غرفة سفرة البيت على عكس باقى الغرف مش بتاخد اهتمام كبير لان كتير بيشوفوا انها مش مهمة بحكم انها مش بتستخدم الا وقت الطعام وعشان كده بنلاقى باقى الغرف زى النوم او الاطفال وطبعا الليفنج هما اللى بياخدوا الاهتمام الأكبر على اساس انهم اكتر الاماكن اللى العيلة بتقعد فيها.
بس على الرغم من انها مش بتستخدم الا وقت الطعام فده مش مانع خالص انك تهتم بيها زى اى مكان تانى لانك مش هتقعد فيها بس وانت بتاكل ، لا كمان هتكون مكان استقبال الضيوف وقت العزومات وكمان فى المناسبات السعيدة.
وبما أننا فى الغالب مش بنجدد غرفة سفرة بيتنا باستمرار على عكس الليفنج مثلا اللى ممكن تغيره كل فترة ، يبقى لازم تختارها بعناية ودقة وتركز فى كل تفصيلة وانت بتشترى ، لانك هتشترى مرة واحدة بس.
أسس اختيار فرش غرفة سفرة انيقة
المساحة
لازم تشوف مساحة المكان اللى هتحط فيه السفرة اد ايه ، ياترى يستوعب غرفة سفرة كاملة بكل مكوناتها ولا ترابيزة وكراسى بس ، وياترى عدد الكراسي هيكون كام ، ده بند مهم جدا هيفرق معاك وانت بتشتري عشان متشتريش حاجة كبيرة أو صغيرة ويكون شكلها مش مناسب للمكان.
يعنى مثلا لو المساحة كبيرة تقدر تشترى غرفة سفرة بـ 12 كرسى او 8 ومعاهم نيش كبير وبوفيه لو انت من محبيهم اما لو المساحة صغيرة ممكن تجيب ترابيزة دائرية او حتى مربعة بـ 4 كراسى او 6 كراسى بحد اقصى وفى الحالة دى ممكن تستغنى عن النيش او البوفيه.
ستايل المكان
طبعا ستايل البيت هيفرق جدا فى اختيار السفرة يعنى لو البيت كلاسيك هتجيب غرفة سفرة كلاسيكية بخشب مزخرف ومنقوش واكيد هتكون القطع تظهر ابداع النحت والزخرفة فى الخشب ، وطبعا بالوان هادية زى الوان الباستيل ، وكمان قماش الكراسى هيكون مزخرف او منقوش عشان يناسب ستايل المكان.
اما لو البيت مودرن هتحتاج غرفة سفرة هادية وبسيطة وبالوان جذابة زى الفيروزى او الابيض مع الخشب بدرجاته وكمان تقدر تجيب قماش الكراسى سادة او كاروه بس بلاش مشجر عشان ميعطيش ايحاء انه كلاسيكى.
طبيعة المكان
لازم نشوف معالم الغرفة كويس هل فيها شباك مساحته كبيرة او باب بلكونة فى وسط الحيطة ، لان ده هيفرق معاك فى اختيار الفرش ، يعنى لو افترضنا مثلا ان الشباك فى وسط الحيطة بالظبط يبقى مينفعش تجيب نيش كبير او بوفيه يغطى الشباك ده لان كده هتكون قفلت مصدر الاضاءة والتهوية الطبيعية.
لو مثلا عندك غرفة سفرة فيها اعمدة يبقى تخلى بالك لو هتشترى نيش أو بوفيه اما انك تبعده عن العمود او ممكن تبتكر له حل ويدخل فى وسط العمود نفسه ودى عملناها عند بعض العملاء لما كان مفيش مساحة مفتوحة لوضع النيش على الحيطة.
مكونات غرفة السفرة
الترابيزة
دى الجزء الاساسى لاى غرفة سفرة وبناء عليها يتم اختيار باقى المكونات وليها اشكال كتير
الترابيزة الدائرية
شكلها جميل وشيك وتناسب الاماكن الضيقة لان كل حاجة بتكون حواليها بس طبعا خلى بالك لازم يكون فيه مساحة مريحة للحركة.
واللى بيميز الترابيزة الدائرية انها بتعمل ألفة اكتر ما بين اللى قاعدين حواليها لان كلهم بيكونوا على نفس المسافة من بعض وشايفين بعض ومفيش حد فى المقدمة أو بيرأس الترابيزة وده على عكس الترابيزة المستطيلة او المربعة ، عشان كده هنلاحظ أن كل ترابيزات الاجتماعات مربعة أو مستطيلة ونفس القاعدة دى تنطبق على ترابيزة الأنتريه.
كمان مفيش فيها زوايا ولا ارجل من الاطراف عشان محدش يخبط فيها وبالتالى هى مريحة وأقل خطورة على الاطفال ، بس عيبها انها مش مناسبة فى المناسبات المزدحمة أو العزومات الكبيرة.
الترابيزة المستطيلة
دى تناسب الغرف الكبيرة وبتكون شيك جدا لو الغرفة ممتدة لانها بتعطى احساس اكبر بالاتساع وطبعا من اهم مميزاتها انها بتستوعب عدد كبير من الناس وكمان ممكن تخليها جمب الحيطة وده عكس الترابيزة الدائرية.
بس عيبها انها بتكون أقل ألفة ما بين الجالسين لان مش كله بنفس المسافة مع التانى ، كمان فيها خطورة على الاطفال واحيانا الكبار بسبب حوافها أو الزوايا الموجودة فيها.
الترابيزة المربعة
دى مش منتشرة كتير ولكنها مناسبة لبعض الأماكن متوسطة المساحة او على حسب ذوق صاحب المكان.
كراسى السفرة
طبعا كل غرفة سفرة بيكون لها شكل الكراسي الخاص بيها واللى بيظهر جمالها وجاذبيتها وظهر حاليا اتجاه جديد لتغيير شكل الكراسى النمطي العادى والاستعانة بالكنب أو الفوتيه كشكل مختلف فى ديكور الغرفة.
وعشان كده هنلاحظ طفرة كبيرة جدا فى تطوير شكل الكراسى حتى ان الاشكال الكلاسيكية تطورت وظهر منها اشكال مودرن.
أما بالنسبة للون القماش وشكله فده بيكون على حسب ستايل السفرة والوان المكان ، الألوان السادة والكاروهات الجديدة غالبا بتكون للمودرن ، والمشجر بيكون للكلاسيك.
البوفيه
ناس كتير بتحب تعمل غرفة سفرة وفيها بوفيه بمراية كبيرة عشان يعطي منظر جميل ومكمل للسفرة وكمان بيعمل خداع بصرى باتساع المكان بسبب وجود المراية.
النيش
لو انت من محبى النيش ومؤيديه لازم تختاره يناسب الترابيزة اللى اشتريتها وكمان حجمه يكون مناسب لمساحة المكان عشان الشكل يكون متناسق وجذاب ، يعنى مثلا مينفعش تكون غرفة السفرة عندك ضيقة وتجيب نيش عرضه 180 سم .
السجاد
اختيار السجاد اوقات كتير يمثل صعوبة عند الناس ، ياترى ازاى تختار السجادة المناسبة لغرفة السفرة.
- لازم تاخد بالك من الحجم ، لازم السجادة تغطي المساحة تحت الترابيزة بشكل كامل وكمان تخرج عنها شوية عشان وقت القعدة تكون السجادة تحت الكرسى وبالتالى يكون موزون ميبقاش رجل فوق السجادة ورجل تحتها.
- شكل الترابيزة ، يعنى لو دائرية يبقى السجادة تكون دائرية ولو مستطيلة تكون السجادة مستطيلة وهكذا عشان التناسق والترابط فى المكان.
- ستايل السفرة لو كانت كلاسيك وفيها نقوشات وزخارف كتير يفضل انك تجيب سجادة هادية بإطار خفيف على الحواف أما لو السفرة مودرن بسيطة تقدر تجيب سجادة بالوان عصرية وجذابة عشان تظهر شكل المكان.
نصائح عامة وانت بتشترى غرفة سفرة
- وانت بتختار الاثاث خلى بالك من الفراغات اللى المفروض تكون فى المكان عشان الكل يقدر يتحرك بسهولة.
- بلاش تشترى ترابيزة حادة الزوايا عشان هتكون خطر على الاطفال والكبار.
- وانت بتختار الكراسى راعى انها تكون مريحة فى القعدة وكمان قماشها يكون متناسق مع المكان.
- لو هتشترى ترابيزة مصنوعة من الخشب الطبيعى وعليها قشرة يبقى خلى بالك لان اشعة الشمس المباشرة تؤثر عليها بشكل كبير وكمان لو وقع عليها سوائل يبقى لازم تتمسح بسرعة عشان متتلفش.
- لو غرفة السفرة مفتوحة على الليفنج يبقى ده هيكون امتداد ليها وحاول تعمل تناسق ما بينهم وتختار الوان محايدة او مكملة.
- تقدر تستخدم وحدات مكملة فى المكان عشان تعطى منظر جمالى زى الشمعدان او اللوحات الفنية بالوان عصرية.
- وانت بتختار الاكسسوارات والمفارش راعى انها تناسب ستايل الترابيزة بشكل عام.
- وجود المرايات فى المكان بيعطى احساس بالاتساع وبيعمل جو جميل بسبب انعكاس الاضاءة.
مصادر الصور
الغلاف Aleksandra Zlatkovic/gettyimages
