الكاتب: Mohamed Ali

من اكثر واهم الحاجات اللى بتشغل بالك وانت بتجهز بيتك سواء بتفكر فى سلم او واجهة او ارضية او كاونتر مطبخ وتسأل نفسك يا ترى ايه افضل انواع الرخام اللى تنفع لكل الأغراض دى ويكون شكله حلو ويتحمل وكمان سهل التنظيف والتلميع.

الرخام حاجة اساسية فى كل مطبخ مهما كان مساحته مفيش غنى عن استخدامه بالنسبة لست البيت وفيه منه انواع كتير وكمان اسعار مختلفة والوان متعددة.

نشأة الرخام وتكوينه

كلنا عارفين الرخام وبنشوفه بقالنا سنين لكن هل فى مرة وقفت وسألت نفسك هو ازاى موجود كده او بيجى منين ؟ الرخام الطبيعى ده اتكون من ملايين السنين وقت ما كانت الأرض عبارة عن كتلة من الغازات المعدنية ، الغازات دى بدأت تبرد ويتم ضغطها وتحولت الى كتل صلبة وتكونت الارض بالشكل اللى احنا شايفينه عليها دلوقتى.

في أثناء العملية دى اتكونت الاحجار الطبيعية اللى منها الرخام واختلفت اشكالهم بناء على نوع المعدن الموجود فى الوقت ده ، العملية دى مش سريعة ابدا بالعكس، دى اخدت ملايين السنين.

ولما الأرض بدأت فى الاستقرار معظم طبقات الصخور دى ظهرت على سطح الأرض نتيجة الضغط والحرارة الموجودين فى باطن الأرض وظهر لنا الأحجار بالشكل اللى احنا شايفينه عليها دلوقتى.

الاحجار الطبيعية هنلاقيها فى كل مكان فى العالم وبيختلف النوع الموجود على حسب نشأته الاصلية ، هنلاقى محاجر رخام وجرانيت وانواع كتير فى امريكا وايطاليا وكندا والمكسيك وتركيا والبرازيل ومصر وغيرها كتير وعشان كده بعض البلاد هتلاقى فيها انواع كتير من الاحجار والبعض هتلاقى فيه انواع اقل.

تنقسم الاحجار الطبيعية لأنواع كتير منها الرخام والجرانيت ودول هنتكلم عنهم بالتفصيل.

ينقسم الرخام نفسه على حسب النقاء والصلابة وسمكه وتركيبه الكيميائي الى نوعين رئيسيين رخام طبيعي ورخام صناعى :

انواع الرخام الطبيعي

ده بيستخرج من الارض خام وبيتكون نتيجة العوامل الطبيعية وبيخرج بعدة ألوان على حسب درجة الشوائب فيه يعنى مثلا الابيض ده بيدل على انه خالى من الشوائب لانه من حجر نقى انما باقى الالوان بتكون نتيجة بعض الشوائب فيها بنسب متفاوتة وله تصنيفات كتير منها :

التصنيف الكيميائي

رخام الدولوميت

ده رخام يحتوى على نسبة زائدة من مادة كربونات الكالسيوم والماغنسيوم وده هنلاقيه اكتر فى الصخور الرسوبية عشان كده فى منه درجات الوان كتير على حسب نسبة وجود المادة فيه واشهر ألوان متوفرة منه الأبيض والرمادي والوردي.

رخام حجر الحية

يحتوى على نسب متفاوتة من الشوائب الطبيعية وده بيخلى لونه مختلف ما بين اللون الوردي والرمادي وفيه نسبة كبيرة من معدن السربنتين وده اللى بيخليه صلب وقوى فى الوانه يعنى مش بيبهت بعد فترة.

رخام الكالسيت

ده رخام يشبه رخام الدولوميت فى الشكل الى حد ما ولكن التركيبة مختلفة، بيتكون من مادة الكالسيت اللى هى عبارة عن كربونات كالسيوم وده هنلاقيه موجود بكثرة فى الصخور النارية والمتحولة والرسوبية وكمان بيحتوى على 5% منه كربونات ماغنسيوم، ونتيجة الاختلاف فى تكوينات الصخور هنلاقى منه الوان كتير زى الاصفر والابيض والوردى والبني.

رخام العقيق

الرخام ده معروف بشفافيته ولونه النقى وده لانه بيحتوى على مادة كربونات الكالسيوم ومنتشر باللون الاخضر والاصفر وكمان البنى واكتر حاجة بتميزه هى تركيبة طبقاته الشفافة واللى بتخلى شكله مميز ونادر عشان كده هتلاقيه من التحف.

رخام ترافرتين

النوع ده تكون نتيجة مياه الفيضان لما طلعت على الحجر الجيري وسابت ترسبات، لما جفت الترسبات دى خلفت ورارها مادة أكثر كثافة وهى رخام الترافرتين.

من مميزات رخام الترافرتين انه قوي جدا وصلب وبيتميز بخفة وزنه لدرجة ان بعض الناس بتفضل تشتغل بيه اكتر من باقى انواع الرخام والجرانيت وعشان كده بيستخدم فى الارضيات والحوائط ، ويتميز بعمره الافتراضي الطويل حتى أن علماء الجيولوجيا قالوا انه ممكن يوصل 50 سنة مع المحافظة عليه.

رخام اخضر بعروق أو يسمى رخام سربنتين

يحتوى على نسبة كبيرة من معدن السربنتين بشكل كتل وهو من اكتر الانواع صلابة ويعتبر هو مصدر الماغنسيوم والاسبستوس وبيستخدم كرخام للشكل الجمالي.

انواع الرخام حسب الشكل

رخام صنى

منشأه مصرى وده من اكتر الانواع المميزة وبيستخدم فى واجهات القصور والارضيات وفى السلالم وكمان مداخل البيوت ، بيعطى احساس بالفخامة والرقى بس عيبه ان فيه تشققات بسيطة.

رخام كرارة ابيض

ده النوع المستخدم فى تركيب الاحواض وخاصة فى بلاد الخليج العربى وبيكون اسمها المغاسل الرخام والارضيات ولونه ابيض لؤلؤى وبيعطى للمكان اناقة ورقى وفيه منه بخطوط رمادى بشكل عشوائى وفيه بخطوط روز بشكل عشوائى وفيه بخطوط رمادية بشكل مسطر واسمه كرارة مسطر وفيه نوع يميل للرمادى وده اسمه كرارة مرمر تركى وفيه منه ابيض سادة بيسموه بيانكو.

رخام تريستا

ده بيستخدم فى الواجهات سواء داخلى او خارجى وفى السلالم لانه حجر راقى له اشكال كتير ، ويفضل انه يستخدم فى الحوائط الداخلية والواجهات الخارجية لانه من انواع الرخام الضعيفة.

رخام الشيكولاتة

ده يتميز بأنه خفيف الوزن و يتقطع بسهولة وبيستخدم فى السلالم والحوائط والارضيات وكمان الواجهات وبيكون مستورد من الهند.

رخام مللى براون

ده بيستخدم فى ارضيات الحمام واحيانا ارضيات المطبخ والحوائط وكمان فى الحوائط الداخلية ويتميز بسعره المعقول عكس الانواع التانية.

رخام الامبرادور

ده رخام يتميز بألوانه المتداخلة مع بعض وبيعطى منظر جمالى وعشان كده بيستخدم فى الرسومات الرخامية بس عيوبه انه سهل الكسر وبيظهر فيه حفر مع مرور الوقت.

الرخام الأخضر الهندى

ده بيستخدم فى الأرضيات ، يتميز بألوانه الغامقة لكن عيبه ان عمره الافتراضى مش كبير.

رخام جلالة فص

من اكثر انواع الرخام انتشارا في السوق ويستخدم فى السلالم والحوائط والارضيات لان سعره رخيص لكن عيبه انه بينقر وبتظهر فيه حفر بعد فترة قريبة من الاستخدام.

رخام زعفران

بيستخدم في الحوائط والأرضيات والسلالم وله الوان كتير ويتميز بجودته العالية لكن بيحتاج رعاية باستمرار.

رخام روزا البرتغالي

يتميز بقوته وصلابته ويستخدم فى السلالم والأرضيات بكثرة.

الرخام الأسود الهندى

ده من اجود انواع الرخام الطبيعى لان حجره سميك وصلب عشان كده بيتحمل درجات الحرارة العالية بدون ما يتشقق ولا يحصل فيه حفر ومش بيتاثر بالصبغات وبالتالى مش بيسيب بقع وله قدرة كبيرة على التحمل زى الجرانيت وشكله مميز وله لمسة قيمة وبريق خاص عشان كده بعض الناس بتستخدمه فى المطابخ.

انواع الرخام الصناعى

ده حجارة رخامية بتتصنع من خليط من المواد الكيميائية وبتكون مكونة بشكل أساسي من بودره بتتخلط مع ألوان صناعية متأكسدة في ظروف صناعية خاصة وبعدين تتصب فى قوالب عشان تجف وبتستخدم في صناعة الأرضيات واطقم الحمامات و تصنيع المغاسل الرخامية واستخدامات الديكور بشكل عام.

اللى بيميز الرخام الصناعي عن الطبيعي ان له خصائص فيزيائية مختلفة عنه وده من حيث التمدد والانكماش والصلابة وكمان ممكن تعمل منه الوان حسب الطلب وفيه منه 3 انواع اساسية :

رخام الاكريليك

وده بيسمى في لغة السوق الكوريان بيتصنع بشكل أساسي من مادة الاكريليك ودى مادة بتستخدم كمادة لاصقة مع بودرة ألومنيوم وده اكتر نوع منتشر لأنه صديق للبيئة لكن عيبه انه يتأثر بسرعة بدرجات الحرارة العالية.

رخام البوليستر

ده بيتصنع من مادة البوليستر او الاكريليك اللى بيتم تعديله وبيتصنع بنفس طريقته بس بيكون اقل منه فى الجودة ولونه بيميل للاصفر ، عيبه انه سهل الكسر وله رائحة قوية ونفاذة.

رخام الجير

بيتصنع من مادة كربونات الكالسيوم وده موجود بالتحديد فى الصين بسبب قلة تكلفته.

الجرانيت

هو فى الاصل من الصخور النارية اللى اتعرضت للماجما او اللافا اللى هى الحمم البركانية و تغيرت تركيبتها نتيجة التعرض لمعادن كثيرة، هنلاحظ انه موجود فى البلاد اللى فيها نشاطات بركانية كتير ومتوفر بالوان كتير جدا منها الاسود والبنى والاحمر والابيض وغيرهم كتير.

يعتبر هو الاختيار المثالى للمطبخ والحمام فى الحوائط وحتى فى تصنيع الأحواض أو المغاسل عشان قوته وصلابته ده غير انه مقاوم للبكتيريا.

مميزات الجرانيت

• مش بيسرب المياه لأن مساماته ضيقة جدا.
• مش بيتكسر ولا بيتلف بسرعة.
• ميتأثرش بمرور الوقت وده بعكس انواع الرخام العادية.
• سهل التنظيف وله الوان كتير.
• يتحمل درجات الحرارة العالية.
• مش بيتأثر بالرطوبة وده بيفرق جدا لو المطبخ خشب.
• مش بيظهر فيه بقع بسهولة.
• بيعطى للمطبخ لمسة جميلة ومميزة.

انواع الجرانيت

جرانيت اسود اسوانى

ده بيستخدم فى المكاتب والشركات والمنازل واهم مميزاته انه مش بيتأثر بالمياه ومش بيتغير لونه مع مرور الوقت وكمان بيتحمل درجات الحرارة العالية بس عيبه ان فيه شقوق كثيرة.

جرانيت فيردى

يتميز بالقوة والمتانة وكمان الصلابة وسهولة التنظيف وبيستخدم فى الممرات والمطابخ والحوائط وفى منه انواع كتير بس مش كلها جودتها كويسة عشان كده لازم تخلى بالك وانت بتشترى.

اسود جلاكسى

يتميز بالقوة والصلابة وتحمل درجات الحرارة العالية وصعب جدا يتخدش عشان كده بيستخدم فى المطابخ والترابيزات والحوائط الداخلية والواجهات الخارجية وكمان الارضيات ومن ضمن خواصه ان له لمعة عالية جدا وشكله فخم عشان كده سعره غالى.

نيو حلايب

بيستخدم فى نوافير المياه والتماثيل والأواني والفازات و يتميز بصلابته ولونه المميز ، بيستخرج من منطقة حلايب عشان كده منشأه مصرى.

احمر اسواني

عادة بيستخدم فى الأرضيات لانه مش بيتاثر بالحرائق لكن فيه منه أنواع رديئة جدا لا تصلح للاستخدام.

جرانيت جندولا

ده يتميز بصلابته وجودته العالية وقوة تحمله وكمان الوانه مختلفة ومميزة بس عيبه وجود شقوق كتير فيه وده هنلاقيه بكثرة فى مصر والصين لانهم البلاد المنتجة له.

جرانيت سفاجا

يستخدم فى ارضيات الحمام والمطابخ والحوائط لانه يتميز بسهولة التركيب وسعره مش غالى لكن محتاج رعاية وصيانة كل شوية.

جرانيت غردقة

ده يتميز بقوته العالية وصلابته وصعوبة كسره عشان كده بيستخدم فى الارضيات والمطابخ لكن عيبه وجود شقوق كتير داخله.

جرانيت سعودي

ده يتميز بدقة التصنيع والمتانة والصلابة وفيه منه الوان كتير زى الابيض الحليبي المنقوش بالاسود او اللون الكريمى المنقط بالاسود واسود منقط ابيض ولون الصحراء البنى وفى منه لون احمر ملكى.

جرانيت صيني

ده بيعد من اشد الانواع منافسة فى السوق عشان بيصنف انه ممتاز فى الصنع وكمان سعره اقل من انواع الجرانيت الثانية وفيه منه الوان كتير زى الرمادي المنقط والزهرى المنقط والكريمي المنقط.

نصائح وانت بتختار انواع الرخام فى المطبخ

• وانت بتختار رخام المطبخ لازم يكون متناسب مع ديكور مطبخك عشان الشكل يبقى جميل.
• اختار سمك عريض مش رفيع عشان تبقى قدرته عالية على التحمل.
• لا يفضل انك تستخدم رخام عادى لكن استخدم جرانيت لانه مش بيتأثر بالحرارة ولا بالبقع بسبب السوائل وكمان سهل التنظيف.
• اختار متخصص عشان يحدد لك مكان الرخام قبل ما تركبه ويركبه لك بشكل صحيح.
• بلاش تركب قطع رخام كتير فى المطبخ عشان ميقللش مساحة المطبخ.

تنظيف الرخام

عملية التنظيف سهلة وبسيطة عن طريق مياه وعليها شوية خل عشان تنظف الرخامة من البكتيريا الموجودة عليها وعلشان دايما يكون نظيف ميتعبكش اتبع النصائح دى:

• متقطعش الخضروات والفاكهة عليه لان التقطيع بالسكينة مع الوقت هيعمل تجريحات كتير وهتضطر ان تعمله جلى وتلميع كل فترة عشان تحافظ على شكله.
• لو وقع عليه بقع زيت او دهون لازم تتشال بسرعة لان الرخام مادة مسامية تمتص اى سوائل وبتظهر عليها.
• استخدم فى التنظيف قماشة ناعمة مع المياه السخنة والخل عشان ميحصلش خدوش.
• لو عايز لمعته تظهر ممكن تستخدم جهاز تلميع الأسطح اللامعة اللى بيستخدم فى تلميع السيارات مع بودرة تلميع وتمسح بها.

سيراميك شقتك هو يعتبر أهم عنصر بتركز معاه فى الاختيار لان هو اللى بيظهر ديكور بيتك ويعتبر هو الحل المثالى للأرضية عشان سهولة تركيبه وتنظيفه وسعره المعقول ومقاومته للمياه وعمره الافتراضى الطويل ده غير ان شكله جميل جدا وله منظر جذاب ، لكن عشان تختار السيراميك هتحتاج شوية تركيز .

لازم تشوف احتياجاتك وذوقك الشخصى من حيث اللون والرسم وبعد كده تشوف خامة السيراميك اللى تناسب اللون ده.

احتياطات قبل تركيب السيراميك

قبل ما تركب السيراميك فى بيتك او مكتبك لازم تخلى بالك من نظافة الارضية اللى هتركب عليها بمعنى ، لو الارض اللى هتركب عليها فيها مطبات عالية أو حفر عميقة لازم المناطق دى تتظبط الأول وخاصة فى العصر الحالى المسألة تطورت واصبح ناس كتير بتلجأ لتركيب السيراميك بمادة مش بأسمنت ورمل زى الاول لو الارتفاع محكوم.

عشان تلزق السيراميك بالمادة ويكون قوى لازم الارض اللي تحته تكون نظيفة والا يتكون فراغات هواء تحت البلاطة ونشوف السيراميك يعمل شروخات و يفرقع من الأرض ويتفك وتضطر تغيره او تظن انه عيب فيه ولكنه العيب فى طريقة التركيب.

الصنايعى المحترف قبل ما يركب بلاط الارضية بيشوف هى شكلها ايه فى الاول وعبارة عن ايه يعنى خامتها لان خامة الارضية الداخلية دى بتأثر على السيراميك اللى راكب فوقها.

مينفعش تكون مادة الأرضية الداخلية بيتغير حجمها بناء على اختلافات درجة الحرارة يعنى متكونش مادة بتتمدد وتنكمش لان ساعتها هتدمر السيراميك وهيتفك من عليها.

لكن طبعا عشان اغلبنا بيركب سيراميك فوق الخرسانة فدى تعتبر الأرضية الاكتر انتشارا وهنا فيه ملحوظة مهمة جدا لازم نخلى بالنا منها.

وهى ان الارضية الخرسانة لازم تجف تماما قبل ما تفكر تركب عليها لانك لو عملت غير كده هتكون الخرسانة فيها نسبة رطوبة ومش هتجف وبالتالى هتعملك مشاكل كتير بعدين عشان كده ينصح انك متركبش السيراميك قبل 28 يوم من صب الخرسانة عشان تتأكد انها جفت تماما.

اختيار الخامة سيراميك ولا بورسلين ولا خامة تانية

سيراميك

طبعا كلنا عارفين ان السيراميك هو الاختيار الشائع عند اغلب الناس عشان سعره المعقول وكمان لانه يتناسب مع اى ديكور معمول فى المكان وطبعا تقدر تختار بلاطات حجمها صغير او كبير على حسب ذوقك وكمان من ضمن عوامل انتشاره سهولة تركيبه لدرجة أن بعض الناس بتركبه بنفسها وده هنشرحه بالتفصيل في مقال تركيب السيراميك.

اول شكل من الاشكال هو اللامع وده عبارة عن سيراميك عادى ومضاف له طبقة زجاجية فوقه فى افران بحرارة عالية جدا عشان تضيف له نوع من الحماية.

ميزة الطبقة دى انها بتضمن ان البلاط ميتأثرش بأي عوامل خارجية زى المياه أو الاتساخ لكن بعض الناس فى الايام دى بتفضل الشكل التانى وهو السيراميك المطفى لأن له مظهر جذاب وبيخلى الملمس طبيعى وخصوصا اذا كانت شكل الحجر او الخشب بتحس فعلا أنها مادة طبيعية مش مصنعة.

لكن عيب السيراميك المطفى انه لازم يتم عزله كويس جدا بشكل دورى مستمر لان له مسامات وإلا يتعرض للاتساخ والتلف.

البورسلين

البورسلين هو واحدة من اقوى الخامات الموجودة فى الاسواق عشان كده انتشر فى الأيام الاخيرة انتشار واسع جدا وهو مصنوع من نفس الخزف المصنوع منه السيراميك ، لكن على درجات حرارة عالية جدا فى الافران عشان كده هو قوي جدا وبيتحمل أصعب الظروف.

لو ركزنا أكثر فى طريقة تصنيع البورسلين هنلاقى ان داخل في تركيبته رمل ومواد كلسية عشان كده هو أكثر كثافة ومسامه اقل بكتير من السيراميك وده اللى بيخلى قدرة امتصاصه للمياه أقل و عشان كده هنلاحظ أن العامل وهو بيركب السيراميك بيسقيه مياه كتير عشان ميمتصش مياه المونة الأسمنتية لكن فى البورسلين مش بيعمل كده.

ومن ضمن خصائص البورسلين انه اصعب فى التقطيع من السيراميك العادى وده اللى خلى بعض العمال والفنيين المحترفين يشتغلوا بمنشار التقطيع الكهربائي لان المقص اليدوى مبقاش كفاية لتقطيعه وعلشان كده نلاحظ أن مصنعية تركيب البورسلين اغلى من السيراميك عشان بياخد مجهود أكبر.

وبما انه قوي وبيتحمل الظروف القاسية بعض الناس بتركبه في الأماكن الخارجية لانه بيتحمل الطقس البارد أو الحار ومش بيمتص رطوبة الجو وده لان معدل امتصاصه للمياه لا يتجاوز 0.5 % وهو ده سر قوته .

طب ايه الخامة اللي تناسبنا سيراميك ولا بورسلين

قوة البورسلين خلته مناسب اكتر للاماكن اللى عليها ضغط كبير زى مثلا الطرقة والممرات والمطبخ وكمان الاماكن الخارجية زى مدخل البيت او حتى مقرات الشركات فى حين هنلاقى ان السيراميك أقل كثافة ومناسب اكتر للأماكن الداخلية واللى عليها ضغط خفيف.

وعشان تخلى الموضوع سهل عليك فيه معهد ظهر للدراسات الصناعية المختصة بالبورسلين والسيراميك اسمه PEI المؤسسة دى عملت ترتيب رائع جدا للسيراميك والبورسلين و صنفتهم بناء على 5 درجات رقم 1 هو سيراميك الحوائط لانه الاقل متانة ورقم 5 هو أقوى درجة.

وانت بتشترى بقى كل اللى عليك انك تشوف الكرتونة مكتوب عليها كام لو الرقم 1 يبقى بلاط ضعيف يصلح للحوائط بس وكل ما الرقم يقرب من 5 يبقى صلب ويصلح للاستخدام الشاق فى الأرضيات.

سيراميك الحوائط

طبعا الكلام اللى فات ده كله مركز مع الأرضيات لكن بالنسبة للحوائط هتلاقى ان بلاطات الحوائط اقل سمك من بلاطات الارضية لانه مش محتاج نفس قوة التحمل اللى محتاجاها الارضية عشان الضغط المستمر والمشى عليها لذلك هتلاقى ان بلاطات الحوائط أقل صلابة من بلاطات الارضية وعشان كده اخد ترتيب رقم 1 .

سيراميك الخزف

النوع ده معمول من الخزف الاحمر او الفخار لكن على درجة حرارة اقل من السيراميك وده بينتج عنه بلاطة خزفية سهلة الكسر لكن لها شكل طبيعى شبه لون الفخار تماما والنوع ده نلاحظه موجود فى البلاط الحرارى اللى بيركبوه فى الافران زى بلاطات سورناجا .

تكاليف السيراميك

يتراوح السعر ما بين 10 – 30 دولار للمتر المربع في حين أن البورسلين يبدأ سعره من 20 دولار وممكن يوصل لحد 100 دولار للمتر المربع لو نوع مستورد ، وطبعا لو هتشترى قطعة زى تابلوه فى الارضية او ديكور للحيطة هيكون سعرها اغلى من المتر العادي.

أما سعر التركيب بيختلف بناء على عدة عوامل منها المكان اللى انت فيه يعنى لو العامل هيسافر مسافة فده هيكون مكلف بالنسبة لك وعادة يتراوح سعر تركيب المتر المربع ما بين 5 – 10 دولار للمتر المربع واحيانا بتختلف عن كده بناء على العوامل اللى قلنا عليها .

انخفضت جدا تكلفة السيراميك فى السنوات الاخيرة وده بسبب التقدم التكنولوجى فى التصنيع الغير مسبوق عن قبل كده لان طبعا زى ما احنا عارفين ان اى منتج وهو جديد بيكون غالى لان تصنيعه بيكون مكلف وقتها.

لكن مع التطور تدخل قطعة السيراميك فى الفرن الحرارى وبتاخد دقائق معدودة وبتخرج اقوى وامتن من الاول وجاهزة على التغليف بعكس زمان كانت معدات التصنيع بدائية فكانت بتاخد وقت اطول فى تصنيعها ومكانتش بنفس الكفاءة وبكده يكون الانتاج تضاعف عشان كده اسعاره قلت.

اختيار شكل السيراميك

اختار شكل غير تقليدى

لو ستايل بيتك مودرن وعايز تعمل حاجة غير تقليدية يبقى عندك اختيارات كتير زى البلاطة الكبيرة – الغير منتظمة – الخرسانية وغيرهم ، الافكار دى هتعطى للمكان شكل جديد غير تقليدى وممكن كمان تخرج بره إطار الشكل المربع وتستخدم البلاط السداسي.

من ضمن الأشكال المميزة الخامات الجديدة زى شكل الحجر اللى بدأ يظهر الايام دى والبورسلين الكبير اللى مقاسه يوصل 100*100 سم وده هنلاقيه فى الفنادق الكبيرة عشان كده بيعطيها فخامة غير عادية وده ينصح انك تستخدمه فى مكان مفتوح مساحته كبيرة عشان يظهره.

اعمل شكل جديد بنفسك

فى وسط الالوان الكتير والخامات المتاحة فى السوق تقدر تعمل انت شكل جديد خالص خاص بيك انت مش موجود فى الكتالوج ازاى الكلام ده ؟؟ بمساعدة من البائع الموجود فى المعرض تخليه يقترح عليك خامات والوان تنفع مع بعض.

يعنى مثلا لو انت حابب تعمل لون سادة فى المكان ممكن تختار تابلوه لونه ماشى مع اللون السادة أو تختار وزرة وتعمل إطار داخلي وممكن تشوف خامة تنفع مع اللون السادة وتتقطع بشكل كويس كإضافة جمب كل بلاطة هتلاقى ان المكان شكله بقى مميز مش مجرد وضع بلاطات جمب بعض وخلاص.

استخدم خامات طبيعية

كتير هتلاقى بلاط بشكل الحجر او الخشب او الرخام وهيعيطك نفس احساس الخامات دى بالظبط كأنهم خامات طبيعية حتى الملمس نفسه.

يعنى مثلا هتلاقى ان شكل الحجر نفس خشونة الحجر الطبيعي وشكل الباركيه بنفس تجزيعات الخشب الطبيعى وحتى مقاسه هتلاقيه مثلا 120*20 سم وملمسه خشبى وكمان فى الحوائط هتشوف شكل الطوب بالظبط بنفس الملمس والفواصل بينهم وده كله يعطيك حرية كبيرة انك تعمل الديكور اللى يناسبك.

ولو مساحة البيت عندك مساعدة ممكن تعمل شلال مثلا من النوع الحجرى ده مع تدفق المياه عليه يبقى منظر جميل جدا أو خلفية فى اى حيطة من شكل الحجر او الطوب ودى كلها من ضمن الأفكار.

اعمل ديكور بمقاسات السيراميك

البلاطات الكبيرة بتعطى ايحاء بصغر مساحة المكان عشان كده بتستخدم فى المساحات الكبيرة جدا يعنى لو المساحة عندك صغيرة مينفعش تجيب بلاطات 80*80 سم يضيق لك المكان جدا.

لو عايز تعمل شكل ديكور يبقى تخلى ترتيب البلاطات قطرى يعنى بزاوية 45 مش افقى رغم صعوبة الطريقة دى فى التركيب لكنها بتعطى ايحاء بأن المكان اوسع واكبر.

وده نتيجة خدعة بصرية من تركيب السيراميك نقطة فى نقطة بدل ما كان حافة مقابل حافة ودى طبعا تقدر تعملها بالبلاطات الصغيرة او الكبيرة ومتنساش لو المكان عندك صغير اختار بلاطات صغيرة هتعطى اتساع للمكان هو بس عيبها الوحيد انها هتاخد وقت فى التركيب.

ازاى تحسب كمية السيراميك المطلوبة

عشان تقدر تحسب كمية السيراميك اللى هتحتاجها فى الأرضيات يبقى لازم تعرف مساحة المكان اللى عندك الاول ، افتكر قانون حساب المساحة اللي درسناه فى الرياضيات زمان.

المساحة = الطول * العرض وده هيعطيك الناتج بالمتر المربع.

طيب بالنسبة للحوائط هنحسب بردو مساحة الحوائط طيب نعرفها ازاى؟؟ بحسبة بسيطة جدا نشوف أطوال كل الحوائط الموجودة ونضربها فى الارتفاع لحد السقف يعطينا اجمالى مساحة الحوائط.

وهنا فيه ملحوظة مهمة جدا لازم نعرفها وهى اننا واحنا بنشترى لازم تزود فى الكمية عشان لو حصل اى كسر فى بلاطة معينة اثناء متلاقيش الكمية نقصت معاك وترجع تشترى تانى، على الاقل تعمل حسابك على 5 متر مربع زيادة ولو اكتر يبقى افضل.

اختيار باب الحمام جزء أساسي من ديكور البيت لازم تهتم بيه وتركز فى كل تفاصيله ، زى ما هيكون فى دماغك ان شكله هيكون جميل ومتناسق مع ديكور المكان وايه هى الخامة اللى هتعمله منها يبقى لازم كمان تراعى شوية حاجات مهمة زى انه لازم يكون مقاوم للرطوبة، مش بيتأثر بتغير درجات الحرارة، مش بيتأثر بتراكم المكثفات وطبعا لازم يحافظ على الخصوصية.

اختيار الخامة

الابواب الخشب

دى اكتر نوع منتشر بس المشكلة انه بيتشوه بسرعة بسبب المياه والرطوبة وعشان كده لو عايز تعمل باب من الخشب يبقى لازم يكون خشب صلب زى الزان أو البلوط او الارو.

وتبعد خالص عن الصنوبر والحور والكرز لانهم مش بيقاوموا الرطوبة والباب هيتلف بسرعة وطبعا الخشب اللى قولنا عليه هيكون مغلف بالشمع او الورنيش وبكده يكون مقاوم للمياه.

مزاياه ان عمره الافتراضي طويل وملمسه طبيعى ده غير ان شكله انيق وجذاب وخامة موثوق منها ومعروفة وعيبه أن تكلفته عالية.

ابواب MDF

خامة MDF هى خامة شعبية لإنتاج الأبواب وميزته ان له الوان كتير وخاصة الألواح الجاهزة المتوفرة بطبقة القشرة وسعره مقبول ولكن عيوبه انه بيجمع الرطوبة وبكده الباب هيتلف بسرعة جدا.

ابواب القماش المكسى

اسمه كده لانه بديل للابواب الخشب وهو عبارة عن لوح ليفي ملصق عليه طبقة رقيقة من القشرة وده بيعطى احساس انه خشب طبيعى بس الهيكل بيكون اخف فى الوزن وكمان سعره اقل لكن مشكلته أن طبقة القشرة بتكون حساسة جدا للتغير في درجة الحرارة وكمان بتتأثر بالرطوبة.

ابواب PVC

دى ابواب مصنوعة من مادة البولى فينيل كلوريد PVC وهى من مشتقات البترول ودى اللى بيتعمل منها حوض الاستحمام (البانيو) و كابينة الشاور ف بتكون ممتازة ومقاومة للرطوبة ، مقاومة للعفن والفطريات وكمان وزنها خفيف و بتعزل الصوت وغير قابلة للاشتعال ، وفي منه الوان كتيرة جدا وكمان ممكن تدخل فيه الزجاج لعمل شكل جمالى.

وده اختيار كويس جدا للحمامات اللى الرطوبة فيها عالية اوى لانها خامة مش بتتأثر بالمياه.

الأبواب الزجاج

بتكون شكلها انيق جدا ومقاومة للرطوبة والتلف، مش بتتشوه من البخار وارتفاع درجة الحرارة، وبتعمل عزل جيد للحرارة والصوت ، وكمان تعزل الرطوبة عشان متخرجش بره الحمام ، وتصاميمها متنوعة بس خلى بالك لازم تطلى السطح الخارجى عشان يكون ضد التكثيف وبردو عشان يوفر الخصوصية.

مشكلته ان تكلفته عالية لان خامة الزجاج غالية ده غير عملية تصنيعه.

الأبواب الالومنيوم

بتتميز بالجمال والدقة في التصميم ، ومش بتحتاج دهان ومش بتتأثر بالمياه ولا الرطوبة وتنتفخ زى الابواب الخشب وبكده هتحتفظ بمظهرها الجميل طول الوقت ومش مكلفة زى الابواب الخشب والزجاج وتقدر تستخدم المياه فى الحمام سواء باردة او سخنة براحتك لانها مش بتتأثر بدرجة الحرارة.

كمان مش بتصدى وغير قابلة للاشتعال ووزنها خفيف ومش بتتكسر زى البلاستيك أو الزجاج ده غير انها عازلة للصوت بنسبة كبيرة.

شكل الباب وطريقة فتحه

 

الباب المفصلي

ده شكل الباب العادى اللى بيكون بمفصلات وده الاكثر شعبية وله مزايا كتير زى الحجم المناسب وسهولة التركيب وتقدر تشطبه وتركب له الاكسسوار اللى يعجبك وكمان سعره مناسب، لكن مشكلته لو المكان ضيق ومفيش مساحة كفاية مش هينفع النوع ده من الأبواب عشان امكانية الفتح والقفل.

الباب الجرار او السحاب

باب الحمام الجرار شكله جميل وانيق ويوفر مساحة بس بتحتاج مكان فاضي جنب مدخل الحمام لكن مشكلة النوع ده من الأبواب انها غالبا مش بتطلع بنفس التصميم المطلوب عشان كده محتاجة فنى محترف جدا عشان يقدر يصنعها مش اى حد.

باب قابل للطى

بيكون له شكلين شكل الأكورديون (3 اجزاء او اكثر) او شكل الكتاب (جزئين) من مميزاته انه بيوفر المساحة يعنى مش هتحتاج لمكان اضافى نفتح فيه زى المفصلى لكن هتحتاج عرض الحلق يكون كبير عشان تقدر تدخل بعد عملية الطى ويكون فيه مساحة لك تعدى منها.

ديكور باب الحمام

لما تخلص اختيار الخامة واللون المناسب لديكور حمامك ممكن تفكر فى زخرفة اضافية عشان تعمل منظر جمالى للباب ميبقاش مجرد باب سادة وخلاص.

وده هيعتمد على خامة الباب نفسه يعنى مثلا ممكن تستعمل زخارف خشب سواء محفورة CNC او باى طريقة تانية على باب خشبى او قطع بلاستيك على الباب المصنوع من PVC بدل لوح الفايبر التقليدى.

وممكن بردو تستخدم بعض قطاعات الالومنيوم او اى معدن تانى فى الباب الالومنيوم او حتى الباب الخشبى.

وطبعا لو عندك باب زجاج سيكوريت يبقى قدامك الرسم أو الحفر بالرمل مع استخدام الالوان او الطباعة UV وده بيعطى مساحة ابداع كبيرة لانه هيخليك تطبع اى شكل على الباب بمقاس الباب نفسه.

وهنا فيه نقطة كويسة جدا للناس اللى مش بتحب باب الحمام يظهر ممكن تدهنه بنفس لون حيطان الممر او ترسمه مع الحيطة برسمة واحدة بورق حائط مثلا او رسم يدوى

اضافات ممكن تعملها فى الباب نفسه

لو كانت التهوية الطبيعية فى الحمام مش كفاية فممكن تضيف جزء خاص بالتهوية في الباب نفسه زى شبكة او الشيش المعروف فى الشبابيك الخشب من تحت او من فوق او ممكن تكون من الدوائر وده هيسمح بتبادل الهواء وحركته.

شكل الحياة اتغير كتير عن زمان وده نتيجة التقدم التكنولوجى اللى حصل لكن التقدم ده كان له عيوب كتير من ضمنها التلوث السمعى اللى حصل بسبب زيادة السيارات فى الشارع وبعض الورش اللى بتعمل ضوضاء عالية جدا، عشان كده هنتعرف مع بعض على مفهوم عزل الصوت فى بيتك عشان تخفف من حدة الصوت العالى.

بعض الناس تقول ان العزل ده موضوع كبير ومكلف عشان اللى بيعملوه هما استوديوهات الصوت عشان التسجيل لابالعكس مش شرط تجيب معدات متقدمة اوى كده عشان تخفف الضوضاء دى.

هنعرف ازاى بشوية افكار وحيل بسيطة تعمل عزل صوتي منزلي كويس جدا من الحاجات الموجودة عندك فى البيت، هو طبعا مش هيكون زى عزل الصوت اللى بتعمله شركات متخصصة واللى هنتكلم عنه فى مواضيع تانية، لكن هيفرق معاك كتير.

لما تعرف مفهوم عزل الصوت كويس هتلاقى ان الموضوع ممكن تعمله بنفسك مش لازم تكلفة عالية اوى، تعالى نرد على شوية اسئلة مهمة وبعد كده نشوف افكار العزل الصوتى.

سبب انتشار الضوضاء

فيه اسباب كتيرة عملت الضوضاء الرهيبة اللى انت بتحس بيها فى البيت وهتشوف ده اكتر لو الحوائط عندك مش متجهزة بعزل كفاية هتحس كأنك ساكن فى الشارع من كتر الدوشة.

ممكن تكون ساكن مطل على شارع رئيسى او جمبك جيران مزعجين وفى بلادنا العربية وخاصة مصر فى بعض الشوارع فيها ورش صناعية بتطلع اصوات عالية جدا، كل دى اسباب تقلل راحتك وانت فى بيتك.

النوع ده من الضوضاء متعب ومضر للصحة مع الوقت بيأثر على الأذن الوسطى وعلى الجهاز العصبى للجسم لازم تشوف لها حل فورا و من حسن حظك ان فيه حلول بسيطة لعزل الصوت متاحة تقدر تنفذها بنفسك.

عشان تعمل عزل الصوت المناسب ليك فلازم تعرف شوية معلومات الاول عن نوع الضوضاء اللى عندك وايه الخامة المناسبة ليها عشان تعزلها.

مفهوم عزل الصوت – ازاى بيتم عزل الصوت

عزل الصوت من اسمه هو عبارة عن علم قائم بذاته مختص بعزل الضوضاء الخارجية ومنعها من التسرب داخل المكان اللى انت موجود فيه.

موجة الصوت المحمولة في الهواء بتمر لحد ما يقف قدامها سطح معين وساعتها إما هتمر منه او هتنعكس وترجع للمصدر اللى جاية منه اصلا.

لكن لها سلوك غريب لو قابلها سطح مستوى زى الحيطة او الشباك بترجع مرة تانية لمصدرها ولو قابلها سطح متعرج او مموج بتتكسر وتخف حدتها وتمشى مع اتجاه التموجات دى ومن هنا جت فكرة و مفهوم عزل الصوت.

عشان كده علماء الفيزياء طوروا لنا خامات العزل بشكل هندسى لو ركزنا فيه هنلاقى مثلا ان بلاطات الفوم العازلة للصوت عبارة عن أهرام او مثلثات متكررة جمب بعضها ده ليه يا ترى ؟ لان الاهرام المتكررة دى بتكسر موجة الصوت وتشتتها وده اللى خلاها افضل مادة فى السوق للعزل.

مستوى عزل الصوت بيعتمد على عوامل كثيرة وعلى الخصائص الصوتية للخامة العازلة نفسها زى الحجم والسمك والكثافة والتركيبة نفسها كل العوامل دى بتأثر تأثير مباشر على كيفية عزل الخامات دى للصوت.

أماكن تسرب الصوت

الأبواب

لو كاوتشات العزل اللى انت ركبتها على الابواب مش مؤدية الغرض بشكل كويس يبقى اكيد فيه تسريب من فتحة ثانية والكلام ده ينطبق على الأبواب الالومنيوم او UPVC ، لكن بالنسبة للابواب الخشب لازم يكون الأبواب من النوع المصمت او على الاقل من النوع الكبس وده عشان يكون لها طبقات خشب داخلية تساهم فى عملية العزل.

الحل ايه ساعتها، تمسك مسدس السيليكون وتمر على الباب بالكامل وتقفل الفتحة اللى ممكن تدخل هواء.

و بعد ما تخلص تقفيل كل الفتحات ويكون الباب مقفول تمام وتحته المخدة يعنى مفيش فرصة لتسريب أى هواء إذا سمعت بعدها تسريب صوت كده انت محتاج تغير الباب نفسه لان كده يبقى فيه مشكلة ممكن تكون خامته ضعيفة جدا.

هتحتاج تشوف خامة اثقل واكتر كثافة او تريح دماغك وتجيب خامة متخصصة فى عزل الصوت اللى بيشتروه استوديوهات التسجيل ده تضمنه بنسبة 1000% لانه مش مجرد خشب عادى لا ده عبارة عن طبقتين خشب فى وسطهم طبقة فوم عازل عشان كده هتلاقى سعره غالى واحيانا هتلاقيه متنجد بطبقة جلد فوق الخشب.

الشبابيك

بالنسبة للشبابيك الوضع مختلف شوية ، لو قفلت جميع الفتحات بالسيليكون او اى مادة غيره زى ما عملت فى الابواب احتمال يكون فيه بعض التسريبات اللى يدخلك منها صوت ودى حلها كالتالى :

ضفلة داخلية للشباك هتعزل الصوت وتمنع الحرارة اللى هتدخل من الشباك ده فى حالة ان الشباك عندك زجاج مفرد.

اقفل الشباك من الداخل بأي وسيلة سواء غطاء من الخشب او ستارة تقيلة عازلة بس طبعا خلى بالك ان الغطاء ده هيمنع الإضاءة زى ما هيمنع الصوت.

ركب شبابيك uPVC وحاول تلاحظ عملية التركيب كويس او تستعين بشركة متخصصة لها خبرة فى المجال ده عشان تتأكد ان الشباك تم تركيبه بطريقة صحيحة بدون فتحات.

ميزة النوع ده من الشبابيك انه معاه الكاوتش العازل المناسب للقطاع بتاعه يعنى بيمنع دخول اى تسريب ومش بس كده ده كمان الزجاج اللى فيه مزدوج يعنى طبقتين مسحوب من وسطهم الهواء وزى ما احنا عارفين ان الهواء هو الوسط الناقل للصوت عشان كده الفضاء الخارجى مفيهوش صوت لان مفيش هواء.

ده يعتبر الحل المثالى لعزل الصوت وممكن كمان تضيف له ستارة قوية تمنع تسرب اى نسبة صغيرة لو عدت منه.

مفهوم عزل الصوت فى الحوائط

عزل الحوائط هو يعتبر الوسيلة الشائعة والمنتشرة فى العالم كله لعزل الصوت وكمان له النصيب الاكبر فى الشغل لان فيها حاجات كتير لازم تتعمل.

فكرة العزل فى الحوائط بسيطة وهى ان أى نسبة صوت داخلة من الشارع انت بتحاول تمنعها عشان متوصلش عندك جوا عن طريق خامات وأدوات بتختلف على حسب المكان اللى انت فيه.

عزل الصوت فى البيوت العادية يختلف عن المكاتب والشركات الكبيرة ويختلف بردو عن استوديوهات التسجيلات الصوتية لان دى بالذات بتحتاج خامات احترافية وغالية جدا.

عزل الصوت فى الحوائط سهل مش محتاج حاجات كتير هى عبارة عن قطاعات حديد موزعة بداخلها مادة العزل سواء كان صوف زجاجى او فوم وبتتغطى بطبقة من الجبسوم بورد او الواح الخشب وطبعا كل ما تزيد سمك الطبقة دى بتزيد نسبة العزل ، وممكن تركب بلاطات ثلاثية الابعاد تعطيك مظهر جمالى رائع ، وفى نفس الوقت تحقق لك نسبة كبيرة من عزل الصوت.

اهم نقطة هى احكام اغلاق الفتحات يعنى ميكونش فيه تسريب هواء وده بيحتاج فنش كويس جدا وملىء كامل لجميع الفراغات بسيليكون او اى مادة لاصقة.

طبعا الخامات دى مكلفة الى حد ما لكن فيه طرق بسيطة لعزل الصوت ممكن تقرأها تعتبر موفرة فى التكلفة عن الطرق الاحترافية المستخدمة فى استوديوهات الصوت او الشركات الكبيرة.

حتى لو اخترت انك تقلل التكلفة شوية ومتعملش كل الطبقات دى ممكن تكتفى بالقطاعات المعدنية وفوقها الجبسوم بورد او الواح الخشب ده فى حد ذاته هيفرق الموجات الصوتية ويخليها متوصلش عندك بسهولة.

الأرضيات والسقف

مفهوم عزل الصوت فى المكان مش بس على اد الحوائط والشبابيك والأبواب لا ده فيه بنود مهمة جدا هتفرق معاك كتير وانت بتقوم بموضوع العزل زى السقف والارضية وخاصة لو كانت الضوضاء داخلة من ناحية الجيران اللى ساكنين فوق هتحتاج تفصل السقف عنهم وتمشى بالعزل لحد الحيطة وتنزل لحد الأرضية.

عزل الصوت من ناحية الارضية بوسيلة من الوسائل دى :

• استخدام سجادة كثيفة تفصلك عن الارضية الصلبة.
• استخدم الفوم تحت الباركيه لو كنت مركب ارضية خشبية لازم يكون الفوم كثافته كويسة.
• البطانة تحت السجادة مهمة جدا فى النقطة دى لكن الموضوع ده محدش بيتلفت له كتير لكنه بيفرق.

كده احنا عرفنا مفهوم عزل الصوت وازاي بينتشر ويدخل لنا في بيوتنا كل اللى عليك انك تختار الطريقة المناسبة للميزانية اللى معاك وتحقق لك شكل جمالى فى الغرفة سواء كنت هتنفذ بنفسك أو هتستعين بمتخصص.

عشان يبقى الكلام واقعى مش ممكن تحقق عزل الصوت بنسبة 100% من افكار منزلية بسيطة ، لا طبعا انت مش هتعمل زى استوديوهات الصوت او المكاتب والشركات الكبيرة دى امكانيات كبيرة اوى.

افضل طريقة لعزل الصوت هى انك تمنع تسرب الصوت بتقليل الفراغات فى المكان اللى انت موجود فيه، بس خلى بالك انه هيوصلك جزء ولو بسيط من الصوت فى الداخل دى نقطة مفروغ منها لكن طبعا هيبقى جزء قليل.

من اهم الاعتبارات اللى لازم تخلى بالك منها هى الشبابيك والابواب الخشبية وطبعا الحوائط واحيانا الأرضيات لو لزم الأمر.

هنساعدك فى الموضوع ده تلاقى أدوات وخامات لعزل الصوت تقدر تلاقيهم على مواقع شراء على الانترنت ومش لازم تكون حاجة غالية اوى عشان تبقى فعالة لكن هتلاقى حاجات سعرها بسيط ونتائجها كويسة.

تعالى نشوف الافكار البسيطة اللى ممكن تعملها وتكمل عليها وتبدع بنفسك حاجات مبتكرة

ديكور غرف عازلة للصوت

تخيل معايا كده لو تكون واقف فى شقتك وهى فاضيه وانت بتشطبها مثلا واتكلمت هتلاقى ان الصوت بيرن فيها وهتسمع اى صوت فى الشارع كأنه جنب اذنك ، ده لان مفيش كتل من الاثاث والفرش تمتص الصوت عشان كده ترتيب أثاث الغرفة اللى انت فيها بهدف تقليل الضوضاء ده اول الحلول الجيدة عشان تخفف حدة الصوت اللى بره.

من افضل الطرق اللى تقلل دخول الصوت من ناحية حيطة معينة انك تخلى الدولاب او المكتبة ناحية الحيطة دى ، ودائما ركز على الحوائط المواجهة للشارع او مصدر الصوت عموما ، لأن هى دى اللى محتاجة تصد الصوت اللى جاى من ناحيتها.

بردو من الحاجات المهمة اللى ممكن تعملها وتفرق معاك انك توزع بعض الكتل على نفس الحيطة دى زى تابلوهات مرسومة او سجاد الحوائط ، وكل ما خامة قماش السجادة تبقى اكثر سماكة كل ما تمتص كمية صوت اكتر.

ولما نتكلم عن الديكور يبقى مينفعش خالص ننسى ورق الحائط العازل للصوت وده اكبر ميزة فيه انه بيعطى كتلة اضافية كبيرة للحيطة لانه مصنوع من طبقة سميكة من الفوم مش زى ورق الحائط العادي.

وطبعا من افضل الحلول الحل الموجود فى الصورة وهو البلاطات ثلاثية الابعاد 3D ، وده لانها تحتوى على مادة البوليسترين العازلة للصوت والمقاومة لامتداد الحريق ، وانسب مكان تركب فيه البلاطات دى هى الحوائط اللى ما زالت فاضية بعد ما ترص الدولاب والمكتبة فى الحيطة المواجهة للصوت ، وبكده تكون حققت شكل رائع فى ديكور الغرفة.

لازم نخلى بالنا من الفرش ، وده من احسن الوسائل اللى تمتص الصوت فى الغرفة انك تجيب ركنة غرفة المعيشة بحجم كويس مناسب ، ولو فيه مكان متسع ممكن تزود كرسى معاها ، وهنا فيه معلومة جميلة ان التنجيد المظبوط بيمتص الصوت كويس جدا لان الاسفنج ومواد التنجيد دى كلها مواد تستخدم فى العزل بس بأشكال تانية.

عزل الابواب

لو بتدور على نقطة البداية فى عزل الصوت يبقى لازم تشوف الاول الابواب الخشبية اللى عندك ، هو صحيح ان الباب لما تقفله هيمنع جزء من الصوت لكن فيه جزء بيتسرب فى المسافة بين الباب والحلق نفسه.

افضل وسيلة لعزل الصوت هى انك تجيب باب سميك مخصوص لعزل الصوت لو كانت ميزانيتك تسمح ، وفيه وسائل منزلية بسيطة تخليك تعمل كده من ضمن الوسائل دى انك ترتب الفرش بحيث تقفل المسافات بين الحلق والباب لو كانت الفراغات كتير.

تاني نقطة مهمة ان الفراغ اللي تحت الباب اللى بنسميه (عقب الباب) ده ممكن يدخل منه كمية صوت كبيرة وعشان تمنع كمية الصوت دى استخدم سجادة سميكة او اى قطعة قماش تقفل الفراغ ده.

وبالنسبة لباب البيت الرئيسى اذا كانت ميزانيتك تسمح بشراء باب مصفح يكون افضل ، وده طبعا من ناحية عزل الصوت أولا ، لانه عبارة عن كتلة فولاذية مغلفة بطبقة صوف زجاجى عازل وفوقها طبقات الخشب يعنى يحقق لك عزل صوتى بنسبة كبيرة جدا ، ولزيادة الأمان ثانيا ، وده لانه مؤمن ضد محاولات السرقة والاختراق.

استخدم البطانية فى عزل الصوت

لو كنت بتدور على طريقة سهلة وبسيطة مش مكلفة ومتاحة عندك فى البيت طول الوقت تعزل بيها الصوت يبقى البطانية هى الحل اللى بتدور عليه.

رغم ان الموضوع شكله مش هيكون جمالى اوى لكنها وسيلة فعالة لتقليل كمية الصوت اللى داخل عندك فى الغرفة، لكن خلى بالك لازم تكون البطانية كثيفة عشان تقوم بالدور ده والناس اللى جربت البطانية الصوف حكت تجربتها فى الموضوع ده.

الموضوع ده بدأ ياخد اتجاه كبير وينتشر وخصوصا بعد ما توفر في الأسواق بطاطين عازلة للصوت واللى تعتبر البديل الارخص فى السعر بدل الخامات الاحترافية اللى بيتعمل بيها استوديوهات الصوت.

وبعض الشركات النهاردة اهتموا بتصنيع البطانية دى رغم ان شكلها مش حلو اوى بس عملوا منها غرفة صغيرة مخصصة للناس اللى بتسجل صوتيات، يدخل جواها ويقفلها عليه ميسمعش اى تفصيلة صوت من بره.

تركيب النوع ده من البطاطين او حتى البطاطين العادية سهل جدا ممكن تلزقه باى مادة لاصقة او تدبسه بدبابيس أو مسامير.

ستائر عزل الصوت

زى البطانية العازلة بالظبط تستخدم الستائر دى لتقليل وامتصاص الصوت قبل ما يصطدم بأي سطح قوى او عاكس زى الحوائط و الموبليات وزجاج الشبابيك.

تقدر تركيب مواسير الستائر دى فى اى مكان تحبه فى الغرفة او تحديدا فى المكان اللى بيدخلك منه صوت كتير سواء كان على شباك فى زاوية او باب فى اتجاه تانى.

تعتبر أقل فاعلية شوية من البطانية لكن لها دور مهم لو مش حابب تركب بطانية على الحيطة عشان المنظر العام فى الوقت ده تكون الستارة بديل مناسب جدا.

ومتنساش بردو ان البطانية اتعملت فى الاصل عشان الموسيقيين فمكانش الشكل مهم بالنسبة لهم اد الوظيفة.

عشان كده لما هتفرش غرفة نومك او الليفنج وبتفكر تعمل عزل صوت كويس هتركب ستارة عشان الشكل العام صعب تفكر فى البطانية.

طب لو لقيت ان الستارة العازلة دى مكلفة بالنسبة لك ممكن تركب اى ستارة عندك بس بشرط يكون قماشها سميك زى البلاك اوت ويفضل انك تعملها تفصيل بدل الستائر الجاهزة مينفعش الاقمشة الرقيقة زى الشيفون والتول والكلام ده وممكن كمان تخلى الستارة كذا طبقة فوق بعض عشان تعطي سماكة اكبر.

اهم نقطة تخلى بالك وانت بتشترى النوع ده من الستائر عشان السوق فيه كتير وفيه انواع جودتها رديئة حاول تشترى من المتاجر او مواقع الانترنت المعتمدة واللى لها تقييم عالي.

ماتنساش بردو وانت بتركب تسيب مسافة في حدود 10 سم حولين الشباك عشان تتأكد انك عزل الصوت اللى ممكن يتسرب فى الجزء ده.

فتحات الشبابيك والأبواب

بما اننا اتكلمنا عن عزل الصوت اللى متسرب من الأبواب بالبطانية والستارة لازم بردو نتكلم عن الطريقة الصح واللى هتريحك بنسبة كبيرة سواء من ناحية الابواب او الشبابيك.

الكاوتشات العازلة

استعملها فى الاماكن اللى بيتلامس فيها الشباك او الباب مع الحلق بتاعه وده بيضمن لك انه مقفول بمنتهى الاحكام لا يدخل منه تراب ولا هواء ولا صوت.

فرامل الباب

هل الحل المثالى عشان الباب ميقفلش جامد ويرزع لان الحركة دى مزعجة جدا وممكن تكسر الزجاج لو كان فيه او تخلى المقبض يخبط فى الحيطة كل شوية لو كان فيه ميول فى الحوائط و غلطة فى تركيب المفصلات.

مخدة الباب

الاسم غريب الى حد ما لكنها اداة جميلة جدا تمنع تسرب الحشرات والاتربة وكمان الصوت المتسرب من تحت الباب ، ومن اهم مميزاتها انها مش مصنوعة من مادة مطاطية تبطع في الأرض أو تجرح فيها، دى مصنوعة من قماش تخلى حركة الباب سهلة جدا و متعملش اى تلف للارضية.

هل كراتين البيض ممكن تساعدك

كتير ميعرفش عن كراتين البيض انها من احسن وسائل عزل الصوت الغير مكلفة ولو كنت سألت حد من مدة كبيرة قبل ظهور الخامات الحديثة دلوقتى وقلت له اعزل الصوت عن الغرفة ازاى كان هيقولك جرب كراتين البيض.

هل الموضوع ده حقيقة فعلا ؟ علميا كراتين البيض مش بتمنع الصوت لكنه بيمر من خلالها وده لسببين الاول انها مادة مسامية والتانى ان وزنها خفيف جدا وعزل الصوت محتاج وسائل أثقل من كده.

لكن الموجات الصوتية سلوكها غريب جدا بتتكسر مع الاشكال المموجة وعشان كده هنعرف فى باقى الموضوع البلاطات العازلة، لكن كراتين البيض بتخفف صدى الصوت بنسبة كبيرة جدا يعنى الصوت مش هيمشى مسافات كتير فى الغرفة.

وعشان كده وانت بتشطب الشقة لما تتكلم تسمع صدى صوتك لان مفيش سطح حاجز فلازم تتأكد ان الغرفة مفيش فيها اسطح لامعة كبيرة او عاكسة لان ده هيعمل صدى صوت ودى هتبقى ضوضاء اضافية غير الخارجية.

بلاطات الفوم العازلة للصوت

لما تشترى بلاطات الفوم العازلة للصوت من الانترنت او من محل تجارى فى البلد اللى انت فيها حتى لو كنت اخترت نوع جيد لكنه مش هيمنع الصوت 100% بس ده مش معناه انه ملوش أهمية بالعكس كمل قراءة الموضوع وهتفهم بالظبط.

فى علم الصوتيات فيه فرق بين 3 مفاهيم رئيسية منع الصوت وعزل الصوت وامتصاص الصوت، البلاط الفوم ده مش بيمنع مرور الصوت ولكنه يحتفظ بالصوت داخل مساماته الداخلية وده فى حد ذاته بيهدر الطاقة الصوتية وبيقلل الصدى بنسبة كبيرة جدا و هنا بقى الفوم بيقوم بدور امتصاص الصوت.

امتصاص الصوت اللى انت حصلت عليه من الفوم ده يعتبر جزء مهم جدا من عملية العزل اللى انت عايز توصلها فى غرفتك هو ممكن ميكونش عزل بنسبة 100% لكنه هيعملك تحسن كبير والميزة ان الفوم ده رخيص ومتوفر في أماكن كثيرة.

من ضمن مميزات البلاطات دى ان شكلها جميل جدا لو ركبتها فى حيطة هتعملك ديكور جميل وهتبقى إضافة كويسة جدا لو كنت مبطن الحيطة بمادة تانية تعزل الصوت فالبلاطات الفوم هتساهم معاها بشكل كبير.

اصنع الواح عزل الصوت بنفسك

عايز تعرف ايه احسن وارخص الطرق الفعالة لعزل الصوت عن غرفتك هي ألواح العزل، ايه هى الواح العزل دى وازاى تعملها.

اختار الخامة اللى تعجبك لعزل الصوت زى الفوم او الصوف الزجاجى تبطن بيها السطح الداخلى للالواح.

هتعمل إطار خشبي للوح العازل اللى هتبطن بيه المادة العازلة اللى انت اخترتها فى الاول مع مراعاة أن مساحة الإطار تكون اد المساحة اللى انت عايز تغطيها ويفضل انك تلزقها بالغراء العادية جوة الإطار.

بعد ما تخلص وضع الخامة العازلة فى الاطار الخشبى لازم تعمل لها شكل كويس بقماش بس اهم نقطة اتاكد ان القماش ده ميكونش عازل للصوت عشان الصوت يوصل جوه للخامة العازلة اللى هتقوم بدورها بدل ما القماش يطرده.

عزل الصوت من الأرضية

عزل الصوت مش بس فى الحوائط ده كمان فى الارضية، اوعى تفكر ان السجاد كل غرضه فى البيت شكل جمالى وتدفئة الارضية وتنعيمها وانت ماشى عليها بس لا طبعا ده له دور مهم جدا فى تخفيف الضوضاء.

ناس كتير مفكرة ان الاسطح السميكة تعزل الصوت اكتر من الرفيعة عشان كده بيخلوا صبة خرسانة السقف سميكة اكثر على اساس انها تعزل الصوت بالعكس دى بتكون اكتر وسيلة تنقل الضوضاء وده بيظهر اكتر فى خطوات المشى ولو حاجة وقعت على الارض بيسمعها الجار اللى ساكن فى الدور اللى تحته.

وهنا بقى يظهر أهمية السجاد اللى خامته كويسة و هيمتص كل الأصوات واى اهتزاز يحصل فى الشقة محدش هيسمعه فى الدور اللى تحت ونفس الوضع بالعكس، بمعنى انك لو ساكن فى الدور الثانى وفرشت سجادة كويسة على الارضية مش هيوصلك الصوت من الدور الأول.

بردو من ضمن فوائد السجاد فى النقطة دى انه هيمتص صدى الصوت و يختزله جوة أنسجته وده طبعا هيتحقق احسن لو كان السجاد سمكه كافى لعمل العزل الصوتى.

وفيه هنا بقى معلومة جديدة لو كنت عايز تخلى السجادة عازلة اكتر بطنها بطبقة من فوم من تحت هتلاقى ان السجادة بقت سميكة اكتر هتعزل الصوت بشكل أكبر وكمان هتمتص اى صدمة احسن من الاول لان يعتبر دلوقتى فيها مخدة تحتها.

وكمان ممكن تستخدم بديل الخشب عشان تزود من عزل الصوت فى الارضية.

ظهر فى الفترة الاخيرة شكل جديد من الموبليات مكناش متعودين عليه وهو الأثاث المعدنى وده بسبب انتشاره فى السوق العالمى وبدأ يدخل لنا بعدها فى بلادنا العربية.

زمان كنا نشوف سرير حديد او ترابيزة لكن كان الشكل مش حلو تحس انه فعلا مش بالفخامة اللى ظهرت فى الطفرة اللى حصلت دلوقتى.

من ضمن الأسباب اللى ساعدت في انتشار الأثاث المعدنى قوته وصلابته وسهولة تنظيفه فى حين أن الموبليات الخشب وخاصة لو كانت كلاسيك بتكون مرهقة جدا فى التنظيف لكن النوع ده كله مودرن.

صحيح أن الموبليات الخشب هتفضل مسيطرة على السوق لكن فيه بعض الاسباب اللى تخليك ممكن تفضل قطع معينة من الأثاث المعدنى فى بيتك او مكتبك او مقر الشركة تعالى نشوف الاسباب دى.

شكله تحفة

المصممين والمهندسين القائمين على تطوير النوع ده من الأثاث عملوا مجهودات كبيرة جدا عشان يخرجوه لنا بالشكل اللى ظهر حاليا ومش الشكل بس لكن كمان اهتموا بالوظيفة.

تخيل لو عندك الانتريه كله خشب وفى وسطهم جبت ترابيزة معدنية وعليها رخامة هيبقى المنظر شكله ايه ؟ اكيد هيبقى مميز جدا مش التقليدى اللى عينك اتعودت تشوفه.

هو طبعا اشكال الخشب كتيرة جدا وأنواع لا حصر لها وده بيعطى لمسة جمالية في المكان والأثاث المعدنى هتكون الوانه محدودة بالنسبة له لكن وجود قطعة معدنية مع أثاث خشبي بتعطي جو مختلف ومظهر عصري للمكان.

غير معرض للتسوس

كلنا عارفين أن الخشب مادة مسامية وده يخليها عرضة لحشرات كتير زى سوس الخشب اللى ممكن يخليك فى يوم تتفاجىء وتلاقى كرسى بيقع لوحده بسبب ان فيه رجل أكلها سوس الخشب.

القوة والمتانة

الأثاث المعدنى بيوصف باللغة العامية المصرية أنه “حمار شغل” لانه بيتحمل اصعب الاستخدامات وده اللى خلاه مناسب فى البيوت بالنسبة للمقيمين او حتى اللى بيأجر مكان بشكل مؤقت.

و هنلاقى ان السرير المعدنى وحتى سرير الأطفال اللى بدورين قوي جدا ويتحمل ضغط الأطفال عليه.

خامات الدهان المستخدمة فيه جودتها عالية عشان كده مش بيتاثر بالسوائل اللى تقع عليه ولا يمتصها طبعا ولو اتنظف كويس وتمت المحافظة عليه بيعيش عمر افتراضى طويل جدا ويتحمل الظروف الشاقة.

ولو افترضنا انه حصل خدش فى دهانه او الفنش بتاعه تقدر تعالجها بنفسك بجهاز رش البودرة وهو سهل جدا فى استخدامه ، وبالتالى مش عملية معقدة ولا محتاجة فنى متخصص.

اسعاره معقولة

من ضمن أسباب انتشار الأثاث المعدنى ان سعره معقول، هو صحيح ان القطعة اللى جودتها عالية سعرها اغلى من مثيلاتها فى الخشب لكن بتلاقي معاها ضمان 15 سنة على الأقل.

فى الحقيقة انت لو جيت تحسب هتلاقى ان القطعة دى ممكن تعيش 20 سنة زيادة عن الرقم المذكور فى الضمان اصلا واللى هيخليك تغيرها مش انها باظت ولكن انك حابب تغير فى الشكل لانك هتكون زهقت من التكرار.

كده عرفنا بعض الفروقات اللى تخلينا نفضل الأثاث المعدنى عن الخشب طب تعالى نشوف ازاى تقدر تشتريه وايه اللى ممكن يناسبك من الأنواع والخامات الموجودة بناء على استخدامك و راحتك.

طبيعة الخامة

الأثاث المعدنى هتلاقيه مصنوع من خامة من ثلاثة الحديد أو الاستانلس ستيل أو الألومنيوم، كل معدن من دول له خصائصه ومواصفاته.

النوع ده من الأثاث غالبا بيستخدم خارجى يعنى مثلا فى البلكونة أو فى حديقة بيتك لو عندك حديقة كبيرة او حتى على الرووف لو حبيت تعمل جلسة جميلة وقت الصيف وطبعا ممكن تستعمله فى المساحة الداخلية.

اهم نقطة فى اختيار خامة الكرسى او القطعة دى هى انك تختار خامة تتحمل الضغط والظروف الجوية لو كنت هتخرجها بره وفى نفس الوقت متكونش تكلفتها عالية.

لو افترضنا اننا عملنا تقييم بنسبة 100% لكل مواصفة فى الخامات دى يبقى التقييم القليل ياخد 25% والاعلى 100% زى ما هو موضح فى الصورة.

الألومنيوم

تعتبر من احسن الخامات المستخدمة فى صناعة الأثاث المعدنى لانها خامة قوية تستحمل الظروف الخارجية ومقاومة للصدأ والتآكل بطبيعتها يعنى مش محتاجة انها تدهن دهان خاص عشان الحماية.

هتلاقى الأثاث المصنوع منها اما مواسير مفرغة او كتل مصمتة، وطبعا بعض الناس هتقلق من الألومنيوم المصمتة عشان سعرها لكن هى معدتش غالية زى زمان بحكم ظهور بدائل كثيرة.

لو بتدور على أثاث معدنى مقاوم للمياه عشان البلكونة او الحديقة او البرجولا اللى بتفرشها والميزانية متاحة بالنسبة لك يبقى الألومنيوم هى انسب خامة.

الحديد

هى احسن خامة من حيث الكثافة والوزن وعشان كده تلاقيها قوية ولو اتكلمنا عن الاسعار فلو قارنت كرسى من الحديد هتلاقى سعره افضل من سعر نفس الكرسى لو كان ألومنيوم او ستانلس ستيل.

العيب الوحيد فى الخامة دى انها مش بتقدر تقاوم التآكل والصدأ لوحدها لازم تدهن دهانات خاصة عشان تقاوم العوامل الجوية.

لو بتفكر تجيب قطعة أثاث من الحديد يبقى تحاول تشوف نوع مدهون بودرة بنظام رش البودرة عشان يعيش أطول فترة ممكنة ويتحمل الرطوبة والمياه.

الاستانلس ستيل

الاستانلس هو شكل من أشكال المعادن المصنوعة من الفولاذ مع بعض العناصر زى الكروم والنيكل والسيليكون والألومنيوم والكربون وعشان كده هى مقاومة للتآكل والصدأ والمياه حتى على المدى الطويل.

ده معناه انها مادة قوية فى حد ذاتها مش محتاجة دهان خاص عشان يحميها من العوامل الخارجية.

من اهم مميزات الاستانلس انه مرن بمعنى انه ممكن يتصنع منه كراسى مريحة اكتر من الحديد واخف منه فى الوزن بكتير ويقدر يعيش معاك فترة طويلة ويتحمل.

اللون المناسب لاستايل بيتك

بتشوف كتير من ألوان الأثاث المعدنى ياترى ايه اللى يناسب ذوق بيتك من كل الألوان دى شوف متعلقاتك الشخصية شكلها ايه.

هل تحب القلم أو الساعة الذهب فى ايدك ولا انت من هواة الفضة ولونها الجذاب ولا من محبين اللون البرونزى فى اكسسواراتك.

اللون الذهبى

الذهبى تم استخدامه عبر العصور فى التزيين وعمل أفضل أشكال الديكور ولكن الايام دى تم استخدامه بتطوير كبير وبقى على نطاق أوسع.

عشان تستخدم اللون الذهبى بلمعته العالية فا انت محتاج جرأة كبيرة لأنه لون قوى بياخد العين وعشان يكون موجود فى مكان او تصميم معين فمصمم الديكور محتاج يبذل مجهود فى اقناع العميل بيه لان مش كل الناس تقتنع بوجوده.

انا شخصيا كنت مع عميل من فترة باعمل له شقته وكنا بنختار السيراميك فى المعرض واحنا بنلف لفت نظرى بلاط اسود مع ذهبي كانت تركيب حلوة مع بعضها قلت له ايه رايك ؟ قالى “لا يا بشمهندس شكله شعبى قوى” هو مكانش قادر يتقبله.

لو كنت من هواة اللون الذهبى يبقى ممكن تستخدم المطفى او الممسوح بدل اللامع عشان يظهر لك باقى تفاصيل المكان.

بعض الناس بتشوف ان الذهبى لون موضة قديمة لانه مرتبط بالكلاسيك بالعكس هو لو موجود فى مكان مودرن فى ترابيزة مثلا مع قطعة رخام هيبقى شكل الترابيزة تحفة ونفس الكلام لو كرسي متنجد تنجيد نظيف.

اللون الفضى او الاستانلس

اللون الفضى أصبح هو ملك المودرن النهاردة يعنى لو حابب تخلى المكان عندك شكله مودرن وتعمل ابهار يبقى اللون الفضى احسن وسيلة لكده.

طبعا اللون الفضى يشمل الكروم والنيكل والاستانلس حتى مع اختلافاتهم فى درجة اللون واللى بتكون مش ملحوظة اوى الا بالنسبة للمتخصص.

لو بتفكر تشترى قطعة أثاث معدني فضية يبقى لا ينصح بانك تجيب معاها قطع اكسسوارات بلون معدني تانى عشان ميحصلش تشتت وتلاقى المكان مزعج، وغالبا الاستانلس بيحتاج معاه سطح مطفى يمتص لمعانه زى قطعة الرخام على الترابيزة.

اللون البرونزى

فى العصر البرونزى كان اللون ده مكتسح فى كل استخدامات الإنسان وقتها من أول أوعية الأكل والشرب لحد القطع التذكارية.

وتم استخدامه فى اوائل القرن العشرين فى الاعمال فنية بكثافة كبيرة جدا ولكن مش بنفس الطرق الكلاسيكية بتاع العصور القديمة ورجع استخدامه تانى فى عصرنا الحالى فى قطع الموبليات.

يعتبر من الالوان اللى ليها طابع خاص فى جودة المكان الموجودة فيه لانها خامة بتعبر عن التراث والحاجة القديمة.

لو كنت من محبى الانتيكات يبقى اللون البرونزى هو انسب لون ليك لانه يتميز بالقطع المعدنية المنقرة واللى فيها زجاج مكسر وبيتم دهان المعدن بشكل قديم زى الفلفد و التعتيق.

مقاومة العوامل الجوية

لو كان غرضك من شراء الأثاث المعدنى هو انك تخليه فى البلكونة او الحديقة يبقى تخلى بالك من الخامة عشان تتحمل الرطوبة والمياه.

مش كل الخامات بتحتاج طبقة واقية من العوامل الخارجية فيه خامات بتحمى نفسها زى الألومنيوم والاستانلس، لكن الحديد وبعض انواع الاستانلس الرديئة اللى مش مطلية كويسة محتاجة حماية عشان تحافظ على نفسها.

وانت بتدور على الأثاث المعدنى سواء على الانترنت او فى المحلات حاول تشوف الأنواع المدهونة دهان بودرة او دهان مضاد للتآكل.

فيه كمان ملحوظة مهمة لو حصل اى تآكل او خدش فى طبقة الدهان لازم تعالجه فورا والا يدخل رطوبة للمعدن وممكن يخليه يصدى.

الراحة في الجلوس

المعدن من الخامات الصلبة والقوية اللى مش من السهل أنك تستريح فى الجلوس عليها ولو نفتكر زمان كان فيه استراحات عامة على كورنيش النيل وأماكن الانتظار كانت من الحديد لما كنت تقعد عليها لمدة ربع ساعة بس كان ظهرك يوجعك جدا.

لازم تختار الكرسى اللى يناسب ابعاد جسمك ويكون التنجيد فيه مريح وعدد التكاوى كفاية ولو كان عاجبك طقم معين وعدد المخدات فيه مش مناسب ممكن تجربه فترة بسيطة لو لقيت انك مش مستريح.

واكيد طبعا زى ما اهتميت بخامة الكرسى نفسه عشان يقاوم العوامل الجوية كمان لازم تهتم بخامة المخدات اللى هتكون عليه لانها لو خامة سيئة هتعفن من الرطوبة مع الوقت.

من لحظة معرفة الوالدين بالحمل تبدأ رحلة البحث عن احتياجات المولود ، ومن اكتر الحاجات اللى بتحتار فيها الأمهات ومش بتكون عارفة تختار اى نوع منه هو سرير اطفال المولود اللى جاى.

ياترى الاختيار هيكون على أساس الشكل ولا اللون ولا السعر ولا الماركة ، طب يا ترى هيكون سرير اطفال خشب ولا معدن واى خامة ، اسئلة كتير بتدور فى دماغ أى أم وخصوصا لو ده اول بيبى بتكون الحيرة اكبر بكتير من بعد كده لان مفيش خبرة كفاية.

سرير الاطفال ده اكتر مكان هيكون متواجد فيه فى الفترة الاولى من حياته عشان كده لازم تكونى سايباه فيه وانتى مطمنة عليه كويس جدا وتختارى كل حاجة فيه بعناية ودقة وحرص شديد.

طب ايه المعايير اللى هيتم بناء عليها الاختيار ؟

مساحة المكان

لازم تاخدى بالك كويس جدا من مساحة الغرفة اللى هتحطى السرير فيها عشان تراعى ده وانتى بتشتريه مينفعش الغرفة تكون صغيرة وتجيبى سرير كبير او سرير بمستلزمات كتير مكملة ليه لان ده مش هيكون عملى و هيضيق المكان وهتضطرى تخزنيه عشان المساحة.

لو الغرفة صغيرة اوى ممكن تعملى سرير اطفال خشب عمولة بالمقاس اللى انتى عايزاه بالظبط.

الأمان

معظم السراير الجاهزة بيكون فيها بطانة خارجية على الجوانب عشان تحمى الطفل من اى صدمات ولو هتشترى سرير خشب يبقى لازم تعملى له بطانة فى الجوانب والحواف عشان تحمى الطفل من اى خبطة.

كمان فيه نقطة تانية لو سرير المولود هزاز يبقى لازم تجربيه كويس قبل ما تشتريه وتتأكدي من ثباته وتوازنه على الارض عشان الطفل ميقعش منه ويفضل انه يكون فيه امكانية الثبات وتستغلى الهزاز وقت اللزوم بس.

الارتفاع

يفضل ان سرير الاطفال يكون بمستويين للمرتبة ، مستوى عالى وده اللى بيستخدم فى اول الولادة عشان يكون قريب من الام وسهل ليها وهى بتشيل الطفل ومستوى منخفض وده اللى هنستخدمه لما الطفل يقدر يقعد ويقف عشان ميقدرش يخرج او ينط من فوق السرير.

الطى والفرد

طبعا هيكون عملى جدا لو السرير كان بيطوى ويتفرد وقت اللزوم عشان يوفر فى المساحة وكمان يكون سهل التخزين بعد انتهاء فترة احتياجه.

المرتبة

لازم المرتبة تكون مريحة وامنة تماما للطفل وتكون مناسبة لحجم السرير مش كبيرة عليه ولا صغيرة كمان لازم نتأكد ان مفيش فيها فراغات عشان متتعبش الطفل فى النوم.

السعر

من الحاجات المهمة اللى على أساسها تحدد اختيار سرير الاطفال هو السعر ، فيه ناس بتفضل انها ما تجيبش حاجة غالية جدا عشان متتركنش على الفاضى و بيشوفوا ان الاحسن انهم يجيبوا حاجة على اد الايد وعملية ومريحة فى الاستخدام وطبعا آمنة ، الاختيار ده على اساس انها بتستخدم فترة بسيطة بس.

وفيه بعض الناس بتفضل انها تجيب حاجة شيك و غالية عشان المنظر يكون حلو لو مسألة الميزانية مش مهمة بالنسبة لهم.

الشكل أو النوع

سرير اطفال صغير

بيكون بعدد 2 حامل فى السقف عشان كده بيسموه سلة موسى وده ممكن نستخدمه فى اول الولادة لانه مش بيحتاج مساحة كبيرة خالص وممكن يتعلق فى اى مكان فى الغرفة وده مناسب اكتر للامهات اللى بتخاف تخلى المولود ينام جمبها في أول الولادة لانها مش متعودة او تعبانة وبعد كده بتستغنى عنه وتخلي الطفل ينام جمبها وفيه منه المصنوع من القش وده مينصحش بيه لانه بيئة مناسبة لنمو الحشرات وفيه نوع تانى من المعدن وبيتغطى بقماش وبيكون معاه ناموسية تحمى الطفل من الحشرات.

سرير اطفال خشب

لو هتجيبى سرير خشب او حتى هتعمليه عمولة يبقى لازم يكون خشب كويس جدا وقوى ويفضل طبعا انه يكون من خشب الزان ويكون له جوانب مرتفعة.

أما عن شكله فهو عبارة عن أعمدة متفرقة وده يستدعي انك تعملى له مخدات مبطنة حول السرير عشان تحمى الطفل من اى خبطة ولازم تكون مربوطة كويس ومحكمة عشان متقعش عليه لو اتحرك.

بالنسبة لدهان السرير احذرى الدهان اللى داخل فى تركيبته رصاص لانه بيقشر وممكن الطفل يعضه او ياكله وده فيه خطورة كبيرة جدا عليه.

وحاليا فى اماكن بيع مستلزمات الاطفال موجود طبقة من السيليكون بتتحط على الجوانب دى عشان تحمى الطفل انه يعضها او يمص فيها.

اخر حاجة فى السرير الخشب انك لازم تتأكدي ان كل قطعة متركبة كويس ومفيش اى حاجة حادة ظاهرة وواضحة للطفل لأنها تمثل خطر عليه.

سرير اطفال معدن

ده بيكون من الحديد وبيتغطى بطبقات من القماش المبطن عشان تحمى الطفل المولود ، وفيه ناس بتفضله عن الخشب عشان التكلفة لان تكلفته فى الغالب بتكون اقل.

كمان فيه منه اشكال مختلفة ومتنوعة ودى حاجة مش موجودة كتير فى السرير الخشب.

خلى بالك كويس لو جبتى سرير اطفال فيه شبك يبقى لازم تتأكدى كل فترة انه سليم ومفيش فيه اى خدش عشان مفيش حاجة من هدوم الطفل تشبك فى الفتحات دى لو اتقطعت لانها فى الحالة دى ممكن تجرحه.

سرير اطفال متعدد الاستخدامات

وده ظهر منه فى الفترة الاخيرة انواع كثيرة جدا سواء خشبية او معدنية وفيه منه الهزاز والثابت وفيه نفس الوقت قابل للطى والفرد عشان سهولة التخزين وكمان بيحتوى على عجل عشان يتحرك من مكان لمكان بمنتهى السهولة بس خلى بالك ان العجل يكون ثابت أثناء الوقوف ومش بيتحرك لوحده.

كمان فيه سراير اطفال فيها وحدة أدراج لتخزين مستلزمات الطفل المولود من ملابس او اشياء تانية وفيه منها بيكون فيه وحدة تركيب الحفاضات ودى بتتركب وقت اللزوم وبتتشال تانى.

وفيه نوع دلوقتى يحتوى على مكملات (حقيبة لحمل الطفل وشنطة لمستلزماته).

اخر حاجة ظهرت السرير القابل للتحويل وده ممكن يتحول لكنبة صغيرة او ركنة بسيطة فى غرفة الاطفال ومنه اللى بيتحول لسرير كبير شوية بعد ما الطفل يعدى سن 3 سنين ودى بتكون استفادة وحل اقتصادي وعملي للاسرة.

احتياطات الأمان

بما أن الطفل المولود بيكون نايم اغلب الوقت والام مش معاه يبقى لازم تاخدى تاخدى بالك كويس من احتياطات الأمن والسلامة لانه مش هيقدر ينادى عليكى وقت الخطر.

1. ينصح بعدم وجود مخدات نهائى لأن الطفل قبل سن سنة مش بينام على مخدات لانه خطر جدا عليه وممكن تسبب الموت المفاجئ وكمان يفضل انك متحطيش معاه اى لعب او دباديب.
2. لو هتركبى فوق السرير العاب بموسيقى أو بدون عشان تلفتى نظر البيبى وتلهيه يبقى لازم تتأكدى انها متركبة باحكام.
3. لو السرير بعجل هاتى له مشابك عشان تمنعيه من الحركة وقت الثبات وعشان الطفل لو اتحرك فى السرير ميتحركش بيه.
4. لو السرير جاهز وهيجى مفكوك وانتى اللى هتركبيه ياريت تقرأى التعليمات كويس عشان يركب بالطريقة الصحيحة.
5. وانتى بتشترى السرير اتأكدى من ثباته على الارض وانه مش مايل عشان يكون آمن للطفل.
6. لو عندك حيوانات اليفة فى البيت يفضل انك تبعديها خالص عن سرير الطفل حتى قبل ولادته عشان متتعودش على المكان وتنقل له أمراض.
7. لازم تباشرى كل فترة على السرير وتشوفى لو فيه اى خدش او حاجة حادة أو مصدية ظهرت فيه تعالجيها بسرعة.

التنظيف

لازم تنظفيه من التراب اولا بالتنفيض او الشفط بمكنسة ، والتنظيف يكون بفوطة مبللة بمنظف ونسيبه ينشف فى جو الغرفة مع فتح الشبابيك او قدام المروحة.

التصاميم الداخلية لفندق Bagtyyar بدولة تركمانستان من اعمال شركة Nama الاماراتية قمة فى الابداع والروعة والهدوء.

تعالوا نشوف شكل الفندق وايه تفاصيل الديكور اللى فيه

الواجهة الخارجية للفندق

اتعملت الواجهة باللون الابيض و استخدموا فيها الزجاج الأزرق العاكس عشان يبقى فيه تنوع فى المنظر ويعطى contrast حلو جدا.

الكاونتر الداخلى فى الاستقبال

تم استخدام الخشب بلونه الطبيعي مع الرخام الأخضر الغامق مع اعمدة ميتاليك ذهبية فى تناغم جميل جدا جدا من المصمم فى التصاميم الداخلية لفندق Bagtyyar .

مع وجود خلفية ميتاليك بشكل اسلامى اعطت طابع جميل و هادى للنزلاء وهما داخلين.

بهو المدخل

تم استخدام الدهانات باللون الأبيض مع الرخام البيج والبنى كنوع من الاختلاف فى اللون لكسر حدة الملل مع رسومات بارزة من تراث الحضارة القديمة للبلاد.

وتم استخدام المشكاة لعمل اضاءة ذهبية رائعة مع اللون الابيض ودى عملت جو ساحر وجذاب فى منتهى الهدوء.

غرف النوم فى التصاميم الداخلية لفندق Bagtyyar

اللى واضح هنا ان غرف النوم يغلب عليها الطابع الكلاسيكى او النيو كلاسيك مع استخدام الألوان البيض والكريمى مع الذهبى الخفيف لاضافة جو هادى.

تصاميم الحمامات

استخدموا الوان البيج والبنى فى السيراميك الخاص بالحوائط والأرضيات مع استخدام الازرق السماوى والابيض فى سقف الحمام والاضاءة المخفية لاعطاء جو هادى بالليل.

قاعة الاجتماعات والندوات

الخلفية الخشب عاطية جو جميل جدا وفخامة للمكان مع استخدام الاعواد الميتاليك الذهبية نفس فخامة الريسبشن مع الكراسى الخضراء.

الحوائط مكسية بورق الحائط البيج مع استخدام الاعواد والكرانيش البيضاء المطعمة باللون الذهبى عشان الاستايل الكلاسيك.

اماكن الانتظار والجلوس

نفس الالوان المستخدمة فى تصميم الفندق عشان الفخامة والرقى والهدوء والستائر المليانة كرانيش وشغل وبراقع.

الملاهى المائية وحمام السباحة

الكراسى بيضاء مع الخشب الطبيعى باللون الاصفر والبرجولة للجلوس وقت الشمس والحرارة.

حمام السباحة الداخلى معمول بشكل جميل و خلفية الحوائط فيه معمولة من الخشب وورق الحائط عشان تكون وراء الكراسى اثناء الجلوس عليها.

اختيار الصنايعى المناسب من حيث الكفاءة والتكلفة يعتبر تحدى وخصوصا فى بلادنا العربية بسبب اما المواعيد الصعبة او قلة الجودة فى الشغل ، لما بتكلم صنايعى ينفذ لك شغلانة معينة عندك فى البيت سواء عرفته من صفحة تواصل اجتماعى او ابلكيشن موبايل او خدمة على الانترنت او حتى حد رشحه لك اكيد لازم تتأكد الاول من مدى اتقانه للمهنة وأنه فنى محترف ، أدوات الصنايعى المحترف كثيرة تختلف على حسب مهنته واحنا هنحاول نتعرف مع بعض على المؤشرات اللى تبين لنا انه محترف مع مجموعة من الادوات دى.

التخصص فى المهنة

حاول تختار الصنايعى المتخصص فى نوعية الشغل المطلوبة عندك، كنت من مدة اعرف ميكانيكى سيارات اتكلمت معاه عرفت انه شغال فى صيانة ماركة واحدة بس مش بيشتغل فى غيرها لفت نظرى جدا وقتها حسيت فعلا انه صنايعى محترف.

نفس الموضوع هتلاقى مثلا نجار للمطابخ بس، ميشتغلش فى نجارة الغرف او نقاش متخصص فى الشغل الداخلى ميعملش واجهات خارجية بردو هتلاقى كهربائى لشغل التيار الخفيف بس (اجهزة الإنذار والحريق وكاميرات المراقبة)

عشان كده خلى بالك اللى تلاقيه كاتب فنى اسقف معلقة ونقاش وكهربائى ده شغل عشوائى مستحيل يكون متقن لكل المهن دى لان كل مهنة من دول فيها تخصصات اصلا.

سابقة اعمال جيدة

طيب ايه اللى يثبت لك انه صنايعى ماهر في مهنته، شغله اللى عمله قبل كده هو اللى هيتكلم عنه لازم تطلب منه أعماله سواء كانت فى كتالوج ورق او على موبايل او تابلت او على الانترنت.

شوف الشغل اللى عمله مثلا آخر سنة ومن الطبيعى ان اى حد بيعمل تجميعة لشغله عشان الناس تشوفها بيختار أحسن أعماله، فلو لقيت ان اعماله دى مش مناسبة او مش عاجباك او مش شبه اللى بتدور عليه استبعده.

أدوات الصنايعى المحترف

الصنايعى المحترف بيتعرف من أدواته ومعداته اللى بيشتغل بيها وبيبان لو كان بيطور من نفسه ولا لا يعنى مثلا لو لقيت معاه عدة مبتكرة بتعمل حاجة جديدة اسهل من طريقة تقليدية اعرف انه متابع الجديد لان الادوات الحديثة زى معدات الليزر عملت نقلة كبيرة فى المجال.

بعكس صنايعى شغال بفكر قديم بعدة قديمة بياخد وقت اطول فى الشغل ومش هيطلع بنفس دقة الأدوات الجديدة تعالى نشوف بعض الادوات دى

متر الليزر

من أهم أدوات الصنايعى المحترف المتر الليزر ، لو لقيته بيرفع مقاسات بمتر ليزر اعرف رجل بيجدد معلوماته، لأن المتر الشريط مبقاش يصلح للأماكن الكبيرة.

تخيل معايا لو شقتك مساحتها كبيرة او عندك فيلا مثلا واقصى متر شريط متاح فى السوق 10 متر بس.

الرجل هيفتح المتر ويقيس وتبدأ معاناته، الشريط يرجع تانى للبكرة يحتاج يفرده مرة تانية عشان كده بيجيب حد يمسك معاه ولو مفيش بيضطر يعلم بالقلم نقطة ويكمل من عندها عشان ياخد باقى المقاس.

لكن مع المتر الليزر الوضع مختلف تماما كل اللى هتعمله انك هتوقف المتر على الحيطة وتضغط على زرار يخرج شعاع الليزر يقيس لك المسافة بين الحيطة اللى انت ساند المتر عليها والحيطة اللى ادامها وتظهر القراءة على الشاشة.

من ضمن فوائده الدقة المتناهية اللى بتوصل الى 1.5 مم ده طبعا غير المسافة اللى بتوصل فى بعض الانواع الى 300 متر ومش بس كده ده بيحسب لك مساحة الغرفة وحجمها وحسابات تانية كتير، يعنى ببساطة اللى هتعمله بالمتر العادى فى نصف ساعة تعمله بالليزر فى 5 دقائق.

ميزان الشيرب الليزر

لما تجيب فنى اسقف معلقة ويشتغل وساعة ما تلاقيه طلع عدته من الشنطة لو لقيت فيها ميزان ليزر اعرف انه رجل متطور بيجدد فى شغله.

ميزان الشيرب التقليدى ده كان يا اما الخيط اللى فيه حبر وده طبعا من السهل جدا يكون فيه اخطاء ده غير ان الحبر كان ممكن يبقى خفيف الخط ميظهرش او ميزان الخرطوم الرفيع.

عشان كده العلماء طوروا ميزان الشيرب اللى تقدر تظبط بيه خط افقى او راسى او حتى افقى وراسى مع بعض وفيه انواع بتعمل 5 خطوط فى نفس الوقت وده طبعا مستحيل تعمله بميزان الخيط.

مش بس كده ده أنت كمان عشان تتأكد ان وزنة الخيط مظبوطة لازم تظبطها بميزان المياه شوف بقى كمية الوقت الضايع اد ايه.

فى الليزر الوضع غير كده خالص تركب الجهاز على الحامل و تضغط زرار يعمل لك خط افقى فى الغرفة وممكن كمان تخلى الخط ده 360 درجة يعني لافف محيط الغرفة كلها وطبعا مش هتحتاج ميزان المياه لان الخطوط كلها مظبوطة اتوماتيك.

وده بيفيد صنايعى السقف المعلق و الكهربائى وفنى تركيب المطابخ ونجار الابواب والشبابيك والسباك لان كل دول محتاجين وزنة بميزان الشيرب.

جهاز كشف المعادن

من أهم أدوات الصنايعى المحترف الجهاز ده، تخيل معايا مثلا لو عندك عامل بيركب حاجة فى المطبخ او اى مكان تانى ومعاه الشنيور بتاعه وقام عامل فتحة فى الحيطة واتفاجأت ان حصلت قفلة وشميت ريحة شياط ايه اللى حصل بقى.

اللى حصل ببساطة ان المكان اللى اتعمل فيه التخريم كان ماشى فيه ماسورة كهرباء والسلكين لمسوا بعض وحصلت القفلة تخيل لو كان اللى حصل ده حصل فى الحمام واللى اتخرمت كانت ماسورة مياه كانت هتبقى الكارثة دى عاملة ازاى دلوقتى.

عشان كده اخترعوا لنا جهاز يكشف لنا اللى جوه الحيطة من غير ما نكسر او نحتاج نكلم الصنايعى اللى عامل الحاجة نفسه عشان يعرف اماكن المواسير.

ببساطة كل اللى عليك انك تشغل الجهاز وتمشيه على الحيطة وهو بيكشف لك اذا كان فيه هنا ماسورة حديد او سلك كهرباء ولا لا و يعرفك بالظبط فين نقطة السنتر اللى فيها الماسورة.

وفيه انواع تانية بتكشف المواسير البلاستيك والخشب شوف بقى كام صنايعى يقدر يستفيد من الجهاز ده.

ميزان المياه الديجيتال

تخيل مثلا لو عندك مبلط سيراميك شغال ومعاه ميزان المياه العادى هيشتغل ويظبط على الميزان العادي وبعد ما يخلص وتيجى تمسح الشقة تتفاجىء وانت بترمى المياه على الارض انها اتحركت لوحدها.

اللى خلى المياه تتحرك هو ان فيه ميول 3 او 4 درجات خلوا المياه تمشى وهو مكانش قادر يشوفهم لان الميزان التقليدى ده عبارة عن فقاعة مياه لازم تكون فى السنتر ممكن تنحرف منه وهو مش اخد باله.

لكن دلوقتى ظهر ميزان مياه ديجيتال بقى من أهم أدوات الصنايعى المحترف اللى عايز يطلع شغله مظبوط مفيهوش غلطة.

الفرق بينه وبين الميزان العادى ان ده مش بس فقاعة مياه فى السنتر لكن ده كمان بيعرف لك نسبة الميول كام درجة بالظبط وده طبعا ظبط مثالى لاى زاوية انت عايز تجيبها.

ده هيفيد السباك والنجار بكل انواعه سواء موبليات او نجارة ديكور وتجليد والكهربائى والمبلط وبتاع الاسقف المعلقة والحداد تقريبا كل الصنايعية والعمال.

لما تلاقى الصنايعى بيشتغل بالميزان ده اعرف انه واثق من نفسه جدا ومش هيخليك تقدر تطلع وراه غلطة لان الميزان ده مش بيعطى فرصة للخطأ ولا حتى 1% يعنى متقلقش.

كاميرا كشف الاعماق

تعتبر اداة جديدة شوية بالنسبة لبعض الناس لان استخدامها مش منتشر اوى لكل فئات الصنايعية لكنها من احسن أدوات الصنايعى المحترف تعالوا نتكلم عنها ببساطة.

الاداة دى تقدر تخليك تستكشف المواتير والمحركات واللى جوه المواسير بدون ما تحتاج لاى تكسير نهائى لانها بتسهل عليك رؤية الاماكن اللى من الصعب جدا توصلها بعينك المجردة وده هيوفر عليك وقت كبير جدا وتكلفة عالية.

كل اللى عليك انك بتفتح الجهاز وتخرج الكابل المرن للجزء اللى انت محتاج تشوف فيه ايه سواء كان عطل او حاجة محتاجة تتصلح وهتلاقى صور الجزء ده ظهرت على الشاشة.

طبعا هى مزودة بإضاءة LED جمب الكاميرا الأمامية لها عشان تكشف الأماكن المظلمة وكمان لو كانت النقطة دى تحت المياه هيصورها لان الجهاز ضد المياه.

مش بس كده دى كمان فيها كارت ميمورى عشان لو كنت حابب تشوف المكان اللى بتصوره على شاشة كبيرة لو كانت شاشة الجهاز صغيرة بالنسبة لك.

جهاز كشف الحرارة

الجهاز ده عبارة عن ترمومتر بيقيس درجة الحرارة والرطوبة فى نقطة معينة ويعتبر من اهم واحسن أدوات الصنايعى المحترف.

الجهاز ده بيقيس الحرارة بالأشعة تحت الحمراء وبيخرج منه شعاع ليزر عشان يبين لك النقطة اللى هو بيقيس حرارتها.

بيستخدموه فنيين التكييف عشان يقيسوا درجة التبريد بالظبط كام ويكتشفوا لو فيه عطل فى التبريد مثلا ويستخدم مع بعض عمال الكهرباء عشان لما يختبر المفاتيح اللى عليها أحمال هل بتسخن ولا لا.

يعتبر هو اهم اداة من ادوات شركات عزل الحوائط والجدران لانه بيحدد لهم حرارة كل حيطة كام وبالتالى محتاجة عزل من خامة ايه عشان يوصلوا الغرفة لدرجة الحرارة المطلوبة تخيل لو الاداة دى مش موجودة هيشتغلوا ازاى بدقة.

بيكشف درجة الرطوبة الموجودة فى الحوائط ومش بس كده ده كمان بيعطيك تحذير لو حصل فيها رطوبة هتوصلها لمرحلة التعفن وطبعا لو حصل تعفن بيبين لك درجته كام وده طبعا مفيد جدا عشان تلحق حاجات كتير قبل ما تحصل بس ده فى الماركات الغالية زى Bosch.

دى كانت بعض الملاحظات اللى تحاول تخلى بالك منها عشان تعرف ان الصنايعى اللى معاك محترف وده يبان عليه من أدواته وشغله اللى عمله وتقييمه وآراء الناس فيه.

تقفيلات المطابخ معرضة طول اليوم للمياه والحرارة وبقع الزيت والطبخ وطبعا بتحتاج تنظيف مستمر عشان متعملش مشاكل صحية ، عشان كده انت محتاج خامة قوية وتستحمل الظروف الشاقة دى وفى نفس الوقت يكون لها شكل جمالى لان مطبخك فى النهاية جزء من ديكور البيت، لما بيتعرض عليك الخامات بتسأل نفسك وتقول اعمل المطبخ خشب ولا PVC .

هنتعرف فى الموضوع ده عن مميزات وعيوب المطابخ الخشب ومطابخ PVC عشان تقرر الانسب لك بناء على ذوقك وامكانياتك المادية.

المطبخ الخشب

اقدم خامة فى التاريخ استخدمها الناس فى عمل المطابخ ولكن حاليا تم استبدالها بـ الواح الكونتر بكل اشكاله و احيانا MDF لان تكلفة الخشب بقت عالية وانواع كتير منه تتأثر بالرطوبة الموجودة فى المطبخ.

الواح الكونتر تعتبر الخامة المثالية للى عايز يصنع مطبخ من الخشب ولكن لازم يتم دهانه أو تغليفه كويس جدا والا يحصل فيه مشاكل كتير بعدين.

بعض الناس ما زالت بتفضل الخامات الخشبية زى الكونتر بانواعه لانها خامة متعودين عليها وعشان كده اى نجار محترف يعملك مطبخك بعكس الخامات الجديدة محتاجة مهارات خاصة.

لا ينصح باستعمال خامة MDF فى تصنيع علب المطبخ لانه بيتفاعل بسرعة جدا مع المياه ويتأثر ويتلف.

عيوب المطابخ الخشب

• الاستجابة السريعة للرطوبة عشان كده بنشوف مطابخ خشب انحنت ولفت من كتر وجود المياه عليها وده لانها مكانتش مدهونة كويس لو بتسأل نفسك اعمل المطبخ خشب ولا PVC  واخترت الخشب خلى بالك من النقطة دى عشان يعيش معاك عمر افتراضى طويل.
• بعض ستات البيوت لما تيجي تنظف المطبخ بتنظفه بفوطة عليها مادة كيماوية كاوية جدا على اساس انها تنظف الدهون والزيوت وده غلط جدا لان المواد دى بتعمل تآكل فى طبقة الدهان وتخلى الخشب مكشوف للمياه وده يقصر عمره ويتلفه.
• الخشب طبعا خامة طبيعية مسامية ودى انسب مكان للحشرات انها تعيش فيه ، فلو كنت هتعمل مطبخ من الخشب يبقى لازم دهان وفنش كويس جدا وتنظيف مستمر بعد كل استعمال.
• لو استخدمت فوقه طبقة تغطيه زى رولات PVC الموجودة فى السوق ، ودى عملية تسمى تجاريا لامنيشن ، الطبقة دى هتحميه من المياه لكن احذر انها تتخدش بسهولة هيبقى المنظر مش حلو عشان كده هو محتاج حماية.
• لازم تخلى بالك من حواف الخشب تكون مكسية بالحواف كويس لانها لو فكت أو اتقشرت مع الوقت المياه هتدخل للخشب وتخليه يعفن.

خامة PVC للمطبخ

لما بتسمع كلمة PVC اول حاجة بتيجى فى بالك هى مواسير PVC البيضاء بتاعت السباكة، لكن مش ده اللى نقصده هنا، احنا نقصد المطبخ المصنوع من PVC. بعد الطفرة الرهيبة اللى حصلت فى تصنيع المطابخ بقت الخامة دى اكتر خامة منتشرة والناس بتدور عليها.

ولو كنت خايف او قلقان منها عشانها خامة جديدة ومصنعة كمل قراءة الموضوع وهتقدر تختار المطبخ خشب ولا PVC .

السوق المحلى والعالمى فيه نوعين من خامة PVC نوع مفرغ من الداخل ونوع مصمت اسمه فوم بورد الفرق بين النوعين بسيط تقدر تفهمه من الاسم.

اللوح المفرغ

هو عبارة عن لوح مقاس 240 سم*120 سم بسمك يتراوح من 2مم – 35 مم مفرغ من جوه وزنه خفيف جدا وسعره اقتصادى.

الألواح دى بتستخدم فى التعبئة والتغليف والعزل والحماية وتصنيع المطابخ والاسقف المعلقة المشدودة وتجليد الحوائط واى استخدام من دول يعتمد على سمك اللوح نفسه يعنى مثلا المطابخ بتستخدم لوح سمك 12-18 مم.

مميزات الألواح المفرغة

• تعتبر ارخص خامة النهاردة مستخدمة فى المطابخ عشان كده بيستخدمها الناس اللى مش مقيمة مدة طويلة يعنى مثلا واحد مغترب ساكن فى شقة ايجار مش لازم يشترى خامة غالية.
• سريعة جدا فى تركيبها وخفيفة الوزن.
• متوفر منها الوان كتير جدا تقدر تختار براحتك عشان مطبخك يمشى مع لون السيراميك.
• مش محتاج دهان ولا تأسيس ولا كل الكلام ده لانه مصنوع بالوانه الافتراضية كل اللى عليك لحظة ما تقرر تعمل المطبخ PVC انك تختار اللى يناسبك من كتالوج او بالتة.

عيوب الألواح المفرغة

• مش بيتحمل درجات الحرارة العالية وطبعا غير مقاوم للحريق.
• ضعيف لانه مش مصمم للعمر الافتراضى الطويل وده بيظهر بشكل كبير اوى لما تعمل منه علبة مطبخ وتربط مسامير المفصلات والمقابض هتلاقيهم مهزوزين بعد فترة لان المسمار مش مربوط جوه كويس لان مفيش كتلة مصمتة يمسك فيها عشانه مفرغ.
• بما انه كتلة مفرغة فيعتبر مسكن مناسب جدا للحشرات انها تدخل جواه ومن الصعب جدا انك تشيلها بعد كده لان فتحاته ضيقة جدا.
• من ضمن العيوب بردو انه ضعيف مش متماسك من جوه وده بيخليه ينحنى بعد فترة او يتكسر باقل ضغط.
• إصلاحه صعب لان زى ما قولنا انك لو فكيت قطعة منه وحاولت تربطها تانى لازم تغير مكان المسمار لان مكان المسمار الأول اتخرم مينفعش تكمل عليه تانى.

لوح PVC فوم بورد

لوح فوم بورد متوفر منه سماكات كتير تتراوح من 1مم – 30 مم ومقاس اللوح 120 سم * 240 سم وأصبحت الخامة دى فى الوقت الحالى بديل لخامات كتير تانية زى MDF والكونتر.

مميزات الواح PVC فوم بورد

• وزنه خفيف وسهل الحمل عشان كده مش متعب فى النقل والتركيب والتصنيع زى خامات تانية تقليدية.
• نفس القوة والاعتمادية الموجودة في الخشب تقدر تخرمه وتقطعه بمنشار وتربط فيه مسامير او دبابيس ومش بس كده ده انت كمان تقدر تعمله كيرف وتقدر تلزق فوقه طبقة حماية عشان الرطوبة والحرارة الموجودين فى المطبخ.
• مقاوم للرطوبة تماما لان معدل امتصاصه للمياه قليل جدا يكاد يكون معدوم.
• بيئة غير مناسبة لوجود الحشرات وكمان مش بيصيبه العفن ولا التسوس زى بعض أنواع الخشب اللى ممكن تسوس وتعفن لو لمسها شوية مياه.
• مصنع من مواد صديقة للبيئة وغير سامة وكمان مقاوم للتآكل يعنى لو هتختار اعمل المطبخ خشب ولا PVC هتلاقى نفسك هتختار PVC طبعا لانك هتبقى مطمن.
• مقاوم للحرارة العالية والحريق لان تركيبته من الداخل قوية مش بتتأثر بالحرارة بسهولة.

ليه خامة PVC احسن من الخشب

لو جيت تسأل حد النهاردة هتعمل المطبخ خشب ولا PVC تلاقيه رد عليك وقالك هعمله PVC طبعا، هو فكر فى الشكل الجمالى والسعر لكن معندوش فكرة عن باقى خواص المادة بالظبط.

1. لانه مصنوع من مواد تشبه البلاستيك الحراري بيتكون من ألياف خشبية مع PVC عشان كده بيسمى بلاستيك خشبى ومعمول من خامات معاد تدويرها عشان كده هو صديق للبيئة.
2. يحتوى على مواد غير عضوية تقفل مساماته الداخلية عشان كده مش بيتأثر بالحشرات والمياه عكس الكونتر اللى هو عبارة عن طبقات خشب ملزوقة بغراء.
3. اى مطبخ معروف انه مليان رطوبة وحرارة عالية، هل الخشب يتحمل الظروف دى لمدة طويلة. اكيد لا هنحتاج مادة بلاستيكية بدون مسامات تتحمل الظروف دى.
4. طبعا شكله الجمالى الرائع لانه فيه منه كمية الوان رهيبة جدا وتأثيرات كتير زى الخشب والرخام منها اللامع والمطفي يعنى مش هتحتاج تعمل دهان معين ولا ورنيش تلميع ولا تتعب نفسك.