عزل الصوت بطرق بسيطة
  • Save

Last updated on نوفمبر 30th, 2023 at 12:26 ص

عشان يبقى الكلام واقعى مش ممكن تحقق عزل الصوت بنسبة 100% من افكار منزلية بسيطة ، لا طبعا انت مش هتعمل زى استوديوهات الصوت او المكاتب والشركات الكبيرة دى امكانيات كبيرة اوى.

افضل طريقة لعزل الصوت هى انك تمنع تسرب الصوت بتقليل الفراغات فى المكان اللى انت موجود فيه، بس خلى بالك انه هيوصلك جزء ولو بسيط من الصوت فى الداخل دى نقطة مفروغ منها لكن طبعا هيبقى جزء قليل.

من اهم الاعتبارات اللى لازم تخلى بالك منها هى الشبابيك والابواب الخشبية وطبعا الحوائط واحيانا الأرضيات لو لزم الأمر.

هنساعدك فى الموضوع ده تلاقى أدوات وخامات لعزل الصوت تقدر تلاقيهم على مواقع شراء على الانترنت ومش لازم تكون حاجة غالية اوى عشان تبقى فعالة لكن هتلاقى حاجات سعرها بسيط ونتائجها كويسة.

تعالى نشوف الافكار البسيطة اللى ممكن تعملها وتكمل عليها وتبدع بنفسك حاجات مبتكرة

ديكور غرف عازلة للصوت

ديكور غرف عازل للصوت
  • Save

تخيل معايا كده لو تكون واقف فى شقتك وهى فاضيه وانت بتشطبها مثلا واتكلمت هتلاقى ان الصوت بيرن فيها وهتسمع اى صوت فى الشارع كأنه جنب اذنك ، ده لان مفيش كتل من الاثاث والفرش تمتص الصوت عشان كده ترتيب أثاث الغرفة اللى انت فيها بهدف تقليل الضوضاء ده اول الحلول الجيدة عشان تخفف حدة الصوت اللى بره.

من افضل الطرق اللى تقلل دخول الصوت من ناحية حيطة معينة انك تخلى الدولاب او المكتبة ناحية الحيطة دى ، ودائما ركز على الحوائط المواجهة للشارع او مصدر الصوت عموما ، لأن هى دى اللى محتاجة تصد الصوت اللى جاى من ناحيتها.

بردو من الحاجات المهمة اللى ممكن تعملها وتفرق معاك انك توزع بعض الكتل على نفس الحيطة دى زى تابلوهات مرسومة او سجاد الحوائط ، وكل ما خامة قماش السجادة تبقى اكثر سماكة كل ما تمتص كمية صوت اكتر.

ولما نتكلم عن الديكور يبقى مينفعش خالص ننسى ورق الحائط العازل للصوت وده اكبر ميزة فيه انه بيعطى كتلة اضافية كبيرة للحيطة لانه مصنوع من طبقة سميكة من الفوم مش زى ورق الحائط العادي.

وطبعا من افضل الحلول الحل الموجود فى الصورة وهو البلاطات ثلاثية الابعاد 3D ، وده لانها تحتوى على مادة البوليسترين العازلة للصوت والمقاومة لامتداد الحريق ، وانسب مكان تركب فيه البلاطات دى هى الحوائط اللى ما زالت فاضية بعد ما ترص الدولاب والمكتبة فى الحيطة المواجهة للصوت ، وبكده تكون حققت شكل رائع فى ديكور الغرفة.

لازم نخلى بالنا من الفرش ، وده من احسن الوسائل اللى تمتص الصوت فى الغرفة انك تجيب ركنة غرفة المعيشة بحجم كويس مناسب ، ولو فيه مكان متسع ممكن تزود كرسى معاها ، وهنا فيه معلومة جميلة ان التنجيد المظبوط بيمتص الصوت كويس جدا لان الاسفنج ومواد التنجيد دى كلها مواد تستخدم فى العزل بس بأشكال تانية.

عزل الابواب

عزل الصوت باعادة ترتيب الفرش
  • Save
Rawpixel/istockphoto

لو بتدور على نقطة البداية فى عزل الصوت يبقى لازم تشوف الاول الابواب الخشبية اللى عندك ، هو صحيح ان الباب لما تقفله هيمنع جزء من الصوت لكن فيه جزء بيتسرب فى المسافة بين الباب والحلق نفسه.

افضل وسيلة لعزل الصوت هى انك تجيب باب سميك مخصوص لعزل الصوت لو كانت ميزانيتك تسمح ، وفيه وسائل منزلية بسيطة تخليك تعمل كده من ضمن الوسائل دى انك ترتب الفرش بحيث تقفل المسافات بين الحلق والباب لو كانت الفراغات كتير.

تاني نقطة مهمة ان الفراغ اللي تحت الباب اللى بنسميه (عقب الباب) ده ممكن يدخل منه كمية صوت كبيرة وعشان تمنع كمية الصوت دى استخدم سجادة سميكة او اى قطعة قماش تقفل الفراغ ده.

وبالنسبة لباب البيت الرئيسى اذا كانت ميزانيتك تسمح بشراء باب مصفح يكون افضل ، وده طبعا من ناحية عزل الصوت أولا ، لانه عبارة عن كتلة فولاذية مغلفة بطبقة صوف زجاجى عازل وفوقها طبقات الخشب يعنى يحقق لك عزل صوتى بنسبة كبيرة جدا ، ولزيادة الأمان ثانيا ، وده لانه مؤمن ضد محاولات السرقة والاختراق.

استخدم البطانية فى عزل الصوت

لو كنت بتدور على طريقة سهلة وبسيطة مش مكلفة ومتاحة عندك فى البيت طول الوقت تعزل بيها الصوت يبقى البطانية هى الحل اللى بتدور عليه.

رغم ان الموضوع شكله مش هيكون جمالى اوى لكنها وسيلة فعالة لتقليل كمية الصوت اللى داخل عندك فى الغرفة، لكن خلى بالك لازم تكون البطانية كثيفة عشان تقوم بالدور ده والناس اللى جربت البطانية الصوف حكت تجربتها فى الموضوع ده.

الموضوع ده بدأ ياخد اتجاه كبير وينتشر وخصوصا بعد ما توفر في الأسواق بطاطين عازلة للصوت واللى تعتبر البديل الارخص فى السعر بدل الخامات الاحترافية اللى بيتعمل بيها استوديوهات الصوت.

وبعض الشركات النهاردة اهتموا بتصنيع البطانية دى رغم ان شكلها مش حلو اوى بس عملوا منها غرفة صغيرة مخصصة للناس اللى بتسجل صوتيات، يدخل جواها ويقفلها عليه ميسمعش اى تفصيلة صوت من بره.

تركيب النوع ده من البطاطين او حتى البطاطين العادية سهل جدا ممكن تلزقه باى مادة لاصقة او تدبسه بدبابيس أو مسامير.

ستائر عزل الصوت

الستائر السميكة تعزل الضوضاء
  • Save
Siraphol/istockphoto

زى البطانية العازلة بالظبط تستخدم الستائر دى لتقليل وامتصاص الصوت قبل ما يصطدم بأي سطح قوى او عاكس زى الحوائط و الموبليات وزجاج الشبابيك.

تقدر تركيب مواسير الستائر دى فى اى مكان تحبه فى الغرفة او تحديدا فى المكان اللى بيدخلك منه صوت كتير سواء كان على شباك فى زاوية او باب فى اتجاه تانى.

تعتبر أقل فاعلية شوية من البطانية لكن لها دور مهم لو مش حابب تركب بطانية على الحيطة عشان المنظر العام فى الوقت ده تكون الستارة بديل مناسب جدا.

ومتنساش بردو ان البطانية اتعملت فى الاصل عشان الموسيقيين فمكانش الشكل مهم بالنسبة لهم اد الوظيفة.

عشان كده لما هتفرش غرفة نومك او الليفنج وبتفكر تعمل عزل صوت كويس هتركب ستارة عشان الشكل العام صعب تفكر فى البطانية.

طب لو لقيت ان الستارة العازلة دى مكلفة بالنسبة لك ممكن تركب اى ستارة عندك بس بشرط يكون قماشها سميك زى البلاك اوت ويفضل انك تعملها تفصيل بدل الستائر الجاهزة مينفعش الاقمشة الرقيقة زى الشيفون والتول والكلام ده وممكن كمان تخلى الستارة كذا طبقة فوق بعض عشان تعطي سماكة اكبر.

اهم نقطة تخلى بالك وانت بتشترى النوع ده من الستائر عشان السوق فيه كتير وفيه انواع جودتها رديئة حاول تشترى من المتاجر او مواقع الانترنت المعتمدة واللى لها تقييم عالي.

ماتنساش بردو وانت بتركب تسيب مسافة في حدود 10 سم حولين الشباك عشان تتأكد انك عزل الصوت اللى ممكن يتسرب فى الجزء ده.

فتحات الشبابيك والأبواب

بما اننا اتكلمنا عن عزل الصوت اللى متسرب من الأبواب بالبطانية والستارة لازم بردو نتكلم عن الطريقة الصح واللى هتريحك بنسبة كبيرة سواء من ناحية الابواب او الشبابيك.

الكاوتشات العازلة

كاوتشات لقفل المسافة بين الباب والحلق
  • Save
Nick Beer/shutterstock

استعملها فى الاماكن اللى بيتلامس فيها الشباك او الباب مع الحلق بتاعه وده بيضمن لك انه مقفول بمنتهى الاحكام لا يدخل منه تراب ولا هواء ولا صوت.

فرامل الباب

فرامل للباب
  • Save
Thitinat.K/stock.adobe

هل الحل المثالى عشان الباب ميقفلش جامد ويرزع لان الحركة دى مزعجة جدا وممكن تكسر الزجاج لو كان فيه او تخلى المقبض يخبط فى الحيطة كل شوية لو كان فيه ميول فى الحوائط و غلطة فى تركيب المفصلات.

مخدة الباب

الاسم غريب الى حد ما لكنها اداة جميلة جدا تمنع تسرب الحشرات والاتربة وكمان الصوت المتسرب من تحت الباب ، ومن اهم مميزاتها انها مش مصنوعة من مادة مطاطية تبطع في الأرض أو تجرح فيها، دى مصنوعة من قماش تخلى حركة الباب سهلة جدا و متعملش اى تلف للارضية.

هل كراتين البيض ممكن تساعدك

كراتين البيض لمنع صدى الصوت
  • Save
chalongrat/stock.adobe

كتير ميعرفش عن كراتين البيض انها من احسن وسائل عزل الصوت الغير مكلفة ولو كنت سألت حد من مدة كبيرة قبل ظهور الخامات الحديثة دلوقتى وقلت له اعزل الصوت عن الغرفة ازاى كان هيقولك جرب كراتين البيض.

هل الموضوع ده حقيقة فعلا ؟ علميا كراتين البيض مش بتمنع الصوت لكنه بيمر من خلالها وده لسببين الاول انها مادة مسامية والتانى ان وزنها خفيف جدا وعزل الصوت محتاج وسائل أثقل من كده.

لكن الموجات الصوتية سلوكها غريب جدا بتتكسر مع الاشكال المموجة وعشان كده هنعرف فى باقى الموضوع البلاطات العازلة، لكن كراتين البيض بتخفف صدى الصوت بنسبة كبيرة جدا يعنى الصوت مش هيمشى مسافات كتير فى الغرفة.

وعشان كده وانت بتشطب الشقة لما تتكلم تسمع صدى صوتك لان مفيش سطح حاجز فلازم تتأكد ان الغرفة مفيش فيها اسطح لامعة كبيرة او عاكسة لان ده هيعمل صدى صوت ودى هتبقى ضوضاء اضافية غير الخارجية.

بلاطات الفوم العازلة للصوت

بلاطات فوم لعمل عزل الصوت
  • Save

لما تشترى بلاطات الفوم العازلة للصوت من الانترنت او من محل تجارى فى البلد اللى انت فيها حتى لو كنت اخترت نوع جيد لكنه مش هيمنع الصوت 100% بس ده مش معناه انه ملوش أهمية بالعكس كمل قراءة الموضوع وهتفهم بالظبط.

فى علم الصوتيات فيه فرق بين 3 مفاهيم رئيسية منع الصوت وعزل الصوت وامتصاص الصوت، البلاط الفوم ده مش بيمنع مرور الصوت ولكنه يحتفظ بالصوت داخل مساماته الداخلية وده فى حد ذاته بيهدر الطاقة الصوتية وبيقلل الصدى بنسبة كبيرة جدا و هنا بقى الفوم بيقوم بدور امتصاص الصوت.

امتصاص الصوت اللى انت حصلت عليه من الفوم ده يعتبر جزء مهم جدا من عملية العزل اللى انت عايز توصلها فى غرفتك هو ممكن ميكونش عزل بنسبة 100% لكنه هيعملك تحسن كبير والميزة ان الفوم ده رخيص ومتوفر في أماكن كثيرة.

من ضمن مميزات البلاطات دى ان شكلها جميل جدا لو ركبتها فى حيطة هتعملك ديكور جميل وهتبقى إضافة كويسة جدا لو كنت مبطن الحيطة بمادة تانية تعزل الصوت فالبلاطات الفوم هتساهم معاها بشكل كبير.

اصنع الواح عزل الصوت بنفسك

الواح عزل الصوت سهلة الصنع من ادوات بسيطة
  • Save
David Papazian/shutterstock

عايز تعرف ايه احسن وارخص الطرق الفعالة لعزل الصوت عن غرفتك هي ألواح العزل، ايه هى الواح العزل دى وازاى تعملها.

اختار الخامة اللى تعجبك لعزل الصوت زى الفوم او الصوف الزجاجى تبطن بيها السطح الداخلى للالواح.

هتعمل إطار خشبي للوح العازل اللى هتبطن بيه المادة العازلة اللى انت اخترتها فى الاول مع مراعاة أن مساحة الإطار تكون اد المساحة اللى انت عايز تغطيها ويفضل انك تلزقها بالغراء العادية جوة الإطار.

بعد ما تخلص وضع الخامة العازلة فى الاطار الخشبى لازم تعمل لها شكل كويس بقماش بس اهم نقطة اتاكد ان القماش ده ميكونش عازل للصوت عشان الصوت يوصل جوه للخامة العازلة اللى هتقوم بدورها بدل ما القماش يطرده.

عزل الصوت من الأرضية

بطانة السجادة لتخفيف الضوضاء
  • Save
Andrey_Popov/shutterstock

عزل الصوت مش بس فى الحوائط ده كمان فى الارضية، اوعى تفكر ان السجاد كل غرضه فى البيت شكل جمالى وتدفئة الارضية وتنعيمها وانت ماشى عليها بس لا طبعا ده له دور مهم جدا فى تخفيف الضوضاء.

ناس كتير مفكرة ان الاسطح السميكة تعزل الصوت اكتر من الرفيعة عشان كده بيخلوا صبة خرسانة السقف سميكة اكثر على اساس انها تعزل الصوت بالعكس دى بتكون اكتر وسيلة تنقل الضوضاء وده بيظهر اكتر فى خطوات المشى ولو حاجة وقعت على الارض بيسمعها الجار اللى ساكن فى الدور اللى تحته.

وهنا بقى يظهر أهمية السجاد اللى خامته كويسة و هيمتص كل الأصوات واى اهتزاز يحصل فى الشقة محدش هيسمعه فى الدور اللى تحت ونفس الوضع بالعكس، بمعنى انك لو ساكن فى الدور الثانى وفرشت سجادة كويسة على الارضية مش هيوصلك الصوت من الدور الأول.

بردو من ضمن فوائد السجاد فى النقطة دى انه هيمتص صدى الصوت و يختزله جوة أنسجته وده طبعا هيتحقق احسن لو كان السجاد سمكه كافى لعمل العزل الصوتى.

وفيه هنا بقى معلومة جديدة لو كنت عايز تخلى السجادة عازلة اكتر بطنها بطبقة من فوم من تحت هتلاقى ان السجادة بقت سميكة اكتر هتعزل الصوت بشكل أكبر وكمان هتمتص اى صدمة احسن من الاول لان يعتبر دلوقتى فيها مخدة تحتها.

وكمان ممكن تستخدم بديل الخشب عشان تزود من عزل الصوت فى الارضية.

مصادر الصور

الغلاف sima/shutterstock

16 thoughts on “ازاى تعمل عزل الصوت فى بيتك بطرق بسيطة

  1. صراحة موضوع جميل انا شخصيا استفدت منه كتير بس فيه حاجة احب اعرفها فى موضوع العزل ده ايه رايكم فى الزجاج الدبل المزدوج فى عزل الصوت وهل هيكن أدائه احسن لو كان فى شباك الومنيوم ولا شباك بى فى سى لانى هاركب شبابيك قريب وعايز اعرف الفرق بين النوعين هل فعلا هيفرق معايا فى العزل ولا مش هيفرق

  2. شكرا يا باش مهندس، معلومات بسيطة بس قيمتها عميقه جدا، أنا أعاني من اشكايات الصوت لانه باسكن في بيت ملتصق ببيت جاري، والاصوات بتدخل الغرف بسهوله، سأحاول الاستفادة من نصائحك

  3. شكراً لك على الموضوع المهم.
    أتمنى لو كان بإمكانك الكتابة عن مواد العزل الإحترافية المستخدمة في الستوديوهات و الفرق بينها.
    أنا عندي مشكلة أن تحت بيتي مطعم عليه مراوح و ماكينات تكييف كبيرة فيها كومبريسورات كبيرة بحدود 10 طن، و بعد أن ركبت العوازل دخلت بمشكلة و هي أن هذه العوازل تفلتر الصوت مثل فلتر الصورة بمعنى أنها تصد بعض التواترات أكثر من غيرها و بالتالي من الممكن أن يكون الصوت الداخل مزعج أكثر من الصوت الأصلي.
    في حالتي التواترات المنخفضة تدخل للبيت مثل صوت الكومبريسور، هذا الصوت يسبب أذى نفسي و جسدي كبير.
    هل لديك إقتراحات لعزل هذا الصوت بعيداً عن مصدره؟ مشكلتي كبيرة مع أصحاب هذا المطعم.

    1. اهلا بك اخى الكريم تشرفنا زيارتك للموقع
      فعلا مشكلة كبيرة وجود مراوح الشفط والمكيفات أسفل المنازل ، ونتمنى أن تتخلص من تلك المشكلة فى أقرب وقت
      لكن بالنسبة لمواد العزل التى تصلح فى حالة منزلك يمكنك استخدام مواد التجليد والإكساء من الخشب مع تبطينه من الداخل بطبقة من الفوم وإحكام جميع الفتحات التى من الممكن أن تؤدى لتسرب الصوت
      مع زيادة الاسفنج الخاص بالعزل من الخارج ، وبالنسبة لمواد العزل الاحترافية المستخدمة فى استوديوهات تسجيل الصوت سنتحدث عنها بالتفصيل فى موضوع منفصل.

  4. شكرا على النصائح
    استفسار .. لو قلنا استخدام ستائر عازلة للصوت وكاوتش عازل حول النوافذ .. بيقلل الصوت ينسبة كام فى المية تقريبا .. مقارنةً بنوافذ ال PVC
    استفسار اخر .. بيتجاب منين الكاوتش العازل للصوت اللى بيكون داير على النوافذ ,, وبيتلصق بايه ؟

    1. نشكرك جدا الأخ الكريم ماجد على إعجابك بالمقال ونتمنى دوام زيارتك
      استخدام الكاوتش العازل للصوت وكاوتش عزل النوافذ من الخيارات الجيدة جدا لكن من الصعب الحكم على نسبة تقليله أو عزله للصوت كم هى بالتحديد لأن هذا يعتمد على متغيرات كثيرة منها المنطقة المتواجد بها وحجم الضوضاء فى الشارع ولكنها نسبة مرضية إلى حد كبير ، أيضا نوافذ PVC جيدة فى العزل ومن الأفضل أن تقوم بتركيب نوافذ PVC مع استخدام كاوتش العزل

      يمكنك شراء كاوتش عزل الصوت و بعض المنتجات العازلة للصوت من موقع أمازون مصر من تلك الروابط
      https://bit.ly/30se2n0
      https://bit.ly/3HtIUo8
      https://bit.ly/3oFvk8w

    1. مرحبا بك ،
      الاسفنج العادى يعزل جزء من الصوت ولكنه ليس بكفاءة الاسفنج المخصص للعزل ستجده متوفر بأغلب مواقع الشراء يمكنك شراؤه بسهولة

  5. شكرا على الموضوع القيم حضرتك ،لدي مشكل كبير مع الجار لان لديه ورشة خياطة فيها آلات صناعية صوتها قوي، متفضل ما هو الحل?

    1. شكرا لك على الزيارة ونتمنى دوام المتابعة لمعرفة كل ما هو جديد.
      بالنسبة للسؤال المطروح فإن وجود آلات صناعية هذا أمر صعب جدا التغلب عليه لأن صوتها أكبر بكثير من مجرد سيارات تمر فى الشارع ولكن نقترح بعض الحلول
      – تركيب نظام عزل صوتى فى طابوق البناء عن طريق الاستعانة بشركة عزل متخصصة
      – تبطين الحوائط بتكسيات خشبية متعددة الطبقات بينها فوم لزيادة مستوى العزل
      – ينصح بعمل أرضيات خشبية أو باركيه لأنها تقوم بعمل عزل إضافى يمكنك معرفة المزيد عنها من هذا الموضوع
      – يفضل تركيب الاسفنج العازل للصوت على الحوائط
      – يفضل عمل شبابيك من UPVC بعدد 3 طبقات زجاج ويمكنك معرفة كل تفاصيله من هذا الموضوع

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *