ازاى تختار اسفنج التنجيد المناسب
  • Save

Last updated on يونيو 19th, 2023 at 05:27 م

مع الاستخدام المتكرر لطقم الانتريه فى غرفة المعيشة عندك او الركنة بتلاقى ان الكراسى والكنب اصبح مش مريح زي ما اشتريته فى الاول بسبب ان اسفنج التنجيد الموجود هبط ومبقاش زي الاول.

اختيار نوع اسفنج التنجيد الصح يعتبر مش سهل لأى شخص عادى لانه بيحتاج خبرة من المحترفين او الناس اللى شغالين فى المجال ، احنا هنا فى الموضوع ده هنعرفك ازاى تختار احسن اسفنج تنجيد يكون مريح لك ولاسرتك ويحسن من أداء الكنبة او الكرسى.

مواصفات جودة اسفنج التنجيد

الكثافة

معرفة كثافة اسفنج التنجيد من الارقام المسجلة
  • Save
Марина Демкина/stock.adobe

الكثافة ببساطة هى عبارة عن وزن كتلة اسفنج بحجم قدم مكعب ، وتعتبر هى اهم العوامل وانت بتختار اسنفج تنجيد او حتى لاى غرض تانى غير التنجيد ، ولو شرحناها بشكل مفصل اكثر هى عبارة عن مقياس الهواء الموجود داخل قطعة الاسفنج كل ما الهواء يقل جواها تزيد كثافة الاسفنج وبالتالى تزيد جودته.

وانت بتختار اسفنج التنجيد المناسب للفرش عندك لازم تشوف قوة تحمله عشان يقدر يعيش معاك اطول عمر افتراضى ، وفيه هنا بقى قاعدة عامة بتقول ان اسفنج التنجيد اللى كثافته اعلى جودته اعلى ويعيش عمر افتراضى أطول.

كل ما الكثافة بتزيد تلاقى الاسفنج أصبح أكثر مرونة يعنى طرى اكتر ، مجرد ما تقعد عليه وتقوم يرجع شكله تانى زى الاول.

عشان كده بننصح وانت بتعمل اعادة تنجيد لاى كراسى او كنب فى بيتك او حتى فى مكتبك وبالذات فى الاماكن اللى عليها ضغط كتير زى غرفة المعيشة او الريسبشن او كنب الاستقبال فى مكتبك انك تستخدم اسفنج بكثافة 2.5 او اكثر.

لو اخترت نوع زى كده وانت بتنجد الكنبة او الركنة او الكرسى تضمن انه ممكن يعيش معاك لحد 12 سنة وممكن اكتر لانه مصمم لتحمل الضغط ، ومن ضمن مميزات بعض أنواع اسفنج التنجيد اللى كثافته عالية انه مقاوم للبكتيريا.

اما لو كان عندك مخدات للظهر او كنب مفيش عليه ضغط كتير والقعدات فيه موسمية يبقى ممكن تكتفى بكثافة 1.8 ويكون كويس جدا لانك مش هتحتاج له كثافة عالية.

معامل الضغط

اختبار معامل الضغط فى الاسفنج لاختبار الصلابة
  • Save

المصطلح يبان انه علمى وغريب مش مهم لنا لكن احنا هنحاول نقوله بطريقة بسيطة عشان نعرف هو ممكن يفيدنا فى ايه ، معامل الضغط ده عبارة عن مقياس لقوة الاسفنج نفسه لما يتعمل له اختبار عشان نقدر نعرف هو صلب ولا مرن وبتبين مدى الراحة اللى فيه.

أثناء الاختبار بتتحط قطعة الاسفنج دى على طاولة وينزل عليها مكبس دائري ويضغط عليها لتحت بالتدريج لحد ما يوصل لنهايتها ويتم تسجيل القراءة دى على شاشة الجهاز.

معامل الضغط ده بيعبر عن كمية الوزن المطلوب بالرطل لضغط قطعة الاسفنج عشان توصل حوالي 25% من ارتفاعها الاصلى ويبقى فيه مسافة تحت مش مضغوطة بالكامل ويسمى المقياس ده (Indentation force deflection (IFD

طيب احنا عرفنا يعنى ايه معامل الضغط و بيتحسب ازاى ، هيفيدنا بايه واحنا بنشترى اسفنج التنجيد ، هقولك ان الخبراء وضعوا مقياس لمعرفة اذا كان الاسفنج مرن اللى هو بيسمى في لغة السوق سوفت او اذا كان صلب.

المرن بيكون اقل من 30 يعنى هتلاقى معامل IFD 30 وده بيستخدم فى الجلسات المريحة جدا لانه بيريح الجسم ، من 30-45 بيكون متوسط وده مناسب للجلوس ، من 50-75 بيكون اسفنج قوى وده ممكن للاماكن اللى فيها ضغط كتير اما لو كان معامل الضغط فوق 75 ده يعتبر قوي جدا.

ازاى تختار اسفنج التنجيد من معرفة الكثافة والضغط

احنا دلوقتى عرفنا يعنى ايه كثافة ويعنى ايه معامل الضغط ، ازاى بقى نقدر نستفيد من المعلومات دى فى اختيار الاسفنج ؟ تعالوا نشوف.

الكثافة والصلابة هما أكثر عاملين مهمين لتحديد جودة الاسفنج ، هتلاقى اى اسفنج موجود فى متجر معتمد او على الانترنت مكتوب معاه رقم الكثافة ومعامل IFD الخاص بيه ، معظم الشركات المصنعة تستخدم اربع ارقام لتحديد جودة الاسفنج طبقا لعوامل الكثافة والصلابة.

اول رقمين منهم لتحديد الكثافة والرقمين اللى فى الاخر لتحديد الصلابة عن طريق معامل IFD وكل ما زادت كثافة اسفنج التنجيد كل ما يبقى مرن اكثر ويعيش اكتر ، وعشان تعرف كثافة الاسفنج قبل ما تشتريه هتلاقى ارقام الكثافة مكتوبة مثلا 25 يبقى الاسفنج ده كثافته 2.5 ولو لقيته 30 يبقى كثافته 3.0 وهكذا.

وانسب كثافات ممكن تشتريها لتنجيد كراسى مريحة عندك تتراوح كثافتها من 1.8 -3.5 وبالنسبة لمعامل الضغط طبعا كل ما يزيد هتزيد صلابة الاسفنج وتقل الراحة فيه.

انواع اسفنج التنجيد من حيث الاستخدام

اسفنج المساحات الداخلية

اسفنج التنجيد المناسب للمساحات الداخلية
  • Save
Ivanna/stock.adobe

احسن انواع اسفنج التنجيد للاستخدام الداخلى هو اسفنج البولي يوريثين الموجود والمتداول فى السوق لسببين الاول انه بيتحمل الضغط والثاني أن له نسبة صلابة لابأس بها.

لكن يعيبه انه مينفعش يتعرض للمياه والرطوبة لأنه قبل ما يجف والمياه تتبخر منه هيعفن ويتلف تماما وعشان كده مينصحش ابدا انه يستخدم للمساحات الخارجية.

متوفر منه كثافات مختلفة تتراوح من 1.8 للمتوسط و3.5 للكثافة العالية ، وتقدر تستخدم كل واحد منهم فى الاستخدام اللى يناسبك زى ما قلنا قبل كده.

اسفنج المساحات الخارجية

لو عندك حديقة فى البيت مثلا وعايز تعمل تنجيد للكراسى الموجودة فيها او في البلكونة أو حتى برجولا فى مساحة معينة يبقى اكيد مش هينفع انك تختار لها اسفنج زى اللى بيستخدم للشغل الداخلى لانك كده هتعرضه للعوامل الخارجية زى المطر والشمس وهيتلف بسرعة.

عشان كده عملوا أنواع من الإسفنج اللى ممكن يستخدم للمساحات الخارجية وده فيه نوعين مشهورين جدا

اسفنج المسامات المفتوحة

الاسفنج بالمسامات المفتوحة للمساحات الخارجية
  • Save
ml1413/stock.adobe

ده يتميز بوجود مسامات واسعة جدا بداخله تسمح بمرور المياه والهواء بسرعة ، تتراوح كثافته من 1.8-2.2 ، يعنى لو جبت قطعة منه وصبيت فوقها مياه هتلاقى المياه نزلت من الناحية التانية بسرعة زى المصفاة وده سر نجاحه فى الظروف الخارجية أن المياه بتخرج منه مباشرة مش بتفضل جوة وتنقع.

وده يعتبر احسن انواع الاسفنج اللى تستخدم للكنب والكراسي الخارجية بسبب مواجهتها للعوامل الجوية ، ولان المياه مش بتفضل موجودة جواه وبالتالى مش هيعفن ولا هيتأثر.

اسفنج المسامات المقفولة

اسفنج المسامات المقفولة للتنجيد الخارجى
  • Save
RadVila/stock.adobe

النوع ده كثافته عالية جدا تتراوح من 3-5 عشان كده مش بيمتص المياه ولا حتى بيخليها تمر من خلاله لان مفيش له اى مسامات وعشان كده استخدموه بشكل واسع جدا فى عوامات الانقاذ والبرد اللى بيتعلموا بيه السباحة وهو ده اللى بيسمى فى لغة السوق (فوم) واسمه العلمى بولى سترين.

ومن ضمن استخداماته الكراسي والاستراحات الموجودة في القوارب واللانشات واليخوت وده هتلاحظوه كتير فى الكراسى الموجودة فى مراكب الرحلات البحرية.

زيادة الراحة فى التنجيد

زيادة الراحة فى الكرسى بكذا طبقة من الاسفنج
  • Save
Will Thomas/Alamy Stock Photo

تفتكر هيحصل ايه لو خليت كذا طبقة من الاسفنج فوق بعض ، هل ينفع ؟؟ هو مش بس ينفع دى تعتبر من أسرار المهنة ، لأن التعدد ده بيزيد كثافة التنجيد.

الصنايعى المحترف فى التنجيد بيستعمل كذا طبقة فوق بعض عشان يزيد كثافة الكرسى عن طريق استخدام كذا نوع بمعاملات صلابة مختلفة لزيادة استقرار الكرسى على المدى الطويل.

الفكرة هنا تكمن فى اسفنج قوى له معامل ضغط اعلى فى الكنبة من تحت عشان تزيد صلابتها واستخدام اسفنج اقل قوة فى الجزء العلوى من الكنبة لمزيد من الراحة.

وفى الحالة دى الاسفنج القوى الموجود تحت ده يعتبر بمثابة الشاسيه الموجود فى مرتبة السرير لانه شايل الجزء اللى فوقه ، عشان لو حصل والاسفنج اللى فوق بدأ يهبط تلاقى الاسفنج القوى اللى تحت يدعم الكنبة وتلاقى نفسك لسه مستريح.

مصادر الصور

الغلاف PRILL Mediendesign/stock.adobe

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *