تخيل لو بعد ما خلصت تشطيب شقتك عملتها بإضاءة سيئة مش هنقول بدون اضاءة لان ده مستحيل طبعا ، هيبقى شكلها عامل ازاى وقتها ، هتلاقى نفسك تعبان مش مستريح وكل شوية تتنقل من غرفة للتانية ، وده للاسف اللى بيحصل فى بيوت كتير ، عشان كده احنا جمعنا لك كل انواع الاضاءة وأشكالها وازاى تقدر تستخدمها بشكل جيد ، وتخلى ديكور بيتك روعة.
ممكن تكون عامل اثاث فى منتهى الجمال والفخامة والوان الدهان اكثر من رائعة وورق حائط جميل واكسسوارات محصلتش ، وتلاقى الاضاءة ضعيفة تدمر لك كل اللى انت عملته.
اول نقطة بتفكر فيها هى ازاى اختار نجفة شكلها يتماشى مع الديكور الموجود ، ياترى اجيبها كلاسيك بلون ذهبي او برونزى عشان تمشى مع الصالون ، ولا نجيبها بقطع كريستال كتير عشان تعمل ابهار ، ولا نجيبها بأجزاء استانلس عشان تمشى مع المكان المودرن.
للاسف مش ده اللى المفروض تبحث عنه في المقام الاول ، لازم يكون عندك خطة وتصميم لشكل الاضاءة اللى هتلبى احتياجاتك.
عشان تعمل اضاءة بيتك بشكل صحيح لازم تضيف انواع الاضاءة الثلاثة وهما عبارة عن 3 انواع ( الاضاءة الاساسية – اضاءة الوظيفة المحددة – اضاءة التمييز )
انواع الاضاءة الأساسية
احيانا تسمى الاضاءة العامة ، ودى النوع الاساسى اللى لا يمكن الاستغناء عنه نهائى ، وبتكون نوع من اتنين اما الاضاءة الطبيعية او الاضاءة الصناعية اللى بتحل محلها وقت الليل ، وهنا هنتكلم عن الاضاءة الصناعية.
الوحدات اللى بتوفر النوع ده من الاضاءة كثير منها :
النجفة او الثريا
الوحدة دى عامة الناس بتشتريها بغرض تجميل المكان اكثر منها للاضاءة ، ولكن الغرض الرئيسى هو الاضاءة مش التجميل يعنى مش لازم تجيب نجفة بمجموعة كريستالات كتير الا لو كان ده ذوقك الشخصى.
لازم تشوف اذرع النجفة اللى هتشتريها هل تكفى اضاءة المكان او لا ، وكمان تشوف عدد اللمبات الموجودة فيها ، من مميزات النجف التحكم فى الارتفاع عشان ميحصلش اى اصطدام سواء مع الاشخاص او الاشياء الموجودة تحتها.
لكن عيبها الوحيد انها غالية وده طبعا لان داخل فى تصنيعها كذا خامة بداية من المعدن المستخدم وطريقة طلاؤه والحفر الموجود وخاصة لو كانت هاند ميد او صنع يدوى ده غير الكريستال ، وعدد اللمبات ، كل دى تكاليف كتير وده اللى بيخلينا نركبها فى غرفة واحدة فى المنزل وغالبا بتكون الريسبشن او المعيشة.
اضاءة مروحة السقف
وده من انواع الاضاءة المنتشرة فى اغلب انواع مراوح السقف ، بحيث وانت جالس مع اسرتك تحت المروحة تكون الاضاءة شغالة بدل ما تستهلك اضاءة الغرفة بالكامل.
اضاءة المسطرة المتحركة Track Light
ظهر النوع ده من الاضاءة فى فترة السبعينات كشكل جديد لبعض الأغراض ، من مميزات النوع ده انه ترك مساحة فاضية على الارض لوضع وحدات اضاءة ارضية وكمان قلل من وجود الطاولات اللى كانت مخصصة للاباجورات ، وكمان فيه ميزة اساسية وهى التحكم فى اتجاهه.
التراك لايت من انواع الاضاءة اللى ممكن تركبها فى اى مكان فى بيتك ( المطبخ – المعيشة – غرفة الاولاد – الممرات وغيرها ) وطبعا ممكن تتحكم فى اتجاهها على لوحة فنية على الحيطة مثلا او على ديكور لحيطة عايز تظهره وواحد يكون على الارض.
كشافات السقف ( اشهر انواع الاضاءة )
ودى انتشرت فى فترة السبعينات وتقريبا دخلت كل البيوت وخاصة اللى كانت بتتبنى فى الفترة دى ، تسمى فى لغة السوق كشافات دفن ، لان الجزء الغاطس منها بيتم دفنه اما فى السقف المعلق او فى السقف الخرسانة نفسه.
يتكون الكشاف من الجزء المعدنى (العلبة) واللمبة نفسها ، وبيتم دفن الجزئين مع بعض داخل السقف ، وده من اشيك انواع الاضاءة اللى ممكن تركبها عندك وهو ده سبب انتشاره لحد الان ان مفيش اجزاء بارزة منه تحت السقف.
الاضاءة الارضية Torchiere
تعتبر واحدة من انواع الاضاءة المنتشرة جدا ، ترجع تسميتها بالاسم ده نسبة لكلمة Torch الفرنسية ولان طريقتها فى الاضاءة تشبه اضاءة كشاف Torch من حيث خروج الضوء من الشكل المخروطى العلوى لها.
ميزة النوع ده انه مش بيحتاج مساحة كبيرة على الأرض ويعطي اضاءة كبيرة جدا للسقف تنعكس على الغرفة كلها ، وطبعا يتوفر منه كل الاستايلات اللى تناسب اى ديكور سواء كلاسيك او مودرن او غيره.
اضاءة الحوائط الابليك ( اقدم انواع الاضاءة )
ده يعتبر اقدم نوع موجود ، وهو من الانواع اللى بيتم تركيبها على الحوائط وممكن تتحكم فيها بمفتاح مدمج بدل ما تتحكم فيها بمفتاح على الحيطة نفسها.
من مميزات النوع ده ان له استخدامات كتيرة وده طبعا على حسب نوع الغرفة او المكان الموجود فيه وكمان شدة اضاءته ، ده غير انه يختلف عن باقى الانواع زى اضاءة السقف او الاباجورات لانه مش بيشغل اى مساحة من السقف او الارضية او حتى الطاولات.
استخدامات الابليك كتير جدا ، ممكن مثلا تستخدمه فى الممرات لعمل اضاءة رائعة على اللوحات ، وممكن تستغلها فى ركن للقراءة فى غرفة المعيشة ، وممكن يستخدم كاضاءة جانبية لغرفة النوم وده يفيد جدا انك تترك الكومود فاضى لاى اغراض تانية او اذا كانت غرفة نومك ضيقة ومش مستوعبة وجود كومود بجانب السرير فيها.
بالاضافة كمان انك ممكن تستخدمه فى المدخل بحيث يعطى اضاءة على طاولة المفاتيح ، او على حوائط المدخل نفسها او اللوحات الفنية الموجودة فيها.
كتير من الناس فاهمة وظيفة الاضاءة الاساسية ، ولكن بتقف عند النوع ده ومتفكرش فى اى نوع غيره ، فى حين انه الاساس فقط ومن الضرورى انك تضيف باقى انواع الاضاءة عشان يكتمل ديكور بيتك.
انواع الاضاءة الوظيفية
من اسمها نقدر نفهم انها صممت لأداء وظائف معينة زى القراءة على مكتب او المذاكرة او تجهيز الطعام فى المطبخ او تناوله على السفرة او عمل المكياج على التسريحة ، كل دى من ضمن الوظائف اللى ممكن تؤديها بالنوع ده من الاضاءة.
لو بصينا على الوحدات اللى ممكن تستخدم لعمل الاضاءة الوظيفية هنلاقى كتير جدا منها :
الاباجورات العادية
ودى من ضمن انواع الاضاءة اللى ممكن تخدم وظيفة معينة زى القراءة مثلا ، ومش بس تعطى اضاءة لا كمان بتعمل شكل جمالى وتظهر ديكور المكان لما تخرج اضائتها من منطقة معينة فى الغرفة.
برغم ان الاباجورات من انواع الاضاءة القديمة ، الا انها يتوفر منها اشكال كتير جدا فى الاسواق منها المودرن والكلاسيك وغيرها اللى تتماشى مع اى ديكور ، ومن مميزاتها انك ممكن تخليها فى غرفة النوم على الكومود او على طاولات جانبية للكنبة فى غرفة المعيشة.
الاباجورات المكتبية
اغلب بيوتنا اللى فيها مكتب للمذاكرة او حتى لتخليص ورق الشغل او الجلوس على الكمبيوتر بيكون فيها مصادر اضاءة من السقف واحيانا ابليك على الحيطة ، ولكن من الخطأ انك تظن ان المصادر دى كفاية ، لان انواع الاضاءة دى مش مخصصة لأداء مهام القراءة والكتابة.
من الضروري انك تجيب اباجورة مكتب لأداء النوع ده من الوظائف لانها تحتاج اضاءة مركزة مش اضاءة الغرفة بشكل عام.
اضاءة علب المطبخ ( من انواع الاضاءة المبتكرة )
تخيل معايا ان مطبخك اضاءته فى السقف كافية جدا لكن لما تيجى تشوف الكاونتر الرخام تلاقى الاضاءة فيه مش كفاية وخاصة اثناء تجهيز الطعام بتكون ست البيت محتاجة اضاءة اكتر ، عشان كده ظهرت اضاءة علب المطبخ كنوع جديد من انواع الاضاءة اللى تساعد على رؤية اوضح.
من مميزات النوع ده انه سهل جدا فى التركيب وله اشكال والوان متعددة ، فيه منه اللمبات الفلورسنت وفيه منه شريط LED وفيه كمان كشافات تشبه كشافات السقف ، وبيتم تركيب اى نوع من دول اما على مصدر الكهرباء الرئيسي أو على بطاريات.
وحدات الاضاءة المتدلية
وتسمى احيانا فى السوق المعلقات ، ودى من انواع الإضاءة المبتكرة حديثا ، وظهرت فى اواخر التسعينات كتطوير لاضاءة السقف العادية ، وبيتم تركيبها من السقف بقضيب معدنى او سلسلة او احيانا 3 سلاسل لو كانت بـ 3 لمبات.
متوفر منها اشكال كتير جدا ، احيانا تلاقى لمبة واحدة واحيانا تلاقى اتنين واحيانا اكتر من كده وتصاميم بكميات ماهولة تناسب كل الاذواق ، واللى بيميز النوع ده من الاضاءة انها ممكن تتركب فى المطبخ او الممرات او فوق طاولة السفرة واحيانا فوق المكتب ، لانها من انواع الاضاءة الوظيفية يعنى المركزة بهدف معين.
اضاءة الزينة
ودى تشبه الى حد كبير الابليك ولكنه مخصص لاضاءة مرايا الحمام او التسريحة فى غرفة النوم ، وبما ان المرايا وكاونتر الحمام هما اهم نقطتين فكان لازم يبقى فيه اضاءة تركز على المنطقة دى وتظهرها.
متوفر منها فى الاسواق اشكال ومقاسات والوان كتير جدا بحيث تتناسب مع جميع اشكال الحمامات ، وهنلاحظ فى الفترة الاخيرة ظهرت بعض المرايات المدمج فيها لمبات كتير زى الموجودة فى كواليس السينما ، النوع ده من الاضاءة هو تحديث للشكل ده.
الاضاءة الارضية Lampadaire
طبعا دى من انواع الاضاءة المنتشرة جدا فى بيوت كتير ولو لاحظنا هنلاقيها تشبه الى حد كبير اضاءة Torchiere ولكن بتغيير فى الاتجاه بدل ما كانت لفوق وتنعكس من السقف لكل انحاء الغرفة دى بتكون مركزة فى اتجاه معين.
وزيها زى الاباجورات الجانبية ممكن تخليها على اى جانب من جوانب الكنبة فى غرفة المعيشة لو كنت مثلا من هواة القراءة أو الجلوس أمام الكمبيوتر الخاص بك.
اضاءة التمييز
بعض الناس تظن ان النوع ده من الاضاءة متخصص لاضفاء جو معين زى الجو الرومانسى او التحفيزى لنشاطات معينة ، لكنه فى الحقيقة أكثر من كده.
السر وراء النوع ده من الاضاءة هو اظهار بعض التفاصيل المعمارية والعناصر المهمة فى المكان ، وعشان كده سميت اضاءة التمييز لأن وظيفتها تجذب انتباهك من النقط العادية الى النقطة المهمة.
وبرغم ان دى من اهم انواع الاضاءة فى اخفاء الاخطاء والثغرات الموجودة فى الديكور ، الا انها مهملة بشكل كبير جدا فى الثلاث انواع المذكورين ، ويتوفر منها انواع كتير جدا هنذكر منها بعضها :
الاضاءة الارضية السفلية Uplight
اول حاجة كانت تخطر على بالنا لما نحب نظهر اى جزء مهم سواء كان لوحة فنية او حيطة فيها تصميم جديد ، كنا نركب عليها ابليك ، ولكن ظهرت فكرة جديدة ان الاضاءة تكون طالعة من الارضية نفسها مش من الحوائط ولا السقف ودى تعتبر فكرة مبتكرة جدا وزاوية محدش فكر فيها قبل كده.
وعشان كده هنلاحظ فى واجهات مبانى كتير المهندس المعماري او المصمم بيخلى بعض أجزاء الواجهة مضيئة من تحت مش من فوق بشكل تقليدى ، لذلك هنلاقى شكل الواجهة اصبح مختلف تماما بتغيير اتجاه الاضاءة.
اضاءة الشموع
ودى طبعا اكتر نوع مشهور جدا فى خلق اجواء رومانسية وهادية فى بعض المطاعم او الكافيهات او على طاولات السفرة فى بيوتنا.
الاضاءة الموجهة
ودى فيه منها اشكال كتير زى بعض الاسبوتات الموجهة لنقطة معينة ، وهنلاحظ واحنا بنشترى النوع ده ان فيه محور داخلى واللمبة بتلف مع اتجاه المحور ده ، وفيه كمان إضاءة مساطر Track Light موجهة لزوايا معينة ، ودى بردو تستخدم لنفس الغرض ، يعنى ممكن مثلا توجهها لحيطة معينة عندك او لوحة شكلها جميل او لمكتبة الشاشة.
اضاءة البانوهات
طبعا كلنا شفنا النوع ده من الاضاءة فى البانوهات للمدخل او الغرف ، وده بهدف اظهار المحتوى الموجود داخل المربع او الدائرة للبانوه سواء كان دهان جديد او لوحة مرسومة او ملمس مختلف بارز للحيطة.
تعتبر اضاءة البانوهات من انواع الاضاءة المميزة جدا واللى انتشرت بشكل واسع فى كل ستايلات الديكور.
من انواع الاضاءة ( المخفية )
وده من انواع الاضاءة اللى تم استحداثها فى الفترة الاخيرة واستخدمت فى اماكن كتير جدا منها المطابخ ، وهنلاحظ وجودها فى كاونتر المطبخ سواء كان رخام او خشب فى الاطار الخارجى له وفى علب التخزين من الداخل ، لذلك هنلاحظ انتشارها عند محلات بيع اكسسوارات المطبخ لأنها تخدم الغرض ده.
من ضمن استخدامات النوع ده طبعا بيت النور فى السقف لعمل جو هادى بدل استخدام الإضاءة الأساسية والمباشرة ، فلو كنت بتدور على شكل جمالى يبقى النوع ده من الاضاءة يناسبك جدا وخاصة مع توفر الوان كتير جدا منه.
دى باختصار انواع الاضاءة الموجودة ، وهنا ممكن نقولك ملاحظة ، ممكن نوع واحد منهم يؤدى كذا وظيفة ، يعنى مثلا كشافات إضاءة السقف واضاءة المسطرة Track ممكن يؤدوا وظيفة الثلاث انواع وده على حسب ما انت توجههم.
لما تيجى تضيف اضاءة التمييز لازم تسأل نفسك سؤال ، انت محتاج الجو العام لكل غرفة يكون ازاى ؟ وايه العناصر اللى تحب انك تظهرها وايه العناصر اللى تحب انك تخفيها.
وخلى دايما فى اعتبارك القطع المهمة زى لوحة فنية او كرسى شكله جميل أو حيطة فيها تجليد شكله جديد وعايز تظهره او ستارة مبتكرة او بلاطات 3D ، كل دى عوامل تخليك تختار افضل اضاءة عشان تبين ديكور بيتك.
مصادر الصور
الغلاف Olha/stock.adobe
