السنة: 2020

نظام التكييف المركزى الذى يعمل بأنابيب تغذية هو أكثر نظام فعال وقوى موجود إلى الآن سواء فى المنازل او الأماكن التجارية ، لأنه يقوم بتبريد كل غرف المنزل أو المكان بالكامل من خلال ماكينة واحدة.

من خلال نظام واحد يمكنك أن تجعل حرارة غرفة النوم مناسبة جدا لك إذا كنت تبحث عن نوم هادىء بدون إجهاد بسبب الحرارة. ويمكنك أن تجعل غرفة المعيشة مريحة جدا إذا أردت عمل تجمع عائلى للاحتفال مثلا. أو تجعل غرفة اولادك مناسبة لمذاكرتهم أو قضاء وقت فراغهم وأنشطتهم اليومية.

يتميز نظام التكييف المركزى أنه أكثر نظام تبريد مثالي للأماكن الحارة مثل منطقة الخليج العربى ، والبلاد الاكثر رطوبة مثل بعض البلاد فى شمال استراليا. أى منزل مكون من أكثر من 3 غرف نوم يتم اعتماد التكييف المركزى فيه كنظام تبريد كافى. و يسمح لك بتحكم كامل فى حرارة المكان أيا كان عدد الغرف الموجودة. وليس هذا فقط ، لكنه يحتوى على مزيل مزيل للرطوبة لتوفير مزيد من الراحة فى المكان.

كيف يعمل التكييف المركزى

يعمل التكييف المركزى عن طريق ضخ الهواء البارد فى مجموعة أنابيب معدنية من الوحدة المركزية والتى غالبا ما تكون فى سطح المنزل. ويتدفق الهواء فى أنابيب موزعة لكل غرفة فى المنزل. يميز هذا النوع من التكييفات بانسيابية دورة الهواء داخله ، والتى تسمح لك بتحكم كامل فى تدفق الهواء ودرجة الحرارة. أيضا يمكنك إغلاق التبريد عن أى غرفة تريدها وتترك باقى الغرف ليعمل بها التبريد.

تتميز طريقة عمل التكييف المركزى بأنها تقلل من تكلفة التشغيل لأنه يمكنك التحكم فى حرارة كل غرفة بشكل مستقل عن غيرها أو إغلاقها. بالإضافة إلى أنه يوفر لك مناخ معتدل فى الصيف ومناخ دافئ فى الشتاء إذا فضلت تشغيله على الهواء الساخن إذا كنت في بلد درجة حرارتها منخفضة.

متى تختار التكييف المركزى

يتساءل كثير من الناس لماذا اختار تكييف مركزى ولا اختار تكييف سبليت لكل غرفة أو حتى تكييف شباك . ما هى المميزات الموجودة فيه تجعلنى اختاره دون باقى الأنواع ؟ تعالوا لنستعرض مجموعة أسئلة إذا كانت إجابتك عليهم نعم سيكون التكييف المركزى هو الاختيار الأمثل بالنسبة لك.

• إذا كنت تحتاج تحكم كامل فى درجة حرارة كل غرفة ونسبة الرطوبة فيها وفى إمكانية تشغيل التبريد فى كل غرفة بغض النظر عن الغرفة المجاورة لها.
• هل لديك مقتنيات هامة تتلف إذا تعرضت للرطوبة المستمرة مثل بعض الكراسى والتحف والأنتيكات أو الكتب إذا كان لديك مكتبة منزلية ؟
• هل تحتاج توزيع متساوى للهواء فى كل غرف منزلك سواء كانت النوم أو المعيشة أو حتى المكتب. وهذه المشكلة تصيب الكثير بمشاكل صحية لأنك تكون جالس فى غرفة و فى ذلك الوقت يكون التكييف الاسبليت على درجة باردة ( وطبعا الاسبليت يغطى غرفة واحد فقط ). ثم تخرج لقضاء شىء معين فى الطقس الحار وقت الصيف. بعد ذلك تدخل الغرفة مرة ثانية فتصاب بنزلة برد نتيجة تغير الجو المفاجئ. لذلك هذه من النقاط الهامة جدا إذا كنت تريد حرارة موحدة لكل غرف منزلك لايكون هناك غرفة حارة وأخرى باردة.
• من مميزات التكييف المركزى عن الاسبليت والكاسيت والشباك أنه اقل الأنواع فى الضوضاء الصادرة عنه . ولذلك هو اختيار مثالى فى الأماكن التجارية والشركات ، لأنك لن تشعر بالفعل بجهاز يعمل معك في الغرفة.

مميزات التكييف المركزى

توفير أكثر فى الكهرباء

إذا كان منزلك كبير وتحتاج تكييف فى أكثر من 3 غرف منه ، فإن التكييف المركزى هو الاختيار المثالى بالنسبة لك. لأنه يوفر فى استهلاك الكهرباء أكثر من تشغيل تكييف لكل غرفة على حدة. بالإضافة إلى توفير تكاليف الصيانة بدلا من صيانة عدة أجهزة سيكون جهاز واحد فقط.

هناك بعض الناس تقول أن ماكينة تغذية التكييف المركزى كبيرة ولن توفر فى استهلاك الطاقة. لكن هذا كان قديما وحاليا تغيرت تلك المسألة. فأغلب الشركات المصنعة أنتجت وحدات التكييف المركزى بتقنية انفرتر. وتتميز تقنية الانفرتر أنها تقوم بتبريد حرارة الغرفة طوال اليوم بحيث يعمل التكييف طوال الوقت فلا يتم إيقافه ويعود للعمل من جديد لأن ذلك يستهلك طاقة أكثر.

الهدوء التام فى التكييف المركزى

بالمقارنة بأجهزة التكييف الاسبليت والشباك والكاسيت ، يعتبر نظام التكييف المركزى هو الأقل فى الضوضاء الصادرة منه أكثر من باقى الأنواع الأخرى وخاصة الاسبليت الذى يصدر عنه أصوات مزعجة فى الوحدة الداخلية.

التحكم الكامل والمرونة فى استخدامه

من ضمن مميزات التكييف المركزى أنه يوفر لك تحكم كامل فى درجة حرارة الغرفة التى تجلس فيها. وهناك بعض الأنواع تتيح لك التحكم فى الحرارة والرطوبة من خلال تطبيق على هاتفك المحمول الذكى إذا لم تكن موجود بالغرفة.

تحكم كامل مع نظام التكييف المركزى المقسم

من ضمن المميزات الرائعة فى هذا التكييف إمكانية تركيب عازل وصمامات بحيث تفصل كل غرفة عن الأخرى فى درجة التبريد. وهذا له مميزات كثيرة جدا مثل توفير الراحة فى كل غرفة على حسب راحة الأفراد الموجودين بها. أيضا توفير استهلاك الطاقة لأنك لن تضطر لدفع فاتورة تبريد المنزل بالكامل فى وقت واحد.

يمكنك ضبط درجة التبريد أثناء الليل على رقم معين تستريح فيه وقت النوم بدون أن تحتاج لتبريد باقى غرف المنزل فى نفس التوقيت بدون داعى. ينطبق هذا الكلام أيضا على الاستخدام التجارى إذا كان لديك مول تجارى أو مقر شركة ستجد أن الأماكن المهمة للتبريد هى المحلات والغرف التى يكون فيها تجمعات بشرية. في حين أن المخازن لن تحتاج لتبريد. وبذلك تكون وفرت بيئة مناسبة للعمل بالنسبة للموظفين والأفراد الموجودين بدون أن تنفق أموال كثيرة على الطاقة المهدورة.

الشكل الجمالى فى التكييف المركزى

شكل الوحدة الداخلية للتكييف الاسبليت يجعل الشكل العام ليس جيداً. حيث تجد كتلة فى وسط الحائط تمنعك أنك تضع مكانها لوحة فنية او بلاطات بارزة 3d مثلاً لأنه قام باستغلال جزء كبير من الحائط لكى يتم تركيبه. لكن مع التكييف المركزى الوضع يكون مختلف ، فهو عبارة عن أنابيب تمد تمديدها إما أن تكون مدفونة تحت الأرض أو أسفل السقف الخرسانة مباشرة ومغطاة بالسقف المعلق.  ولذا فإن شكله الجمالى أفضل بكثير من الاسبليت وأنواع أخرى.

بالنسبة للوحدة الخارجية المركزية فيمكنك أن تخفيها بعيداً عن الأنظار فى الفناء الخارجى للمنزل أو فى جزء بعيد من الحديقة المنزلية.  والوحدة الداخلية تكون بطبيعة الحال مغطاة بالسقف المعلق أو مدفونة تحت الأرض فالبتالى تكون هى الآخرى بعيدة عن الأنظار. لذلك نجد أن التكييف المركزى هو الموجود فى أغلب الأماكن العامة مثل المستشفيات والمراكز التجارية لأن الشكل الجمالى أفضل بكثير من غيره.

بالإضافة لذلك هناك نقطة مهمة لدى البعض ، وهي أن وجود تكييف مركزى فى منزلك يعزز من قيمته ويعطيه فخامة ليست موجودة فى التكييف العادى إذا كنت تفكر فى بيع المنزل.

المحافظة على صحة عائلتك

وهذا ينطبق على كل انواع التكييفات ، وخاصة التى تعمل بتقنية دورة الهواء المعكوسة والتى يتم فيها تحويل المبخر لمكثف والمكثف لمبخر. لسحب الرطوبة من الجو وإمكانية التحكم فى درجة الحرارة المناسبة خاصة فى البلاد ذات نسبة الرطوبة المرتفعة.  وهذا مفيد جداً لمرضى الربو وكبار السن والأطفال ومن يعانون من اضطرابات في المناعة.

التكييف المركزى ذو عمر افتراضى أطول

من المعروف عن أجهزة التكييف المركزى أن عمرها الافتراضى طويل. ولذا فهى مستخدمة على نطاق واسع جداً فى الأماكن التجارية ذات الإستخدام الشاق. بالإضافة إلى أنها مصممة لكى تعمل 24 ساعة متواصلة في الأماكن العامة. لذا نجد أن بعض العملاء الذين قاموا بتركيب أجهزة تكييف مركزى منذ 15 عام ، ما زال يعمل لديهم بكامل طاقته. ولم يشتكى منه  أحد طوال هذه الفترة ، ولكن يتم عمل الصيانة الدورية وتغيير الفلاتر والتنظيف له.

عيوب التكييف المركزى

تكلفة التركيب مرتفعة

على الرغم من أن التكييف المركزى موفر في استهلاك الكهرباء على المدى الطويل. لكنه مكلف فى التركيب إلى حد ما بالمقارنة بأنواع التكييف الآخرى.

التكييف المركزى يحتاج إلى تخطيط دقيق

هذا النوع من التكييفات يحتاج إلى تخطيط دقيق جداً لأن الخطأ به مكلف جداً. بالنسبة لأماكن فتحات التغذية والسحب وجريلات التهوية وأماكن المواسير والأنابيب التى يسير فيها الهواء.

اذكر لكم موقف حدث معى أثناء عملى فى أحد المحلات التجارية كنت أعمل فى الموقع بالكامل. والمالك استعان بشركة تكييف مركزى لكى تقوم بتركيبه ، وبالطبع فإن أغلب التكييفات المركزية تكون فى السقف. انتهيت من تصميم السقف مع توزيع الاضاءة وقمت بتسليمهم المخطط لمعرفة شكل التصميم.  وذلك لمراعاة التصميم مع تمديد فتحات التغذية والسحب.

وبعد الانتهاء من العمل فى المكان بالكامل والدهان انتهى. وصل الفنيين لتشغيل التكييف قبل تسليم المكان. لأجد الفنى يقول لى أنهم بحاجة إلى تكسير السقف لفتح فتحة لأعمال الصيانة لأنها لم تنفذ اثناء مرحلة التأسيس. فقلت له لماذا لم تقوم بعمل فتحات السحب بحيث تكون هى فتحات الصيانة. وتستطيع من خلالهم فك Diffuser بمنتهى السهولة وتقوم بعمل الصيانة منه ، فقال لم نفكر هكذا أثناء عملنا.

وبالطبع هذا خطأ كبير جداً من شركة التكييفات وهو نسيان فتحة الصيانة أثناء التأسيس. وذلك على الرغم من انى كنت قد قمت بالإتفاق معه على عمل فتحة السحب مخصصة للصيانة للحفاظ على الشكل الجمالى وعدم وجود باب كشف.  لذلك بعض الناس تتعب جداً فى أعمال التكييف المركزى لأنه يجب ألا يكون به أى خطأ ولذا فإن البعض لا يفضل تركيبه.

التكييف المركزى لا يصلح لكل الأماكن

من عيوب التكييف المركزى انه يحتاج إلى مساحة فى فناء منزلك لتركيب الوحدة الخارجية أو مساحة على سطح المنزل. فمن الممكن ألا يكون متاح بالنسبة لك استغلال هذه الأماكن خاصة إذا كنت تقيم فى عمارة سكنية مع جيرانك ولست فى منزل مستقل. أو إذا لم يكن لديك مساحة فارغة خارج المنزل أو على السطح. ولذلك لابد قبل أن تفكر فى تركيبه أن تقوم بعمل مقايسة بكل فنيات التركيب التى سيتم إجراؤها مع عمل مخطط كامل من الشركة التى ستقوم بالتنفيذ.

كيف تعرف جودة التركيبات الموجودة لديك

تركيب التكييف المركزى معقد أكثر من تركيب تكييف الاسبليت. مثلما أشرنا من قبل فإنه يحتاج إلى تخطيط دقيق في أماكن أنابيب التهوية وفتحات التغذية والسحب.  فلكى تقوم بتركيبه وأنت مطمئن لابد أن تتأكد أن القطع والمعدات التى سيتم تركيبها فى منزلك من أفضل الأنواع من حيث الجودة.

التأسيسات والتركيبات

على سبيل المثال ، أنابيب التهوية لابد أن تكون على مستوى عالى جدا لتحمل الحرارة وفى العادة تكون مقسمة إلى تصنيفات وفئات. لابد أن تتأكد أن الشركة التى ستقوم بالتركيبات تستخدم مواسير فئتها عالية مثل فئة R المعروفة بتحمل أقصى درجات حرارة وتضمن أفضل مستوى عزل. أيضا لابد أن تتأكد بنفسك من فئة الأنابيب هل هى مطابقة للمواصفات أم لا.

نفس الكلام ينطبق على وحدة التشغيل ، لابد أن تتأكد أنها من النوع الموفر للطاقة وهذا تعرفه من عدة نقاط. يمكن أن تجد مدون عليها كلمة انفرتر وهذا معناه أنها تعمل بتقنية انفرتر. ويمكن أن تجد عليها ملصق لبطاقة استهلاك الطاقة لابد أن تكون فئة A أو أعلى.

التعامل مع الهاتف الذكي

بعض شركات التكييف المركزى التى تقدم منتج جودته عالية تتيح توافقية فى الأجهزة مع التطبيقات التى تعمل على الهاتف الذكى أو التابلت. وهذا يمنحك فرصة للتحكم الكامل فى درجة حرارة غرف منزلك كلها من خلال هاتفك. ويمكن أن تغلق جهاز التكييف عند الخروج من المنزل فى الصباح وتذهب للعمل إذا نسيت إغلاقه لحظة خروجك. ويمكنك فتحه لتهيئة درجة حرارة المنزل قبل وصولك لتكون مناسبة بدلا من الانتظار.

تقنيات إضافية

تخيل معى أنك جالس بمفردك في الغرفة وقمت بضبط درجة تبريد التكييف على رقم معين ثم دخل مجموعة من أصدقائك للغرفة ستجد مع مرور وقت بسيط أن حرارة الغرفة بدأت تزداد وستحتاج أن تزيد درجة التبريد مرة أخرى. لذلك أضافت كثير من الشركات ميزة رائعة وهى جهاز استشعار يمكنك إضافته للتكييف لكى يستشعر حرارة الغرفة فإذا زادت يرفع هو مستوى التبريد تلقائيا بدون تدخل منك.

ناس كثير تعرف مراحل تشطيب الشقة وبتشتغل فيها لوحدها بدون ما ترجع لمهندس متخصص ، ويظن انه كده بيوفر الأتعاب اللى بياخدها المهندس او الشركة المتخصصة ، لكنه ميعرفش ايه اللى ممكن يقابله وهو شغال في الشقة ويفاجىء بعد ما يخلص انه محتاج يركب التكييف فيضطر يكسر فى الحيطة ، عشان يقدر يركب الوحدة الداخلية وتوصيلات الكهرباء اللازمة لجهاز التكييف ويرمم التكسير اللى اتعمل باسمنت او جبس ويبقى الشكل سيء جدا ، لكن اللى غايب عنك فى الموضوع ده مرحلة من ضمن مراحل التشطيب بنعتبرها أساسية وهي تأسيس التكييف الاسبليت واللى بيتم فيها كل التجهيزات اللازمة لتركيب التكييف مستقبلا اذا حبيت تركبه فى اى وقت.

كلنا عارفين اكثر نوع تكييف مستخدم فى بيوتنا وحتى الشركات والمكاتب بيكون من النوع سبليت Split وهو عبارة عن وحدة داخلية بتكون داخل الغرفة اللى احنا فيها ، ووحدة خارجية بتكون خارج الغرفة واللى فيها الكمبريسور ، واللى بيوصل الهواء البارد بينهم مجموعة مواسير نحاس ، وطبعا فيه كابلات كهرباء عشان جهاز التكييف يشتغل.

عشان تشغل التكييف وتكون مستريح فيه الموضوع مش هيبقى قاصر على اختيارك لنوع تكييف جيد واختيار احسن مكان مناسب له فى الغرفة وبس ، لا الموضوع له ابعاد تانية كثير تؤثر على ادائه وهو شغال من ضمن الأبعاد دى هى مراحل عملية تأسيس التكييف الاسبليت ، واللى أصبحت جزء مهم من مراحل تشطيب الشقة.

ايه هى عملية تأسيس التكييف الاسبليت

تأسيس التكييف الاسبليت هى عبارة عن عملية تشبه تأسيس السباكة وتأسيس الكهرباء من حيث تكسير محارة الحوائط ودفن المواسير بداخل الحيطة ، لكن يزيد على كده دفن نوع تانى من المواسير وهى مواسير تبريد التكييف المصنوعة من النحاس النقى ، واللى بتوصل الهواء البارد ما بين الوحدة الخارجية والداخلية.

مكان الوحدة الداخلية

يتم تركيب الوحدة الداخلية على قاعدة معدنية ، يفضل انك تركب القاعدة المعدنية بمسامير ربط قوية لحد ما تكون ثابتة تماما ، مع مراعاة انها تكون مستوية تماما وده تقدر تختبره بميزان المياه العادى او الديجيتال لضمان تركيبها بمستوى افقى ، وخلى بالك لو مكانتش القاعدة مستوية وكان فيها ميول هتلاقى مياه الصرف مش هتخرج مظبوط.

اختيار مكان الوحدة الخارجية فى تأسيس التكييف الاسبليت

ثانى جزء من اجزاء التكييف هو الوحدة الخارجية ، ودى لازم تعمل حسابك انها تكون متركبة فى مكان بعيد تماما عن اى جزء من الغرفة ، زى البلكونة او المنور لأنها تصدر اصوات وينتج عنها اهتزازات تختلف من كل نوع للثانى ، لذلك ننصح بوضع قطعة من الفوم تحتها بينها وبين الحامل المعدنى لدعمها عشان تقلل من الاهتزازات وهى شغالة.

من اهم النقط اللي لازم تراعيها أثناء تركيب الوحدة الخارجية أن يكون قدامها مسافة كافية لتحريك الهواء الساخن الناتج عن تبريد الكمبريسور الداخلى ، على الاقل 60 سم من قدام المروحة لطرد الهواء الساخن و 30 سم من وراء المروحة ، عشان دائرة التهوية تشتغل بشكل مظبوط ميكونش فيها اى اعطال.

فيه مجموعة نقط كثير لازم تراعيها أثناء مرحلة تأسيس التكييف الاسبليت ، من ضمن النقط دى بالنسبة للوحدة الخارجية وخاصة لو كنت ساكن فى شقة سكنية فى عمارة مع سكان تانيين ، يبقى الحل الوحيد بالنسبة لك فى الحالة دى هو أن الوحدة الخارجية تتركب فى البلكونة ، وطبعا لازم تعرف مقاسات البلكونة عندك كام بالظبط وتشوف مقاسات الوحدة الخارجية كام عشان تشوف تتناسب معاها او لا ، وده هتلاقيه مكتوب على مواصفات التكييف على الانترنت او فى موقع الشركة المصنعة أو الكتالوج الخاص به.

المحافظة على الوحدة الخارجية

أهم نقطة تخلى بالك منها انك تحذر جدا من تغطية المروحة الخاصة بتبريد الكمبريسور ، لان لو ده حصل ممكن يحرق الكمبريسور الداخلى لانه بيكون سخن جدا اثناء الشغل ومحتاج تبريد مستمر ، وده طبعا بيظهر فى التكييفات العادية أكثر من الانفرتر ، لانها بتشتغل مدة اطول وعشان كده استهلاكها فى الكهرباء أعلى.

كمان من النقط المهمة اللى لازم تراعيها هو إنك تحافظ على سلامة الوحدة الخارجية ، بمعنى انك طالما هتركبها فى البلكونة يبقى ممنوع نهائى تخلى فوقها اى اوعية زرع او شوايات لو كنت بتحب تعمل الباربكيو فى البلكونة ، لإن ده مش بس هيضيع لك ضمان الجهاز لكن ده ممكن يتلفه ، كمان مينفعش انك تغطى المروحة لأنها وسيلة التبريد الوحيدة للكمبريسور الداخلى ، واحنا كنا بنأسس اماكن لبعض التكييفات فى بيوت اكتشفنا ان اصحاب البيت كانوا مغطيين مروحة التكييف وللاسف الجهاز اتحرق.

مواسير صرف المياه فى نظام تأسيس التكييف الاسبليت

تخيل معايا انك مركب تكييف سبليت وانت قاعد فى بيتك او مكتبك هتلاقى نقط مياه بدأت تنزل من فتحة خروج المياه الموجودة في الوحدة ساعتها بتوصل توصيلة او خرطوم بلاستيك داخلي يملا علبة او زجاجة فارغة ولحظة ما تمتلىء بالمياه تفرغها وهكذا.

تخيل كمية المعاناة دى مع الوحدة الداخلية أو الوحدة الخارجية لما تلاقى ماسورة صرف المياه خارجة فى الشارع بترمى المياه بالطريقة دى ، طبعا دى طريقة عشوائية ، لكن فيه حل هندسي بسيط جدا بيتعمل فى تأسيس التكييف الاسبليت وهو ماسورة صرف بلاستيك يتم تركيبها فى الحيطة مع التأسيسات اللى بتتعمل زى ماسورة التبريد وزى تمديدات الكهرباء ، ونقطة نهايتها بتكون فى الصرف الرئيسى للمكان سواء كانت بلاعة او اى وسيلة تانية لتجميع مياه الصرف.

زى ما احنا عارفين المياه تتجه ناحية الاتجاه المائل ، لذلك مهم جدا انك تحدد اتجاه ميول الماسورة اللى هيمشى فيها مياه صرف التكييف ، يعنى مثلا خلى المسافة العمودية بينها وبين الوحدة الداخلية على الأقل 40 سم لضمان عدم ارتجاع المياه ناحية الوحدة الداخلية مرة ثانية إذا كانت المسافة قريبة ، بعد المسافة العمودية يتم عمل ميول للماسورة لضمان خروجها بأمان ناحية الاتجاه اللى هتصرف فيه المياه.

فيه نقطة مهمة جدا أثناء تأسيس التكييف الاسبليت وتحديدا فى تركيب ماسورة الصرف انك لازم تعمل لها اختبار قبل مرحلة الفنش وتغطية الحيطة بالمحارة ، وده إجراء أغلب الشركات اللى بتركب التكييفات بتعمله لضمان عدم تسرب اى كمية مياه ، لان لو حصل تسرب للمياه أثناء الصرف هتبقى كارثة لانها هتعمل تلف فى خرسانة السقف والأرضيات.

توصيل تمديدات الكهرباء فى تأسيس التكييف الاسبليت

زى اى جهاز كهربائى لازم يكون فيه عندك كابلات لتغذية التكييف بالكهرباء ، ودى من الحاجات اللى هتعمل حسابك عليها أثناء عمليات تأسيس التكييف الاسبليت ، هتكسر جزء من الحيطة لتمديد ماسورة الكهرباء اللى هيتم فيها تمديد السلك المناسب اللى هيشغل الجهاز بعد كده.

عشان تقدر تحسب كمية الكهرباء اللازمة لتشغيل التكييف تقدر بحسبة بسيطة تحسبها او تقرأ موضوع كابلات الكهرباء ، ومن خلاله هتعرف بالظبط ايه هى كثافة السلك المطلوبة اللى تقدر تركبه بعد كده عشان التكييف يشتغل بأمان.

وهنا نحب نقدم لك نصيحة من الخبراء ، وهى أنه يفضل انك تخلى كهرباء التكييف على مفتاح اتوماتيك مستقل ميكونش محمل على نفس المفتاح المخصص للغرفة اللى انت فيها عشان لو حصل له اى مشكلة زى شورت كهربائي مثلا او حصل فيه عطل ومحتاج صيانة ، تقدر تفصله براحتك بدون ما تطفى الاضاءة وباقى اجهزة المكان اللى انت موجود فيه.

مواسير التبريد فى تأسيس التكييف الاسبليت

هنا بقى النقطة المهمة جدا واللى من غيرها مش بس شكل المكان عندك بيكون سيء جدا ، لا دى كمان من اسباب ضعف التبريد في جهاز التكييف وهى مواسير التبريد الخاصة بالتكييف ، و اللى بتشوفها فى الاماكن اللى مكنش معمول لها تخطيط من البداية ، وبتلاقيها عبارة عن مواسير نحاس مع كابلات كهرباء ملفوفين بشريط لاصق ابيض او اى لون واصلين من الوحدة الخارجية للوحدة الداخلية لتوصيل الهواء الخاص بالتبريد وهو غالبا بيكون غاز الفريون.

عشان يكون شكل بيتك أو مكتبك انيق مينفعش ابدا تكون المواسير دى ظاهرة فى الخارج بالشكل ده ، ده بالاضافة ان كده خطر جدا لان لو حصل اى صدمة للمواسير دى او اتخبطت بأي طريقة ممكن تسرب غاز الفريون وده ملوث جدا للبيئة ، وكمان هيقلل العمر الافتراضى للتكييف لأن غاز التبريد بيتسرب للخارج مش بتستفيد منه فى تبريد المكان.

مكان تركيب مواسير التبريد

عشان تعمل تأسيس التكييف الاسبليت بشكل صح لازم تكون المواسير دى مدفونة داخل الحيطة مع مراعاة انها تكون باقل مسافة ممكنة ، وهنا نقدر نقولك على نصيحة مهمة وهى انك تحاول تخلى المسافة بين الوحدة الخارجية والداخلية قريبة عشان متجبرش جهاز التكييف انه يشتغل لفترة أطول فترة ممكنة وبكامل قوته عشان يقدر يبرد المكان ، وده هيقصر عمر التكييف الافتراضي لانه كده هيشتغل فترات كثير ، لكن لو بقت مسافة المواسير اقل هيعطى فرصة للتكييف انه يفصل.

من النقط المهمة جدا اللي لازم تراعيها أثناء عملية تأسيس التكييف الاسبليت هى ان ميكونش فيه انحناءات كثير فى الماسورة النحاس لتوصيل غاز التبريد بكل طاقته ، بالاضافة الى وجود الفوم العازل سليم ومش مقطوع من اى جزء فيه.

لو كنت مضطر لتمديد مواسير النحاس الخاصة بالتبريد لمسافة طويلة تزيد عن 120 سم ، يبقى حاول انك تضيف دعم للماسورة كل 120 سم عشان تضمن انها تفضل مستوية معاك ميحصلش فيها انحناءات طول المسافة وهي ممدودة.

جودة مواسير التبريد

عشان تحصل على تبريد مثالى من جهاز التكييف عندك ، لازم تتأكد من جودة المواسير النحاس اللى بتوصل الهواء البارد من الوحدة الخارجية للداخلية ، ودى مش بس مستخدمة فى التكييف لكن كمان مستخدمة فى الثلاجة واى جهاز له منظومة تبريد عموما.

لازم تكون المواسير من نوع جيد جدا عشان تضمن سلامة وصول غاز التبريد بين مكونات الجهاز ، والا يتسرب للخارج ويبقى كل اللى انت بتعمله بدون فائدة ، او يدخل بعض المؤثرات الخارجية جوة نظام التبريد زى الرطوبة او الاتربة ، ودى ممكن تسبب ضعف في اداء التكييف او ممكن تتلفه.

أثناء تصنيع المواسير النحاس ، يتم تنظيف الطبقة الداخلية للمواسير وتجفيفها قبل ما يتم عزلها عشان تفضل بنفس حالتها لحد ما تشتريها وتركبها بين أطراف وحدات التكييف ، كمان من النقط اللى لازم تراعيها انك تستخدم غاز تبريد ميتفاعلش مع المواسير النحاس زى الأمونيا ، ده ممنوع استخدامه نهائى لانه يتفاعل مع النحاس.

انواع المواسير النحاس

 

نوع صلب

النوع ده من المواسير صلب جدا وقوى ويتحمل الضغط الشديد ، مش من السهل انه يتشكل وتعمل فيه انحناءات ولا ينصح اصلا انك تعمل فيه كده ، متوفرة بأطوال تتراوح بين 3 – 6 متر ، ومتوفر منه 3 أوزان مختلفة كل نوع منهم له اسم بحرف انجليزي يمثل درجة سماكته وتخانته.

اكثر نوع سميك هو K ، يليه L ثم M ، لو كنت بتدور على ماسورة كثافتها عالية لتحمل الضغط العالى يبقى النوع اللى كثافته K هو الأنسب لك ، وبالنسبة للنوع L تتراوح أقطارها ما بين 1.25 – 8 سم لتناسب كل أغراض التبريد.

نوع مرن

النوع ده مرن جدا وسهل فى تشكيله له رمز كودى ACR وده يعتبر هو النوع المثالي لكل أغراض التبريد والتكييف ، وده يعطيه ميزة رائعة لأنه هيتشكل بسهولة وهيمشى داخل الحوائط ، من ضمن مميزاته يتم تنقيته وتجفيفه تماما من اى نسبة رطوبة موجودة فيه ، بعد كده يتم تعبئتها بالنيتروجين قبل ما تتقفل ، يتوفر منه لفات باطوال تتراوح ما بين 7.5 – 15 متر وباقطار ما بين 0.3 – 4 سم لتناسب كل أغراض التبريد.

نصائح عامة فى تأسيس التكييف الاسبليت

عشان تتفادى اى اخطاء ممكن تحصل بعد كده لتأسيس التكييف الاسبليت اللى انت عملته ، يفضل انك تحتفظ بنسخة من الرسومات الهندسية المعمولة لخطوط التبريد والكهرباء وصرف المياه ، لان لو مش معاك المخططات دى ، ممكن بمنتهى البساطة أثناء الصيانة فى الحوائط او تخريم بالشنيور ممكن الفنى بدون ما يعرف يخرم اى ماسورة فيهم ، ساعتها هتلاقى الغلطة دى تكلفك كثير ، وعشان تتفادى المشاكل دى ممكن تستخدم جهاز الاستشعار اللى بيحدد لك مكونات الحائط من الداخل سواء مواسير نحاس او بلاستيك او كابلات كهرباء.

تسرب المياه مشكلة صعبة بتواجه كتير من البيوت وبتخلى البيت مليان مياه سواء كان دور ارضى او بدروم (قبو) ، وده بيحصل نتيجة ماسورة مياه اتكسرت داخل الحيطة اذا كانت فى سباكة المطبخ أو الحمام ، او تحت بلاط الشقة إذا كانت معمولة لغرض تصريف مياه معين زى تصريف مياه التكييف اللى بيتم عمله أثناء عملية تأسيس التكييف ، وبينتج عنه مشاكل كثير جدا خاصة لو حصل فى مكان مش ظاهر.

لما بتقابل مشكلة زى تسرب المياه فى بيتك بتتوتر جدا ، وبتبقى قلقان ان المواسير تآكلت أو حصل فيها صدأ ، وهتبقى خايف ان البدروم او الدور الأرضى يتملا مياه ، أو أن الحنفية او الخلاط يكون بيسرب مياه بقاله فترة وانت متكونش عارف اذا كنت مسافر مثلا ، وبتفضل فى الوقت ده تفكر فى حاجات كثير جدا اولهم انك ازاى توقف التسرب ده عشان ميتلفش الحوائط او الارضيات او السجاد الموجود ، اذا وصلت المياه لباقى غرف البيت ، او حتى سجاد الحمام.

عشان تقدر تتعامل مع مشكلة التسرب لازم الاول تعرف مصدر التسرب فين ، هل هو من خلاط الحمام ولا خلاط المطبخ ، ولا من تآكل أجزاء فى بعض الحنفيات ولا هل حصل مشكلة فى ماسورة معينة ، وهل اللى حصل ده ممكن يضر ولا آثاره مش سيئة بدرجة كبيرة.

الدليل على وجود تسرب المياه

لو شاكك أن فيه تسرب مياه عندك فى البيت ، ومش متأكد من الموضوع ده ، لازم تتأكد الاول قبل ما تعمل اى حاجة ، زى مثلا الارتفاع غير المسبوق فى فاتورة المياه ، أو أنك لاحظت ظهور صدأ فى المواسير ، أو أن لون الحوائط اتغير وبقت أغمق شوية فى اللون ، بسبب أنها تشبعت بالمياه المتسربة ، أو وجود مياه على أرضية المطبخ أو الحمام باستمرار ، او تقشير ألوان دهان الحوائط أو خروج ورق الحائط وفكه من الحيطة ، او ظهور الرطوبة فى السقف أو على الحوائط.

وممكن تلاقى علامات ظاهرة زى حنفية المياه بدأت تسقط نقط مياه بالتدريج كل يوم ، وده بسبب تآكل جزء معدنى من الصواميل اللى رابطة اجزاء الحنفية دى مع بعض ، وده هيخلى المياه تتراكم وتشوفها بنفسك وده بيسبب لك مشاكل كثير.

لما تلاقى أى علامة منهم قدامك ، لازم تعالج الموضوع فورا قبل ما يتطور ، ويعمل لك مشاكل تضر البيت كله.

اشكال وانواع تسرب المياه

تسرب غير مدمر لكنه مكلف

النوع من التسرب رغم انه متعب بالنسبة لك لكنه مش بيسبب اضرار جسيمة فى بيتك ، لكنه هيكلفك وقت ومجهود وأموال كثير عشان تقدر تعالجه ، زى مثلا رشاش المياه اللى بيروى الحديقة المنزلية عندك هتلاقيه بيسرب مياه او بتخرج منه فى اتجاه غير الاتجاه الطبيعى لها يعنى ممكن تلاقيه بيرمى المياه فى الهواء ، ومن ضمن أشكال التسرب ده لما بتدخل الحمام تلاقى قاعدة التواليت بتسرب مياه رغم انك مستخدمتش الحمام من فترة.

تسرب مائي قليل لكنه هيتطور مع الوقت

تسرب المياه القليل مش هيعمل أضرار كبيرة فى البداية ، لكن لو تم إهماله ، هيزيد مع الوقت وهينتج عنه ضرر أكبر في المستقبل ، وغالبا النوع ده من التسرب مش بيكون ملحوظ فى بداية ظهوره ، زى التسريب فى الحائط اللى يسمى (نشع) ، اوتسرب الحنفية او الخلاط أو مسطرة الدش ، أو التنقيط اللى بيحصل من بعض الأجهزة وده احيانا يمثل خطر كبير لو التسرب ده كان قريب من مصدر كهرباء ، زى غلاية الشاى وسخان الماء اذا كان كهرباء او حتى سخان الغاز.

تسرب مياه يسبب مشاكل فورية

من حسن حظك ان اى نوع من أنواع التسرب اللى ممكن تحصل مش من النوع ده ، لأن النوع ده لو حصل هيسبب لك مشاكل كتير ، وعشان كده هو اكثر نوع تقدر تلاحظه بمنتهى السهولة مش محتاج انك تدور عليه كثير ولا هتحتاج اجهزة متخصصة لكشفه ، لأنه لو حصل هتلاقى بيتك اتملا مياه تماما بسبب اما صدا واضح وكبير فى المواسير أو كسر بسبب ضغط شديد مثلا ، لذلك لو ظهر عندك اى تلف او كسر فى المواسير لازم تتعامل معاه فورا.

من ضمن أشكال تسرب المياه الخطيرة فى البيت هو تسرب المياه من الخزان الخرسانى ودى من اكبر الكوارث اللى ممكن تقابلها لو عندك فيلا وفيها خزان فى الحديقة ، لازم تتأكد من جودة بناء الخزان وجودة نظام عزل خزان المياه لان ده هيضمن لك عدم التسرب نهائى.

تسرب المياه تحت الأرضية

تسرب المياه تحت الارضية شىء صعب جدا ويعتبر اخطر الانواع ، عشان معالجته عملية مجهدة ومكلفة وتحتاج لوقت طويل ، لانك هتضطر تكسر كل الأماكن المشكوك فيها زى أسفل الأرضيات لو كان فيه مواسير مدفونة تحت ، وللاسف بعض الناس بتفتكر أن تسرب المياه مشكلة بسيطة لا تستدعى العلاج المبكر ، وده بيخلى المشكلة تتحول لكارثة كبيرة مع مرور الوقت هيخلى حوائط بأكملها تقع ، والاسقف الخرسانة تتدمر لأن حديد التسليح بيتاكل.

لذلك ننصحك بالتعامل السريع مع تسرب المياه فور اكتشافه وخاصة انه اصبح اسهل كثير من قبل كده فى عصرنا الحالى بعد التقدم العلمى والتكنولوجيا اللى بقت موجودة وتوفر اجهزة كشف تسرب المياه اللى وفرت وقت وتكلفة ومجهود إضافى ، لأن اكتشاف مكان التسرب أصبح بدون تكسير فى الحوائط ولا الأرضيات ، يعنى مش هتتعب عشان تكتشف المكان ، كل اللى عليك انك هتوجه جهاز الكشف على الجزء اللى انت شاكك فيه وهتعرف من على الشاشة او من الانذار وجود تسرب أو لا.

طرق التعامل مع تسرب المياه

اقفل كل مصادر المياه

اقفل كل الحنفيات والخلاطات الموجودة فى البيت و متستخدمش اى مياه فى الوقت ده ، عشان تقدر تتأكد هل فيه عطل فى المواسير والتمديدات او لا ، اذا المياه فضلت شغالة وماشية فى المواسير كده يبقى المشكلة تعقدت وهتحتاج منك مجهود أكبر عشان تقدر تحلها.

تأكد من العداد

بعد ما تقفل كل مصادر المياه ، لازم تتأكد من العداد ، وده تقدر تعرف منه إذا كانت المياه لسه شغالة ولا توقفت ، عن طريق المؤشر الصغير واللى بيكون على شكل ترس او مثلث او نجمة صغيرة على حسب الشركة المصنعة للعداد والبلد اللى انت موجود فيها ، لو كان المؤشر لسة شغال ، فمعنى كده ان المياه لسه شغالة فى المواسير ، وكده تقدر تتأكد من وجود تسرب مياه فى البيت بنسبة 100%

اقفل مرحاض الحمام (التواليت)

اكثر نوع مشهور جدا فى تسرب المياه فى اغلب البيوت هو اللى بيحصل من مرحاض الحمام ، اقفل كل المراحيض الموجودة عندك لو كان فيه كذا حمام لكن كل واحد لوحده ، وشوف مؤشر العداد الصغير بعد ما تقفلهم واحد وراء التانى ، لو المؤشر وقف عن الدوران بعد القفل يبقى كده انت عرفت ان المرحاض اللى انت قفلته ده هو مصدر تسرب المياه ، ولو المؤشر متوقفش عن الدوران اقفل المرحاض اللى بعده لحد ما يقف.

اقفل الاجهزة واحد بواحد

لو بعد ما قفلت كل الحنفيات والخلاطات ومراحيض الحمام ومؤشر العداد استمر فى الدوران ، يبقى ده دليل على أن مصدر تسرب المياه مش منهم لكن من مكان تانى ، عشان تقدر تحدد مكانه اقفل الاجهزة اللى بتستخدم المياه واحد وراء التانى زى غسالة الملابس وغسالة الاطباق والسخان ، ومع كل جهاز شوف العداد توقف عن الدوران ولا لسة.

بعد ما قفلت كل الحنفيات والخلاطات والمراحيض وملحقاتها ، وتأكدت من الاجهزة اللى بتسحب مياه انها مقفولة ولقيت ان مؤشر العداد لسه بيلف كده يبقى مصدر تسرب المياه غالبا هيكون من الارضية ده معناه انه ممكن يكون ماسورة اتكسرت ومدفونة تحت الارض ، او ممكن تكون ماسورة تصريف مياه التكييف ، كده يبقى هتحتاج تستدعى السباك عشان يحل المشكلة بشكل احترافى اكثر لان معاه معدات متخصصة فى كشف التسريب.

اقفل مصدر المياه الرئيسي

اعرف مكان عداد المياه فين بالتحديد واقفل المحبس الرئيسى ، عشان المياه متفضلش تتسرب اكثر من كده وتتلف الحوائط و الخرسانة وحديد التسليح وممكن تخلى السجاد يعفن.

نظف آثار تسرب المياه

لو اكتشفت مصدر تسرب المياه بدرى يبقى كويس جدا عشان تقدر تنظف اثر المياه اللى وقعت ، لانك لو تأخرت فى عمل ده هيسبب تعفن و رطوبة زائدة فى الحوائط ، عشان كده ابعد اى شىء طالته المياه وحاول تجففه تماما سواء كان فرش او سجاد ، ومتحاولش تستخدم اى شىء وصله مياه لانه ممكن يتعفن لو متمش تهويته كويس جدا.

نصائح عامة للتعامل مع تسرب المياه

• لو فشلت فى إصلاح مشكلة التسرب لوحدك بعد ما تأكدت من كل النقط دى استدعى سباك لإصلاح المشكلة ، او ممكن تكلم خدمة العملاء تعرف مصدر التسرب ايه وتحل المشكلة ، ولو كان عندك خزان مياه خرسانة لازم تتصل بشركة العزل اللى ركبت نظام عزل الخزان تكشف مصدر التسريب وتعالجه.
• قبل التنظيف افصل التيار الكهربى عن المكان ، وده شىء أساسى خاصة لو كانت المياه أعلى من أماكن مخرج التيار زى بعض البرايز او اماكن التوصيل واحنا كلنا عارفين ان المياه من الموصلات الجيدة للكهرباء ، ولو كان قاطع الدائرة الكهربائية او المفتاح الاتوماتيك بعيد عن متناول ايديك ومش قادر تفصل التيار ، يفضل انك تتصل بكهربائى.
• لازم تطهر أى شىء لمسته المياه الراكدة وخاصة لو فضلت موجودة كذا يوم عما مشكلة التسرب تتحل ، وافتح الشبابيك والأبواب ، عشان تساعدك فى تجفيف المكان من المياه.

وسائل متقدمة لاكتشاف تسرب المياه

بعد ما تخلص كل محاولاتك فى كشف مكان التسريب ، يجى دور اجهزة الكشف لمعرفة مكان التسرب بالتحديد وخاصة لو كان صعب الوصول له زى خزانات المياه الخرسانية ودى أجهزة بيستخدمها المحترفين والشركات ، عن طريق توصيل المعدات دى بمواسير المياه ، وكمان بتتوصل بجهاز ضغط غاز النيتروجين ، واللى من خلاله بيتم معرفة مشكلة التسرب اللى فى البيت ، من خلال اهتزازات مؤشره ، ولو حصل اى تسرب فعلى فى نقطة معينة ، فالجهاز ده هيعطيك إشارات صوتية تدل على مكان التسرب المائى ، لأن الأذن مش بتسمع صوت التسرب وخاصة لو فى مكان ضيق ، كمان فيه كاميرات حرارية ومعدات خاصة بالمنظار ، تقدر تكشف لك عن تسرب المياه ، ومن خلالها تقدر تميز مكان التسرب بدقة عالية جدا.

تقدر تكتشف مكان تسرب المياه فى بيتك ، من خلال استعمال بعض الصبغات الخاصة بالفلور أو الملون الغذائى الصحى ، ومن مميزات الصبغات دى انها مش بتسبب مشاكل لصحة الانسان ، ولما تشوف اتجاه الصبغة هتعرف تحدد أماكن التسرب المائي بالظبط.

بردو فيه جهاز الميكروفون الأرضى ، وده جهاز متخصص في كشف التسرب المائي ، ويقدر من خلاله الفنى المختص يحدد أماكن التسرب ، بوضع الميكروفون فى بعض الأماكن المحددة ، وبعد كده يسمع أصوات التسرب المائي ، وبيتأكد ان كان فيه تسريب فعلا ، أو أن البيت خالى من أى تسرب مائي.

استخدم تقنيات حديثة فى بيتك

بعض شركات إنتاج الأدوات الصحية ابتكرت وسائل حديثة للكشف عن التسرب بحيث تقدر تتعامل باسرع وقت ممكن ، زى القطعة الحساسة اللى بتكتشف وجود المياه على الأرض لحظة ما تقع فى المطبخ او الحمام ويعطيك انذار بسماعه او على تليفونك المحمول ، وساعتها تقدر تفعل نظام الإغلاق الأوتوماتيك من خلال وسيلة من اثنين ، اما انك تقفل المياه يدوى ، او تقفل بقطعة تحكم مركزى موجودة من ضمن نظام الاستشعار ده اللى بيتباع مع بعضه وبتيجى الشركة تركبه لك لو حبيت تضيفه.

تقشير الدهان الذى يحدث فى بعض جدران المنازل شكله سيء جدا وهذا يجعلك منزعج طوال الوقت ، وخصوصا أنه من الصعب تجاهل علاماته الظاهرة. مثل الفتحات التى تظهر فى الدهان مع مرور الوقت ، أو حتى الأجزاء الكبيرة من الدهان التى تقع من تلقاء نقسها.

أسباب تقشير الدهان كثيرة ، مثل وضع الدهان اللاتكس (البلاستيك) على الدهان الزيتى. أو الجدران المتسخة التى تم دهانها بدون تنظيف. والرطوبة الزائدة الموجودة سواء من الأرض أو فى المناطق ذات الطقس الرطب. ويمكن أن يكون بسبب تأسيسات الدهان السيئة التى تمت فى المراحل الاولى. وبالرغم من ذلك فإن هذه المشكلة لها عدة حلول ، نتناول منها حلا بسيطا فى هذا المقال.

وقبل أن تعيد دهان أى مكان ، اقرأ تعليمات هيئة حماية البيئة بخصوص الدهان الثابت الذى يحتوي على مكونات من الرصاص ، لأنه عرضة للتقشير السريع بلإضافة إلى أنه ضار جدا بالصحة ويحتوى على مواد سامة. حيث يمكنك أن تطلب عينات من الدهان الذى سينفذ فى منزلك ، و تختبرها على أجهزة أو تقوم بعمل اختبار فى بعض المعامل للتأكد من جودتها وتركيبتها.

علاج تقشير الدهان

جهز المكان وقم بارتداء وسائل الأمان

سواء كان الدهان المتقشر يحتوى على الرصاص أم لا لابد أن ترتدى قناع واقى ونظارات ، بالإضافة إلى قفازات لكى تحمى نفسك من خطورة الرصاص. أيا كانت مساحة الجدران التى تعالجها ، أو نوع الدهان المستخدم. أيضا من الضرورى أن تقوم بتغطية أرضية المكان الذى تعالج فيه مشكلة تقشير الدهان بقطعة كبيرة من البلاستيك أو القماش ، لكى تمنع سقوط الدهان على الأرضية. ثم قم بفك قطع الزخارف الموجودة فى المكان مثل حلايات الأرضية أو كرانيش السقف إذا كانت ستتأثر سواء كانت من الجبس أو من خامات بديلة للجبس ، وانقل الفرش والسجاد لمكان آخر.

إزالة الأجزاء التالفة من تقشير الدهان

لكى تقوم بمعالجة التقشير الذى حدث لابد أن تزيل الدهان التالف من على الحائط. وذلك باستخدام فرشاة من السلك أو أداة كشط الدهان لكى تتخلص من كل الدهان التالف. وإذا واجهت جزء من الصعب مسح الدهان من عليه اتركه كما هو ولا داعى لإزالته ، لأنه فى الغالب سيكون جيدا وستقوم بالدهان عليه بدون مشاكل.

إصلاح الأجزاء التالفة

بعد أن تزيل الأجزاء التالفة سترى شقوق وثقوب على الحائط ، لا يجوز أبدا تركها بتلك الطريقة. من الضرورى أن ترممها قبل إعادة الدهان و من هنا يبدأ العمل. احضر كمية من المعجون وافرده بسكينة المعجون بسلاسة. وتجنب المبالغة فى إضافة المعجون ، كل ما تحتاجه فى الوقت الحالى طبقة بسيطة من المعجون.

من المهم جدا التأكد أن المعجون قد غطى كل الأجزاء التالفة التى تم تقشير دهانها الأصلى ولا تقلق لأن كل ذلك سيتم صنفرته وتنعيمه فى نهاية الأمر. وهنا يمكننا أن نخبرك بملحوظة هامة بخصوص سكينة المعجون. حاول اختيار سكينة من النوع المرن التى تنحنى أثناء العمل وتجنب النوع الصلب. لأن المرنة أسهل كثيرا بالإضافة إلى أنها تعطيك الفرصة فى فرد المعجون بسهولة أكثر على الحائط من السكينة الصلبة.

بعد ذلك اتركه يجف تماما حسب الوقت المكتوب على التعليمات الموجودة على العلبة ، وهو غالبا يتراوح ما بين 45 – 60 دقيقة.

هناك بعض أنواع من المعجون التى تحتاج ساعتين لكى تجف. أيضا من النقاط الهامة التى لابد أن تضعها فى اعتبارك هى عدم محاولة صنفرة السطح الذى تم تغطيته بالمعجون قبل أن يجف تماما ، لأنك لو فعلت ذلك ستجد أن ورقة الصنفرة قد امتلئت بالمعجون و تلفت وستضطر لتغييرها.

صنفرة الأجزاء التالفة من تقشير الدهان

سواء كنت مضطر لترميم أماكن تقشير الدهان التالفة أم لا ستحتاج لتنعيم الحوائط التى عالجتها بالمعجون وجفت إما بالصنفرة الكهربائية أو اليدوية. وذلك لكى تضمن أن السطح أصبح أملس وخالى من الحفر والشقوق. ولذلك لابد أن تستخدم ورق صنفرة ناعم جدا فى تنعيم أسطح الحوائط.

هناك أيضا ملحوظة هامة لابد أن تراعيها أثناء صنفرة الحائط ، وهى تجنب الضغط على الصنفرة بقوة أثناء العمل. لأنك لو فعلت ذلك ستزيل طبقة المعجون التى أضفتها وعند ذلك ستضطر لإضافتها من جديد.

بعد ذلك قم بتنظيف المكان باستخدام فوطة خشنة أو قطعة اسفنج رطبة وليست مبللة وقم بمسح المكان المراد دهانه. وبعد ذلك جففه بقطعة قماش جافة ونظيفة واتركه يجف تماما.

عزل الحوائط

إذا كانت الرطوبة هى السبب فى تقشير الدهان ، فمن المهم أن تحمى المنطقة التى تقوم بدهانها مجددا من مشكلة التقشير حتى لا تتكرر مرة أخرى. لذلك لابد من تغطية الحائط بطبقة عازلة بأى مادة من المواد المتاحة لعزل الرطوبة. ثم اترك السطح يجف تماما حسب تعليمات الشركة المصنعة لتلك المادة. وهناك بعض المواد يتم خلطها مع الأسمنت أثناء عملية المحارة وهذا يتطلب منك إزالة طبقة المحارة وإعادة إكساؤها من جديد.

ادهن الحائط

بذلك يكون الحائط جاهز للدهان الجديد ، ولكى يكون العمل دقيق قم بدهان الطبقة الأولى على الحائط بالكامل حتى المنطقة التى تمت معالجتها. وبعد التأكد من جفافها تماما يمكنك إضافة طبقة أخرى إذا كانت ضرورية أو كنت ترغب فى إكساء الحائط باللون الجديد. وخاصة إذا لك تكن مغطاة باللون جيدا بعد إضافة الطبقة الأولى وهذا من الملاحظات التى أشرنا إليها فى اختيار الدهان. ثم اترك الدهان يجف تماما. وبعد ذلك انزع الشريط اللاصق الذى قمت بإضافته لتغطية الكرانيش أو حلايات الأرضية أوإطارات الأبواب.

كلنا بنقوم الصبح مستعجلين سواء رايحين المدرسة او الشغل وبناخد شاور سريع عشان منتأخرش ، لكن لو عندك وقت متاح ولو انت حاسس ان جسمك تعبان هتلاقى نفسك محتاج بانيو الحمام تسترخي فيه لفترة بسيطة عشان تحس بالراحة ، بانيو الحمام مش مجرد مكان هتاخد الشاور فيه وخلاص لا هو مكان للاسترخاء والراحة ، لذلك لازم تختاره بعناية وخاصة مع تعدد الاشكال و المقاسات والانواع الموجودة فى السوق ، تعالوا نعرف ايه هى النقط اللى هتساعدنا فى اختيارنا للبانيو.

اشكال بانيو الحمام

لما تيجي تختار بانيو الحمام وانت بتلف فى معارض الادوات الصحية أو حتى بتشوف على الانترنت هتلاقى مجموعة اشكال كثير ، اهم نقطتين يساعدوك فى اختيار الشكل المناسب هم المساحة والمادة الخام المصنوع منها.

المساحة المتاحة عندك هي أهم نقطة هتأثر على اختيار البانيو المناسب لك ، فمثلا أنت ممكن تكون ناوى تختار البانيو البيضاوى ، لكن المساحة الموجودة عندك تكفى البانيو الدائرى ، وبالإضافة للمساحة المادة الخام بردو هتأثر على اختيار بانيو الحمام ، لأن فيه بعض الخامات مصنعة بطريقة معينة تناسب بعض الاماكن ، زى النحاس والحجر الطبيعى.

بانيو الحمام الحر Freestanding

الشكل ده من اشهر اشكال البانيو الموجودة ، وده لأنه يتناسب بدون قيود مع أى مساحة ، يعنى مش محتاج لحوائط متصلة بجوار بعضها عشان يتم تركيبه ، ده بالاضافة الى ان شكله جميل وهيعمل لك نقطة تركيز فى حمامك يعنى قطعة ديكور بالمقارنة مع أشكال البانيوهات الاخرى ، وسعره مناسب بالنسبة للأنواع الأخرى المتوفرة فى السوق.

بانيو الحمام العادي

بدأ ظهور الشكل الكلاسيكى من البانيو فى 1800م فى العصر الفيكتورى ، ومازال منتشر على نطاق واسع ويسمى فى بعض الاماكن “رجل المخلب” لان رجله تشبه رجل الحيوان ، لكنه مع مرور السنين تطور شكله كثير واتجه للشكل العصرى ، وتم استبدال الأرجل التقليدية الموجودة اسفله بأرجل بشكل اخف واكثر نعومة عشان تتناسب مع الاستايلات المودرن.

ولو كنت من هواة الشكل الكلاسيكى فى بانيو الحمام ، ممكن تختار شكل رجل المخلب ده هتلاقيه موجود فى بعض معارض الادوات الصحية ، لكن اذا اخترته اعمل حسابك انه هيحتاج مساحة أكبر لتركيبه لان مقاسه اطول من الانواع الثانية.

البانيو البيضاوي

على عكس التصميم الكلاسيكي واللى اسمه رجل المخلب هنلاقى النوع ده من بانيوهات الحمام واللى شكله دائرى ومتناسق بسمترية يعني نصفه اليمين زى الشمال ، شكله قريب لشكل الحوض ، من مميزات النوع ده من البانيوهات انه مناسب للشقق الصغيرة اللى مساحة حمامها ضيقة ، بردو من ضمن المميزات ده من الناحية الجمالية ان فيه دوران وده هيعمل تباين فى الشكل مع حواف وزوايا الحمام وده مناسب جدا للحمامات المودرن.

بانيو الحمام المسحوب

لو بتدور على بانيو تصميمه مختلف شوية عن التصميم العادي أو البيضاوى ، ممكن تختار البانيو المسحوب ، وكلمة مسحوب هنا معناها مشتق من تصميمه المسحوب من اتجاه واحد فقط لاعلى والاتجاه الثانى زى ما هو كنوع من الدعم للظهر والرقبة أثناء فترة الاستحمام.

مريح جدا فى اختيار مقاسه لانه يشبه إلى حد كبير النوع الحر مش محتاج حوائط محيطة به ، هتلاقى مقاساته تشبه بانيو الحمام البيضاوى او البانيو الحر وممكن تلاقيه اكبر منهم بنسبة بسيطة.

بانيو الحمام المعلق

الشكل ده من البانيوهات بيتركب فى ثلاث حوائط متصلة مع جانب واحد مكتمل لإظهار الشكل من الخارج ، من مميزات الشكل ده انه مش بيستغل مساحة كبيرة فى تركيبه لذلك هتلاقيه موجود فى البيوت اللى مساحتها صغيرة ، وفيه منه انواع كثير ممكن تركبها مع كابينة الشاور.

بانيو الركنة او الزاوية

النوع ده من البانيوهات مشابه للبانيو المعلق ، لكن اكبر منه فى المساحة ، ويتميز بمساحته الأوسع من البانيو المعلق ، ومع ذلك فالمساحة اللى يحتاجها اى نوع من الاثنين متساوية ، وزى ما البانيو المعلق يحتاج 3 حوائط لتركيبه هنلاقى ان بانيو الركنة يحتاج حائطين فقط لانه موجود فى الزاوية ، من مميزات بانيو الحمام بالشكل ده انه مريح أكثر لذلك هنلاقى اغلب انواع الجاكوزي بالشكل ده.

بانيو الحمام الساقط

النوع ده من البانيوهات يشبه تماما حوض الحمام الساقط اللى بيتم تركيبه فوق الرخام ، هنا نفس الموضوع يتم تركيب البانيو ده على الشاسيه الخاص به من فوق ويكون هو ساقط لتحت ، وميزة الطريقة دى فى التركيب إن الحافة مختفية وده يعمل شكل جمالى رائع.

يتم تركيب النوع ده من بانيو الحمام عن طريق دخوله فى شاسيه مخصص له مصنع من الشركة المصنعة للبانيو نفسه ، وبعد كده يتم عزل الحواف الداخلية ويظهر منه الاطار الخارجى فقط ، من مميزات النوع ده بجانب الشكل الجمالي انه بيوفر فى المساحة ومتوفر منه اشكال وخامات كثير تناسب كل الاحتياجات زى تركيب باور جيت او كابينة شاور كاملة بكل ملحقاتها.

بانيو الغطس

بانيو الغطس أو بانيو الاستايل الياباني شكله عادة اما يكون دائرى أو بيضاوى ، مقاسه أطول شوية من البانيوهات العادية ، وده معمول بغرض انك تكون جالس فيه مستريح اثناء الاستحمام ، وفى نفس الوقت يقدر جسمك كله يغطس فى البانيو ، متوفر منه مجموعة مقاسات كثير جدا تناسب البيوت الكبيرة لانه فخم ويحتاج لمساحة ، وبردو متوفر منه مساحات اصغر يناسب البيوت الصغيرة ، وطبعا ده المقاس المستخدم لاغلب الشقق العادية اللى بنسكن فيها.

بانيو بمدخل Walk-in

بانيو المدخل Walk-in مجهز خصيصا عشان تقدر تمشي وتجلس فيه بدون خوف من الانزلاق ، يحتوى على شقوق بطول أجزاءه الداخلية لضمان سلامتك أثناء الحركة ، بالاضافة لكده فيه مقابض تستخدمها فى المشى عشان تساعدك فى التوازن ، وده من أشهر البانيوهات اللى بتستخدم فى البيوت اللى فيها كبار السن ، عشان بتوفر لهم استحمام مريح بدون ما يحتاجوا مساعدة الغير.

خامات بانيو الحمام

قبل ما تحدد خامة بانيو الحمام اللى هتختاره هتلاقى نقطتين بيأثروا على اختيارك وهما السعر ومدى الراحة ، عشان كده هتلاقى كل خامة لها ملمس مختلف عن غيرها ، لذلك مهم انك تجرب وتشوف ايه هى الخامة اللى هتكون أكثر راحة بالنسبة لك ، ممكن مثلا بانيو يكون ملمسه ناعم جدا وده مش مريح بالنسبة لك او العكس ، وخاصة انك هتقضى وقت فى البانيو اثناء الاستحمام فلازم تهتم باختيار الخامة.

اغلب الخامات المريحة هتلاقى سعرها غالى واثقل فى الوزن ، عشان كده لازم تعرف كل المعلومات عن الخامة اللى انت عايزها قبل ما تفكر تشتريها.

بانيو فايبر جلاس

خامة الفايبر جلاس دى من ارخص خامات تصنيع بانيو الحمام ، ودى مصنوعة من ألواح البلاستيك المقوى ويتم تشكيلها على شكل البانيو المطلوب ، يتميز بانيو الفايبر جلاس بأنه قوى ويتحمل الظروف الصعبة الى حد ما ، لكن يعيبه انه ممكن يحصل فيه تشققات او يتكسر بعض اجزاء منه نتيجة الاوزان الثقيلة الموجودة عليه.

كمان من ضمن عيوبه انه مسامى بمعنى ان خامته مسامية وده بيخليه يمتص المياه ويظهر فيه انحناءات بعد فترة ويبقى غير مستقر.

البورسلين

البورسلين من الخامات القوية الموجودة فى السوق واللى بدأ انتشارها بقوة فى الادوات الصحية بسبب قوتها وشكلها الجمالى وملمسها الناعم ، يتم تصنيعها عن طريق ضغط طبقات من الحديد الزهر او الصلب مع البورسلين والبودرة الزجاجية ويدخل الخليط كله فى فرن حرارى لطلاؤه بالطبقة الخارجية وتصبح قوية جدا.

كل ده يخلى خامة البورسلين اقوى كثير من الفايبر جلاس بالإضافة الى انها غير مسامية وده يطول من عمرها الافتراضي لان البانيو المصنوع منها غير قابل للانحناء مع الوقت.

برغم أن طبقة طلاء البورسلين الخارجية قوية جدا لكنها حساسة لاى مؤثرات خارجية ، لذلك احذر جدا اثناء حمله ونقله أنه يحصل له اى صدمات لان ده هيسبب تكسيرات فى سطحه الخارجى.

الاكريليك

الاكريليك مشابه للفايبر جلاس فى حاجات كثير فى التصنيع ، يعنى يتم تصنيعه عن طريق ألواح من البتروكيماويات مع مواد تثبيت ومواد راتنجية صمغية بالاضافة للون المطلوب ، ويتم وضع الخليط فى فرن خاص عشان ينصهر ويتم صبه فى قوالب على شكل تصميم البانيو المطلوب ، وبعد كده يتم معالجته بالفايبر جلاس.

من مميزات بانيو الحمام الاكريليك انه خفيف الوزن ومتوفر بمقاسات واشكال كثير جدا تناسب كل الاحتياجات ، ولكن هنلاقى ان اشهر شكلين متوفرين من خامة الاكريليك هم البانيو الساقط والبانيو الحر.

برغم انه يشبه طريقة تصنيع الفيبر جلاس بالظبط لكن خامته غير مسامية ، وده يعطيه سبب انه اقوى منه بكثير وعمره الافتراضى هيكون اطول ، ده غير انه مقاوم للصدمات بأي مؤثر خارجي ، لكن ده لا يمنع انك تحافظ عليه من اى اصطدام متعمد.

السيراميك

أكثر خامة مستخدمة فى صناعة السيراميك والأدوات الصحية ، وهنا هنلاقى ان بانيو الحمام يتم تصنيعه عن طريق صهر كمية من البلاطات مع بعض ويتم تشكيلها بشكل تصميم البانيو وده يخلى النوع ده من البانيوهات قوى جدا ويتحمل الظروف الشاقة ، وزى اى خامة يتم تشكيلها وصبها فى قوالب هنلاقى ان فيهم ميزة مشتركة وهى توفر اشكال ومقاسات كثير جدا منه اكثر من اى خامة تانية موجودة فى السوق.

من عيوب خامة السيراميك أنها خامة محتاجة صيانة مستمرة والا هيتلف وهتحتاج تغيره.

الحجر الصناعى

الحجر الصناعى ده عبارة عن حبيبات الحجر الناعمة يتم تجميعها مع بعض ويتم لصقها بمواد لاصقة قوية جدا وتصب فى قوالب بشكل التصميم المطلوب ، وبعد كده تتغطى بطبقة من الاكريليك او مواد مشابهة له لضمان حماية محتواها الداخلي من اى تسرب مياه واى خدوش او تجريحات.

ولأنه مصنوع من حبيبات وتم لصقها وتجميعها مع بعض فخامته بتكون اخف من الحجر الطبيعى ، ولكن بدون ما تفقد قوتها وصلابتها وده من اهم مميزات بانيو الحجر الصناعى.

يعتبر بانيو الحمام المصنوع من الحجر الصناعى ده من افضل البدائل الموجودة ، لو بصينا لمواصفاته هنلاقيه يتمتع بالمتانة والقوة لأنه مصنوع من حبيبات الحجر والمادة اللاصقة ، ده غير انه خفيف فى الوزن بالمقارنة بالحجر الطبيعى ودى من مميزاته ده غير ان سعره معقول بالنسبة للحجر الطبيعى ، بالاضافة لكده هو من خامة غير مسامية يعنى مش هيحصل له اى تمدد أو انحناء مع الوقت لانه مش هيتشرب بالمياه ، عيبه الوحيد ان عدد الاشكال والمقاسات منه محدود بالمقارنة بباقي الانواع الثانية فى السوق.

الرخام الملون

يتم تصنيع الرخام الملون من حبيبات كسر الرخام مع مواد لاصقة ودى مش خامة مستحدثة بالعكس دى مستخدمة فى القرن الخامس ومازالت مستخدمة حاليا ، من مميزاتها تحمل الحرارة والصدمات والظروف الشاقة ، لكن لها عيوب كثير منعت انتشارها.

من ضمن عيوب بانيو الحمام الرخامي ان سعره غالى فى بعض البلاد يبدأ من 800 دولار ، ده غير ان وزنه ثقيل جدا ودى من الصعوبات اللى تواجهه فى التركيب ، بالاضافة لكل ده انه محتاج صيانة دورية لأنها لو متمتش هتلاقى البانيو لونه يبهت ويجير وهيبقى شكله سيء جدا.

بانيو الحمام النحاس

يتم تصنيعه من النحاس النقى حسب طلب العميل أو المهندس اللى بينفذ المكان ، وده يستخدم فى القصور والفيلات الفاخرة لأنه من العناصر الفخمة جدا ، وطبعا هو اقوى خامة موجودة فى السوق كله مفيش اى خامة تانية تقارن بقوتها ومتانتها وتحملها للحرارة ، ولا محتاج اى صيانة دورية لأنه خامة معدنية.

بالاضافة لكده فيه نقطة وهي انه مع الاستخدام المتكرر للمياه مش بيجير زى انواع تانية تلاقي املاح المياه غيرت فى الوانه ، لكن ده بيفضل بنفس لمعانه ، ومع وجود كل المميزات دى هنلاقى سعره غالى جدا وهو اغلى نوع موجود فى الاسواق ممكن يبدأ من 2000 دولار.

مقاس بانيو الحمام

بعد ما تختار الشكل المناسب لك واللى تلاقيه يتماشى مع ديكور الحمام عندك لازم تشوف ايه المقاس المناسب ، يبقى هتحتاج متر قياس واتبع الخطوات دى :

تأكد من الأرضية

قبل ما تقيس اى ابعاد لازم تتأكد ان الارض مستوية تماما ، وده تقدر تعرفه بميزان المياه العادى او الديجيتال طبعا احنا نفضل انك تقيس بميزان ديجيتال لزيادة دقة القياس وده هيخليك تعرف مستوى ميول الارضية لو كان فيها اى انحدار لاتجاه معين هيبان على الشاشة كام درجة بالتحديد ، وده معناه ان المياه هتنحدر للاتجاه ده.

قيس طول بانيو الحمام

لو كنت هتختار بانيو معلق يبقى قيس الطول من الحيطة للحيطة يعنى من سطح البلاط لسطح البلاط في الجانب المقابل عشان تعرف الطول بالظبط كام ، ولو هتحسب طول البانيو الساقط يبقى لازم تزود أثناء حساباتك مسافة الشفة الخارجية للبانيو ودى حوالى 3 سم لكل حيطة ، ولو الحوائط عندك مائلة او فيها شطرة يعنى ميول معمارى يبقى لازم تستعين بالمهندس يقيس لك الطول المناسب عشان التركيب بعد كده ميبقاش فيه مشكلة.

وهنا اذكر موقف حصل لمهندس اعرفه كان بيجهز شقة وبعت مهندس بيشتغل معاه يرفع المقاسات وبعد ما خلصوا المخطط المعماري للمكان واشتروا البانيو وراحوا يركبوه تفاجئوا انه مش هيركب لان الحمام مقاسه اصغر ، وفضلوا يلفوه فى كذا اتجاه لحد ما اكتشفوا انه لازم يتركب بنفس ميول الحيطة.

طبعا حاولوا يكسروا الحيطة ويغيروا مكانها ، لكن جهاز التعمير رفض لأنه ملتزم بنفس المخطط لجميع الوحدات السكنية ، واضطر المهندس يركبه مائل لان تاجر الادوات الصحية مرضيش يرجع البانيو تانى وكان سعره غالى جدا فى مصر ، فخلى بالك من نقطة المقاسات جدا لانها تفرق كثير.

قياس عرض البانيو

عشان تحسب المساحة اللازمة لعرض بانيو الحمام قيس من الحيطة للحيطة وراعى ان فيه مجموعة نقط مهمة جدا ، زى مثلا باب الحمام لما يتفتح إذا كان مفصلى ، كمان يكون فيه مساحة جنب البانيو عشان أغراض الصيانة والإصلاحات ، ده غير انك لازم تكون مستريح وانت داخل او خارج من البانيو عشان ميحصلش اى انزلاق.

ارتفاع بانيو الحمام

من النقط المهمة جدا اللى بتغيب عن بال ناس كتير ويعتقد انه عادى هى الارتفاع ، لكنها من المقاسات المهمة اللى لازم تراعيها وانت بتختار عشان ارتفاع الارضية عندك ومكان خلاط المياه ودى نقطة فى غاية الاهمية انك وانت قايم من البانيو متلاقيش نفسك اتخبطت فى الخلاط ، لان ده ممكن يسبب لك اصابة خطيرة ، كمان عشان عتبة الشباك لو كان الشباك مستواه نازل حسب الشكل المعماري لتصميم الحمام.

مقاسات مداخل البيت

طبعا فيه ناس ممكن تقول ايه علاقة مداخل البيت بمقاسات البانيو ، فيه ارتباط وثيق جدا بين الاثنين يعنى لازم تتأكد كويس ان مقاسات الشباك والسلم والأبواب اكبر من البانيو ، والا مش هتقدر تدخله للبيت من الاساس ، وده موقف حصل لناس اعرفهم كانوا اشتروا طقم صالون ومقدروش يدخلوه للبيت حتى من الشبابيك اضطروا يرجعوه للتاجر تانى وياخدوا مقاس اصغر ، فخلى بالك من النقطة دى لانها تفرق.

تركيب بانيو الحمام

تركيب البانيو يعتبر من التحديات اللى هتقابلك وانت بتجهز سباكة الحمام وده يتوقف على نقطتين هما مقاس البانيو وشكله ، لذلك لازم تعرف ايه هو اسهل شكل ممكن تركبه بدون ما يحتاج منك تكسير فى الحوائط او تغيير فى ملامح المكان.

عامة بانيو الحمام المعلق والساقط داخل الشاسيه يعتبروا اسهل فى التركيب من البانيو الحر وبانيو الركنة او الزاوية ، وطبعا مينفعش ننسى نقطة مهمة جدا فى التركيب وهى وزن البانيو واللى يعتمد على الخامة المصنوع منها ، إذا كان وزنه ثقيل جدا ننصحك انك تجيب سباك محترف لتركيبه ، او تكلم خدمة العملاء للشركة المصنعة وهما يركبوه لك ، لان فيه بعض السباكين للاسف مش بيقدروا يركبوا كل الانواع ، فحاول تخلى بالك من النقطة دى.

سعر بانيو الحمام

سعر البانيو يتم تحديده تبعا لجودة الخامة المصنوع منها وشكل البانيو نفسه ، يعنى مثلا هنلاقى ان بانيو الفايبر جلاس ارخص نوع فى سعره وهنلاقى السيراميك أعلى منه شوية ، والاكريليك هتلاقيه أعلى أكثر ، في حين أن النحاس والبانيوهات المصنوعة بالطلب اغلى الانواع ، فيه قاعدة عامة فى اختيار البانيو بتقول أن البانيوهات الأصغر فى الحجم ، بتكون اقل فى السعر من البانيوهات الاكبر فى الحجم ، وده طبعا لانها بتستهلك خامة اقل ، وده مش معناه أن فيه فرق فى الجودة بين المقاس الصغير والكبير ، لأن الخامات هى العامل الأساسى فى تحديد السعر.

استخدام بانيو الحمام

فيه اعتبار مهم جدا لازم تخليه فى دماغك وانت بتشترى بانيو الحمام وهو الاشخاص اللى هتستخدم البانيو ده ، هى جملة تبان غريبة شوية لكن لازم تراعى احتياجات الناس اللى هتستخدمه جدا وانت بتختار ، يعنى مثلا لو اخترت بانيو طويل زى الاستايل الياباني المخصص للغطس بالنسبة لأطفال هتستخدمه هيبقى فيه مشكلة كبيرة وهما بيستخدموه لانهم كده هيبقوا محتاجين مساعدة لما يدخلوه او يخرجوا منه.

نفس الموضوع بالنسبة لكبار السن ممكن تستخدم لهم البانيو المخصص للغطس أو البانيو الدائرى ، وممكن تستخدم بانيو بمدخل او تركب بعض الانواع القابلة لتركيب مدخل لها عشان تساعد كبار السن وذوى الاحتياجات الخاصة فى الدخل للبانيو بمساعدة المسك فى المقابض الموجودة لمنع الانزلاق ومراعاة اقصى درجات الامان ، كمان مهم جدا انك تراعى طول البانيو بالنسبة للشخص اللى هيستخدمه لازم يكون مناسب له ، وتراعى لو الشخص مثلا عنده تعب فى جزء من أجزاء جسمه أو يحتاج لمساند فى الجوانب اذا كان يحتاج للمساند دى.

اول نقطة بتخطر على بالك وانت بتشترى انتريه جديد او ركنة فى غرفة المعيشة مثلا هى اللون هل يتماشى مع شكل الديكور عندك ولا لا ، غالبا ده بيكون اهم عامل بتفكر فيه وانت بتختار قماش التنجيد ، لكن فى الحقيقة فيه عوامل تانية كثير جدا غير اللون وعلى نفس الدرجة أكبر من الاهمية بل واكثر ، لان المسألة مش بس لون لكن ازاى الكرسي او الكنبة هتتلبس بالقماش ده ، وازاى هتقدر تنظفه وتحافظ عليه عشان يعيش معاك فترة طويلة.

قماش التنجيد هو أهم وأكبر عامل لازم تاخده فى اعتبارك وأنت بتشترى انتريه او ركنة جاهزة ، او اذا كنت حابب تصنعهم ، عشان كده جمعنا لك مجموعة إرشادات ونصائح قبل ما تختار قماش التنجيد لازم تعرفها.

اغلب الشركات المصنعة حاليا بقت تعمل خليط بين أنواع اقمشة كثير ، عشان تنتج قماش تنجيد بالوان ونقوشات متعددة ، وملمس ناعم بالاضافة الى اعطاؤه مرونة وقدرة على تحمل الضغط والاستخدام المتكرر ، تعالوا نعرف ازاى نقدر نشترى قماش التنجيد.

قوة تحمل قماش التنجيد

قوة تحمل قماش التنجيد تعتمد على قطعة الأثاث نفسها ، مكانها فى اى غرفة ، وطريقة المعيشة للأفراد اللى بتستخدم قطع الأثاث زى مثلا هل فيه اطفال او حيوانات اليفة قطط او كلاب مثلا ، لازم قماش التنجيد اللى هتختاره يلبي كل الاحتياجات دى.

اقمشة التنجيد المنسوجة بخيوط عمرها الافتراضى اطول من الأقمشة المطبوعة ، لأنها تحتوى على عدد خيوط اكثر وأنسجتها محكمة ، وزى ما احنا عارفين ان عدد الخيوط Thread count ده عبارة عن عدد الانسجة المتقاطعة فى البوصة المربعة ، لذلك هنلاقى ان الاقمشة اللى عدد خيوطها اكثر بتبقى اكثر كثافة فتعيش عمر اطول.

اختار قماش التنجيد بناء على الشخص اللى هيستخدم الكرسي أو الكنبة ، ولو بتحب وجود الحيوانات الاليفة معاك على الكنبة يبقى يفضل انك تستخدم قماش من المايكروفايبر أو الجلد لأنهم يتحملوا اصعب الظروف اكثر من القماش العادى ، عامة اختر قماش قوي وصلب اذا كانت قطعة الأثاث اللى هتنجده بها متكررة الاستخدام.

شكل قماش التنجيد

اختيار قماش التنجيد لازم يجمل لك شكل الكرسى ويحقق تناسق فى شكل الديكور العام لبيتك ، عشان كده لازم يكون متناسق مع شكل الكرسى وبنفس ستايله ، يعنى مثلا الكرسى ستايل مودرن يليق معاه قماش مودرن والكنبة الكلاسيك يتماشى معها قماش تنجيد كلاسيك.

ممكن هنا نقول لك على ملحوظة جديدة ، لو كنت صاحب ذوق مختلف وجرىء ممكن تعمل دمج ما بين ستايلين مختلفين مع بعض زى مثلا قطعة قماش مودرن بخطوط هندسية أو دوائر مع قطعة اثاث كلاسيك ، ده هيضيف للمكان تميز غير عادي وخاصة لو كانت ستايل الغرفة عصرى ، ممكن وقتها تستخدم القطعة دى كديكور مكمل لشكل المكان مش من قطع الأثاث الاساسية ، وهنا الشكل الهندسي او الدوائر الموجودة فى القماش هتحقق تكامل مع ستايل ديكور المكان.

اشكال قماش التنجيد متنوعة ومختلفة فيه منها النمطى ومنها الغير تقليدى ، حاول تختار منها اللى يتماشى مع ستايل المكان اللى بتجهزه ، يعنى مثلا لو رسم القماش نقش متكرر Pattern لازم تتأكد ان حجم الباترن متناسق مع الكرسي أو الكنبة وفى نفس الوقت مع حجم الغرفة ، على سبيل المثال لو حجم الرسم كبير هيتماشى مع الغرف اللى مساحتها كبيرة لأنه بنفس التوازن ، وبنفس الطريقة الباترن اللى حجمه صغير يتماشى مع الغرف اللي مساحتها صغيرة.

لون القماش

لون قماش التنجيد دائما بيكون هو أول نقطة كله بياخدها فى اعتباره اثناء اختيار القماش او قطع الاثاث ، لان هو اللى بيحدد شكل ديكور المكان ، وخاصة لو كانت القطعة دى او القماش ده فى كنبة او ركنة مستحوذة على مساحة كبيرة من الغرفة.

لازم يكون اللون اللى هتختاره محبب لك لانك هتفضل شايفه قدام عينك طول الوقت ، مثلا مينفعش تختار ألوان مشبعة تماما  فى غرف صغيرة وخاصة لو كانت الالوان دى على كنبة حجمها كبير ، لكن عشان تكون مستريح فى المكان طول الوقت اختار ألوان محايدة زى الابيض والبيج والرمادى ومشتقاتهم ، وطبعا مش محتاجين نقولك راعى الألوان الحساسة لأي أوساخ واتربة لو كان عندك اطفال او حيوانات اليفة ، لانك هتحتاج تغسل قماش تنجيد الكنبة باستمرار مع اقل استخدام لو حصل فيها اى حاجة.

من ضمن النقط اللى لازم تراعيها فى اللون حرارته ، يعنى حرارة اللون على مقياس كلفن اللي لازم تعرفها وأنت بتختار اللمبات الليد ، بردو من النقط المهمة هنا فى اختيار حرارة لون القماش هل هيكون لون دافىء ولا لون بارد لان ده من العوامل المؤثرة بشكل كبير جدا فى ديكور المكان كله ، كمان حاول تتجنب الموضة فى اختيار اللون الا لو عجبك ألوانها لأن الموضة بتتغير كل فترة وهتحس ان شكل الكرسي أو الكنبة اصبح قديم.

خامات قماش التنجيد

تانى نقطة هتفكر فيها وانت بتختار قماش التنجيد هى خامة القماش ، اكيد بتبحث عن خامة قوية تتحمل الظروف الشاقة والاستخدام المتكرر وخاصة لو عندك اطفال بيحبوا  يلعبوا على كنب الانتريه او الركنه ، وعشان تقدر تختار خامة قماش قوية لازم تعرف الاول ايه هى انواع القماش من حيث الخامات.

فيه نوع طبيعى وده ينقسم لنوعين نوع مشتق من النباتات ونوع مشتق من الحيوانات ، وفيه نوع صناعى وغالبا بيكون مميكن مش صنع يدوى (هاند ميد).

الأقمشة الطبيعية

الاقمشة المشتقة من النباتات

القطن

اشهر خامة قماش نباتى مستخدم بشكل واسع جدا فى اغراض كثير ، متوفر منه انواع ودرجات كثير والدرجات العالية فيه واللى مصنوعة من القطن طويل التيلة سعرها غالى توصل لسعر الحرير ، لكن الدرجات الأقل فى السعر المصنوع من ألياف قصيرة تتجعد بسرعة.

يتميز القطن بانه اكثر خامة مريحة وسهلة التشكيل ولكن عيبه أنه غير مقاوم للتجاعيد وبيحصل له تمدد ، ده غير انه سريع الاتساخ واى كمية اتربة ممكن تتعلق فيه وده بيحتاج غسيل متكرر او هتضطر انك تشتري غطاء للكنب عندك عشان تحميه ، لذلك الشركات المصنعة لقماش التنجيد بدأت تخلطه مع خامات تانية عشان يكون اسهل فى الاستخدام ويتحمل الظروف الصعبة.

الكتان

بردو من الخامات المنتشرة جدا فى الاستخدام و هنلاقى له خصائص كثير تشبه القطن ، متوفر بدرجات كثير الدرجة العالية فيه لها ملمس ناعم تشبه الحرير وسعرها غالى.

وزى القطن بردو يعتبر الكتان من الخامات الغير مرنة وسهلة التجعيد ، وده بردو خلاها مناسبة جدا للدمج مع خامات تانية لتسهيل الاستخدام ، ويتميز الكتان بأنه سهل التنظيف وتقدر تغسله فى الغسالة وتكويه بالمكواة بدون اى مشاكل.

من المعروف عن الكتان عمره الافتراضى الطويل يعتبر من اقوى خامات الاقمشة الموجودة فى الاسواق ، وكمان الوانه ثابتة مش بيبهت لو كان مواجه للشمس فى غرفة لها نوافذ مفتوحة باستمرار ، لكن عيبه انه ممكن يحصل له تعفن لانه غير مقاوم للرطوبة نهائى لذلك لو هتضطر تستخدمه يبقى يلزمه تهوية باستمرار ، عشان كده يستخدم أكثر فى الستائر وفى اكساء الحوائط اكثر من استخدامه فى التنجيد.

الاقمشة المشتقة من الحيوانات

الجلد

الجلد واحدة من أشهر الخامات المستخدمة فى التنجيد ، من مميزاته ان مش بس القطع اللى بتتنجد جلد بتبقى مريحة ، لكن شكلها فخم جدا وتعطيك ايحاء بأن سعرها غالي ، كثير من الناس بتفضل تخلى ركنة او كنبة غرفة المعيشة متنجدة بالجلد.

من مميزات الجلد انه سهل جدا فى تنظيفه بناء على مدى رعايتك له وده بسبب ان ملمسه ناعم وسطحه مش بيمتص السوائل لو وقعت عليه وفى نفس الوقت مش بتتغير رائحته لأنه بدون مسام بعكس الأقمشة تتغير رائحتها لو وقع عليها سوائل ، ولو حافظت عليه ممكن يستمر عمره الافتراضي 10 سنوات لأنه خامة قوية تتحمل ضغط الاستخدام.

من عيوبه انه اقل فى الراحة بالنسبة للاقمشة ، ويتأثر بوجود اى الة حادة عليه عشان كده فيه ناس كثير بتهرب من تركيبه لانه ممكن يتقطع بسرعة ، ده غير ان سعره غالى.

الحرير

الحرير يتم انتاجه عن طريق دودة القز ويعتبر هو رمز الرفاهية عبر العصور لذلك هنلاقيه من اعلى الاقمشة فى السعر ، وفيه منه نوعين نوع ملفوف وده ملمسه ناعم ومرن جدا وله لمعة عالية ، ونوع منسوج وده هنلاقى أنسجته متقاطعة مع بعضها.

يتميز الحرير بقوته العالية وعمره الافتراضى الطويل اذا لم يتم تعرضه لاشعة الشمس المباشرة ، بالاضافة الى مقاومته للتعفن ، ويتميز بسهولة تنظيفه سواء بالتنظيف الجاف او بسوائل التنظيف العادية ، وعشان كل المواصفات دى متوفرة فيه هنلاقى ان سعره غالى جدا ويستخدم فى قطع الاثاث الفخمة.

الصوف

ثاني اشهر خامة قماش طبيعية هى الصوف وده مستخرج من شعر الغنم ويسمى صوف بكر بمعنى انه جديد مش معاد تصنيعه ، ومتوفر منه ملمس ناعم و خشن ومجعد.

يتميز الصوف بقدرته العالية على مقاومة الاتربة والاوساخ بشكل كويس ، ومش بيتآكل بسرعة ، ويتحمل اشعة الشمس المباشرة ، ولكنه قابل للتجعد ومحتاج منك حماية ضد الحشرات.

من مميزات الصوف انه خامة قوية جدا ، لكن الانواع الغالية فيه يتم خلطها مع خامات صناعية ثانية لتقليل التجعيدات ، لتنظيف الصوف ممكن تستخدم التنظيف الجاف وممكن تستخدم سائل تنظيف عادى مع المياه.

قماش الجوت

بداية نشأة خامة الجوت فى الهند وبنجلاديش وكان يستخدم فى الأصل فى صناعة الاحبال والسجاد ، ومع ذلك مستخدم فى التنجيد لكن مش بنفس الانتشار الكبير الموجود فى خامات تانية ، من مميزاته اضافة لمسة جمالية للقطعة اللى بتتنجد به وخاصة لو كان مستخدم مع قماش تانى او جلد مثلا هيعطى منظر جميل جدا ، لذلك مستخدم بشكل كبير فى تنجيد الباف.

من عيوبه انه قماش صلب وخشن وده اللى بيخلى بعض الناس تختاره فى القطع الأقل استخدام مش فى الكنب او الكراسى الرئيسية ، ده غير انه ينكمش مع الوقت ، ويتغير لونه للأصفر بمجرد تعرضه لاشعة الشمس ، ويفقد قوته ومتانته لو تعرض للرطوبة.

الاقمشة الصناعية

تعتبر الاقمشة الصناعية واللى مصنوعة من مشتقات البترول هى اكثر انواع الاقمشة فى السوق انتشار زى المايكروفايبر ، وتتميز بوفرة كبيرة جدا فى الوانها ونقوشاتها ، ده غير قدرتها العالية على تحمل أصعب الظروف.

قماش الفيسكوز

هو قماش يعتبر شبه مصنع يتم تصنيعه من استخراج السيليلوز من لب الخشب ويمر بمراحل تصنيع طويلة جدا لحد ما يخرج بالشكل اللى بنشوفه عليه ، ويعرف فى بعض الاوقات باسم الرايون ، وبرغم انه مش قوى زى انواع تانية صناعية ، إلا أنه يستخدم على نطاق واسع جدا فى التنجيد لان فيه جزء من الراحة الموجودة فى الاقمشة الطبيعية ، يتميز بأنه سعره رخيص ومريح جدا وله ملمس ناعم وله قدرة على مقاومة الرطوبة.

عيوبه أن شكله بيتغير بعد فترة ، وسهل جدا فى الخدش والتجريح ، وله كمان عيب صعب جدا وهو اذا طاله اى مياه ينكمش جدا ويبقى شكله سيء ، ومن الصعب انه يستعيد شكله الاصلى فى الاول لذلك بعض الناس مش بتحب تركيبه.

قماش الأسيتات

يتم صناعة قماش الأسيتات من مادة كيميائية اسمها أسيتات السيليلوز ، يتميز بملمسه الناعم وشكله الفخم جدا ولمعته القوية بالإضافة إلى قدرته العالية على تشرب الاصباغ.

من ضمن مميزاته انه مقاوم للتمدد والانكماش ومقاومة العفن الفطرى لكنه غير مقاوم لتشرب السوائل ولا التآكل ، ويستخدم بشكل واسع جدا فى الخلط مع خامات تانية لإنتاج قماش تنجيد يتميز بنعومة ولمعة عالية جدا ، وعشان كده هتلاقيه فى انواع قماش كثير جدا حاليا زى الكتان والتفتا ، من مميزاته سهولة التنظيف سواء كنت هتستخدم الغسيل الجاف أو التنظيف بماء وصابون عادي.

قماش اكريليك

من اقماشة التنجيد المصنعة قماش الاكريليك المصنوع من بوليمرات من مشتقات البترول ، متوفر منه ماركات كثير معروفة زى اكريلان ، اورلان ، دولان ، درالون ، يتميز بملمسه الناعم وفخامته العالية لذلك يتم تصنيع المخمل منه او اللى يسمى القطيفة.

من مميزات قماش الاكريليك انه مقاوم لأشعة الشمس المباشرة ، ومقاوم لبهتان اللون والعفن الفطري والحشرات ، لكنه غير مقاوم للحريق ، وبسبب كل توفر الخصائص دى فيه عشان كده هو متميز جدا فى الاستخدام الخارجى للكراسى الموجودة فى البلكونة او الحديقة ، وبالنسبة لتنظيفه سهل جدا ممكن بمياه وصابون عادى او الغسيل الجاف.

قماش النايلون

كلمة نايلون ترمز الى اقمشة مصنوعة بمواد كيميائية واللى بدأ ظهورها من الشركة الامريكية ديبونت سنة 1939 ، ظهر النوع ده من الاقمشة بمواصفات كويسة زى القدرة على امتصاص الاصباغ واللمعة العالية بالاضافة الى انه قماش ساتر تماما للحشو الداخلى الموجود عليه ، عشان كده يستخدم بشكل واسع فى الستائر.

من مميزات النايلون انه مش بيتاكل بسرعة و يتحمل أصعب الظروف ومقاوم للحشرات والعفن الفطري ، مستخدم بشكل واسع جدا فى صناعة المخمل وصناعة قماش التريكو ، وتقدر تستخدم معاه المياه والصابون فى التنظيف او الغسيل الجاف ، ولكن عيبه انه مش بيتحمل اشعة الشمس المباشرة.

قماش المخمل

المخمل او اللي يسمى فى الاسواق قطيفة هو من اشهر الانواع فى الاستخدام ، بسبب شكله الجمالى وملمسه الرائع الناعم والفخامة اللى يتميز بها ، وله ميزة رائعة جدا وهى ان سطحه غير لامع وده يخليه يمتص الاضاءة الساقطة عليه فى الغرفة بسبب وجود سطحه الوبرى ، ومتوفر بالوان كثير جدا ، ده غير ملمسه الدافىء عشان كده هنلاقيه فى كل عناصر فرش البيت زى المراتب واغطية السرير.

عيوبه انه صعب الى حد ما فى التنظيف ، وفى بعض الاوقات مش بيعيش لفترة طويلة وده بسبب ان عمره الافتراضي متوقف على كثافة عدد الوبر الموجود فى سطحه ، فلو كان القماش المخمل سطحه مفيش له وبر او فروة كافية هتلاقى الطبقة الموجودة تأثرت بالاحتكاك و تآكلت مع الوقت.

قماش الشانيل

يعتبر الشانيل واحد من اشهر انواع قماش التنجيد انتشار فى السوق المصرى بسبب نعومته وصلابته ، يتكون من خليط من القطن مع أقمشة صناعية زى الاكريليك والاولفين والرايون ، يعتبر من الأقمشة المطاطية لذلك لابد من دعمه بطبقة تانية اسفله ، يتميز بأنه مريح جدا فى الجلوس لذلك هنلاقيه مستخدم فى قطع الاثاث الموجودة فى غرف الاطفال ، ده غير ان شكله عصرى.

يتميز بقوة تحمله للظروف الصعبة ونعومة ملمسه والراحة فى الجلوس عليه ، متوفر منه الوان واشكال كثير جدا وسهل تنظيفه فى المنزل لا يشترط الغسل بأدوات ومعدات خاصة.

من عيوبه انه مطاط لذلك يحتاج الى دعم خلفه وده يعتبر تكلفة اضافية فى التنجيد ، وغير مناسب للبيوت اللى فيها حيوانات أليفة لأنه هيتخدش ويتاكل مع كثرة احتكاكهم به.

قماش أولفين

يتم تصنيع قماش اولفين من مشتقات البترول ، شكله يشبه الصوف الى حد كبير ومقاوم للرطوبة والعفن الفطري والتآكل والمواد الكيميائية ، عيبه انه حساس جدا تجاه الحرارة يعنى لو محافظتش عليه من أشعة الشمس المباشرة يتآكل مع مرور الوقت ، وممكن يتصنع منه المخمل والأقمشة الناعمة ، يتميز بسهولة تنظيفه بالغسيل العادى والغسيل الجاف.

قماش التنجيد من البوليستر و المايكروفايبر

ظهر قماش البوليستر في الخمسينات من شركة ديبونت الامريكية كتطوير لصناعة الاقمشة ، وانتشرت خامة المايكروفايبر مع مرور الوقت بسبب خصائصها المميزة ، ولو دققنا النظر فى  المايكروفايبر هنلاقيه يتكون من خليط كيميائي من البوليستر والبولي أميد ، يتميز قماش البوليستر بتعدد الوانه وملمسه ودرجة لمعانه.

النوع ده من الاقمشة يعتبر اقوى نوع يتحمل كل الظروف الصعبة زى مقاومة التآكل ومقاومة اشعة الشمس المباشرة ومش بيحصل له تعفن بعد فترة وضد الرطوبة يعنى متوفر فيه كل المميزات تقريبا.

فى بداية اختراع البوليستر كان يجذب الأتربة الموجودة ويتسخ بسرعة ، لكن المايكروفايبر لما تم تصنيعه بطرق متقدمة اصبح له قدرة عالية جدا على مقاومة الاتساخ والانكماش ، لذلك يعتبر المايكروفايبر من الاقمشة المميزة حاليا فى الاستخدام.

من مميزات البوليستر انه ممكن يتم خلطه مع كل انواع الاقمشة زى مثلا القطن وينتج لك قماش ناعم بملمس حريري ، ولانه مقاوم لكل الظروف الصعبة فهو مناسب جدا للاستخدام الخارجى.

نصائح عامة فى اختيار قماش التنجيد

فيه مجموعة عوامل تانية فى اختيار قماش التنجيد مهم بردو انك تخليها فى اعتبارك ، زى بيئة الغرفة نفسها اللى هيكون فيها قطعة الأثاث ، هل فيها اشعة شمس مباشرة ولا رطوبة عالية ؟ ، هل فيه حيوانات اليفة معاك في الغرفة ؟ ، هل فيه حد من الأفراد الموجودين فى البيت يعانى من الحساسية ؟

بهتان اللون

ده عامل مهم جدا وانت بتختار قماش التنجيد ، خاصة لو هيتنجد فى كنبة او كرسى يتعرض باستمرار لأشعة الشمس المباشرة او قريب من الشباك ، وبالتالى لازم تختار قماش مقاوم لبهتان اللون عشان يعيش معاك عمر افتراضى أطول.

مقاومة العفن

لو بيتك فى منطقة رطبة يبقى مهم جدا انك تختار قماش مقاوم للعفن ، لان الرطوبة المستمرة تصيب بعض أنواع القماش بالتعفن.

الإصابة بالحساسية

لو عندك فى البيت أشخاص مصابين بالحساسية يبقى لازم تراعى النقطه دى كويس جدا وانت بتختار قماش التنجيد ، حاول تختار قماش من المايكروفايبر لانه خالى من الوبر وغير جاذب للاتربة ، وده يخليه الاختيار الأول بالنسبة لك فى الحالة دى.

الحيوانات الأليفة

لو كنت من هواة تربية الحيوانات الاليفة فى بيتك زى القطط والكلاب ، يبقى من الضروري انك تتجنب الاقمشة الحساسة للخربشة واثر مشى الحيوانات عليها زى مثلا الحرير او اى قماش فيه انسجة كثير ، لكن المفروض انك تستبدله بجلد أو قماش مصنوع من المايكروفايبر لانهم هيتحملوا النوع ده من الضغط. وممكن تقرأ موضوع حماية الكراسى من الحيوانات بالتفصيل عشان تعرف أكثر.

كل اللى بتفكر فيه وانت بتعمل مطبخ جديد هو اللون هل يتماشى مع السيراميك ولا لا ، وشكل المقبض وستايل المطبخ مودرن ولا كلاسيك ومقاسات علب التخزين العلوية والارضية ، لكن هل فكرت فى شكل الفنش للمطبخ ، وانت موجود فى شركة تصنيع المطبخ هيسألك الفنى ويقولك تحب مطبخ هاى جلوس ولا مطفى ؟ متبقاش متردد او قلقان من الرد.

الشكل اللى انت هتختاره سواء لامع او مطفي هيفرق كثير جدا فى شكل المطبخ بغض النظر عن الخامة اللى هتعمله منها ، هنتعرف مع بعض على مميزات وعيوب كل نوع من الأنواع الموجودة مع مجموعة إرشادات ونصائح تساعدك فى اختيار مطبخ هاى جلوس ولا مطفى ، وازاى اختيارك يكون ملائم لشكل مطبخ بيتك سواء كان جديد او بتجدده.

خامات اسطح المطبخ

سواء عملت علب تخزين المطبخ من الخشب او MDF او الواح الكونتر الحبيبى او كونتر الطبقات ، فيه اختيارات كتير من أشكال وخامات الفنش اللى ممكن تختارها عشان تحقق الشكل الوظيفة اللى بتدور عليهم فى مطبخك.

على سبيل المثال لو كانت الدلف المستخدمة فى علب المطبخ من الخشب ، ممكن تعملها عزل بدهان زيتى او تدهنها بوليستر وده يرجع لاختيارك انت على حسب ذوقك.

اذا كان المطبخ مصنوع من الواح الاخشاب المصنعة زى الخشب الحبيبى او الواح الكونتر او الواح MDF ، يفضل انك تدهنها بالدهانات المخصصة للمطبخ واللى تم صنعها عشان تحقق الغرض ده ، ودى موجود منها ماركات معروفة فى السوق ، او ممكن دهانها بكذا عبوة بوليستر.

وممكن تكسى الدلف الخارجية بطبقة من الميلامين او اللامنيشن ، او قشرة الخشب او طبقة كسوة من PVC اللى بيتم كبسها حراريا ، كل الاختيارات دى تعتمد على ذوقك واختيارك للشكل النهائى اللى بتدور عليه.

مش مهم تكون الخامة ايه من وسط كل الاختيارات اللى اصبحت متاحة حاليا وبقت فى حد ذاتها اختيار محير حتى ان الناس بتغير قرارها بناء على اسم الخامة فقط ومن خلال السمع من بعض اقاربها او اصدقائها لمجرد ان واحد منهم مدح فى خامة معينة ، لكن الاهم من كده انك تحدد انت محتاج مطبخ هاى جلوس ولا مطفى ولا نصف لامع ، هو ده القرار الاهم اللى لازم تختار على اساسه الخامة سواء كانت دهان او اكساء ، تعالى نعرف ايه مميزات وعيوب المطبخ اللامع اللى يسمى فى السوق هاى جلوس High gloss والنصف لامع Semi gloss والمطفي Matt

المطبخ هاى جلوس (اللامع)

المطبخ هاى جلوس او اللامع هو يعتبر أكثر أنواع المطابخ طلب من الجمهور فى الوقت الحالى ، وعشان نوضح الكلام اكثر كلمة هاى جلوس ده مش نوع مطبخ معين لا دى فئة المطابخ اللامعة بلمعان كامل زى الاكريليك وبعض أنواع لامنيشن ، وانتشرت بشكل كبير جدا فى الفترة الاخيرة منذ ظهورها فى فترة السبعينات ، يتميز النوع ده من المطابخ انه مناسب جدا للبيوت العصرية والمودرن ، لان علب التخزين الخاصة به عدد خطوطها قليل والدلف بدون حلايا او حفر او نقوشات وده من ملامح الاستايل المودرن.

الفنش الهاى جلوس يعبر عن مقياس معروف يستخدم فى التعبير عن درجة لمعان خامات تصنيع المطابخ ويشار اليه برقم 100% لامع ، بناء على أى خامة مستخدمة فى فنش المطبخ ، وعلى المورد والمكان اللى بتشترى منه الخامة.

تتميز مطابخ هاي جلوس بلمعة عالية جدا فى سطحها تعكس الاضاءة فى المطبخ ، وده من ضمن اكبر الاسباب اللى ادت لانتشار اللون الأبيض منها فى الفترة الحالية.

مميزات المطبخ هاى جلوس

اظهار اتساع المكان

من أهم الاعتبارات اللى لازم تخليها فى دماغك وانت بتختار مطبخ هاي جلوس ولا مطفى ، هو اى نوع منهم يظهر اتساع المكان اللى هيكون فيه ، واللى ياخد النقطة دى هو المطبخ الهاى جلوس ، بفضل الانعكاسات اللى بيعملها للضوء ، يعتبر كأنه قطع مرايات موجودة فى المطبخ وبيظهر المطبخ بحجم اكبر من حجمه الطبيعى ، وده يخليه الاختيار الافضل بالنسبة لك لو كانت مساحة مطبخك قليلة ومحتاج تظهره.

انعكاس الإضاءة

من ضمن مميزات المطبخ هاى جلوس انك مش هتقلق وانت بتختار منه لون غامق ، لان المعروف عن الالوان الغامقة انها تمتص الاضاءة لكن هنا الوضع مختلف ، الخامة هاى جلوس مش هتمتص الاضاءة ولكنها هتعكسها بالكامل او على على الأقل 95% منها وبالتالى تقدر تختار اى الوان فيها براحتك.

سهولة التنظيف

من ضمن مميزات المطبخ الهاى جلوس انه سهل جدا فى تنظيفه ودى تعتبر أهم نقطة واللى تكاد تكون سبب الإقبال الكبير على النوع ده من المطابخ ، باستخدام قطعة قماش ناعمة مصنوعة من المايكروفايبر ومياه وصابون عادى بدون اى مواد خاصة أو كاوية تقدر تنظف علب المطبخ وتزيل من عليها الاتربة والدهون المتراكمة.

عيوب المطبخ هاى جلوس

عدم ثبات اللون

مش معنى كلمة ثبات اللون هنا انه لونه بيتمسح مع الوقت ، لا طبعا الكلام هنا عن تغير لونه مع البيئة المحيطة نتيجة الانعكاس ، فكل ما يكون اللون مش مشبع أكثر كل ما انعكاس الضوء يزيد اكثر ، لذلك هنلاحظ ان اكثر لون عاكس للضوء هو اللون الأبيض وهو اكثرهم انتشار في الطلب من خلال الجمهور.

ولكن خلى بالك من نقطة مهمة ، وهي أن القدرة الكبيرة على الانعكاس اللى تتمتع بها خامة هاى جلوس تعكس الضوء لكل مكان فى المطبخ ، وبما أن سطح الخامة عاكس تماما فيظهر كل الوان الاسطح الموجودة حوله ، وهنا بقى بعض الأشياء الموجودة هيظهر لونها على سطح علب المطبخ وخاصة لو كانت علب المطبخ بيضاء هتلاقى الوان كل شىء محيط بها ظهر لك على علب المطبخ نفسها ، عشان كده متبقاش مندهش من الوضع ده.

ظهور العيوب والخدوش

زى ما اللمعة العالية جدا بتعمل شكل جمالى للمطبخ الهاى جلوس ، بردو لها بعض العيوب وتحديدا فى الالوان الغامقة انه بيظهر أقل خدش او اتربة او بصمات الاصابع اكثر من الالوان الفاتحة بكثير ، عشان كده فيه ناس كثير بتفضل الالوان الفاتحة عشان النقطة دى ، كمان فيه نقطة مهمة وهي أن كثرة تنظيف النوع ده من المطابخ مع كثرة الاحتكاك ممكن مع مرور الوقت يجرح سطح علب التخزين وده هيظهر جدا باعتبار أن السطح غامق ، وده مش هتلاقيه موجود فى المطابخ بسطح نصف لامع او مطفي.

نصائح عامة بخصوص المطبخ هاى جلوس

انعكاسات الضوء فى المطبخ هاى جلوس بتكون ظاهرة جدا فى العلب العلوية للمطبخ بحكم انها فى مستوى النظر وظاهرة جدا بالنسبة للعين ، اكثر من ظهورها فى العلب الارضية ، فلو كنت بتحب المطبخ يكون بلمعة عالية عشان الشكل الجمالى وقلقان من ظهور اى خدوش او بصمات عليه ، ممكن تخلى العلب العلوية فقط هاى جلوس والعلب الأرضية تكون نص لمعة او مطفية ، بحيث تخفى اى انعكاسات.

كذلك لو بتحب الالوان الغامقة فى مطبخك وعايز لمعة عالية ، ممكن تدمج لون غامق مع لون فاتح ، خلى العلب العلوية هى اللى تكون غامقه لانها فى مستوى النظر ، واقل فى الاستخدام من العلب الارضية اللى عليها ضغط كبير باستمرار ، وخلى العلب الارضية بالوان فاتحة لانها مش هتظهر اى خدوش او بصمة.

المطبخ المطفى Matt

علب المطبخ اللى سطحه مطفى مش بتعكس اى اضاءة نهائى على عكس المطبخ الهاى جلوس ، يعتبر النوع ده من المطابخ الاختيار المثالي للبيت بستايل نمطى ، وهنلاحظ حفر على أوجه الدلف الخارجية لمزيد من الشكل الجمالى.

ممكن يتماشى المطبخ المطفي مع الستايل العصرى ، باعتبار علب التخزين والدلف بأوجه مسطحة تتماشى مع بعض الاستايلات الحديثة ، لذلك هنلاحظ انتشاره الفترة دى جدا ، وخاصة فى معظم البلاد الاوروبية وبدأ ينال شعبية اكثر من المطبخ هاى جلوس.

مميزات المطبخ المطفى

تغطية العيوب والخدوش

أكبر ميزة تميز المطبخ المطفى أن سطحه يغطى اى عيوب او خدوش او بصمات اللمس المتكرر ، عشان كده بيكون صعب ملاحظة العيوب دى فى النوع ده من المطابخ بعكس المطابخ هاى جلوس ، وده مش معناه انك مش هتشوف اى عيوب او خدوش نهائى لا طبعا ولكن هتكون بنسبة أقل بكثير من المطابخ الهاى جلوس ، بسبب قلة الضوء المنعكس من خلال سطحها.

ثبات اللون

ثانى ميزة ممكن تخليك تتجه للمطبخ المطفى ان لونه ثابت اكثر من المطبخ هاى جلوس ، وده بسبب عدم وجود انعكاسات بعد سقوط الضوء عليه ، عشان كده مش هتلاقى فيه مناطق مظلمة ومناطق مضيئة ، وتقدر تلاحظ ده لو رحت اي معرض لشركة تصنيع مطابخ وشوف المطبخ هاى جلوس هتلاقى ان الوان المكان المحيطة به موجودة على سطحه ، في حين أن المطفى مش هتشوف فى سطحه اى شىء تانى.

عيوب المطبخ المطفى

اظهار ضيق المكان

من المعروف ان الاسطح المطفية تمتص الضوء بعكس الأسطح اللامعة اللى تعكس الضوء ، وده هيخلى شكل المطبخ صامت مش تفاعلى زى الهاى جلوس ، بالإضافة إلى أن المطبخ المطفى مش هيساعد على اظهار اتساع المكان لان سطحه غير عاكس.

صعوبة التنظيف

على عكس الأسطح اللامعة هنلاقى ان الاسطح المطفية اصعب الى حد ما فى التنظيف من الهاى جلوس ، لان لها سطح يشبه المسامات نتيجة التصنيع ، وده بياخد وقت ومجهود فى التنظيف ، وعشان تضمن سلامة المطبخ ممكن تستخدم قطعة قماش من المايكروفايبر مع مياه وصابون بدون استخدام مواد كاوية لتنظيف سطح المطبخ.

خشونة الملمس

لو اخترت المطبخ بسطح مطفي زي مادة لامنيشن مثلا ، لازم تشوف العينات كويس جدا بنفسك وتلمسها بايدك وتتأكد ان ملمسها مسطح ، لان فيه بعض خامات لامينيشن لها أسطح خشنة ، وده هيخلى تنظيفها اصعب بكثير من السطح المطفى العادى لان سطحها ملىء بالتفاصيل ويعلق فيها اتربة وزيوت كثير ، لكن ده لا يمنع انك تعمل بعض القطع فى المطبخ بملمس طبيعي زى الخشب أو بعض الخامات الخشنة لاضافة ملمس طبيعى للمطبخ ولكن حاول تختاره بدرجة خشونة قليلة.

نصائح عامة بخصوص المطبخ المطفى

لو كنت من هواة المطبخ المطفى ومش حابب الشكل يكون ممل نوعا ما بسبب انه مفيش انعكاسات للضوء ممكن تأخذ فى اعتبارك فكرة من الافكار دى :

• ممكن تختار شكل الدلف الخارجية بحفر بسيط مش بتفاصيل كبيرة ، ده هيعمل ظل ونور مع سقوط الضوء عليه من اى زاوية.
• ادمج لونين مع بعض كنوع من التغيير فى الشكل بدل ما تكون علب التخزين كلها بلون واحد.

المطبخ النصف لامع

لو الاختيار ما بين مطبخ هاى جلوس ولا مطفى مكانش مقنع بالنسبة لك ، ممكن فى الوقت ده يكون المطبخ النصف لامع هو الحل الأمثل بالنسبة لك ، وهنا نقدر نشوف مميزات المطبخ النصف لامع أنه جمع مميزات الهاى جلوس مع مميزات المطفي فى وقت واحد ، لأنه يتمتع بدرجة انعكاس للضوء ولكن بسيطة مش بنفس قوة انعكاس الهاى جلوس.

وبسبب قلة الانعكاس الموجودة فى الخامة مش هتشوف الوان كثير من الموجودة فى المطبخ كله على سطح العلب ، ده غير انه هيقلل من وجود البصمات والخدوش على سطحه لأن الانعكاس انخفض بنسبة كبيرة ، ويتميز بسهولة فى تنظيفه مقارنة بالمطبخ المطفى.

الزجاج السيكوريت موجود حولنا فى كل مكان ، لكن احيانا مش بنعرفه ، واحيانا يسمى الزجاج الحرارى ومن ضمن الاماكن الموجود فيها ، السيارات والمبانى العامة زى المستشفيات والمدارس ، والاثاث وفى الرفوف وكبائن الشاور وفى الشبابيك واستخدامات تانية كثير جدا ، كل ده بفضل قوته وصلابته بالمقارنة مع الزجاج العادى.

ايه هو الزجاج السيكوريت

الزجاج السيكوريت هو نوع من انواع الزجاج يستخدم فى الأماكن المطلوب فيها الأمان والقوة الزيادة ، شفاف شبه الزجاج العادى ، لكنه اقوى واصلب واصعب فى الكسر 6 مرات بالمقارنة بالزجاج العادي ، ويقدر يتحمل الضغوط والاصطدام اللى ممكن تكسر الزجاج العادي بكل سهولة.

بالاضافة لكده الى انه فيه فرق كبير بينه وبين الزجاج العادى وقت الكسر ، مثلا الزجاج السيكوريت لحظة الكسر يتحول الى قطع صغيرة مربعة أو دائرية بحواف ناعمة ، فى حين ان الزجاج العادى لحظة الكسر يتحطم لأجزاء كبيرة جدا بحواف حادة تماما ، وده بيشكل خطر كبير على الأشخاص الموجودين لانه ممكن يصيبهم بجروح خطيرة.

من ضمن الاسماء اللى اطلقت على زجاج السيكوريت اسم (زجاج الامان) وده بسبب انه لما بيتكسر بيتحول الى قطع صغيرة آمنة لو حاولت تمسكها بايدك ، وده هنلاحظه على الطرق لما زجاج اى سيارة بيتكسر فى الحوادث ، عشان كده أطلق عليه الاسم ده ، مش بس عشان صعوبة كسره او قوته الزائدة.

ممكن نحول الزجاج العادى الى زجاج سيكوريت بطريقة من اتنين ، اما المعالجة الحرارية او المعالجة الكيميائية ، ونحصل على نفس النتيجة فى النهاية باى طريقة منهم ، فمثلا المعالجة الحرارية تعتمد على التسخين والتبريد السريع ، فى حين أن المعالجة الكيميائية تستخدم فيها حرارة وبعض المواد لزيادة صلابة الزجاج.

استخدامات الزجاج السيكوريت

بفضل الأمان المتوفر فى الزجاج السيكوريت بدرجة عالية ، وصلابته الممتازة تم اعتماده في الاف التطبيقات الموجودة فى حياتنا ، بداية من المكاتب والشركات الكبيرة ، والأعمال المنزلية زى الشبابيك وكبائن الشاور ، وزجاج السيارات ، والزجاج المستخدم فى معظم الاجهزة الكهربائية زى البوتجاز والفرن سواء كهرباء او غاز وارفف وادراج الثلاجة والميكروويف وشاشات التليفون المحمول والطبقة الواقية لها ، ويستخدم فى الابواب الاكورديون لتجنب كسرها بسبب الاستخدام المتكرر وفى الابواب المصفحة ، ويستخدم بردو فى صناعة الزجاج المصفح المستخدم في سيارات الدبلوماسيين ، والاقنعة المستخدمة فى الغطس ، وكل استخدام يحتاج زجاج قوي وآمن.

مميزات الزجاج السيكوريت

اهم ميزة من مميزات الزجاج السيكوريت قوته وصلابته وصعوبته فى الكسر بالنسبة للزجاج العادى ، لانه اقوى منه بحوالى 6 او 7 اضعاف ، وده اللى خلاه المطلب الأول فى كل المقايسات الفنية في الأماكن العامة لأن تركيبه الزامى فى الاماكن دى ، وعشان كده هو الوحيد المستخدم في واجهات المولات والمحلات التجارية ، وفي استخدمات هندسية زى الرفوف والترابيزات ووحدات التخزين.

بالاضافة الى صلابته وقوته ، يتميز بأمان عالى جدا لانه صعب الكسر واذا اتكسر بيتحول لقطع صغيرة ناعمة وباطراف غير حادة لا تصيب بأي أذى ، على عكس الزجاج العادى اللى بيتكسر الى قطع كبيرة وضخمة وحادة جدا فى الاطراف ، و ده سبب كافى لاختياره لتوفير أقصى درجات الأمان في حالة حدوث اى كسر على الأفراد الموجودين.

ازاى يتم تصنيع الزجاج السيكوريت

عملية التصنيع دى يطلق عليها فى لغة السوق (سكرتة الزجاج) ودى ممكن تتم بطريقة من اثنين ، والطريقتين يعتمدوا على حقيقة علمية وهي أن الزجاج المضغوط يصبح اقوى بكثير من الزجاج المشدود ، بمعنى انه كل ما يتم ضغط الزجاج فى ظروف اصعب يصبح اقوى من المشدود ، وده عن طريق تعرض الأسطح الخارجية للزجاج للضغط ، وده معناه ان اى محاولة لتكسير الزجاج السيكوريت لازم يتعرض لضغط اكبر من اللى تم تصنيعه فيه.

سكرتة الزجاج بالحرارة والتبريد

معظم أنواع الزجاج السيكوريت اللى بنستخدمها مصنوعة بطريقة الحرارة عن طريق الخطوات دى :

• يتم تصنيع الزجاج السيكوريت عن طريق تقطيع الزجاج العادى للمقاسات المطلوبة.
• يتم استبعاد اى قطعة زجاج بها شوائب أو فقاعات داخلية ودى خطوة مهمة جدا لان القطع اللى فيها شوائب تتعرض للكسر لما تدخل للحرارة.
• يتم تعرض الزجاج العادى فيها لدرجة 620 مئوية داخل فرن مخصص لعملية دى ، ويفضل موجود فى الحرارة دى لفترة.
• بعد كده تيجى مرحلة التبريد وهنا يتعمل له تبريد سريع عن طريق تعرضه لهواء بارد من مواسير بضغط عالى وبسرعة عالية جدا من كل الزوايا وبالتحديد من الأطراف أسرع من المنتصف لمدة تتراوح من 3-10 ثوانى ، العملية دى تجبر جزيئات السطح الخارجى للضغط على جزيئات الطبقات الداخلية والعكس صحيح تولد قوة داخلية تضغط على السطح الخارجى.
• العملية دى تنتج زجاج مضغوط جدا من السطح الخارجى ومشدود جدا من الطبقات الداخلية ، وزى ما قلنا الحقيقة العلمية أن الزجاج يقوى كل ما يتعرض لضغط أكبر من التعرض للشد ، وبالتالى عشان تكسر الزجاج السيكوريت لازم تتجاوز القوة الضاغطة اللى صنعته ، وده هو سر قوة الزجاج السيكوريت وانه اقوى بـ 6 او 7 اضعاف من الزجاج العادى.

وفيه فائدة ثانية للعملية دى وهى تعدد مناطق الضغط على الزجاج من خلال التبريد وهو ده سبب صغر حجم القطع لما الزجاج السيكوريت يتكسر.

سكرتة الزجاج بالمعالجة الكيميائية

ودى طريقة مش منتشرة فى بلادنا العربية ، وفيها تتم سكرتة الزجاج عن طريق تبادل الأيونات.

• يتم غمر قطعة الزجاج فى حمام يحتوى على ملح بوتاسيوم بدرجة حرارة 300 مئوية.
• لحظة ذوبان الملح ، ده معناه انه تم حله لمكوناته الاساسية.
• ويتم تحرير ايونات البوتاسيوم المشحونة لتحل محل ايونات الصوديوم الموجودة على سطح الزجاج.
• لما أيونات الصوديوم تترك سطح الزجاج عشان تدخل فى محلول ملح البوتاسيوم ، تترك فراغات فى سطح الزجاج نفسه وهنا يجي دور ايونات البوتاسيوم الأكبر منها فى الحجم واللى بتحل محلها وتملا الفراغات دى.
• ايونات البوتاسيوم اكبر من ايونات الصوديوم بحوالى 30% ، ونتيجة عملية تبادل الأيونات دى يتعرض السطح الخارجى للزجاج للضغط ، وده يخلى جزيئاته تكبر فتضغط على الطبقات الداخلية اللى بيحصلها عملية شد نتيجة الضغط الخارجي.
• وبكده ينتج لنا زجاج قوى عشان تقدر تكسره لازم تتجاوز الضغط اللى تعرض له أثناء التصنيع.

رغم أن الطريقتين ينتجوا زجاج سيكوريت قوى الا ان الزجاج المصنوع بالمعالجة الكيميائية لما يتعرض للكسر تصبح اجزائه كبيرة وحادة شبه قطع الزجاج العادى ، عشان كده مش بيسمى زجاج آمن بعكس النوع المصنوع بالحرارة ، إلا إذا تم اكساؤه بطبقة حماية خارجية لمنع وقوع أجزائه إذا تعرض للكسر.

ضمان جودة الزجاج السيكوريت

بعد ما عرفنا الزجاج السيكوريت وازاى يتم تصنيعه بالمعالجة الحرارية أو المعالجة الكيميائية وعرفنا هو ليه اقوى ، تعالوا نتعرف على عوامل ضمان جودة الزجاج ونعرف اذا كان جودته سيئة أو لا.

• بسبب الضغط الداخلى العالى جدا اللى بيتم تنفيذه على الزجاج بعملية التبريد ، لابد من اجراء كل عمليات القطع والتخريم والحفر قبل عملية السكرتة والدخول فى الفرن الحراري ، لانه بعدها مينفعش اجراء اى معالجة على الزجاج.
• معدل سرعة التبريد هو اللى بيحدد قوة تحمل الزجاج السيكوريت ، بعد معالجته الحرارية بدرجة 620 مئوية يتم تبريده بهواء نفاث بسرعة عالية جدا ، وهنا نقدر نعرف اذا كان الهواء سريع نحصل على زجاج قوى جدا ، لان سرعة الهواء البارد هي اللى بتضغط على جزيئات السطح الخارجى ، و تشد جزيئات الطبقة الداخلية ، وبالتالى اذا كان اقل فى السرعة يبقى الزجاج المنتج اضعف.
• من المعروف عن الزجاج السيكوريت ان الحد الادنى للضغط اللى يتحمله سطحه الداخلى 10000 PSI يعني 10 الاف رطل فى البوصة المربعة ، وبالنسبة لأطرافه تتحمل ضغط 9700 PSI ، ودى مواصفات الكود الامريكى ASTM C 1048 المعترف به عالميا ، وده يعتبر 4 أضعاف قوة الزجاج العادى.
• تأكد من سلامة الحواف ، لان لو حصل اى خدوش او كسور للحواف سواء فى التصنيع او التقطيع او النقل او حتى التركيب ده هيخلى الزجاج السيكوريت قابل للكسر ، عشان كده خلى بالك من جودة الحواف.

أنواع الزجاج المعالج بالحرارة

النوع المقوى

هو نوع معالج بالحرارة والتبريد بسرعة عالية جدا وهو اللى ممكن يتحمل الضغط العالي 10000 PSI وده المستخدم فى اغلب تطبيقاتنا الموجودة زى المحلات التجارية وغيرها ، عشان كده يسمى الزجاج الآمن فى الاستخدام ، لذلك المقايسات الخاصة بالمباني العامة لازم يكون فيها زجاج من النوع ده لتوفر الأمان.

النوع المعالج حراريا

وده نوع تانى معالج بالحرارة بردو ولكن بسرعة تبريد منخفضة ، لذلك هنلاقيه اقل منه فى القوة يتحمل ضغط 7500 PSI واقل منه فى الكفاءة ومن عيوبه انه بيتكسر لقطع كبيرة ، وعشان كده يحدث إصابات بالغة للأفراد الموجودة.

من أكثر الأشياء التى تصيبك بالقلق أثناء تجهيز ديكور منزلك أن تكون واقفا فى منتصف غرفة المعيشة وهى فارغة وتظل فى حيرة ولا تعرف من أين تكون البداية. هناك مجموعة عناصر تحكم اختيارك ، مثل ذوقك الشخصى وطريقتك فى المعيشة من حيث الجلوس ومواعيدك فى النوم وتناول الطعام وقبل كل ذلك الميزانية. لكن أهم نقطة تبدأ بها هى توزيع فرش غرفة المعيشة ، بمعنى أوضح توزيع الكنب والكراسى والطاولات ووحدات التخزين وأى قطع موجودة على سطح أرضية الغرفة.

وقد جمعنا لك مجموعة من النصائح والإرشادات يمكنك اتباعها لكى تضمن توزيع فرش غرفة المعيشة بأفضل استغلال للمساحة الموجودة وبأسهل الطرق بناء على احتياجاتك الشخصية.

قم بتسجيل أبعاد غرفة المعيشة

ارسم مربع وسجل فيه كل مقاسات الحوائط سواء على الكمبيوتر الشخصى لك او على ورق اسكتش. سيساعدك هذا الرسم فى ترتيب فرش غرفة المعيشة بشكل دقيق وأيضا فى تخطيط المساحة. بعد الرسم وكتابة المقاسات قم بتحويلها من أمتار إلى سنتيمترات بالضرب فى 100 بالآلة الحاسبة.

بعد ذلك قس أبعاد كل قطعة أثاث تنوى شراؤها ، وارسم مربع لكل قطعة أثاث واكتب عليها مقاساتها فى رسم الغرفة الذى قمت به. من خلال هذا الرسم يمكنك أن تقرر إذا كان الفرش والاكسسوارات مناسبة لمساحة الغرفة أم لا.

استخدامك لغرفة المعيشة

مع تغير طرازات الديكور منازلنا أصبحت غرفة المعيشة متعددة الاستخدامات ، وخاصة إذا كان هناك أطفال ستجدهم طوال الوقت جالسين فيها للعب والمرح وقضاء كل الأنشطة. ولكى تجدد شكل و توزيع فرش غرفة المعيشة لابد أولا أن تحدد احتياجك الرئيسى منها وخصوصا إذا كانت مخصصة لأنشطة كثيرة. هل تستخدمها للتسلية والترفيه ، أم أنها غرفة عائلية للجلوس فيها مع أولادك أم لمشاهدة التلفاز. فكل استخدام من تلك الاستخدامات له طريقة معينة فى ترتيب الفرش وتنظيمه لذلك لابد أن تحدد ما هو استخدامك.

حدد نقطة التركيز

أكثر نقطة تساعدك فى تخطيط مساحة غرفة المعيشة وتوزيع الفرش فيها هى نقطة التركيز. والتى من الممكن أن تكون شاشة التلفاز أو دفاية ديكور او ثريا فى السقف أو لوحة فنية. وبمجرد ما تحدد هذه النقطة تستطيع ترتيب الفرش بناء عليها. فمثلا إذا كانت نقطة التركيز خلفية الشاشة ، فمن الضرورى أن تضع فى اعتبارك أن مسافة الرؤية تتراوح بين 250 – 370 سم ، وزاوية الرؤية لا تزيد عن 30 درجة. وفى ذلك الوقت لابد أن تكون كنبة الجلوس مقابلة للحائط الموجود فيه الشاشة.

ويمكنك ترتيب الكراسى والشيزلونج حول حائط الشاشة أو على جوانبها ، أو تحيط بكنبة الجلوس كنوع من التوازن البصرى. ولعمل شكل مثالى ممكن أن تضيف قطعة أثاث مختلفة عن الشكل الموجود مثل عدد 2 باف أو بين باج أمام الشاشة لكسر روتين المكان.

بالنسبة لغرفة المعيشة الموجود بها دفاية الديكور غالبا ما تكون مخصصة للمحادثات وتجمع العائلة وهذا هو هدفها الرئيسى. وفى هذه الحالة فإن أفضل قطعة فرش هى كنبة أو ركنة دائرية أو منحنية حول منطقة التدفئة بمقاس لا يتجاوز 250 سم لكى تسهل عملية التواصل بين الجالسين.

فى الغرف الخالية من شاشة التلفاز أو الدفاية تكون نقطة التركيز فيها فى المنتصف وهى أيضا للجلسات العائلية. وينصح باستخدام كنب وكراسى متقابلة مع بعضها وإضافة طاولة أنتريه فى المنتصف لوضع المأكولات والمشروبات للجالسين.

رتب القطع الكبيرة أولا

دائما الكنبة أو ركنة غرفة المعيشة هى أكبر وأغلى قطعة فيها ، ولذلك فإن شكلها وحجمها هو الذى يحدد طريقة توزيع فرش غرفة المعيشة كله. لهذا السبب لابد أن تختار شكلها بعناية ، لأن شكلها هو الذى يرسم ملامح المكان.

إذا كانت مساحة الغرفة كبيرة يمكنك شراء كنبة على شكل حرف L تتيح لك خيارات متعددة فى الجلوس وخاصة إذا كان هناك ضيوف أو أصدقاء. أما إذا كانت المساحة صغيرة ستحتاج لكنبة صغيرة وكراسى محيطة بها على نفس الأحجام لمراعاة مساحة غرفة المعيشة.

تجنب توزيع فرش غرفة المعيشة على محيط الغرفة

توزيع فرش غرفة المعيشة ملاصق للحوائط يعتبر واحد من الأخطاء التى يقع فيها كثير من الناس. لأنك فى تلك الحالة لن تخسر فقط مساحة الغرفة ووحدتها لكن أيضا ستعطيك إحساس بفراغ كبير فى وسط الغرفة. فمن الأفضل أن تبدأ من منتصف الغرفة وتتجه ناحية الحوائط.

ومن الممكن أن تستخدم نفس الطريقة فى غرف المعيشة المفتوحة على المطبخ إذا كان مطبخك مفتوح. وفى تلك الحالة سيتحول فرش غرفة المعيشة إلى فاصل بين منطقة الليفنج وغرفة الطعام مثلا إذا كانت في الجزء المجاور لها. بالإضافة إلى أنها تساعد على التواصل بين الأفراد الموجودين فى المطبخ وباقي أجزاء المنزل.

توزيع فرش غرفة المعيشة

بعد تحديد نقطة التركيز فى الغرفة يأتى دور ترتيب قطع الفرش. حاول أن ترتب قطع الفرش حول نقطة التركيز نفسها ، بعد ذلك رتب الطاولات ووحدات التخزين. ضع طاولة الأنتريه Coffee table فى وسط الكنبة أو الركنة. وحاول أن تترك مسافة 45 سم بين الطاولة و كنبة الجلوس ، لكى تكون المأكولات والمشروبات ومتعلقات التلفاز فى متناول اليد.

رتب الطاولات الجانبية على جوانب الكنبة اليمين واليسار بعد أن تنتهى من ترتيب الكراسى. وبالنسبة للغرف ذات المساحة الصغيرة ستحتاج فيها طاولات قابلة للطي تفردها وقت الاستخدام وتطويها وقت التخزين. وبعد الانتهاء من ترتيب الكنب والكراسى والطاولات اجعل وحدات التخزين مجاورة للحائط مباشرة فى المكان الذى تسمح به مساحة غرفة المعيشة.

ضع كونسول شاشة التلفاز أسفلها مباشرة وفى أكبر حائط موجود فى الغرفة. و إذا كنت تفضل عمل إكساء للحائط لتركيب الشاشة أو بلاطات 3D حاول أن تجعله على أكبر حائط موجود لكى يظهر ديكور غرفة المعيشة.

راعى مساحات الحركة

من اهم النقاط التى لابد أن تضعها فى اعتبارك أثناء توزيع فرش غرفة المعيشة هى مساحات الحركة. لابد أن تعرف كيفية حركة الأفراد الموجودين فى الغرفة. حاول أن تترك مسافة ما بين 75 – 90 سم فى الأماكن كثيرة الحركة لتجنب اصطدام الشخص المار بالجالسين على الكنب او اصطدامه بالكنب نفسه.

أيضا من النقاط الهامة التى يجب مراعاتها فى توزيع فرش غرفة المعيشة أن تجعل حركة الأشخاص الموجودين فى الغرفة بعيدة عن نقطة التركيز مثل شاشة التلفاز. وهذه النقطة بالتحديد تعتبر من الأشياء المزعجة أن يمر شخص من أمامنا أثناء مشاهدة التلفاز. لذلك حاول أن تجعل الحركة من خلف الكنب أو الكراسى أو في ممر جانبى بجوار الفرش.

ضع السجادة فى منتصف الغرفة

آخر وأسهل عنصر من عناصر فرش غرفة المعيشة هو السجادة. لابد أن تكون فى منتصف منطقة الجلوس فى الغرفة ، مع مراعاة امتدادها تحت الكنب والكراسى بمقدار كافى لكى تكون محور الارتكاز. وإذا كانت الغرفة مفروشة بالموكيت بكامل مساحتها يمكنك إضافة سجادة فى المنتصف لإضفاء مزيد من الدفء والشكل الجمالى. وهذا يظهر أكثر فى المنازل ذات المساحة المفتوحة.

أثناء اختيارك لمقاس السجادة التى تناسب غرفة المعيشة لابد تعرف مقاسات قطع الفرش التى ستشتريها وهنا يفيدك المخطط الذى قمت برسمه. أيضا هناك نقطة هامة فى تحديد مقاس السجادة وهى أن يكون منها جزء أسفل الكراسى فلا تكون على الحواف مباشرة. وبالنسبة لشكل السجادة يتوقف على شكل الغرفة لديك فمثلا إذا كانت الغرفة مستطيلة يناسبها سجادة مستطيلة ، فى حين أن السجادة المربعة والدائرية تناسب الغرف المربعة.

تسهيل التواصل بين الجالسين

أغلبنا يقضى عدد ساعات إقامته فى المنزل فى غرفة المعيشة سواء فى مشاهدة التلفاز أو قضاء وقت مع العائلة. لذلك لابد من عمل تخطيط غرفة المعيشة بحيث يكون مناسب للتواصل بين الجالسين. على سبيل المثال لايصح أن يكون الجالسين فى الغرفة بعيدين عن بعضهم فيحتاجوا لرفع أصواتهم ليستمعوا لبعضهم أثناء الحديث. أيضا لايكونوا جالسين على خط واحد ، لكن يفضل أن يكونوا مقابلين لبعضهم لسهولة التواصل.

كذلك يفضل أن ترتب الكراسي في مجموعات ثنائية أو ثلاثية متجاورة مع بعضها ، لتجنب أن يكون هناك شخص جالس فى ركن بعيد منفرد. أيضا حاول أن تجعل غرفة المعيشة مناسبة لأنشطة متعددة ، مثل مشاهدة التلفاز والترفيه ولعب الأولاد.

وهنا سنعرض عليك بعض طرق تخطيط غرفة المعيشة من الممكن أن تختار أحدهم إذا كان يناسب غرفتك ويحقق لك التواصل بين الجالسين مع سهولة الحركة داخل الغرفة.

المخطط الأول

فى هذا المخطط تم وضع الكنبة مقابلة لنقطة التركيز وهى هنا عبارة عن وحدة تخزين كتب. وممكن يستخدم لشاشة التلفاز أو دفاية الحائط او الشباك. وإذا لاحظنا الجوانب سنجد عدد 2 كرسى مع 2 طاولة لكل كرسى ، وتم وضع طاولة Coffee table فى منتصف الغرفة. وهذا بدوره يجعل الجلسة على شكل حرف U وعدد 2 اباجورة على كل طاولة واحدة وذلك لضمان إضاءة مساحة غرفة المعيشة بشكل جيد و لعمل اضاءة مباشرة أو غير مباشرة.

الملاحظ فى هذا المخطط وجود مدخلين فى زوايا متقابلة ، و لذلك تم استخدام المساحة بشكل جيد ، وأصبحت نقطة التركيز فى جزء من الغرفة والكنبة مقابلة لها. ومع وضع الكراسى محيطة بالكنبة لضمان تواصل الجالسين مع بعض. ولو دققنا النظر أكثر سنجد أن الكنبة تحركت للأمام لكى يكون هناك مساحة للحركة بدون إزعاج للجالسين أثناء مشاهدتهم لشاشة التلفاز.

المخطط الثاني

هذا النوع من المخططات مناسب جدا للغرف الكبيرة أو التى تحتاج كراسى متعددة. ولذلك فهو ملائم لوضع كنبتين مع بعضهم بشكل متقابل مع طاولة Coffee table فى المنتصف. مع وضع عدد 2 كرسى فى الضلع الثالث لتكملة شكل حرف U لسهولة التواصل بين الجالسين. ولو لاحظنا الكراسي نجد أنها مقابلة للحائط الموجود فيه نقاط التركيز وهما هنا شاشة التلفاز والدفاية ، وتم وضع 2 لمبادير على جوانب الكراسي للحصول على إضاءة لتجميل شكل المكان.

المخطط الثالث

فى هذا النوع من المخططات اختلاف عن النوعين السابقين ، لأنه مناسب أكثر لوضع الركنة ، والتى تعطى مساحات أكبر للجلوس. لذلك هى الاختيار المفضل لكثير من العائلات ، ولو لاحظنا هنا سنجد فى الناحية المقابلة للركنة كرسى لتكملة شكل حرف U لسهولة التواصل بين الجالسين.

مفيش واحد فينا مشطب شقته او حتى مكتبه وعمل سقف معلق ، إلا وكان فيه عنصر أساسى وهو كرانيش السقف عشان يحس بجمال شكله وخاصة لو كان سقف كلاسيك هيبقى من الضروريات ، الكرانيش دى عبارة عن قطعة ديكور اضافية يتم تركيبها على اخر نقطة فى الحيطة ملامسة للسقف المعلق او حتى السقف الخرسانى بحيث تكسر شكل الزاوية القائمة الموجودة.

متوفر منها اشكال كثير جدا كل شكل منهم يعطى منظر مختلف عن التانى للغرفة الموجودة فيها ، وعشان تقدر تختار كرانيش السقف المناسبة لك لازم تاخد فى اعتبارك مجموعة نقط زى ارتفاع سقف الغرفة وستايل المكان اللى انت فيه ، وطريقة تركيب الكرانيش على الحيطة والسقف ، تعالوا نعرف ازاى هنقدر نختارها.

مقاسات كرانيش السقف

تأثير ارتفاع الغرفة على كرانيش السقف

ممكن تكون متخيل شكل فى دماغك وحاسس انه هيطلع مناسب ، ولكن فيه مجموعة اعتبارات لازم تاخدها فى الاول قبل ما تختار كرانيش السقف ، زى تصميم الغرفة وستايل الديكور اللى عايز توصل له وحجم الغرفة نفسها ، عشان تضمن انك هتحصل على افضل شكل ممكن ، ولو سألت صنايعى الجبس اللى بيشتغل فى بيتك وطلبت رأيه ممكن يفيدك فى الشكل المناسب ، ولكن احنا هنعرفك ازاى تختار بنفسك ويكون الشكل متناسق.

من اكبر الاخطاء اللى الناس تقع فيها انها بتركب كرانيش ارتفاعها عالى فى غرفة ارتفاعها متوسط او اقل من المتوسط ولو عملت كده هتلاقى الشكل أصبح سىء جدا ، فى نفس الوقت لو ركبت كرانيش صغيرة فى غرفة سقفها مرتفع هتلاقيها ضاعت فى مساحة الغرفة لان الغرفة كبيرة أو سقفها مرتفع.

الأسقف المرتفعة تعتبر بيئة مثالية لتركيب كرانيش سقف غنية بالزخارف والاشكال اللى تستخدم للديكور الكلاسيك ، ودى بتكون موجودة فى المساجد والكنائس وقاعات المؤتمرات الرسمية والقصور والفيلات الكبيرة ، واى مكان سقفه مرتفع عشان تملى الفراغ الموجود فيه.

مقاسات الكرانيش الموصى بتركيبها

ينصح بتركيب كرانيش السقف اللى تفاصيلها بسيطة في الأماكن العادية اللى اسقفها معتادة زى الشقق والمكاتب العادية عشان ميبقاش شكل المكان مزدحم بدون داعى ، ودى بعض المقاسات الموصى باستخدامها ، ممكن تستخدم كرانيش السقف بارتفاع يتراوح من 6 – 15 سم فى الاسقف اللى ارتفاعها 240 سم و من 7 – 20 سم فى الاسقف اللى ارتفاعها 275 سم و من 8 – 20 سم فى الاسقف اللى ارتفاعها 3 متر ، وممكن تستخدم كرانيش اكبر من كده للاسقف اللى تتجاوز 3 متر ارتفاع.

خامات كرانيش السقف

 

الجبس

فى العصر الفيكتورى تم استخدام الجبس لعمل كرانيش السقف وتشكيلها بالاشكال الموجودة وقتها ، وتطورت الصناعة دى لحد ما وصلت لنا بالشكل الموجودة عليه حاليا ، وتتميز خامة الجبس بانها الافضل فى الشكل والملمس عشان كده شكلها بيكون رائع فى الفنش والدهانات.

تعتبر افضل خامة فى تصنيع كرانيش السقف وباقى الحلايات المستخدمة للبيت سواء كانت كرانيش جاهزة او مصنوعة عمولة لموقع معين ، وتتميز بامكانية التحكم فى حجمها ومقاسها أثناء التصنيع فى الموقع.

عيوبها انها من اغلى الانواع الموجودة فى السوق لان فيها خامة وصنعة عشان تخرج بالشكل ده ، ده غير انها محتاجة صنايعى محترف عشان يقدر يثبتها فى الحيطة لان الغلطة فيها ممكن تسبب مشكلة كبيرة لو وقعت.

الخشب

كرانيش السقف فيه منها خامات كثير غير الجبس عشان تناسب كل الاحتياجات ، زى الخشب وده يعتبر اغلى نوع فى الانواع الموجودة فى السوق وتقدر تركبه فى الاماكن اللى محتاج تظهر فيها تجزيعات الخشب فيها بدهان شفاف زى الورنيش او اللاكر ، ولو كنت عايز تدهن بلون كاسى تماما اختار كرانيش مصنوعة من MDF ، لان سطحها ناعم تماما وتقدر تدهنها باى لون ده غير ان تكلفتها اقل بكثير من الخشب الطبيعى.

خامات مصنعة

فيه بدائل تانية اقل فى السعر من الخشب الطبيعى زى مثلا الفينيل او PVC ، ودى اقل فى السعر من الخشب وتتميز بمقاومتها للحشرات والتعفن والرطوبة ، وفيه بعضها بيصنع بشكل الخشب عشان يتماشى مع الديكور اذا كان فيه تجليدات خشبية بنفس لونه.

وانت بتشترى كرانيش السقف الجاهزة لازم تشوف عينة من الخامة بنفسك عشان تتأكد شكلها هيبقى مناسب لديكور المكان اللي بتركبها فيه ، ولازم تعرف من البائع ايه هى امكانيات التشطيب والفنش اللى هتدهن بيه الكورنيشة لان مش كل خامات PVC تقدر تدهنها.

من ضمن الخامات اللى ظهرت فى الفترة الاخيرة بعض الخامات اللى وزنها اقل من الجبس واقل فى السعر زى خامة بولى يوريثان والمعروفة باسم فيوتك ودى تعتبر أكثر خامة لها شعبية بعد خامة الجبس وتعتبر أفضل بديل للجبس لأنها خفيفة جدا ، وطريقة تركيبها سهلة جدا تقدر تركبها بنفسك بخطوات بسيطة اعرفها من الموضوع ده ، ولكن عيبها انها صعبة التشكيل فى المنحنيات تقدر تعرف كل تفاصيلها من رابط الموضوع ده و خامة GRC واللى تستخدم للواجهات الخارجية وفيه كمان جبسوم مختلط مع فايبر جلاس يشبه الواح جبسوم بورد.

ستايل كرانيش السقف

تعتبر كرانيش السقف عنصر تماثلي فى المكان ، بمعنى أنه مع وجود الوزرة فى الارضية كإطار فاصل بين الحيطة والأرضية ، فيه كرانيش فى السقف كإطار بين الحيطة والسقف سواء كان معلق او خرسانة ، وتستخدم لعمل شكل جمالي ، ولإخفاء عيوب تركيب السقف سواء لحامات او شروخات ، بالاضافة الى اظهار حجم الغرف الكبيرة بشكل أفضل ، فى لها أنماط كثير تتوافق مع ستايلات الديكور.

ستايل جورجى

يستخدم النوع ده للإبهار لانه ملىء بتفاصيل وزخارف كثير جدا واحيانا هتلاقى اشكال من العصر الرومانى والحضارات الأوربية القديمة ، ويستخدم النوع ده من الكرانيش فى الاماكن العامة اللى بيكون فيها زوار لانها مزدحمة جدا وحجمها كبير على غرفة فى بيت عادى ، لكن الأنسب لها مكان فيه عدد زوار كثير.

ستايل فكتوري

من عام 1850 بدأ استخدام الجبس وتشكيله على قوالب زى الفايبر وتدعيمه بالكتان او الخيش ، وبدأ يستخدم كعنصر من عناصر تزيين البيوت للسقف والحوائط والاعمدة ، ومع مرور الوقت تطور وبدأ يتم عمل تشكيلات معقدة من الجبس باستخدام الطريقة دى ، من ضمن اللى يميز الستايل ده من كرانيش السقف انها مطعمة بالزخارف والتفاصيل زى الورود والفواكه ولكن مش بنفس التفاصيل الموجودة فى الاستايل الجورجى.

ستايل ما بعد الحرب العالمية

بعد انتهاء الحرب العالمية الأولى بدأت الناس تنصرف عن عمل الديكورات المكلفة فى البيوت وده كان واضح جدا فى الفترة دى ، واتجهت معظم الناس للبساطة والهدوء ، عشان كده ظهر نوع جديد من الكرانيش عبارة عن خطوط بتفاصيل بسيطة بدون اى زخارف أو نقوشات ، مع عمل طبق فى منتصف الغرفة لإضافة شكل مميز مع تركيب الإضاءة.

ستايل آرت ديكو Art Deco

من المعروف عن ستايل آرت ديكو أنه يتميز بالجرأة الشديدة في اختيار ألوانه وخطوطه ، لذلك ظهر نوع جديد من كرانيش السقف تتكامل مع الستايل ده فى الديكور لذلك هنلاقى النوع ده من الكرانيش مستخدم فى البيوت المودرن والعصرية وكل الأنماط الحديثة لأنه اقلهم تفاصيل ويتميز بصغر حجمه عن باقى الانواع.

إصلاح وترميم كرانيش السقف

وانت بتجدد فى البيت حاول تتجنب فك كرانيش السقف بقدر الامكان لانها لو كانت من الجبس هتتلف تماما ولو كانت من الخشب ممكن يتكسر منها أجزاء صغيرة ولو MDF هيحصل فيها مشاكل كثير ، واذا كنت مضطر انك تفك بغرض التجديد او الاحلال حاول ترقم الأجزاء الموجودة وتصور أماكن تركيبها عشان تقدر ترجعها مرة تانية ، لانها غالبا بتكون قطع متجمعة على بعض عشان تنتج الشكل المطلوب ، واحيانا بتكون كذا خامة مع بعض ، عشان كده لازم تفهم كويس هى بتتكون من ايه عشان تقدر تتعامل معاها فى الترميم.

إصلاح كرانيش الخشب

كرانيش السقف المصنوعة من الخشب اللين او الصلب بتكون راكبة بمسامير اما فى الخرسانة نفسها او فى القوائم الخشبية اذا كانت الحوائط مصنوعة من الخشب ، عشان تقدر تشيل الكرانيش دى هتحتاج ازميل من اسفل الكورنيشة ، وتدق عليها بهدوء من تحت لحد ما تخرج من الحيطة مع مراعاة انك تطلع بالخشب سليم من اثر نزع المسامير ، عشان كده ينصح بتركيب الكرانيش الخشب بمسامير ربط مش دق بشاكوش.

إصلاح كرانيش الجبس

كرانيش السقف المصنوعة من الجبس قابلة للكسر ، لذلك يجب التعامل معها بحرص شديد اثناء التركيب والفك ، ولو بصينا لطريقة تصنيع النوع ده من الكرانيش هنلاقيها بتتصنع فى موقع التركيب نفسه على طاولة خشبية كبيرة ويتم سحبها بالشكل Profile ، وبعض الناس بتصنعها بقوالب فايبر او سيليكون مرنة لو كان شكلها فيه دوران ، ويتم اضافة الزخرفة على حسب الطلب.

بالنسبة للتكسيرات اللى بتحصل دى ممكن معالجتها بفيلر ، وممكن تستخدم الجبس الفرنسى لمعالجة اى كسور ، وده طبعا يحتاج صنايعى محترف للمعالجة وحتى التركيب لان شغل الجبس عامة يحتاج مهارات عالية.

دهان كرانيش السقف

معظم تفاصيل كرانيش السقف بتضيع نتيجة تراكم طبقات الدهان على الكورنيشة نفسها عبر السنين ، ولازالة طبقات الدهان دى لازم مهارات خاصة ووقت كبير لإجراء الموضوع ده ، وعشان تضمن عدم تلف الكورنيشة لازم تجرب فى قطعة صغيرة منها.

يمنع تماما استخدام الفرشة السلك او اى وسائل كشط للدهان ، ولكن استخدم المواد المذيبة للدهان سواء فى الخشب او الجبس ، او ممكن تستخدم ورق البخار لازالة الدهان من على كرانيش الجبس ، وبالنسبة للخشب ممكن تستخدم مسدس الهواء الساخن ، لكن خلى بالك ان الخشب ممكن يتحرق ، وبالنسبة لقطع الدهان الصغيرة الموجودة فى التفاصيل الداخلية للكرانيش ممكن تزيلها بخلة الاسنان او الفرشاة.