكن ترتبهم بشكل معين ، بحيث أنها تدعم وتريح رأس وعنقك ، لو مثلا واحدة بالنسبة لك مش كفاية ممكن تستخدم اكتر او ممكن تستخدم واحدة جمبك وواحدة تحت راسك وهكذا.

قماش المخدات

اختار اغطية مخدات السرير من مادة طبيعية ، عشان متكونش سبب فى ارتفاع الحرارة لك اثناء النوم ، كمان مهم جدا اختيار البطانة الداخلية تكون من خامة جيدة زى القطن ، ده بيساعد على زيادة عمرها.

وضعية نومك

وضعية نومك بتأثر على اختيار مخدتك ، بس فيه قواعد عامة تقدر توفق بها بين طريقة نومك ومخدتك ، وهى مش قواعد صعبة ولا صارمة ، عشان كلنا بنغير من وضعية نومنا أثناء الليل ، يعنى فيه ناس بتقضى فترة نومها على ظهرها ، والبعض بيفضل وضعية نوم المعدة اللى تخليهم يتنقلوا على جانب واحد ، فلو أنت عايز مخدة تريحك فى كل وضعيات النوم ، فعندك مجموعة قواعد أساسية :

1. لو اكتر وضع مريح لك هو الجمب فأنت اكيد هتحتاج مخدة صلبة ، وخلى كمان واحدة جانبية أكثر سماكة ، يعنى تكون سماكتها بنفس المسافة بين أذنك وكتفك الخارجى.
2. أما لو بتنام على بطنك كده تناسبك المخدة الناعمة ، وممكن متحتاجش مخدات تحت رأسك ، وحاول تخلى مخدة تحت معدتك عشان تمنع آلام الظهر.
3. اذا كنت بتنام على الظهر هتتناسبك مخدة مسطحة ورفيعة ، عشان تخلى رأسك ورقبتك فى خط مستقيم ، وهتحتاج لمخدة ناعمة ، إلا لو عندك ألم فى الرقبة وأنت نائم على الظهر ، فأكيد هتدور على مخدة تعطيك دعم إضافى.
4. ولو ملكش وضعية معينة فى النوم ، أو بتتقلب كتير على السرير ، فصعب نحدد لك واحدة بعينها ، فى الحالة دى ممكن تعمل اختبار للمخدات بنفسك فى المحل اللى بتشترى منه وتشوف اى ملمس هترتاح فيه اكتر.

علاقة المراتب بالاختيار

تخيل أن المراتب بتأثر على إختيارك للمخدات ، لو كانت مرتبة سريرك صلبة اختار مخدات مرنة ، تاخد شكل رأسك أول ما تنام عليها ، أما لو كانت المرتبة مرنة حاول تختار مخدة صلبة عشان تحمى رأسك ورقبتك من كثرة الانحناءات.

عشان تكون مستريح وانت نايم يبقى لازم تختار اثاث غرفة النوم بعناية شديدة ، لانها من الغرف الأساسية فى البيت ، عشان كده لازم تاخد بالك من فرشها ، بأنك تختار مقاساته بدقة تتوافق مع مساحتها ، وكمان تختار خامة الفرش نفسه من خشب كويس يكون عملى ومتين وشكله فخم ، عشان يعمر معاك فترة طويلة ، وبردو تختار الاكسسوارات من خامات كويسة تظهر جودة الغرفة .

اختيار اثاث غرفة النوم هو حاجة مشجعة ليك ، ولكن بعض الناس اللى بتخاف من التجديد مش بتحب تغير المنظر اللى متعودة عليه وخاصة فى خامات وأشكال الفرش ، فالخوف بيكون من أنها تكون غالية أو من الاختيار الخاطىء.

لكن اختيار الفرش هيكون سهل عليك  لو سألت نفسك كذا سؤال قبل ما تروح تشترى ، وتعرف مجموعة اعتبارات مهمة قبل ما تقرر أى شىء.

ميزانية شراء اثاث غرفة النوم

اثاث غرفة النوم مسألة مش بسيطة لانه مكلف جدا لازم تشوف ميزانيتك الأول قبل ما تختار ، يعنى لو الفرش غالى ومش معك ميزانية تغطى ، ممكن تلجأ لواحد من الاختيارات دى ، إنك تختار قطعة دلوقتى ، وتنتظر بعدها فرصة أن يكون معك مال كافى لشراء باقى القطع.

الخيار تانى وهو أنك تختار فرش مستعمل ، الخيار الثالث انك تختار فرش اقتصادى جودته مش عالية جدا وفى نفس الوقت سعره مش غالى ، بس ده غالبا بيكون فى الغرف اللى مفيش عليها ضغط واستخدام كتير وبالتالى مش هتتأثر بسرعة.

جودة الاثاث

أنت مش هتشترى فرش خردة أو جودته سيئة ، ينهار ويتشقق فى ظرف شهور قليلة ، وده مش معناه أنك هتختار أعلى جودة لقيتها ادامك إلا لو كان معاك ميزانية تتحمل ، فالميزانية هتلعب دور كبير فى اختيارك لمستوى الجودة سواء كان عالى أو منخفض ، وكمان الغرفة نفسها ، فغرفة النوم الرئيسية تستحق أنك تختار لها فرش جودته عالية ، وأنك تقلل من جودة غرفة الأطفال شوية ، على اعتبار أنها هتتجدد بعد سنوات قليلة.

الخشب المستخدم فى اثاث غرفة النوم

من اكتر الاسئلة المنتشرة ايه هى افضل خامة خشب فى تصنيع اثاث غرفة النوم ، فيه انواع كتير متاحة زى السويدى (الموسكى) ، القيقب ، الزان ، العزيزى ، الحور وممكن الارو.

افضلهم طبعا على الاطلاق هو الارو ولكن سعره غالى جدا ولو اتكلمنا عن الزان هو خشب متين جدا ولكن من عيوبه المشهورة انه بيتأثر بالعوامل المحيطة يعنى تلاقيه بعد فترة اخد شكل منحنى ومش بس كده ده كمان بيقل عن حجمه الطبيعى وده اللى خلى بعض العمال يهربوا منه فى التصنيع.

لذلك اتجهت الناس فى الفترة الحالية الى خشب العزيزى والحور واحيانا الاور لانه لهم مميزات رائعة من حيث الصلابة الانواع دى صلبة جدا تعيش عمر افتراضى طويل ، ده غير انها سهلة فى التصنيع مع العامل ودى نقطة مهمة خلى بالك منها.

بالاضافة انهم يظهر فيهم الابداع بالدهانات بعكس مثلا خشب السويدى يحتوى على عقد كتير منها عادى ومنها الخبيثة واللى بتقع بعد فترة وتضعف الخشب ، وبالتالى لو كانت الميزانية معاك محدودة ممكن تلجأ لخشب العزيزى والحور ومعاهم السويدى فى الاماكن الغير ضرورية ولو الميزانية مفتوحة ممكن الارو.

مساحة الغرفة

لو أنت بتفرش غرفة ضيقة جدا ، فمش لازم تختار سرير كبير بأعمدة ، ولا تختار تسريحة ضخمة تشغل لك المساحة ، أما لو كنت محظوظ بغرفة واسعة كفاية ، بلاش تختار فرش أصغر بكتير من المساحة  المتاحة لك.

يعنى المقاس مهم جدا لو عايز غرفة نومك يكون شكلها حلو ، لازم يكون فيه توازن بين المساحة وحجم الفرش ، وخاصة لو هتضيف قطعة فى الركن ، وبردو عشان متشتريش اثاث فى غرفة النوم ويبقى ملوش مكان.

ضرورى ان يكون فيه مساحة كافية للكومود الجانبي ، بحيث يكون على مستوى واحد من السرير والمرتبة ، وأهميته بتتلخص فى أن عليه الأباجورات ، وممكن تستغله فى وضع موبايلك أو كتاب مهم بتقرأ فيه وتخزين اغراضك.

احتياجاتك فى غرفة النوم

اذا كانت غرفة النوم ستايل قديم من النوع اللى فيه السرير باتنين شباك ، وشايف أنه ضرورى انك تغير الفرش بتاعها ، أو حتى كام قطعة فيها ، فأنت فى كل الأحوال محتاج تقرر هتغير ايه تحديدا من اثاث غرفة النوم.

وفى حالة أن الغرفة هى الماستر لك ولزوجتك ، وفيه حد منكم طويل القامة ، فاستغنى عن الشباك الصغير ، عشان ميكونش مؤذي لك وانت نايم لانك هتحس بعدم الراحة وان السرير قصير بالنسبة لك.

بالنسبة للدولاب لو كان شكله حلو ، لكن مساحته مش مكفية كل الملابس ، ممكن تغيره لمقاس أكبر فى حدود المتاح ، ولو كانت المساحة عندك اكبر ، ممكن تلجأ لعمل غرفة ملابس.

وأهم نقطة أنك تراعى فى اختياراتك أسلوب حياتك يعنى مثلا لو انت متعود تقوم الصبح تقعد على كرسى بجانب السرير يبقى تشترى جلسة بعدد 2 كرسى وطاولة لتناول الشاى مثلا ، وعاداتك فى أيام الأجازات ، والوقت اللى بتقضيه مع أسرتك ، وبردو مراعاة وجود حيوانات أليفة فى منزلك وأنهم بيشغلوا مساحة.

خلفية الشاشة معروف أنها بتميل للعرض أكتر من الارتفاع ، وممكن تستغلها صح خاصة لو مساحة الغرفة محدودة ، يتراوح ارتفاعها المعتاد مابين 100 – 250 سم على حسب ذوقك وطبيعة الغرفة.

اذا كان السرير أسفل الشباك ، فلازم تتأكد من أن طول ظهر السرير ، ميغطيش على الشباك عشان التهوية مهمة ، إلى جانب أن وقتها الشكل العام هيكون سىء جدا.

ستايلك المفضل

فى حالة لو بتحب الأشكال الجديدة ، فأنت مش هتكون مرتاح لطقم غرفة النوم التقليدى وهتلاقى نفسك محتاج تغير اغطية السرير والمخدات ، من ناحية تانية لو غرفتك فيها ديكور بتحبه  من ألوان وستائر مثلا ، يبقى هتجدد الفرش لنوع يتناسب معاه ويكون بينهم تناسق ، وفى الوقت نفسه متقعش فى مطب الأختيار الجامد أو الصامت.

الفكرة اللى موجودة الأيام دى لفرش غرف النوم هى اختياره بحيث يكون ما بين الحديث والتقليدى ، وده بيكسر حدة بعض الإختيارات.

بعض الغرف يليق بها الأسلوب الإسكندنافي فى الديكور اللى هو ابسط اشكال التصميم ، والبعض الآخر بيشغل مساحتها ومش بيليق عليها ، فعشان تستخدم الأسلوب ده وتوفقه مع المكان ، اختار فرش بسيط ذو ملمس دافىء وبلاش تضيف اكسسوارات كتير.

اختيار اثاث غرفة النوم

من البديهى أنك هتختار اثاث غرفة النوم متطابق مع بعضه يعنى تصميم موحد للغرفة السرير نفس تصميم الدولاب نفس شكل التسريحة ، لكنه فعلا مش مطلوب ، وفى بعض الحالات بيكون مش بيكون افضل اختيار.

فى الغرف التقليدية او الرسمية بيكون شكله ملائم ، لكن فى الغرف المودرن بيكون منظره ممل جدا وبيقفل شكل الغرفة ، كل اللى عليك أنك تختار قطع الفرش المتنوعة بس خلى بالك لازم تكون القطع متكاملة مع بعضها.

ومن الاتجاهات الحديثة اللى ظهرت فى اثاث غرفة النوم حاليا عدم السمترية يعنى ايه ، يعنى ممكن تختار كومود نيو كلاسيك يمين السرير وواحد مودرن على شمال السرير وبتعمل جاذبية رهيبة جدا للغرفة وتلاقى الدولاب تصميمه مزج بين الشكلين مع بعض ، وكمان الكومود مبقاش شرط انه يكون ادراج تقليدية او رفوف.

يعنى ممكن تختار فرش خشبى الصنع ولونه فاتح عشان تكون الغرفة مريحة جدا ، وممكن تخلى الكومود جذع شجرة مدهون بلون لائق او تخليه بلونه الطبيعى ، هيعطيك شكل مختلف تماما ، وممكن تختار اللون الفيروزى لكل الفرش ، هيخلى نمط غرفتك مميز وجديد عن البيج والبنى اللى أصبحوا مسيطرين على اذواق الناس.

فى حالة أن الغرفة مشتركة

لو أن الغرفة لزوجين أو اثنين أخوات بيتشاركوا فيها ، فالمهم أنك تأخذ النقطة دى فى اعتبارك وأنت بتختار الفرش ، يعنى لو هما أخوة خلى لكل واحد منهم سرير ، وطبعا كومود جانبى باضائته عشان يخزن فيه اغراضه ، إلى جانب دولاب يعلقوا فيه ملابسهم  ، مع مراعاة أذواقهم الشخصية والمرونة فى المساحة ، يعنى ميكونش حد منهم بيشتكى ان الغرفة ضيقة ومش قادر يتحرك فيها براحته.

مقاسات اثاث غرفة النوم

تأثير مقاس السرير على اثاث غرفة النوم

فى مقاسات كتير للسرير ، وده يرجع لمقاس الغرفة اللى هتفرشها ، تعالى شوف المقاسات المختلفة المعروفة عالميا فى الجدول ده

اسم السرير	المقاس	الوصف
مفرد صغير Small Single	76 سم × 191 سم	مخصص لشخص واحد
مزدوج صغير Twin Single	97 سم × 191 سم	يكفى شخصين صغيرين لذلك يسمى مزدوج
مزدوج كامل Full Double	137 سم × 191 سم	يكفى شخصين بالغين لذلك هو اكبر من النوع السابق
سرير الملكة Queen Size	152 سم × 203 سم	وهذا هو المقاس المنتشر فى غرفة النوم الرئيسية فى بيوتنا
سرير الملك King Size	193 سم × 203 سم	هذا المقاس اكبر قليلا يصلح للغرف والبيوت الكبيرة
سرير الملك (مقاس امريكى) California King	183 سم × 213 سم	وهذا اكبر مقاس متوفر ويصلح للفيلات والقصور والبيوت الكبيرة وموجود فى بعض الفنادق

مقاس الكومود

أما عن مقاس الكومود فبيكون ثابت فى الطول والعرض ، غالبا هتلاقى مقاسه الاستاندرد 60 سم فى 60 سم .

مقاس الدولاب

فى نقطة مهمة فى مقاس الدولاب وهى أن ارتفاعه و عمقه ثابت مش بيتغير ، وبيكون 60 سم الا فى بعض الحالات الاستثنائية وده قليل جدا ، لكن العرض بيتغير عادى جدا ، فمقاساته تتراوح ما بين 120 سم و 240 سم و 340 سم ، وسر ثبات عمقه هو شماعات الملابس.

مقاس التسريحة

فى أى غرفة نوم بيكون مقاسها فى الطول 120سم واحيانا بيتغير لو المساحة حكمت ، أما عرضها بيكون 40 سم.

نيجى هنا لنقطة مهمة وهى ليه أرقام المقاسات زوجية مش عدد فردى ، والسبب ان مقاسات لوح الخشب 122*244 سم وده ينطبق على انواع كتير زى الابلكاش او MDF او الكونتر ودى ارقام زوجية ، و الصنايعى المحترف عشان ما يهدرش الخشب بيصنع القطع بمقاسات زوجية ، لان اللوح بيتقسم نصفين وبيصنع منهم اى قطعة فى فرش غرفة النوم.

وخلى بالك لو لجأت للتصنيع هتشوف الموضوع ده بنفسك هتلاقى ان قطع الغرفة لو كانت صغيرة هتتكلف نفس تكلفتها لو كانت كبيرة لان الصنايعى هيحاسبك على الخشب المهدور.

وفى التصميم بنراعى كل المقاسات اللى ذكرناها ، ومش بس كده لازم كمان نراعى المسافات بينهم ، زى المسافة بين الدولاب والسرير ، وبين التسريحة والسرير ، وده عشان يسهل حركتنا فى الغرفة ، وخاصة أننا لازم نترك مساحة لدلف الدولاب عشان تفتح بسهولة ، بدل ما تقع فى خطأ ممكن يكلفك كتير ، والدلف ما تفتحش لو كانت المساحة ضيقة.

نصائح عامة لتجهيز اثاث غرفة النوم

المكان الأمثل للمرايا

يفضل وضع المرايا فى أحد جوانب السرير ، ومش فى الواجهة عشان متعملش ازعاج للشخص وهو على السرير ، وكمان تعطى مساحة أكتر لان زى ما احنا عارفين ان المرايا بتعطى اتساع وبعد ثالث للمكان.

المخدات فى اثاث غرفة النوم

قبل ماتشتري المخدات شوف خامة الحشو ، هل عبارة عن ريش وده بعض الناس بتفضله عشان مريح لكن خلى بالك ان بعض الانواع الرديئة بتسبب حساسية ، ولا قطن وده يعتبر افضل خامة مريحة وصحية ، وفيه البوليستر وده اقوى شوية ، بردو فيه مخدات مايكروفايبر ودى جديدة ، وخامتها رقيقة.

غرفة الملابس

يفضل ان غرفة الملابس تكون مستقلة عن غرفة النوم ، ولكن طبعا يكون المرور بينهم سهل يعنى مثلا تكون جزء من غرفة النوم لو كانت كبيرة ، او تتقفل بفاصل خشبى او زجاجى وتكون مستقلة عن غرفة النوم عشان الشكل العام وراحتك لما تلبس.

مع دخول موسم الشتاء بتحصل امطار كتير وبتسبب تلفيات فى الحوائط و مواسير التصريف ده غير ان اسقف كتير جدا بتنقع بسبب المطر فى الشتاء ، وده طبعا بسبب وجود المياه عليه فترة طويلة فبتعمل تآكل فى الخرسانة والحديد ، وبنشوف ده كتير جدا ونرمم اسقف بسبب الموضوع ده.

بالاضافة لكده لو محلك التجارى مطل على الطريق ، بعض السيارات أثناء القيادة السريعة بتجيب المياه اللى على الطريق كلها نتيجة حركة الإطارات وتيجى على الحوائط عندك ، واحيانا تدخل من الشبابيك والأبواب ، وعشان كده هتعرف فى الموضوع ده ازاى تحمى بيتك من المطر فى الشتاء .

أماكن تسرب مياه المطر فى الشتاء

البدروم (القبو)

اول مكان لازم تفحصه كويس وتأمن عليه بعد ما تشوف مواسير الصرف هو البدروم ، شوف هل فيه مياه دخلته ولا لا.

فى فترات المطر الغزير لازم تتأكد كويس ان مفيش اى مياه واقفة عندك والا هتحول البدروم او حتى أرضية الفناء فى المدخل لمستنقع رهيب وده هيخلى المياه تتسرب من خلال اى شقوق او شروخات وتدخل لجدران بيتك وتأثر على الاساسات اللى فيه.

أفضل وسيلة تقاوم بها المطر فى الشتاء هى البلاعات لتصريف أكبر كمية من المياه إذا كانت واقفة ، لان مضخات الشفط احيانا مش بتكون فعالة 100% لو الكمية كبيرة وخاصة اذا مكانش فيه وسيلة للتصريف زى البلاعات ووسائل الصرف المتقدمة اللى أصبحت من ضرورات تأسيس السباكة في المكان.

لو حسيت برائحة كريهة فى المياه الموجودة عندك يبقى لازم تكلم المختصين بالصرف الصحى فى البلد اللى انت مقيم فيها سواء كانت البلدية او مجلس المدينة ، لان ده معناه ان فيه مياه من الصرف الصحى نفسه دخلت على البلاعات الموجودة عندك.

مياه الصرف الصحى مليانة بكتيريا وفيروسات وكائنات دقيقة واللى ممكن تسبب امراض لا حصر لها زى أمراض الجهاز الهضمى والامراض الجلدية ومشاكل صحية تانية كتير عشان كده لازم تتواصل مع المتخصصين فى الحكومة يتعاملوا معاها فى اسرع وقت.

لو كانت مياه مطر الشتاء قليلة مش كتير ممكن تشيلها ببعض العلب البلاستيك او تستخدم مضخة شفط لطردها بره المكان ، وطبعا مهم جدا انك تفتح الشبابيك والابواب ولو فيه مراوح شغلها لزيادة التهوية ولو عندك جهاز مزيل الرطوبة شغله فترة وخليه على اقصى طاقة.

التعامل مع الارضية

السجاد

لو اكتشفت وجود مياه الشتاء تحت السجاد او الموكيت سواء كانت دخلت من شباك مفتوح او مش معزول كويس او من الفراغ اللى تحت الباب ، يبقى لازم تجفف المياه دى بأسرع ما يمكن.

مينفعش ابدا تسيب جزء من الفرش رطب سواء سجاد او موكيت لان دى انسب بيئة تنمو فيها الحشرات وهيظهر العفن فى السجادة فى حدود 48 ساعة بحد اقصى ، عشان كده لازم تهتم بالموضوع جدا وحتى بعد زوال المطر لازم تعمل تنظيف كويس جدا للسجاد.

اول حاجة لازم تعملها تشيل اى سجادة مبللة وتغسلها وتجففها بنفسك كويس او تغسلها فى مغسلة متخصصة فى السجاد ، ولو فيه جزء من السجادة مبلل من جمب الحيطة ارفعه من على الأرض بحيث ميكونش لامس الارض ابدا ، عشان متعطيش فرصة للأنسجة المبللة تلمس الأرض.

لازم تزيل بطانة السجادة إذا كانت موجودة لانها اكيد هتكون مبللة بردو ، واستخدم مكنسة شفط لتجفيف السجادة تماما.

الارضية الخشب (الباركيه)

جفف الارضية الخشب بقطعة اسفنج جافة ، لو قطع الخشب امتصت مياه بشكل كبير جدا هتعمل منحنيات من المنتصف او تبعد عن الحيطة من الاطراف ، وكده تبدأ مراحل تلف الباركيه ، لكن فيه بعض الانواع بترجع لحالتها الطبيعية مع الوقت ، ولو لقيت فيه بلل فى الخشب اتبع الخطوات دى عشان تقدر تجففه :

• امسح المياه الموجودة بفوطة جافة.
• افتح ابواب الغرف الداخلية والشبابيك عشان تعمل اكبر قدر من التهوية.
• وجه المراوح الموجودة عندك للجزء المبلل.
• لو عندك مزيل الرطوبة شغله فترة وخليه على اقصى طاقة.

المحافظة على الحوائط من المطر فى الشتاء

تسريبات مياه المطر فى الشتاء للارضية سهل انك تعرفها لانها ظاهرة لو رفعت السجادة هتشوف فين المشكلة ، لكن المياه المتسربة على الحوائط ممكن تسبب مشاكل تهدد سلامة الحوائط لو متمش معالجتها فورا.

لو افترضنا ان البدروم عندك دخله كمية مياه ومتمش تجفيفها بسرعة جدا ، هتتسرب على الحوائط من الجزء السفلى وهتمتصها الحوائط وده شىء طبيعى.

وهنا تكمن الخطورة لو كانت الحوائط معمول فيها تجليد من خامة زى الجبسوم بورد او البلاستر بورد لان دى خامات من الصعب جدا تجفيفها وفى الحالة دى هتشيل الجزء اللى تلف بسبب المياه وتغيره.

بردو هتلاقى اجزاء تانية فى حوائط بيتك تعرضت للتلف من مطر الشتاء زى المناطق اللى تحت الشبابيك اللى تسرب لها مياه ومعرضة باستمرار للرطوبة.

دائما ابحث عن الاماكن اللى تكشف تلف الحوائط بسبب المطر فى الشتاء زى اى تجليد خشبى اصبح رطب لو خبطت عليه بايدك هتلاقى صوته واضح او ورق حائط طلع من على الحيطة بسبب الرطوبة او دهان يقع من الحيطة نفسها.

لازم تتواصل مع فنى محترف يحدد لك بالظبط فين مصدر تسريب مياه الشتاء ، وتستبدل اى اجزاء تعرضت للمياه فى الحوائط بالواح جديدة سواء كانت جبسوم بورد او بلاستر بورد ، كمان خلى بالك من عزل الحوائط فى الداخل لو لقيته تعرض للبلل لازم تستبدله بأجزاء جديدة ولكن بعد ما تجفف الحوائط تماما بالمروحة ومزيل الرطوبة.

وهنا بقى بيظهر الصنايعى المحترف اللى يقدر يحدد أماكن الرطوبة فى الحوائط بمساعدة جهاز قياس الرطوبة و جهاز قياس التعفن ودول موجودين فى الاسواق.

الرووف او سطح البيت

لازم تتأكد ان الرووف مفيش فيه مشكلة يعنى القرميد اللى ركبته سليم مفيش منه قطعة مكسورة او مشروخة ، ويفضل انك تعمل الفحص ده بصفة دورية طول السنة.

اقف فى حديقة بيتك وبص كويس على قطع القرميد الفخارى اللى مغطية سطح بيتك وشوف لو فيه اى علامات شرخ او تكسير ، لان دى هتكون وسيلة دخول مياه كتير جدا لأساسات البيت.

لازم تتأكد ان كل القطع فى مكانها الصحيح ، ولو كان فيه بعضها مايل او انحرف عن مكانه الاصلى او اذا كانت مفقودة أو وقعت لاى سبب لازم تكلم فنى متخصص فى الاسقف القرميد يعالج الاجزاء دى ، وطبعا مش محتاجين نقولك معناها ايه لو قطعة قرميد مفقودة يعنى المنطقة دى من الرووف هتكون مكشوفة تماما لمياه المطر وكل العوامل الجوية.

تأكد من الأجزاء المائلة فى سطح القرميد ميكونش فيه اى جزء مبين الداخل ولا يكون فيه أجزاء مصدية لان ده معناه انها هتتآكل قريب جدا ان لم تكن متآكلة فعليا.

بعض الاماكن داخل البيت

من اكثر الوسائل اللى ممكن تدخل مياه لبيتك الابواب او الشبابيك ، لازم تتأكد انهم مقفولين بإحكام ومعزولين كويس ، ولو محتاجين اى اصلاحات اعملها بقدر الامكان قبل دخول الموسم الشتوى ، بغض النظر عن مياه المطر فى الشتاء ممكن يكونوا وسيلة لدخول هواء بارد جدا.

بردو لازم تشوف حالة السقف المستعار اللى عندك وخصوصا لو كان من الواح الجبسوم بورد ، اتأكد ان مفيش فيه اى علامات سوداء أو بقع مياه ، لان الخامة دى بالذات بتتلف من أقل كمية مياه وبتحتاج تغيرها ، وده ممكن تعرفه كويس من خلال تغيير لون دهان السقف او بهتانه بسبب مياه الأمطار ، وطبعا تقدر تعرف كمية الرطوبة كام بالظبط بمساعدة الأجةووةهزة.

احتياطات الأمان لتصريف المطر فى الشتاء

أماكن تصريف المطر فى الشتاء

من اكتر الاماكن اللى هتلاقى فيها مياه المطر فى الشتاء هى اماكن اساسات البيت والرووف والأرضيات الخارجية واللى ممكن تتلف بسرعة نتيجة تراكم المياه ، واللى بتتجمع نتيجة انسداد وسائل التصريف فى البيت زى المزراب أو مواسير الصرف و ينتج عنها كمية مياه كبيرة.

ودى بتشكل خطر كبير على الأساسات الخرسانية لأنها بتتسرب داخل الحوائط وتعمل شروخات واماكن ضعيفة جدا فى الحوائط ممكن تكون وسيلة لتسرب المياه اكتر بعد كده.

عشان تتفادى كل ده لازم تفحص المزاريب ومواسير الصرف بشكل دورى حتى لو مكانش فيه مياه مطر لكن لازم تكون نظيفة طول السنة لاى طوارىء.

بعض الناس بتفحص المزاريب والمواسير دى مرتين فى السنة فى فصول الربيع والخريف بعد تساقط اوراق الشجر لان وارد جدا يقع فيهم اوراق من الشجر او اتربه من الجو ، وإذا هبت اى عاصفة ترابية زى الموجودة فى بعض الدول العربية لازم فحص للاجزاء دى كويس.

وفيه هنا اقتراح جميل نقدر ننصحك بيه وهو انك تمد طرف المزراب ابعد بشوية من حوائط البيت عشان متقعش منه المياه على الحوائط نفسها ، بس طبعا تراعى ان المياه متجيش على بيت جارك.

تهذيب الشجر

من الاشياء اللي ممكن تفرق معاك فى شكل و تنسيق الحديقة تهذيب الشجر بدل ما يكون عالى وكبير وفى نفس الوقت تحمى المزاريب الموجودة لصرف المطر فى الشتاء بكل سهولة عشان ميحصلش اى انسداد بسببها ، بالاضافة لكده هتتجنب خطر ان اى غصن منها ممكن يقع على بيتك لو كان فيه عاصفة شديدة.

الأمان فى استخدام الكهرباء

تأثير البرق على التيار الكهربى

كلنا عارفين تجربة جذب المغناطيس اللى درسناها فى المدرسة وهى أن قطبين المغناطيس المختلفين بيجذبوا بعض ، نفس الكلام ده ينطبق على البرق.

البرق عبارة عن شحنات كهربية سالبة وموجبة موجودة فى السحاب تنقسم لجزئين ، وبيكون فى الارض نفس الشحنات بس طبعا بكمية أقل فى الشجر وفى أسلاك الكهرباء وغيره ، اللى بيحصل ان الشحنات السالبة الموجودة فى السحاب تنجذب للموجبة اللى فى الارض والعكس طبعا.

ده بينتج عنه شحنة كهربية خيالية توصل الى 10 بليون واط ، (ودى العلماء حسبوها اكتشفوا انها تكفى 32 مليون شخص) وهى دى اللى بتسبب مشاكل قطع التيار.

قوة الشحنة دى بتعمل حرارة حوالي 53000 درجة فهرنهيت ودى تعادل 5 أضعاف حرارة الشمس نفسها عشان كده البرق بيكون من أهم أسباب حرائق الغابات ، وفى اللحظة اللى بتحصل فيها الشحنة دى بتعمل تغيير في اماكن ذرات الهواء وهو ده التفسير العلمى لصوت الرعد اللى احنا بنسمعه.

لذلك بننصح انك تتابع النشرة الجوية يوميا عشان تحمى بيتك من المطر فى الشتاء ولو عرفت ان فيه فرصة للبرق والرعد افصل جميع اجهزتك الكهربائية قبل حدوثه.

خطوات عملية لحماية بيتك من خطر الكهرباء أثناء سقوط المطر

• اهم نقطة على الاطلاق اثناء حدوث المطر فى الشتاء انك تخلى بالك من ان كل اجهزتك المنزلية تكون في قمة الامان بعيد عن المياه تماما ، لان طبعا كلنا عارفين ان المياه والكهرباء أعداء ، عشان كده من الضرورى ان لو حصل ودخل بيتك مياه لازم تتأكد ان جميع البرايز والمفاتيح متغطية ومقفولة.
• افصل اى اجهزة غالية عندك زى التلفزيون والكمبيوتر والثلاجة والغسالة و التكييف والسخان إذا عرفت إن فيه عاصفة رعدية ممكن تحصل يعنى قبل حدوث الرعد والبرق ، لأنك لو تأخرت عن كده ممكن يحصل مشاكل.
• لا ينصح ابدا انك تستخدم التليفون الارضى أثناء حدوث الرعد والبرق ، لأن الشحنة الكهربائية الموجودة فى البرق تنتقل عبر أسلاك التليفون ، استخدم التليفون المحمول او اى تليفون بدون سلك.
• اقفل اى اجهزة وقت انقطاع التيار الكهربى ، وخلى لمبة واحدة بس هى اللى تكون مفتوحة عشان تبقى علامة لو الكهرباء رجعت تانى ، ولما الكهرباء ترجع متفتحش الاجهزة مباشرة لأن التيار الكهربى فى الوقت ده بياخد وقت لحد ما يستقر.

ما بين اختيار قطع الأثاث وألوان الدهانات و ترتيب لوحات الحائط هناك مئات الخطوات التى نقوم بها لعمل أفضل شكل جمالى ، فقد نقوم بتركيب اللوحات بارتفاع مبالغ فيه ، أو نختار الدهان لامع بدلا من المطفى أو القياس الخاطىء للسجادة وربما عدم قياس حجم قطع الأثاث وهل هى تتناسب مع قياسات الأبواب أم لا ، كل هذه تعتبر من ضمن اخطاء الديكور والتى من شأنها أن تقلل من سعادتك بعد عمل منزلك الجديد ، وقد يقع بعض مصممين الديكور فى تلك الأخطاء أو فى غيرها وهناك عدة أماكن مشهورة قد قمت بزيارتها ووجدت بها أخطاء فادحة من قبل أكبر المهندسين.

لذلك جمعنا لك أشهر 6 اخطاء قد يقع فيها البعض أثناء عمل الديكور المنزلى وكيفية تفادى تلك الأخطاء أو حلها إذا كانت موجودة بالفعل ، وذلك من خلال استشارة أكبر الخبراء فى عالم الديكور المنزلى لحل تلك المشاكل حتى تعيد حساباتك من البداية وتتعلم من ذلك ، ودائما ضع فى اعتبارك أن كل مشكلة من مشاكل الديكور المنزلى ولها عدة حلول وليس حل واحد ، كل ما عليك هو معرفة تلك الأخطاء ومحاولة تجنبها فى المستقبل حتى لا تتكلف الكثير من النفقات لمعالجة ذلك. وسنتحدث أيضا عن بعض النصائح العامة التى يجب اتباعها لتجنب اخطاء الديكور الموجودة ولتجنب الوقوع فى أى أخطاء أخرى.

اخطاء غرفة المعيشة

• وضع الفرش ملاصق جدا للحائط يعطيك إحساس أن نصف مساحة الغرفة فارغ وهذا يفقد المنزل ألفته ، ينصح بترتيب الفرش بعيد إلى حد ما عن الحائط وفى نفس الوقت يكون قريب من بعضه وبذلك يصبح شكله أجمل ولا يكون متناثر فى أركان الغرفة.
• اختيار طاولة غرفة المعيشة بحجم كبير تقيد الحركة ، لأنها ستشغل مساحة أكبر ، يفضل أن يكون حجم الطاولة متناسق مع حجم باقى قطع الفرش والأثاث و أن يكون هناك نسبة وتناسب بينهم ، بمعنى أنه على الأقل يكون حجمها ثلث حجمه ، و لا تكون صغيرة فتشعر أنها عديمة القيمة فى المكان وتضطر لتغييرها.
• اختيار ألوان قماش كراسى السفرة بطريقة متباينة يعتبر من اخطاء الديكور ، ولكى تتفادى تلك النقطة اختر أنماط  متقاربة لألوان وأشكال الكراسي ، وقم بدمجهم مع بعض حتى تحصل فى النهاية على ديكور لائق ، فمثلا استخدم قطعة قماش معينة من لون ثابت فى جلسة الكرسى وفى الظهر استخدم القطعة المنقوشة بخطوط أو بزخرفة من نفس اللون ( ستجدها فى صفحات عينات الأقمشة ) ، هذا الاختيار يعتبر رائع ويجعل القطع كلها متماشية تماما مع بعضها.
• وضع لوحة صغيرة أعلى كنبة كبيرة ، وهذا يعطى الشخص الجالس إحساس بفراغ كبير غير مناسب ، لذلك ينصح بإزالة اللوحة الصغيرة  وضع مكانها لوحة كبيرة تملأ هذا الفراغ ، ويكون حجمها على الأقل ثلاثة أرباع حجم كنبة الجلوس ، والأهم من ذلك أن يكون ارتفاع اللوحة فى مستوى النظر ، ما يقدر بحوالى 120 – 140 سم ، وفى نفس الوقت يكون الإرتفاع بين الكنبة واللوحة حوالى 10 سم.

اخطاء فى الفرش والاكسسوارات

• من اخطاء الديكور الشائعة اختيار سجادة أكبر أو أصغر من المساحة المتاحة ، وقتها تجد الأرضية أسفل كنب الجلوس فارغة بدون سجاد وهذا شكل محبب على الإطلاق ، كل ما عليك فعله هو أن تختار سجادة مساحتها تكفى لوضع كل قطع الفرش سواء كان انتريه ، أو سفرة أو كنب جلوس أو ركنة بحيث على الأقل تكون الأرجل الأمامية للكنب او الكراسى فوق سطح السجادة ليست بعيدة عنها بمسافة ، وبذلك يكون الفرش كله فى مكان واحد غير متباعد ومتناثر.
• يعتبر حجم الستائر غير المناسب من اخطاء الديكور المنتشرة كثيرا والتى نراها أغلب الأوقات ، فإما أن تكون صغيرة على قياسات الشباك أو قصيرة جدا لا تصل إلى الأرضية ، أو تكون منخفضة على الأرض بشكل ملفت ، حاول أن تختار ستائر كبيرة الحجم حتى إذا كان الشباك صغير ، و يفضل أن تزيد عن إطارات الشباك من اليمين واليسار ومن الأعلى والأسفل وتكون داخل بيت الستارة والذى يتم عمله فى الأسقف المستعارة لإخفاء ميكانيزمات الحركة بداخله.

اخطاء عامة فى الديكور

• عدم التنوع فى الألوان يجعل شكل المكان باهت يفقده الحيوية ، لابد من إضافة ألوان مبهجة ومتنوعة فى تلوين الحوائط كلها لكى تعطى إحساس بالدفء فى أركان المنزل.
• بما أن هناك تحديثات وصيحات جديدة فى عالم الديكور المنزلى ، فمن المؤكد أنك تصاب بالحيرة فى اختيارك ما بين السيراميك و الباركيه ، السجاد الكلاسيك و الحديث ، و المطبخ الألومنيوم و الخشب ، و اختيار المقابض معدن أم استانلس وهذا من أكبر الأسباب التى تؤدى إلى اخطاء الديكور ، لذلك اختر طابع مميز واحد لمنزلك أو نمط واحد معروف ، ويكون مريح و عملى بالنسبة لك ، وأن يكون شكله مألوف عندما تنظر إليه ولا تلتفت كثيرا لصيحات الديكور وكل ما هو جديد فيها لأن جزء كبير منها لا يناسبنا ولا يناسب ثقافتنا فى المجتمعات العربية.
• عدم التنويع فى الإضاءة يعتبر من الأخطاء الشائعة فى الديكور ، ففى بعض الاحيان تجد الأباجورات إضاءتها مثل اللمبات العادية وذلك يعطى للمكان طابع رسمى كأنه مقر لمكتب ، لكن حاول أن تغير فى اختيار نمط الإضاءة للحصول على شكل جذاب ، وقم بإضافة مصادر إضاءة غير الكشافات الموجودة فى السقف ، أى قم بتوزيع الإضاءة ما بين الحائط والأباجورات ، والاضاءة المخفية ، ووجه إضائتهم لاتجاهات مختلفة لكى تبرز جمال الغرفة.

اخطاء الديكور فى غرفة النوم

• من اخطاء الديكور المنتشرة جدا المبالغة فى عدد مخدات السرير بحيث يصبح السرير مزدحم بها ، وهذا يجعل النوم غير مريح نهائيا بالإضافة إلى عدم تناسق الشكل العام ، لابد أن تحدد عدد المخدات الذى يتناسب مع حجم السرير ، وترتبهم بطريقة متناسقة تزيد من رونق ديكور غرفة نومك ، ويمكنك معرفة المزيد عن مخدات السرير من هذا الموضوع.
• تركيب إضاءة ساطعة جدا فى غرفة النوم ، هذا يعطيك إحساس بعدم الراحة ، الحل هو أن تدمج إضاءة خافتة مع إضاءة ساطعة وتقوم بالتبديل بينهم بمجموعة مفاتيح على حسب حاجتك فمثلا وقت القراءة تفتح إضاة قوية ووقت الاسترخاء تفتح الإضاءة الخافتة ، حتى تكون الغرفة مريحة.

اخطاء الديكور فى الحمام

• تركيب ورق الجدران فى الحمام اختيار غير مناسب ، بسبب وجود الرطوبة والمياه باستمرار ، لكن إذا كنت من محبيه ، فلابد من التأكد من تعرضه للتهوية دائما والأهم من ذلك أن تقوم بتركيب كابينة شاور مغلقة بحيث يكون خارج الكابينة و لايتعرض للمياه على الإطلاق. ويمكنك تفادى تلك المشكلة باختيار ورق الحائط القابل للغسيل فهو مقاوم تماما للمياه.
• من اخطاء الديكور في الحمام عدم وجود خزائن لوضع الفوط و مستحضرات التجميل والصابون ، لذلك من المهم أن تقوم بترتيب الحمام وتختار مساحة لتركيب وحدة تخزين تجعل حمامك مرتب وتحفظ مواد التنظيف بعيد عن متناول الأطفال وهذا من أهم اعتبارات الأمان فى الحمام.

اخطاء الديكور فى المطبخ

• وضع الثلاجة فى أبعد مكان عن باب المطبخ من الأشياء المزعجة بالنسبة لك ، لأنك وقتها ستضطر لقطع مسافة المطبخ كاملة ذهاب وإياب لكى تأخذ طعام أو شراب من الثلاجة ، وبما أن الديكور ليس مجرد شكل جميل للمكان ، لكن لابد من توفير اقصى درجات الراحة للإنسان.
• إذا كان سقف المطبخ منخفض فلا يجوز تركيب علب تخزين مرتفعة جدا ، لأن هذا يجعل المنظر العام سيء ، قم  بقياس الحائط وضع أبعاد السقف فى اعتبارك وعلى أساس ارتفاعه ، قم بتركب علب التخزين فى المكان المناسب.
• المبالغة فى عدد علب التخزين ، وبالتالى المساحة المتاحة من المطبخ تصبح أصغر و تصبح الحركة أصعب ، استخدم عدد مناسب من علب التخزين ليكون متناسب مع مساحة المطبخ ، بحيث تضم بداخلها كل أغراضه ولا داعى لوجود ازدحام ، ويمكنك معرفة أسس تصميم المطبخ من هذا الموضوع.
• وضع أجهزة كهربائية صغيرة الحجم فى مطبخ كبير ، وهذا يعطيك إحساس بفراغات كثيرة ، أيضا وضع أجهزة كهربائية كبيرة فى مطبخ صغير لا يستوعبها ، الأفضل أن تأخذ قياسات المطبخ بالتحديد لكى تختار أجهزة تناسب مساحة مطبخك أيا كان ، ولمعرفة المزيد عن ترتيب أجهزة المطبخ يمكن قراءة هذا الموضوع.

بعض النصائح لتجنب اخطاء الديكور

نصائح بخصوص الالوان

• من المعروف أن الألوان الداكنة تبرز ديكور المكان ، وإذا كانت مساحة منزلك ضيقة لا يشترط أن تقوم بدهانه كله بألوان فاتحة ، لكن ممكن أن تقوم بدهان حائط واحد بلون داكن مناسب وخصوصا إذا كان الفرش والأثاث لونه فاتح ، ويمكنك معرفة المزيد عن اختيار ألوان متناسقة للمنزل من هذا الرابط.
• إذا كانت ألوان دهانات الغرفة محايدة مثل البيج او الرمادي الخفيف يمكنك استخدام ألوان الاكسسوارات وخصوصا اللوحات الفنية فى اختيار ألوان مخدات كنب الجلوس و الانتريه لكسر حدة المكان.
• حاول اختيار ألوان محايدة أثناء مرحلة الدهانات ، لأن ذلك سيسمح لك بإضافة ألوان ثانوية مبهجة مع أى تغيير آخر تريد عمله فى أى وقت ، ومن الجميل أن الألوان المحايدة تتماشى مع أغلب ألوان الاكسسوارات مثل الفضى أو الذهبى وحتى النحاسى.

نصائح فى الفرش والاكسسوار

• من النقاط الهامة التى تغيب عن أذهان كثير من الناس أنه ليس فقط الألوان هى التى تحدد لك الشكل العام للمكان ، لكن هناك أيضا حجم قطع الأثاث واللوحات الفنية التى لها تأثير كبير ، لذلك ننصح دائما باستخدام اكسسوارات من المعدن فى غرفة المعيشة المودرن ، لكى تعطى حداثة وعصرية للمكان مثل بعض الاكسسوارات الاستانلس أو الفضة.
• أيضا من النقاط المهمة فى ديكور منزلك والتى لا يهتم بها بعض الناس ، وهى تغيير أغطية الكنب وأغطية المخدات الصغيرة حسب فصول السنة ، هذا الموضوع تم إجراء بعض الدراسات النفسية عليه وقد نصح الخبراء بضرورة تغيير الأغطية بألوان دافئة مثل الأحمر والبرتقالى والأصفر فى فصل الشتاء حتى تمنحك إحساس بالدفء ، وفى موسم الصيف قم بتغييرهم إلى ألوان باردة مثل الأزرق والأخضر.
• إذا كان هناك لوحة فنية لونها غير مناسب للغرفة يمكنك تغير لون الإطار ، أو إذا كانت اللوحة كلاسيكية فى غرفة ذات نمط حديث ، يمكنك تغيير خط in line ( اللون الداخلى الموجود بعد الإطار ) وتجعله حديث ، أو تغير شكل الإطار نفسه وهذا سيغير من شكل اللوحة.

نصائح عامة

• إذا كانت الميزانية محدودة فكل ما عليك هو التركيز على مناطق معينة فى منزلك ، بمعنى أنك لا تقوم بتوزيع الميزانية على كل الأماكن ، وفي نهاية الأمر تشعر أنه لم يحدث أى تغيير ، لكن اختر مكان ظاهر وقم بعمل التغييرات فيه ، أو قم بإضافة قطع أثاث لتزيين غرفة المعيشة ، أو مكتبة منزلية مميزة لكسر حدة الملل ولتغيير شكل الغرفة.
• من المهم أيضا الاستعانة بمصمم داخلى ليقوم بعمل التخطيط والرسم المبدئى لمنزلك من حيث توزيع الفرش والأثاث وتوزيع الكهرباء والإنارة بناء عليه حتى لاتحتاج إلى تكسير مستقبلى فى الحائط لإضافة بعض الوحدات كما نرى ، ومن مهامه أيضا أن يجعل الفرش مناسب لاحتياجاتك ومتطلباتك ، لأن مهمة المصمم أنها تختصر عليك المجهود والأخطاء التى من الممكن أن تقع فيها ، وهو يقلل من الوقت اللازم لتنفيذ ديكورات منزلك بفضل أطقم العمال والفنيين المتواجدين معه باستمرار والاشراف المستمر عليهم لتفادى وقوعك فى أى اخطاء مستقبلية.

كل أسرة عندها شباب وفتيات عارفة قد إيه أهمية غرف الشباب بالنسبة ليهم ، فهى مش غرفة نوم بس زى ما هى بالنسبة للكبار ، لكن بتكون غرفة نوم ودراسة واسترخاء وحتى لعب أو ممارسة موهبة زى لعب بيانو أو جيتار.

وحتى فى كتير من الأوقات بيستقبلوا في غرفتهم أصحابهم وأقاربهم ، فهنا غرف الشباب بتكون غرفة صالون ولعب ودردشة يعنى عالمهم الخاص اللى بيحسوا فيه بالأمن والهدوء ، عشان كده لازم نهتم بديكوراتها ، وألوانها اللى لابد تكون مميزة وجديدة وتشعرهم بالبهجة ، مع مراحل تغيراتهم العمرية ، بالإضافة إنها لازم تعكس شخصيتهم مش شخصية فرد تانى من العائلة.

غرف الشباب بتكون فيها متعلقاتهم الشخصية ، يعنى بلاش نتخلص من أى حاجة منها لأن لها قيمة عندهم ، وتفكرهم بذكريات تخليهم يكملوا حياتهم وهم مبسوطين يعنى بتعطى لهم طاقة إيجابية ، وفي الوقت نفسه  لابد إننا منكلفش نفسنا فى تأسيس غرف الشباب أو على الأقل التكاليف تكون معقولة ، وبالذات لو مفيش ميزانية كافية فى الوقت الحالى.

حوائط غرف الشباب

دهان الحوائط

دهان الحوائط هو من أبسط ديكورات غرف الشباب ، إلى جانب إنه هو اللى بيشد النظر وبالنسبة لدهان الحيطة اللى وراء السرير ممكن تكون بلون مميز ومختلف ، وممكن ندمج شوية ألوان مع بعض بشرط تكون متناسقة وتعطى منظر حلو للحيطة .

الألوان القوية هى اللى بتميز غرف الشباب ، وممكن على أساسها  نظبط الاكسسوار فى الغرفة ليعطيك تميز أكثر ويبرز لك وضوحها ، فلو اختارت ألوان هادئة للغرفة ، فكل اللى عليك أنك تزود الاكسسوارات وتنوعها ، وكمان تختار فرش فيه شغل زخرفته عالية ، بحيث يتماشى مع جو الغرفة.

بوسترات الحوائط

البوستر فكرة جميلة جدا ، فممكن نحط بوستر على الحيطة اللى وراء السرير ، وغالبا الشباب بيحبوا الصور الشخصية  ليهم مع أصدقائهم فى رحلة أو صور شخصية مع العائلة ، وبردو وجود بوستر لشخصية بيحبوها و متعلقين بيها ده فى حد ذاته بيعكس روحهم وشخصيتهم فى الغرفة ، ويخليهم يقعدوا فيها لفترات طويلة من غير ما يملوا ولا يزهقوا .

وجود بوستر شكله غريب وجريء زى بوستر أشكال هندسية مطبوع يعطي عمق فى غرف الشباب ، وخاصة لو أصحاب الغرف متحمسين لتغيير شكل البوسترات ، وممكن نلصق صور مطبوعة عليها تعبيرات وجوه منوعة زى وجوه تضحك أو وجوه حزينة أو  متساءلة كتعبير عن شخصيات الشباب المختلفة اللى دايما بنقابلها حوالينا.

بردو ممكن بدل ما نلصق ورق جدران فى الغرفة ، نلصق على الحيطة قماش مطبوع بأشكال وصور يختارها بذوقه الشخصى ، ودى فكرة نقدر نجدد فيها شكل الغرفة.

سقف الغرفة

ينصح انك تخلى السقف بسيط مفيش فيه زحمة ولا تفاصيل كتير عشان ميعملش تشتت انتباه ويضيع جمال باقى العناصر زى الاكسسوارات او التابلوهات.

أرضية غرف الشباب

الأرضية بتكون إما سيراميك او باركيه ملائم و مفروش بسجادة نختارها بعناية ونحدد مقاسها تبعا لمساحة الغرفة وشكل توزيع الفرش ، ولونها يكون دافىء يحسسه أكتر بالأمان وأن غرفته مميزة وجميلة.

أثاث غرف الشباب

لغرفة شباب عصرية وكمان عملية ، علينا إننا نختار أثاث للغرفة يكون تصميمه جميل ، والخامة متينة عشان يتحمل سنين من الاستخدام المتواصل ، واهم عنصر فى الفرش هو السرير اللى لازم نختار مقاسه بدقة تتوافق مع مساحة الغرفة ، وبردو نختار لونه بحيث يتوافق مع باقى العناصر ، فغالبا بيكون حجمه متوسط أو كبير وده حسب مساحة الغرفة .

شىء آخر مهم فى حالة أن مساحة الغرفة ضيقة متسمحش بوضع كنبة أو ركنة للجلوس ، وهو إننا نختار سرير ظهره مبطن باسفنج عشان يريح الجالس على السرير وبردو يكون عالى فى الطول عشان يكون مريح للرقبة ، أما بالنسبة لغطاء ظهر السرير فيفضل إنه يتغطى بغطاء غامق اللون كدرجة من درجات البنى ، ونوعية قماشه متبقاش معرضة للاتساخ بسرعة زى القطيفة ، عشان كده القطن هو أنسب أنواع القماش فى الحالة دى.

لازم يكون فى غرف الشباب الخاصة بيهم  مكتب للدراسة أو ممارسة أعمال مكتبية خاصة ، ولازم واحنا بنشترى المكتب نتأكد إنه تكون من خشب متين ، وطوله مناسب يعنى ميكونش طويل جدا ويعوق اللى بيستخدمه عن الجلوس الصحيح ، ولا يكون قصير بحيث يكون متعب بالنسبة له.

بردو من ضمن النقط المهمة لو كانت الغرفة متسعة يبقى نخصص فيها مكان للكنب ، يقدر من خلاله يقعد فيه مع أصحابه وهو مرتاح.

وبالنسبة للكومود اللى بجوار السرير فلازم يكون فى مستوى طول السرير مش أطول منه فيؤذى صاحب الغرفة لانه ممكن يخبطه وهو نايم او وهو قاعد لانه اعلى من مستواه.

وعموما توزيع الأثاث فى غرف الشباب يكون بذوق شخصى ، بس بشرط إن توزيعه يكون متناسق ، وميكونش فى ركن أو مكان من الغرفة فيه مساحة مش مُستغلة ، فمن باب الغرفة نقدر نلاحظ ده ونبص يمين وشمال ، عشان نشوف شكل توزيع الأثاث ، وأن المساحات الفاضية متاحة فى الناحيتين.

ترتيب مخدات سرير غرف الشباب

بعد ما نحط المخدات كل اثنين جنب بعض ، نرتب أمامهم مخدتين صغيرين ، ولو حابب تضيف مخدة كبيرة ودى بتكون آخر مخدة ممكن تضيفها ، فيفضل أن لونها يكون بنفس لون غطاء ظهر السرير يعنى لو هو كحلى مثلا ، خلي غطاء المخدة الكبيرة كحلى عشان يكون عندك تناسق جميل ، وهنا فى شرط أساسى وهو أن لون كل المخدات يكون لائق ويتماشى مع بعض ومع لون ملاءة السرير عشان ميحصلش تنافر وتشتت.

اكسسوارات غرف الشباب

اللوحات

لو عندك ظهر السرير عالى يفضل أنك تستغنى عن إضافة لوحة فوقه لإنه هيغطى على وجودها ، ولو ظهر السرير منخفض فمن الممكن أنك تحط لوحة كبيرة  أو عدة لوحات معبرة.

وممكن تضيف لمسة عن طريق لوحات متراصة بجوار بعض بحيث أنها تشكل سلسلة فنية ويكون مفيش مسافة بين كل لوحة والثانية ، تعطيك شكل جديد نادرا ما احنا بنشوفه فى تصاميم غرف الشباب ، و تكون فيه مساحة مناسبة بينها وبين نهاية ظهر السرير من فوق ، عشان طرف إطارات اللوحات ميكونش لامسه فيبقى المنظر سيء جدا .

أما لو كنت بتدور على شكل جديد ومختلف فممكن تضيف رف وراء ظهر السرير ويكون لونه مناسب ، وترص عليه لوحات صغيرة أو أى اكسسوار لائق ويكون لون الاكسسوار واحد مش ألوان متضاربة.

ومهم إنك متحطش لوحة واحدة حجمها صغير على الحيطة اللى وراء السرير ، لان الحيطة وقتها هتبقى شبه فاضية ، لكن حط عليها أكتر من لوحة يكون بينهم تكامل عشان تشد انتباه أصدقائك.

الاباجورات

من الضرورى وجود أباجورات بجوار السرير فى غرف نوم الشباب عشان استخدامهم الشخصى للقراءة وعشان ما يستخدموش الإضاءة الأساسية للغرفة طول الوقت ، لذلك ينصح باستغلال جوانب السرير لوضع أباجورات ، و تكون نهاية اللوحات المُعلقة محاذية لطول الاباجورة لتناسق الشكل العام.

أفكار لاستغلال مساحة غرف الشباب

مساحة التخزين في غرف الشباب لها أهمية كبيرة ، وتتمثل في أنهم بيخزنوا فيها هداياهم والحاجات اللى احتفظوا بيها زى الجوائز والميداليات وغيرها ، فنركز فى تصنيع مساحة كافية ليهم عشان ميضطروش يخرجوا بره الغرفة ، وبكده يفقدوا الخصوصية اللى بيدوروا عليها.

ممكن تتوفر المساحات دى بجوار السرير أو أسفله عن طريق تركيب خزنة كبيرة ، تكفى معظم أغراضهم ، أو استغل المكان الفارغ تحت الكنب بس بشرط أن الخزائن تتعمل بطريقة معاصرة وتبان متناسقة مع شكل الديكور كله ، و لو فيه عندك حيطة قدامها فراغ واسع ، من الممكن استغلاله فى وضع دولاب تخزين مصنوع من الخشب بطريقة مبتكرة.

لو كانت مساحة الغرفة تسمح بعزل السرير بستارة عن مكان الجلوس والدراسة ، فيفضل وضع ستارة فاصلة بحيث تسمح له التحرك بحرية بين المكانين دول ، والعزل بينهم هيعطيه خصوصية بالذات لو فى وقت وجود أصحابه بالمكان.

ولو كان عنده موهبة زى الرسم مثلا ممكن تعمل له مساحة صغيرة يقدر يرسم فيها لوحاته الفنية او مكان يقدر يعزف فيه بيانو او جيتار لو كان من هواة الموسيقى.