التصنيف: الديكور الداخلى

منذ وقت قريب كان الاهتمام بالحمامات قليل فى الشكل والديكور العام لأن البعض كان يعتبره مكانا ثانويا وليس أساسى ، و لكن حاليا تغيرت الصورة كثيرا وأصبح هناك اهتمام كبير بديكور الحمام. كما أنها أصبحت مساحة لابتكار تصاميم جديدة فى شكل السيراميك وأطقم الأدوات الصحية ، وأيا كانت مساحة حمامك وتصميمه ، فلديك فرصة كبيرة لإظهاره عن طريق عناصر كثيرة منها سجاد الحمام .

قبل شراء سجاد جديد لابد أن تأخذ بعض النقاط بعين الاعتبار ، كيف تختار السجاد وما هى الخامة القوية التى تتحمل الرطوبة والمياه فى ، و الأنماط المفضلة لك من بين كل الأنواع المتوفرة.

أسس اختيار سجاد الحمام

المتانة

من المعروف أن بيئة الحمام قاسية على السجاد ، وذلك بسبب الرطوبة والمياه المستمرة التى تسقط عليه ومع مرور الوقت تتلف أنسجته وهذا يقلل من العمر الافتراضى للسجاد. ولهذا السبب ابتكرت الشركات المصنعة خامات تقاوم تلك الظروف وهى النايلون والبوليستر والبولى بروبيلين. لأن تلك الخامات مقاومة للتعفن ، بالإضافة إلى أنها ألياف صناعية لا تمتص المياه مثل الألياف الطبيعية ، وتجف بسرعة ولهذا فهى أطوال فى العمر الافتراضي وهذا أدى لانتشارها.

أيضا من العوامل التى ساعدت فى انتشار الخامات الصناعية أن تكلفة تبديلهم رخيصة. بالإضافة الى أن ألياف السجاد الصناعية أكثر خامة مناسبة لبيئة الحمام الرطبة.

أثناء اختيار السجاد تأكد من متانة الخامة ، وهذا بالنسبة لنوع المادة المصنوع منها السطح الخارجى خاصة فى مكان مثل الحمام دائما معرض لسقوط المياه على الأرض وعلى السجادة أيضا. والذى من الممكن أن يسبب انزلاقات خطيرة. لذلك راعى دائما كل احتياطات الأمان ، واختر سجادة سطحها غير قابل للانزلاق ، ولا تمتص المياه بسهولة.

المقاس

من المهم جدا أخذ المقاس فى اعتبارك مثل اختيار خامة متينة ، لابد أيضا أن يكون المقاس ملائم لمساحة الحمام ، فلا تختار سجادة مقاسها غير مناسب لمجرد أن المساحة محدودة ، لأن الاهتمام باختيار سجادة مناسبة للحمام ، لايقل عن أهمية اختيار السجاد المناسب لغرفة المعيشة.

اختيار سجادة كبيرة لحمامك يجعله يبدو صغير وضيق ، أما السجادة الصغيرة جدا ليست فقط تجعل المكان غير متجانس ، ولكنها ستبلل كل أركان الحمام وتصبح بلا فائدة ، أيضا شكل السجاد مهم فأنت غالبا لن تستخدم مشاية صغيرة فى الحمام إلا فى حالة وجود بانيو ، لانه من الضرورى فى ذلك الوقت أن تغطى تلك المساحة الفارغة بقطع من السجاد.

مقاس سجادة الحمام	استخدامها
40 × 60	امام الحوض الاستاند او بانيو القدم
50 × 85	امام البانيو
60 × 152	امام وحدة التخزين الكبيرة
70 × 115	فى منتصف الحمام

مشاية الحمام الموجودة أمام الدش أو البانيو تستخدم لكى تمنع سقوط قطرات الماء أو البقع على الأرضية ، وغالبا متوفر منها مقاسين 40×60 سم و 50×85 سم ، لم يعد سجاد الحمام لمجرد الشكل الجمالى فقط ولكن لكل مقاس وظيفته ، مثلا مقاس 60×152 سم المكان المناسب لها أمام دولاب التخزين الكبير ، فى حين ان مقاس 70×115 سم هى انسب قطعة لمنتصف الحمام.

بجانب أهمية المقاس لشكل المكان وإخراجه النهائى ، فهو يؤثر أيضا على سرعة تجفيفه من الماء. لأنه من الطبيعى كلما كانت أكبر كلما استغرقت وقت أطول فى التجفيف ، لكن العامل الأكبر فى سرعة التجفيف هو الخامة.

إذا كنت تريد الاستفادة من قوة امتصاص المشاية للماء والشكل الجمالى لها ، فاستخدم الاثنين فى حمام منزلك. فوجود السجاد سيجعله نقطة تركيز Focal point داخل الحمام ، وبالنسبة للمشاية الصغيرة يمكنك أن تجعلها على حافة البانيو أو تخفيها فى خزانة الحمام وتخرجها وقت الاستخدام.

خامات التصنيع

قبل أن تختار النوع المناسب لابد أن تعرف بعض التفاصيل عن المواد الخام المصنوعة منها. فهناك خصائص للنوع المناسب لمقاومة البيئة التى سيكون فيها. فمثلا الحمام الذى توجد به المياه بشكل أساسى أهم خاصية يجب تتوفر فيها هى المتانة و مقاومة التلف الذى تسببه المياه. لذلك توجد أنواع مختلفة من الخامات تستطيع أن تختار منها النوع الملائم لمنزلك.

القطن

عادة ما يكون السجاد فى الحمامات بسيط ويصنع من القطن أو الشانيل ، فالقطن هو الأكثر شهرة فى صناعة السجاد ، لأنه كمادة خام يحتوى على خصائص تعطيه متانة وجودة عالية ، لأن أنسجة الخامة رفيعة وتسمح بسرعة تجفيفها. بالإضافة إلى أن سمك السجادة الصغير يساهم فى سهولة التقطيع لكى تستطيع تفصيلها على شكل الحمام وتجعل كل قطعة في مكانها المناسب.

ومن مميزات السجاد المصنوع من القطن أنه متوفر بألوان مختلفة ، يمكنك اختياره بأى لون يتماشى مع الألوان الموجودة فى الحمام مثل لون السيراميك أو الخزانة. ومن المهم أن تعرف أن خامة القطن الخاصة بسجاد الحمام ستكون معرضة للتلف التدريجي ، إذا لم يتم تجفيفها من البلل أولا بأول. لذلك من الضرورى أن تعرضها للشمس والهواء بعد الغسيل لكى تجف ويكون التجفيف شامل كل أجزاءها.

الشانيل

وهى الخامة الثانية المستخدمة فى صناعة السجاد ، ويتم تصنيع هذا النوع من السجاد باستخدام مواد تشبه الاكريليك ، والرايون والبولي بروبيلين. وهي فى الأساس مواد صناعية ، ويتميز النوع المصنوع من الشانيل أنه متين جدا ، لأن خاماته لا تتلف نتيجة تعرضها للمياه باستمرار لذلك بعض الناس تفضله أكثر من القطن.

خامات بديلة

متوفر بدائل لأنواع السجاد التى ذكرناها ، فإذا كنت تفضل المواد الطبيعية و الشكل الحديث فى نفس الوقت ،فمن الأفضل أن تتجه لسجاد البامبو. حيث يستخدم هذا النوع على نطاق واسع ومع مرور الوقت أثبت أنه ممتاز كسجاد للحمام. لكن يفضل عدم استخدامه فى وجود أشخاص لديهم أقدام ضعيفة ، لأن أقدامهم لن تتحمل صلابته.

وهناك سجاد بديل رغم أنه ليس مصنوع خصيصا للحمام ، إلا أنه يناسبه جدا إذا تم الاعتناء به مثل الكليم الكتان وهو من أفضل البدائل التى يمكنك استخدامها فى منزلك. متوفر منه أنواع مختلفة المنشأ مثل الصيني والإيراني والتركى والهندى. واختيارك لأى نوع منهم يرجع للمنشأ الذى تفضله ، فهو يشبه القطن من حيث التجفيف ويتميز بخاصية التجفيف السريع ، وهذه هى الخاصية التى تعمل على زيادة المتانة الخاصة به.

نصائح عامة عند اختيار سجاد الحمام

قبل أن تختار الخامة لابد أن تفكر فى طريقة تنظيفها المناسبة. لذلك قامت الشركات المصنعة بعمل السجاد بحيث تستطيع غسله فى الغسالة الاتوماتيكية بدون مشاكل. وقبل أن تقوم بعملية الغسيل لأى سجادة لابد أن تقرأ تعليمات الغسيل ، لكى تتأكد من طريقة الغسيل الصحيحة.

اختر السجاد ذو الوجهين المصنوع من القطن أو من النايلون الطارد للرطوبة ، لأن هذه الخامات متينة وعمرها الافتراضى طويل. ويمكنك اختيار خامة المايكروفايبر إذا كنت تريد أن تظل السجادة محتفظة برونقها لفترة طويلة ، لأن المايكروفايبر خامة غير قابلة للانكماش بسهولة لذلك يستخدم فى صناعة المخدات.

أثناء اختيارك لسجاد الحمام تأكد أن الأصباغ ثابتة وليست من النوع الضعيف الذى يتأثر بالمياه بسهولة. لأنك إذا أهملت تلك النقطة ستلاحظ بعد فترة تلطيخ السيراميك بلون الصبغة ، مع مراعاة اختيار سمك السجادة المناسب لأنه كلما زادت سماكة السجادة كلما احتاجت رعاية أكثر.

طراز سجاد الحمام

اختلفت طرازات السجاد فى الحمام مع مرور الزمن فنجد تصاميمها تشبه تصاميم سجاد أى غرفة فى المنزل. وسواء كنت تفضل أن حمام منزلك يشبه حمامات الفنادق الفاخرة فى الشكل ، أو يحتوى على تصميم مرتبط بثقافتك وذوقك الشخصى ، ستجد السجاد الذى يناسب احتياجاتك.

لما ارتفعت أهمية ديكور الحمامات بدأ الاهتمام بالسجاد فى الحمام. و أصبح هناك الكثير من السجاد متوفر بألياف صناعية مضادة للمياه بأشكال وألوان كثيرة ، لذلك أنت لست مضطر أن تخصص للحمام مشاية بلون معين وتختار غطاء للمرحاض مطابق لها. كل ما عليك فعله فى اختيار اللون هو أن تطلع على الأشكال المتوفرة وتقرر ما هى الألوان التى تتماشى مع شكل السيراميك.

يمكنك اختيار السجاد الايرانى ذو الزخارف المعقدة فهو يضيف للمكان أناقة ومظهر جمالى بحكم أنه يشمل ألوان متعددة ويتماشى مع الحمام الكلاسيكى. أما سجاد الأشكال الهندسية البسيطة المموه برتوش ألوان جريئة يتماشى مع الحمامات العصرية.

فى كثير من الأوقات يتوفر لك فرص لكى تغير ديكور حمامك للأفضل. تبدأ هذه الفرص بخطوات يتغاضى عنها كثير من الناس منها اختيار السجادة المناسبة رغم أنها الخطوة الأولى لتحويل حمامك من حمام تقليدى إلى حمام أنيق.

البعض ينظر للمكتبة فى المنزل وكأنها من الكماليات ، لكنها فى الواقع من الفرش المهم ، وكمان تصنيعها مش مكلف ، لأنك ببساطة ممكن تعمل مكتبة منزلك بأى ميزانية متوفرة معك ، وكل اللى هتحتاجه عشان يكون عندك المكتبة المنزلية وشكلها قيم ، غرفة فاضية وبعض الفرش اللى هتختاره بعناية من سوق الاثاث المستعمل ، وكمان أعداد كبيرة من الكتب الجيدة عشان تستمتع بقرائتها.

اختيار الكتب فى المكتبة المنزلية

وجود الكتب هو أهم عنصر فى المكتبة ، ولو أنت مش من محبى القراءة ، يبقى مفيش داعى لاستغلال غرفة بأكملها ، عشان تعمل فيها مكتبة منزلية خاصة ، أما لو كنت من عشاق القراءة ، وعندك مجلدات وكتب كافية وتقدر تملىء بها رفوف كاملة ، وكمان هتشترى كتب أخرى ، فجهز مكتبة مناسبة ، تقدر تستخدمها وقت ما تحب ، ده بدل ما تزور المكتبات العامة ، أو تنزل الكتب الالكترونية.

اماكن الكتب

تجميع الكتب مش معناه أنك تنفق من أموالك الكثير ، فأنت مش فى حاجة للطبعات الأولى ، عشان تملأ بها الرفوف ، وكمان مفيش داعى لشراء الاصدارات الاخيرة بأسعار التجزئة.

تقدر تشتري الكتب من سوق السلع المستعملة ، و ساحات البيع العامة ، وسوق بيع التحف ، و سوق مبيعات العقارات القديمة ، وأسواق بيع السلع بثمن مخفض.

هتلاقى فى سوق السلع المستعملة باعة متخصصين فى بيع الكتب سواء كانت جديدة أو قديمة ، وأسعار الكتب فى ساحة البيع هتكون أفضل ، وممكن تلاقى أكوام من الكتب بتتباع هناك بأقل الأسعار ، وفى متاجر التوفير فى بعض المولات التجارية فيه أقسام مخصصة للكتب بس ، وتقدر تتصفح عناوينها عشان تختار منها.

اختيار نوعية الكتب في المكتبة المنزلية

لا تخلو المكتبة المنزلية من الكتب المفضلة لأصحاب البيت ، ولو بتشترى مجموعة من مجلدات الكتب الجديدة ، فاختار اللى ناوى تقرأها، ومش مجرد كتب تملىء بها رفوف المكتبة بس ، ومتخترش كتب عشان تناسق أو روعة غلافهم الخارجى فقط ، بدون ما تعرف محتوياتها من الداخل.

ويستحسن أنك تختار الكتب اللى بتحب القراءة فيها مرارا وتكرار أو اللى هتستخدمها للأبحاث ، ولو كنت مجرد جامع للكتب ، حاول التركيز على اختيار الكتب الكلاسيكية ، أو الكتب الموسوعية اللى بتركز على حقبة معينة أنت تهتم بالقراءة عنها أو تنتمي لمجال تخصصك.

أما لو اشتريت كتب لها غلاف جلدى شيك ، لكن أنت مش مهتم بمحتوياتها ، فتقدر تحطها كديكور تجمل به المكتبة ، فعليا ممكن أنك تستخدم الكتب فى الديكور ، زى أنك تحطها بطريقة مميزة على ترابيزة الزينة ، أو ترصها على أرضية الغرفة بطريقة مميزة.

تخزين الكتب فى المكتبة المنزلية

تقدر تعمل المكتبة المنزلية built-in مدمجة فى الحائط ، وتخصص لها قسم معين بحيث يكون شكل المكان جميل ، ولكن مش هينفع تحط مكتبة built-in لو كنت مستأجر البيت ، أو فى حال أن ميزانيتك قليلة ، فى الحالة دى عندك وسيلة من 3 لتخزين الكتب.

علب تخزين الكتب المستعملة

شراء علب تخزين جاهزة هو أمر مش مكلف ماديا ، لكن مع الوقت العلب دى هتهبط نتيجة تقل الكتب عليها ، لأنها مصنوعة من خامات ضعيفة زى الكونتر الحبيبى ، والبديل هو أنك تروح سوق المستعمل و تشترى مجموعة من علب تخزين الكتب المصنوعة من خشب قوى ، وكمان تقدر تدهنها وده يعطيها شكل أجمل.

لازم تكون مدرك أن ارتفاعات واستايلات علب تخزين الكتب المستعملة مش هتكون متطابقة ، وكمان أنت مش هتلاقى علب تخزين تنفع تتعمل مكتبة منزلية من أول يوم تسوق ، لكن هتبحث عنها شوية.

علب تخزين بديلة للكتب

عندك اختيار تانى وهو استعمال علب تخزين بديلة للكتب ، زى استخدام مجموعة من الصناديق الخشب كمكتبة ، بعد ما تثبتها فى بعضها و تثبتها فى الحائط ، وتقدر كمان تستخدم علب التخزين الكلاسيكية ذات الأبواب الزجاجية ، عشان تعملها مكتبة للكتب الكلاسيكية ذات الأغلفة الجلدية و كتب الأطفال المصورة.

الرفوف المعدنية فى المكتبة المنزلية

لو بتدور على رفوف معدنية لتخزين الكتب فى المكتبة المنزلية ، يفضل أن الرفوف تكون بعمق صغير بمقاس 30 -38 سم ، لان بعض أنواع الرفوف المعدنية عميقة جدا ، وبالتالى مش هتكون مكتبة عملية.

تزويد مكتبة الحائط برفوف تخزين متعددة هيخلى المنظر جذاب ، خاصة لو كنت بتحب الديكور الصناعى أو الانتقالى ، لأن الرفوف مفتوحة على الجانبين ، وهتحتاج لاستخدام مساند كتب فى كل جهة منها ، و ده هيظبط ترتيب الكتب وراء بعض.

اختيار اسطح مناسبة للقراءة

عشان تزيد من رونق وجمال المكتبة المنزلية ممكن تكملها بمكتب أو ركن للدراسة والمذاكرة ، حتى لو كنت مش بتشتغل فى البيت إلا نادرا ، لأن وضع مكتب في غرفة المكتبة يمنحك مكان تكتب فيه الخطابات ، و تحط الكمبيوتر الخاص بك فيه.

المكتب

اختيار المكتب يرجع لذوقك ،ممكن تختار مكتب خشبي عتيق ، فيه العديد من الأدراج ، أو ممكن تختار مكتب معدنى مستعمل من النوع الكلاسيكى ، أو تختار ترابيزة مركونة عندك من زمن ، وتستفيد منها كمكتب لك في غرفة المكتبة المنزلية .

قبل ما تشترى المكتب المستعمل لازم تتأكد أنه سليم ومتين ، وتقدر تجدد القطع اللى تعرضت للتلف فيه ، وتختار له الدهان المناسب عشان يعطيه منظر جذاب.

الترابيزة

لو أنت مش محتاج أدراج كتير ، ومش عايز تختار مكتب حجمه كبير ، عشان ميبقاش المكان ضيق ، فاشترى ترابيزة مدورة أو مستطيلة بخامة متينة ، عشان تكون بديل للمكتب ، خاصة لو كنت بتحب تشتغل على سطح واسع ، ونفسك تستغله صح فى عملك.

أما لو كانت الغرفة مساحتها واسعة كفاية ، ممكن تستخدم ترابيزة قديمة ، أو تشترى ترابيزة مستعملة ، خاصة لو ناوى تستخدم غرفة المكتبة فى الدراسة أو البحث.

كلما كان سطح الترابيزة واسع ، كل ما عرفت ترتب أوراقك وتجمع كتبك اللى بتستخدمها عليه ، ولو رتبت الكراسي حول الترابيزة بترتيب وتنسيق ، وكان عندك لسه مساحة واسعة ، ممكن تستخدمها فى استضافة أصدقاء الدراسة ، أو أعضاء نادى الكتب اللى مشارك معهم.

اماكن الجلوس في المكتبة المنزلية

بعد ما تختار المكتب أو الترابيزة المناسبة ، لازم تختار مقاعد شكلها جميل وتكون مريحة ، عشان تعمل بها جلسة مناسبة للغرفة كلها ، لأنك مش هتستريح في القراءة طالما طريقة جلوسك مش مريحة.

لو كنت مخلى غرفة المكتبة مكان خاص بك ، حط كرسى مريح (فوتيه) مع كنبة استرخاء عشان راحة قدمك ، ولو بتفكر تشارك المكان مع حد تانى ، يفضل أنك تضيف كرسى آخر ، او اختار كنبة واسعة ودى هتكفى الغرض.

بالاضافة لوجود الكنبة هتحتاج كمان لكرسى أو أكتر للمكتب أو للترابيزة ، وفى إمكانك تختار اما الكراسي العتيقة الدوارة ، أو كرسى واحد من كراسى غرفة السفرة.

قبل ما تقرر تشتري اختار القطع المناسبة لجسمك و الديكور الموجود ، وتقدر تغير فى المقاعد الموجودة وتجدد فيها ، بدون ما تشترى جديد ، ده لو كان الهيكل سليم ومش متآكل ، وكمان حالة التنجيد كويسة ، مجرد بس أنك هتعيد استخدام بقايا الحشو بتاعها ، أو تستخدم أقمشة بسعر معقول فى إعادة تنجيدها ، لأن إعادة تنجيد الكراسى بيكون تجديد بسيط مش مكلف.

إضاءة المكتبة المنزلية

الاضاءة مهمة فى كل الغرف ، والأهمية بتزيد فى الغرفة اللى تحتوى على المكتبة المنزلية ، عشان القراءة فى اضاءة خافتة أو مستواها ضعيف مؤذية جدا للعين.

الإضاءة الأساسية

لو السقف عندك متأسس عشان يتحمل التجهيزات الكهربائية الثقيلة ، فركز على تركيب النجف ، ولو السقف عادى ممكن تستعين بالكشافات العادية ، وكمان ركب مفتاح ديمر للتحكم فى شدة الضوء.

الإضاءة الوظيفية

متستخدمش إضاءة السقف فى القراءة والدراسة ، ويفضل انك تستخدم لمبادير أو اباجورة ترابيزة لكل كرسى فى الغرفة ، وتأكد من اختيار ارتفاع اللمبادير ، بحيث الضوء مركز على صفحات الكتاب عشان تكون القراءة مريحة ، وبالنسبة لاضاءة المكتب ، ضرورى يكون فيه أباجورة مكتبية.

إضاءة التمييز

من مميزات إضاءة التمييز أنها بتعمل أجواء ممتعة فى غرفة المكتبة المنزلية ، وتقدر تحط إضاءات ارضية Uplight فى الأركان أو وراء التماثيل والتحف المعمارية ، وتنور علب تخزين الكتب الخاصة بك ، بأنك تركب إضاءات على سقف الرفوف العلوية للخزنة ، أو تركب شريط LED بحيث يكون شامل محيط علب التخزين ، كل الإضاءات دى هتعمل أجواء خاصة ، وكمان هتساعدك على قراءة عناوين الكتب ، ولو حبيت تعلق عمل فنى فى المكتبة ، فلازم تركز عليه الضوء باستخدام الابليك.

دهانات حوائط المكتبة المنزلية

عشان تشعر فى غرفة المكتبة المنزلية بالسكون والراحة ، وقبل ما تدهن حوائطها ، تأكد من اختيار الدهانات المناسبة ، وتجنب استخدام الألوان الزاهية والبراقة اللى لها تأثير قوى على العين ، زى اللون الأصفر البراق ، واللون البرتقالي الساطع ، ولون الفوشيه الغامق ، واللون الأخضر الليمونى ، عشان هتخلي عندك نشاط عالى ، ومش هتكون مستعد للقراءة.

ممكن تستخدم درجات ألوان أغمق عشان يكون الشكل أنيق ، وده باختيار ألوان زى البرتقالى الغامق ، أو الأخضر الزيتوني ، او البني.

معظم الألوان المحايدة تعطي أجواء مريحة للأماكن المعزولة زى غرفة المكتبة المنزلية ، خاصة لو كانت ألوان محايدة هادئة زى الرمادى ، ولازم تتدرج ما بين الدرجات المتوسطة والغامقة.

أما عن دمج الألوان مع بعض فاختار من الألوان المحببة لك ، ويفضل أن درجاتهم تكون فاتحة مش غامقة ، وكمثال للألوان المناسبة ، عندك البنى والذهبى ، والرمادى الفاتح ، فالألوان الفاتحة على وجه الخصوص تتماشى مع غرفة المكتبة.

اللون الأبيض النقى هيليق بمساحة الغرفة ، ولو اخترته كلون للحوائط ، فلازم تزود عليه بعض الألوان الغامقة ، ولو قررت تلزق ورق حائط للجدران ، فتجنب اختيار الورق اللى فيه رسم باحجام كبيرة او صور اشخاص لأنها هتشتت انتباهك ، وبدلا منهم اختار ورق باشكال خفيفة ونقوشات هادية ، ولازم ألوانهم تكون لايقة على بقية الحوائط.

ستائر الشبابيك

اختيار ستائر للشبابيك يعتمد على الشبابيك نفسها ، والوقت اللى بتقضيه داخل المكان ، وعشان تكون مرتاح فى الجلوس ، اختار الستائر اللى تؤدى افضل وظيفة فى النهار والليل.

الغرفة أثناء الليل

عشان تكون غرفة المكتبة الخاصة بك مريحة أثناء الليل ، اختار ستائر تصل للأرضية ، أو الستائر المبطنة لمزيد من الخصوصية ، وبدل من شراء ستائر جديدة مكلفة ، اختار ستارة قديمة عندك ، وركبها على شبابيك الغرفة ، وبعد التركيب عليك أنك تتأكد أن القماش بتاعتها بيتفتح ويتقفل ، باستخدام اكسسوارات الربط والتعليق ، عشان تسمح لضوء النهار بالدخول.

ضوء النهار

لو هيبقى ضوء النهار مشكلة بالنسبة لك أثناء جلوسك على الكمبيوتر مثلا وانعكس الضوء على الشاشة ، ممكن تستخدم مرشح ضوئي ، تحت ستارة الشباك بخامة شفافة ، ويكون مصمم عشان تفتحه أو تقفله وقت ما تحب.

هل سألت نفسك قبل كده ايه هى ستايلات الديكور الموجودة ؟ كلنا لحظة اختيار ديكور الشقة بنقول مودرن ولا كلاسيك لكن فى الحقيقة فيه ستايلات تانية كتيرة جدا ، زى مثلا النمطي والانتقالي هل تعرف الفرق بينهم ؟ ممكن تكون محتاج تغير ستايل الديكور فى بيتك لكنك مش هتعرف بالتحديد هتعمل ايه ، عشان كده هنتعرف فى موضوعنا عن كل ستايلات الديكور الموجودة وايه المناسب لنا.

ستايل الديكور الانتقالي Transitional

تعالوا نبدأ بواحد من اشهر ستايلات التصميم فى العصر الحالى وهو النمط الانتقالى ، وهو اللى نقدر نقول عليه خير الامور الوسط ، وده مناسب بالنسبة لك فى حالة ان النمط التقليدى بالنسبة لك زحمة ومتعب ، ولكن الديكور العصرى مش مريح.

هنا يجى دور النمط الانتقالي وهو عبارة عن مزيج متكامل بين فخامة الاستايل الكلاسيكى ولكن بخطوط والوان عصرية وجديدة ، ومن هنا سمى باسم انتقالى لانه بينقل من الكلاسيك للمودرن.

من ملامح النمط ده انه بيقلل الاكسسوارات الى الحد الادنى ، واللي من ضمنها المخدات على الارض والسجادة ، وتقدر تستخدم الربط فيه بين الأثاث والأقمشة والمفروشات.

يعتبر السر وراء جمال النمط الانتقالى فى الديكور هو المزج بين القديم والحديث ، لذلك هنلاقى من علامات الاستايل ده الفرش المنحنى بخامات مختلفة وجديدة زى الخشب بلونه الطبيعى والبامبو والاستانلس ستيل ، ده لان المزج بين نمطين مختلفين عن بعض يعطى جو من الاثارة والاختلاف.

ستايل الديكور التقليدي Traditional

ستايل الديكور التقليدي يعتبر واحد من أشهر الأنماط الموجودة فى عالم الديكور واقدمها تاريخيا لأنه ظهر فى فترة القرن 18 و 19 فى انجلترا وفرنسا ، ومن أشهر ملامحه استخدام الخشب في الأثاث بألوان غامقة ، ومحفور عليه كمية من النقوش والزخارف كدليل على الفخامة.

وده يوضح سبب تكلفته العالية ، بالاضافة الى انه يستخدم فيه أقمشة غالية زى الحرير والكتان والقطيفه (المخمل) فى كل مكان من اول الكراسى والكنب لحد الستائر ، وهنلاحظ ان الاقمشة موجودة بألوان ونقوشات كثيرة.

من ملامح الفخامة فى النمط الانتقالى وجود نجف للاضاءة بكمية كبيرة من الكريستال ، ومن الملاحظ ايضا فى الاستايل التقليدى اختيار الألوان المحايدة دائما مع اظهار الجمال فى بعض الحوائط بلوحة فنية مرسومة بالزيت أو تنسيق من الزهور.

يتميز الاستايل التقليدي بوجود تناسق بين الاثاث وبعضه فى الالوان والاقمشة ودى من اشهر ملامحه ، لذلك لو كنت مش النوع اللى يحب التناسق فى ألوان الفرش مع بعضها يبقى الاستايل ده مش هيكون مناسب بالنسبة لك.

ستايل الديكور المودرن او الحديث Modern

طبعا ده اول نمط بيجي فى بالنا اول ما نفكر نعمل البيت مودرن ولا كلاسيك ، وعشان تعرف ايه هو المودرن لازم الاول نفرق بين المودرن والعصرى صحيح ان فيه بينهم تشابهات كثير ، لكن المودرن له علامات مميزة جدا.

المودرن يدل على فترة زمنية محددة لكن العصرى متطور عبر الزمن ، ظهر الاستايل المودرن فى الفترة الوسطى من القرن العشرين ، وكان مزيج ما بين الاسكندنافى والحديث فى منتصف القرن وما بعد الحديث ، كل المزيج ده أخرج لنا مفهوم المودرن الموجود النهاردة.

ومن أهم ملامح ستايل الديكور المودرن الاثاث بخطوط ناعمة وسطح أملس ، وهنلاحظ انتشار الأثاث المعدنى زى الاستانلس وغيره مع وجود الزجاج ، ومن مميزات الاستايل المودرن البساطة والهدوء ، عشان كده هنلاقيه بسيط بدون زحمة ولا حاجات ملهاش قيمة ، مع استخدام الفن كعنصر اساسى من عناصر الديكور.

من ضمن ما يميز الاستايل المودرن الاثاث والفرش بالوان محايدة وهادية مع وجود بعض القطع بألوان مميزة ظاهرة لكسر حدة الألوان المحايدة.

ستايل الديكور العصري Contemporary

لو بصينا على كل ستايلات الديكور الموجود عبر العصور هنلاقى ان ستايل الديكور العصرى هو الوحيد اللى بيتطور عبر الزمن ، ومن اهم صفاته انه اقتبس من كل الفترات الزمنية صفات وملامح وكون بها استايل اصبح مناسب للعصر الموجود حاليا ، وهيتغير عبر تقدم العصور.

من ملامح الاستايل العصري انه بسيط ويتميز بالنعومة ، وله بعض الخصائص المميزة زى الحلايا فى الحوائط المكونة للبانوهات ، وحلايا على الشبابيك ، وهنلاحظ أن مساحة البيت مفتوحة لعمل مظهر مختلف عن الشكل التقليدى.

فى الاثاث والفرش هنلاحظ الأرجل ظاهرة بخطوط واضحة وده يعطى احساس بدخول الضوء والتهوية من اسفل قطع الفرش ، وكمان من الملاحظ انك هتلاقى استخدام المعادن والزجاج بكثرة ، ده لان لهم خصائص انعكاس وانكسار الضوء ودى من ملامح الديكور العصرى.

وبكده يعتبر الاستايل العصرى مزيج بين انماط كثيرة ، بالاضافة لذلك هنلاقى الألوان المحايدة مسيطرة على اغلب الاجزاء سواء فى الحوائط او الاثاث او بعض الاكسسوارات ، مع وجود بعض الاقمشة الملونة بالوان زاهية ورسومات لعمل تميز فى الشكل ، وبالتالى يصبح النمط العصري مثالى لأغلب البيوت.

ستايل الديكور الاختزالى Minimalist

كلمة الاختزال Minimalist ظهرت فى الستينات وكانت تطلق على اعمال النحات روبرت موريس ، ومعناها البساطة الشديدة وبعد ذلك تم اطلاقها على مسميات فى مجالات مختلفة زى الازياء والعمارة والديكور ، لذلك هنلاحظ فى الاستايل ده مفيش اى زحمة ولا عناصر غير ضرورية.

لذلك فيه تشابه كبير بينه وبين ستايل الديكور العصرى فى صفات كثير ، الاثنين تكوينهم بسيط غير معقد وخطوطهم واضحة جدا ، والفنش او المظهر النهائى بسيط مفيش اى تأثيرات غريبة فى الدهان مثلا.

ظهر ستايل الديكور الاختزالى فى اليابان وكان تركيزه الأساسي على معيار مهم وهو “القليل كثير” Less is more وده نابع من فكر اهمية سهولة الحركة داخل المكان ، يعنى ميكونش فيه زحمة ولا فرش كثير ، مع الأسف فى بعض بلادنا العربية ناس بتفرش شقتها لدرجة انها مش بتقدر تتحرك داخلها وده خطأ كبير.

من أهم ملامحه هي الألوان المحايدة وخصوصا الأبيض للحوائط والسقف ، واستخدام بعض الألوان الأساسية كلون تمييزى ، كمان هنلاحظ عدم وجود نقشات لونية Pattern لأنها جذابة للعين.

لأن مبدأ “القليل كثير” هو الأساس في ظهور الاستايل ده ، فبالتالى هنلاحظ ان الاثاث الوظيفى هو أهم عنصر في ستايل الديكور الاختزالي ، عشان توفير المساحة ، وده مهم جدا.

لذلك نلاحظ مثلا فى الاستايل ده من الديكور وجود ترابيزة تحتها مساحة تخزين أو سرير بميكانيزم يخرج من الحيطة ويرجع تانى لمكانه الاصلي بعد استخدامه ، او ترابيزة الانتريه المتحولة لطاولة طعام.

ستايل الديكور المودرن فى وسط القرن Mid century modern

ظهر الاستايل ده فى الديكور فى فترة الخمسينات والستينات من القرن الحالى ، فى الفترة دى حاول المهندسين والمصممين اختراق قواعد وقوالب التصميم التقليدية المعهودة منذ فترة طويلة ، وبدأوا فى التفكير فى أشكال تناسب العصر الحديث ، ومن من اهم الاسباب اللى ادت لانتشار ستايل الديكور Mid century هى الطفرة الكبيرة اللى حدثت للنمط ده من التصميم
وهناك قطع أثاث وفرش من عصر وسط القرن العشرين مستخدمة فى بيوتنا لحد الان ، زى مثلا بعض الكراسى المميزة بوجود مداد اضافى للارجل ، او الكرسى على شكل بيضة ، او كرسى بظهر خشب يشبه العمود الفقري.

ستايل الديكور Mid century هتلاقيه مريح وسلس يعنى مش قطع مجتمعة مع بعضها ، ودائما تلاحظ انه بيدعم المعيشة داخل فراغ البيت وخارجه ، وعشان كده هنلاقى من أهم مواصفات الاستايل ده وجود الابواب الجرار (السحاب) والشبابيك المطلة على المناظر الطبيعية لإضفاء جو من الاتصال مع الطبيعة الخارجية.

من الخامات المستخدمة باستمرار فى الفرش الأخشاب الفخمة زى التيك والجوز وخشب الورد ، بالاضافة الى الوان الاصفر والاخضر الزيتوني كالوان مبهجة لكسر حدة الألوان المحايدة.

ستايل الديكور العشوائي أو ما يعرف باسم البوهيمي Bohemian

فى ظل كثرة انماط وستايلات الديكور المختلفة يحاول ستايل الديكور العشوائى كسب المزيد من الشعبية والانتشار ، لان فئات كثير حاليا دخلوا بقوة فى الاستايل ده من التصميم وده افضل وقت لاكتشاف الجوانب العشوائية فى ذوقك او الفنية كما يطلقها البعض.

باختصار ستايل الديكور البوهيمى هو عبارة عن نمط انتقائى جمع أذواق من مختلف الثقافات والأفكار والفنون بدون اى قيود أو قواعد تنظمها ، وانتج نمط جديد تماما خارج الصندوق ، ومن هنا أطلق عليه اسم عشوائى.

لما نتكلم عن تصميم بيت بستايل بوهيمى هتلاقى نفسك دخلت فى ثقافة مختلفة ، قطع الزينة معلقة في أماكن كثير وهتحس انك بقيت عايش حياة بدوية لان ملامح الطبيعة محيطة بك ، عشان كده لما نيجى نقارن ستايلات الديكور ببعض هنلاقى ان الاستايل البوهيمي ممكن نستخدمه لو أن الترتيب بالنسبة لنا غير ضرورى.

ومن ملامحه المميزة انك تلاقى نقوشات باشكال مختلفة عن بعضها وبحجم رسومات كبيرة ، وحاليا بدأ يظهر للنمط ده تطوير فى بعض أشكاله زى اضافة اكسسوارات معدنية وأخشاب فخمة وجلود الحيوانات كتطوير للشكل المعتاد ، وده يفضل اذا كنت من محبى التجديد والشكل الغير تقليدى يبقى الشكل ده مناسب لك.

ستايل المزرعة Farmhouse

قائمة ستايلات وانماط الديكور كبيرة جدا وكان لابد من ذكر الاستايل ده رغم انه مش منتشر فى بلادنا العربية ، ومن أهم ملامح الاستايل ده انه مقتبس من عناصر كثير فى الطبيعة ، زى الأخشاب بخامتها الطبيعية والنباتات الخضراء الموجودة في كل غرفة.

اشتهر نمط المزرعة بتنوع المعادن فيه زى الذهبى والنيكل والحديد المطلي بالأسود ، لأن التباين هو أشهر سماته ، مع الاحتفاظ بالالوان المحايدة كصفة رئيسية فيه ، ولو فكرت تدخل لون جديد للمكان تكسر به حدة الألوان المحايدة يبقى لازم تقتبسه من الطبيعة.

من الملامح المميزة للنمط ده ان البيت يكون مفتوح بعدد أقل فى الحوائط ، مع وجود الأبواب السحاب بكثرة مع الأرضيات الخشبية بمساحات كبيرة ، واضاءة خفيفة مش مكثفة.

ستايل الديكور التراثي Shabby chic

نشأ الاستايل التراثى فى القرن 18 واستمر لحد ما وصل للشكل الموجود عليه حاليا ، ومن أهم ملامحه الرئيسية الانتيكات فى الاثاث والقطع التراثية.

وده نتج من خلال توارث قطع الأثاث من الاباء الى الابناء لحد ما توارثها الأجيال وكل جيل وضع بصمته عليها لذلك تجد اختلاف فى الاستايل ده من بلد لاخرى ، على حسب ثقافة كل بلد.

مثلا فى فرنسا نلاحظ وجود الألوان الباهتة فى النقوشات على الاقمشة واللى هتكون متناسقة تماما مع الحوائط والجدران البيضاء ، وبالتالى لما وجد مصممين الديكور الالوان دى عملوا نوع من التباين ودخلوا النجف بالكريستال فى النمط ده لاضافة جو من الاختلاف.

ستايل ساحلي Coastal

مش معنى كلمة ساحلى انك مضطر تعيش على البحر عشان تعمل ديكور بيتك بالنمط ده ، المفهوم مش قاصر على مجموعة ديكورات بحرية لكن له معنى تانى.

ستايل الديكور الساحلى له علامات مميزة من الطبيعة الموجودة فيه ، وده نقدر نلاحظه من الخامات المستخدمة فى الفرش والاكسسوارات ، هنلاحظ وجود الألوان المحايدة زى الابيض والبيج لمحاكاة الرمال ، وبعض القطع الزرقاء لمحاكاة شكل الأمواج ، وهكذا.

من أهم الصفات المميزة للاستايل الساحلى عدم وجود فرق بين الداخل والخارج ، لذلك هنلاقى الالوان فاتحة ومبهجة وده يعتبر شرط من شروطه ، وعشان كده الستائر الموجودة خفيفة جدا مكونة من طبقة رقيقة من القماش ، عشان تتحرك بمجرد مرور الهواء عليها.

مش شرط انك تلاقى قواقع واصداف بحرية منتشرة فى زوايا الغرفة ، ولكن ممكن تلاقى فازة بلون ازرق ، او ورق حائط مخطط ، او رسومات تعكس الإحساس بالبيئة الساحلية داخل المكان.

لما نيجى نتكلم على الاثاث والفرش فى ستايل الديكور الساحلى هنلاقيه من اكثر الانواع راحة ، لأن الأصل في الجلوس على الشاطىء هو الاسترخاء ، لذلك هتلاقى ان معظم الفرش مصنوع من البامبو وخيوط الكتان وتنجيده مريح جدا لزيادة احساسك بالراحة.

ولان الاتصال بالطبيعة مهم جدا فى النمط الساحلى للديكور فكان لابد من وجود النباتات الخضراء فى كل غرف البيت.

ستايل الديكور الريفي Rustic

لما نشوف ستايل الديكور الريفي نقدر نعرفه بعلامات بسيطة ، زى الخامات الطبيعية و بعض اللمسات اليدوية فى التصنيع وشكل يشبه ستايل المزرعة ، أهم صفة مميزة لاستايل الديكور الريفي هى الطبيعة المجردة ، يعنى بعيدة عن التدخلات البشرية.

وهنا نلاحظ استخدام جلود الحيوانات فى الارضية زى السجاد ، والاخشاب بطبيعتها ، وممكن تلاقى الباب مقطوع من جذع الشجرة مباشرة بدون اى اضافات ، وكمان وجود الفرو على الكنب والكراسى ، ورؤوس بعض الحيوانات كنوع من الاكسسوار.

ولكسر حدة المكان اللى كله من الطبيعة بالكامل يتم اضافة وحدات اضاءة متدلية مصنوع من المعادن والزجاج.

ستايل الديكور الصناعي Industrial

نشأ النمط الصناعى فى الديكور فى الفترة اللى كانت فيها غرب أوروبا أغلقت مصانعها بعد نهاية الثورة الصناعية الثانية ، وتركت كمية كبيرة جدا من المصانع مقفولة ، فى الوقت ده حصل زيادة سكانية وده اللى خلى الناس تحول المصانع المقفولة الى مناطق سكنية ، لذلك أطلق عليه لقب النمط الصناعى.

من أهم ملامحه مواسير تغذية المياه و مواسير تأسيسات الكهرباء وأنابيب تغذية التكييف تكون ظاهرة للعين مش مخفية بسقف معلق او مدفونة ، وجود بعض الحوائط بقوالب الطوب زى ما هى او بالاسمنت الخرسانى بدون اى دهان ، لذلك مش هتشوف اى اسطح ناعمة او قطع اثاث هادية.

ملامحه الخشنة والقوية جدا هتخليك تشوف فيه ملمس خشن زى الحجر وفروقاته الواسعة والخرسانة فى الاسقف مع وجود اللوحات الفنية الكبيرة والاقمسة بنقوشات بسيطة ، ودايما هتلاقى قطع الاثاث مش مدهونة بالكامل ومعاها قطع انتيكات تراثية ، لاظهار ملامح القوة فى باقى المكان.

ستايل الديكور الكلاسيكي Classic

نشأ الاستايل الكلاسيكى فى فرنسا فى القرن 17 وانتشر بسرعة جدا فى اوروبا كلها لحد ما سيطر على اغلب دول المنطقة وكان وقتها الفنانين ملهمين بالفن الإيطالي واليوناني ، وبسبب انتشاره فى بلاد كثير ، فكل بلد وضعت بصمتها الخاصة فيه.

من أهم ملامحه الكرانيش فى السقف والأعمدة بحلايا أو نقوش ، وتحديد الابواب والشبابيك بخطوط واضحة ، و الدفايات الرخام ، وهنلاحظ أن أغلب قطع الأثاث تميل للشكل المربع.

من الملاحظ بردو انك هتلاقى الزخارف الكلاسيكية والإطار اليونانى المربع بعض الناس تسميه “فرزاتشى” ، والاعمدة بطولها الكامل او نصف طولها ، ودائما هتجد سيمترية فى التصاميم الكلاسيك وده يعتبر من ملامحه الرئيسية.

كمان من صفاته المميزة ان أعمدته مصنوعة من الرخام ودائما هتلاقى دهان السقف بلون ابيض مطعم بالوان ذهبى او فضى او نحاسى ، واستخدام الألوان المحايدة في باقي الغرفة ، وكمان هنلاحظ استخدام ورق الحائط برسومات تقليدية ونمطية.

من صفات ستايل الديكور الكلاسيكى واللى تعتبر من عيوبه انه مكلف جدا يعتبر اغلى ستايل فى تنفيذه من حيث الحلايات الموجودة في السقف والكرانيش وزخرفة الاثاث والانتيكات ، بالاضافة الى ان الفنش والدهان مكلف لأنه الوان كثير منها الأبيض والذهبى او النحاسى ، وده غير ان كل الاثاث والاكسسوارات صنع يدوى (هاند ميد).

ستايل الديكور الاسكندنافى Scandinavian

من اسهل وابسط أنماط الديكور الموجودة وتقدر تتعرف عليه بسرعة ، هتلاقى دائما خشب البلوط بألوانه الفاتحة وألوان الحوائط والسقف دائما بيضاء لاعطاء مزيد من الاسترخاء والهدوء ، والمرايا الكبيرة والاقمشة متعددة الطبقات بالوان ونقوشات هادئة ، كمان هنلاقى قطع فرش من الزجاج ، و هدوء ملمس الحوائط لإضفاء جو هادى على المكان.

ستايل Art deco

نشأ الاستايل ده فى فرنسا فى أوائل القرن العشرين وبعدها وصل للولايات المتحدة فى الأربعينات ، وكان للثورة الصناعية تأثير كبير جدا فى الفترة دى على أنماط الحياة لذلك نجد انتشار المعادن فى الاستايل ده ، وهتلاقى تصنيعها دائما بحواف مدببة و زوايا خشنة ، كما نلاحظ أن قطع الأثاث كبيرة جدا عن الحجم الطبيعى.

ستايل اسيوي Asian zen

كلنا سمعنا عن الفينج شوى (علم طاقة المكان) وظهر له متخصصين شغالين فيه ، ولو بحثت بدقة شوية هتلاقى ان فلسفة فينج شوى موجودة فى كل ستايلات الديكور فى بيوتنا ، ومن ملامحها الخطوط الناعمة والاشكال المميزة والجو العام المريح ، والعودة للطبيعة من أهم سمات ستايل الديكور الآسيوي.

بردو من الصفات المميزة للنمط الاسيوى استخدام الدوائر اكثر من المربعات مع عدم السيمترية فى التصميم ، مع وجود عزل فى الابواب والحوائط للاحتفاظ بدرجة كبيرة من الخصوصية ، أما بالنسبة للالوان فكلها مستوحاة من الطبيعة مباشرة لإضفاء جو من الهدوء.

ستايل أندلسي Andalusian

وده من الأنماط اللى بدأت تنتشر في بلادنا العربية فى الفترة الاخيرة بكثرة ، وده راجع لأن منشأ الاستايل الاندلسى هو بلاد المغرب وبعدها انتشر فى الاندلس (اسبانيا حاليا) وعاد بقوة فى الفترة الاخيرة للبيوت وبعض المطاعم والمحلات التجارية.

من اهم صفاته المميزة وجود نقوشات وزخارف على الخشب ، او ما تسمى مشربية ودى تضفي تأثير رائع عند دخول الضوء من وراءها الى داخل المنزل مع مراعاة وجود زجاج أو مادة شبه شفافة فى الخارج لتقليل شدة الاضاءة الطبيعية.

وطبعا اهم صفة مميزة فى ستايل الديكور الاندلسى هى الأشكال المستوحاة من الثقافة الإسلامية وهى القوس أو الارج على شكل محراب المسجد بزاوية من المنتصف ، وده نلاحظه منتشر فى كل التصاميم الأندلسية ، كما نلاحظ وجود الإضاءة المتدلية من السقف من الوحدات ذات التصميم التراثي.

وفى الاسقف هنجد بعض الناس او مصممين الديكور يضعوا قبة منقوش عليها بعض الزخارف مع الاضاءة المخفية او قطع الزجاج المرسومة بالوان مبهجة ، وهنا ننصح محبين الطراز الاندلسى بتخفيف كم التفاصيل وقت تنفيذ النمط ده لانه هيكون متعب ومرهق للعين لو تم تنفيذه فى مكان ضيق ، وده شىء غير محبب.

المطبخ هو من اهم الاماكن فى البيت ، عشان بتعمل فيه طعام اولادك المفضل ، وكمان اسرتك كلها بتتجمع فيه لتناول وجبة العشاء ، وسواء كان المطبخ واسع أو ضيق ، فهو مكان بتقضى فيه وقت طويل جدا ، تخيل معايا لو شفاط المطبخ مش موجود ، مع الوقت هيكون متعب جدا ومش هتقدر تتحمله لعدم خروج الروائح غير المرغوبة منه ، زى الدخان و وجزيئات الطعام الدقيقة.

لو مفيش شفاط فوق البوتاجاز فى بيتك ، فالبيت كله هيكون معرض لتراكم الروائح والدخان وخصوصا لو كان المطبخ مفتوح ، وده يسبب لك ولأسرتك مشاكل صحية في المستقبل ، عشان كده ظهرت أنواع كثيرة من الشفاطات متوفرة بالسوق ، تقدر تختار من بينهم شفاط المطبخ المناسب لك ، ويعتمد اختيارك للشفاط على حجم المطبخ ، و موقعه ، ومنطقة الطبخ اللى بتبقى شاملة البوتاجاز وطريقة الطهي نفسها.

انواع شفاط المطبخ

الفكرة الاساسية لشفاط المطبخ هى اخراج البخار والدخان و جزئيات وروائح الطعام المختلفة من مطبخك ، فى وقت الطبخ وبعده ، ده عشان يكون دايما نظيف ورائحته جميلة ، وحاليا اختيار الشفاط المناسب لمطبخك يرجع لعوامل مختلفة زى حجمه والمادة الخام المصنوع منها وكمان مكان تركيبه.

شفاط المطبخ تحت علب التخزين

النوع ده صغير ومساحته محددة ، يعنى مخصص لبوتاجاز المطبخ فقط ، ويتركب تحت العلب العلوية مباشرة ، بحيث يكون فوق البوتاجاز تماما ، عشان يطرد مباشرة كل الدخان والروائح اللى بتخرج من الطعام ، مصنع خصيصا عشان ينسجم مع علب تخزين المطبخ ، ويفضل انك تركب الشفاط فى نفس وقت تركيب علب التخزين عشان ميحصلش اى إهدار للمساحة عندك.

ده يعتبر النوع المنتشر فى البيوت الأمريكية ويوجد منه نوعين ، نوع مزود بمدخنة ونوع بدون المدخنة ، النوع الأول منه يقوم بسحب الروائح ودخان الطهى عبر المدخنة ويتخلص منهم خارج البيت.

أما النوع الثاني الغير مزود بمدخنة فهو لا يتخلص من الدخان غير المرغوب ولا الملوثات ، لكنه يقوم بتنقية الهواء الملوث ده وبيرجعه نظيف للمطبخ تانى.

مميزات شفاط المطبخ المزود بمدخنة

شفاط المطبخ المزود بمدخنة مناسب جدا للمطابخ الكبيرة ، واللى بيكون فيها طهى مستمر ، فمثلا لو كنت بتحب الطهى أو عندك عزومات بصفة مستمرة ، هينتج عندك كمية من الابخرة والزيوت ، والشفاط ده هيساعدك فى تنظيف مطبخك بفاعلية كبيرة.

لأنه يتخلص من الابخرة والزيوت الموجودة فى المطبخ ، ويطردهم خارج البيت ، ومن مميزاته أنه يعمل بهدوء وكفاءة عن بقية أنواع الشفاطات الأخرى.

عيوب الشفاط المزود بمدخنة

من عيوبه أنه محتاج لأنبوب عشان يصرف الدخان والروائح ، ولو كان بيتك مش متوفر فيه أنبوب من أيام بنائه ، فأنت مش هتقدر تستخدم النوع ده من الشفاطات فى مطبخك ، او هتكون مضطر انك تكسر له فى تأسيسات الحيطة عشان تمدد المدخنة.

مميزات شفاط المطبخ الغير مزود بمدخنة

شفاط المطبخ الغير مزود بمدخنة مريح جدا فى التركيب ، ومتعدد الجوانب والاستعمالات ، وكمان اكتر متانة ، وممكن تركبه فى أى مكان فى المطبخ ، لأنه زى باقى الأجهزة مش محتاج يتركب له مدخنة ولا فتحة تهوية.

يناسب أكثر للمطابخ متوسطة الحجم ، اللى بيكون فيها معدل الطهى معتدل مش عالي ولا منخفض جدا ، ووظيفته أنه ياخد الهواء المعبأ بالروائح غير المرغوبة والمليء بجزيئات الطعام وينقيه وينظفه ، وبعد كده ينشر نفس الهواء ده فى المطبخ تانى.

عيوب الشفاط غير المزود بمدخنة

من اكبر عيوبه أنه لا يتخلص من الهواء والابخرة تماما ، وبالتالى مطبخك هيكون رطب ، خاصة لو مفيش عندك شبابيك ، بالاضافة لذلك أنواع الشفاطات دى صوتها عالى وتحتاج للتنظيف المستمر ، وكمان الفلاتر الخاصة بها هتحتاج أنك تغيرها من وقت للتانى لان الزيوت هتسبب انسداد الفلتر ودى تكلفة إضافية.

شفاط المطبخ الحائطى

شفاطات الحائط لا يمكن تركيبها فى الكاونتر الرخام سواء على محيط المطبخ او فى الوسط ، لأن النوع ده من شفاط المطبخ كبير الحجم إلى حد ما ، وبياخد مساحة كاملة فوق بوتاجاز الطهى ، عشان كده شفاط الحائط بيتركب أعلى البوتاجاز بدل ما يتركب فى علب التخزين نفسها.

متوفر بمدخنة خاصة وظيفتها خروج الهواء والأبخرة والزيوت وطردها للخارج ، ويتم توصيل المدخنة بالحائط الخارجى حيث يتم اخراج الغازات والزيوت ، و بالتالى يحتفظ المطبخ بنقاء ونظافة الهواء فيه.

مميزات شفاطات الحائط

شفاط المطبخ اللى من النوع ده له مميزات ، وأولها أن حجمه الكبير يساعد على تنظيف مطبخك تماما من الابخرة والغازات ، وبالتالى مش هتلاقى مطبخك رطب ولا مبلل ، ومش هتلاقى أى دخان أو روائح عالقة ، حتى لو مفيش عندك شبابيك كافية فى المطبخ.

العيوب

تركيب شفاط حائط فى مطبخ صغير ، هيقلل من عدد علب التخزين اللى هتركبها ، ولو ركبت شفاط فوق البوتاجاز ، فمش هتقدر تركب علب تخزين فى المنطقة دى لانه احتل المساحة ، كمان ضرورى أنه يكون متصل بحائط خارجى فى بيتك سواء على شارع او منور داخلى ، ولو البوتاجاز مش قريب من حائط خارجى ، هتبقى مضطر انك تمشى بالمدخنة مسافة كبيرة لحد الحائط وده مع الوقت يقلل من كفاءته.

شفاط ايلاند او جزيرة

لو ناوى تخلى البوتاجاز فوق كاونتر المطبخ فى المنتصف او مايسمى جزيرة ، يبقى لازم تركب له شفاط فوقه مباشرة ، يعنى ميكونش متركب على أى حائط ، النوع ده يشبه شفاط الحائط فى تصميمه ، فيما عدا أنه بيتعلق من السقف ، بحيث يكون فوق سطح البوتاجاز ، ويؤدى نفس الوظيفة.

المميزات

لو عندك مطبخ واسع ، وفيه كاونتر فى المنتصف متركب فوقها بوتاجاز مسطح ، فالشفاط المناسب فى الحالة دى هو شفاط ايلاند (الجزيرة) ، لأنه هيعطى شكل مميز لمطبخك.

العيوب

اول عيب انه غالى الثمن ، بالاضافة الى أنه يحتاج للتوصيل بفتحات تهوية فى السقف ، والأمر ده مش ممكن تنفيذه فى كل الأحوال ، إلا إذا كان بيتك جديد وبتخطط لوضع كاونتر فى المنتصف وفوقه بوتاجاز الطبخ الخاص بك ،فلازم فى البداية تخطط لتركيب فتحات التهوية أثناء بناء المنزل مش بعد كده.

شفاط المطبخ السفلى

النوع ده من الشفاطات مش منتشر بكثرة فى المطابخ فى بلادنا العربية ، لكنك تقدر تشترى واحد من هذه النوعية بجانب الشفاط الرئيسى لأنه فعال جدا ، النوع ده من شفاط المطبخ يتم تركيبه داخل علبة التخزين السفلية ، وتقدر تستدعيه وقت احتياجك أثناء الطهي بالضغط على الزرار.

ووقت ما تخلص استخدامك يتم تخزينه فى العلبة الارضية من الداخل مرة اخرى ، لانه مخبأ تحت الكاونتر الرخام ومش بيكون ظاهر فى الأوقات العادية ، باعتباره جزء من مكونات البوتجاز نفسه مش جهاز مستقل.

المميزات

شفاط التهوية السفلى مناسب جدا للمطابخ الصغيرة ، واللى مساحتها لا تحتمل وجود شفاط منفصل ، لأن الشفاط من النوع المخبئ داخل البوتاجاز ، وبالتالى مش هتحتاج لأى مساحة إضافية سواء على الحائط أو على علب التخزين.

العيوب

لو الشفاط اتكسر أو حصل عطل فيه ، فى اغلب الاوقات هتضطر تغير البوتاجاز كله ، باعتبار ان الشفاط جزء من البوتجاز ، ودى طبعا تكلفة اضافية مش هتقدر ميزانيتك تتحملها دائما.

شفاطات المراوح

طبعا ده النوع اللى اغلبنا متعود عليه ، وده بسبب كفاءته العالية ، لذلك بعض الناس بدل ما تركب شفاط بمدخنة ، ممكن تثبت فى الحائط مروحة شفط عادية ، لأنها بتكون محكمة فى تركيبها وكمان مريحة فى الاستخدام ، و تحتاج بس لمصدر كهرباء عشان تشتغل.

تقدر تركبه فى أى مكان فى مطبخك ، مش بس قريب من البوتاجاز ، ولا محتاج منك تجهيزات معينة فى الأرض أو الحوائط عشان المدخنة ، بالعكس هو بسيط جدا يمكن تثبيته على الحائط ، أو تركيبه فوق شباك ، عشان يطرد كل الابخرة والغازات خارج بيتك.

المميزات

تركيب شفاط المروحة مش محتاج إلى استعدادات مسبقة فى مطبخك ، يعنى لو مفيش عندك نظام تهوية ، ممكن أنك تركب شفاط المروحة فى وقت لاحق ، عشان يغير من الهواء داخل المطبخ.

العيوب

هذا النوع من الشفاطات احيانا بتكون فعاليته تجاه دخان الطهي ضعيفة نوعا ما ، وأثناء استخدامه فى مطبخك ، هتظهر مشكلة الشحوم والزيوت اللى على الحوائط ، والرطوبة اللى بتبقى فى هواء المطبخ ، عشان كده كثير من الناس لجأت لكذا نوع شفاط مع بعض زى الهرمى الاستانلس مع المروحة.

علب المطبخ المصنوعة حسب الطلب بتتعمل على حسب المقاس اللى انت عايزه ، أما لو قررت تشترى علب تخزين جاهزة ، فقدامك نوعين اما العلب المجمعة مسبقا ، أو اللى جاهزة للتجميع ، وفى الحالة دى هتختار مقاسات علب المطبخ من الأبعاد المعروفة Standard واللى تقريبا كل الشركات المصنعة تتبعها أثناء التصنيع.

العلب الأرضية أو علب الحوائط أو العلب الطولية الموجودة فى أحد جوانب المطبخ لهم مقاسات ثابتة خاصة بهم ، مثلا لما تيجى تختار مقاسات علب المطبخ الارضية ، افتكر أنها بتكون من ارضية المطبخ نفسه ولحد آخر نقطة فيها ، ومش متضمنة سمك الكاونتر الرخام اللى هيكون فوق العلب.

مقاسات علب المطبخ الأرضية

العلب الأرضية أساس تصميم أى مطبخ ، ويتم تركيبها على الارضية مباشرة ، وفوقها الكاونتر ، وتضم بداخلها تركيب الحوض ، وغسالة الاطباق والملابس ، والبوتجاز ، وتخزين الاوانى وأوعية الطهي.

وعشان كده هنلاقى ان العلب الأرضية اغلى نوع فى جميع تقفيلات المطبخ بالكامل ، لأن مساحة التخزين فيها اكبر من العلب العلوية ، وعشان كده بنطلب منها كمية أكبر فى التصنيع.

مقاسات علب المطبخ الارضية ، سواء كانت جاهزة للتجميع ، أو علب مجمعة مسبقا متوفرة كالتالى :

بيان المقاس	المقاس
الارتفاع بدون الكاونتر الرخام	87 سم
الارتفاع بالكاونتر الرخام	يتراوح من 89 – 91 سم
العمق بدون الكاونتر الرخام	60 سم
العمق مع وجود الكاونتر الرخام	يتراوح من 63 – 65 سم
العرض الافتراضى	غير مرتبط بمقاس معين ولكنه حسب الحاجة

مقاسات علب المطبخ الأرضية – الارتفاع

ارتفاع علب المطبخ الأرضية هو المقاس الوحيد الاقل تغيير ، وده بالمقارنة بغيره من مقاسات علب المطبخ ، وكلها بتيجى من المصنع بطول 87 سم ، وده طبقا لقوانين البناء المتبعة والمشتقة من دراسة الإنسان Ergonomics ، واى تغيير فيه يؤدى لصعوبة الوصول لبعض مكوناتها.

وفى الوقت اللى نحتاج فيه ارتفاعات مختلفة عن كده ، زى مثلا مستخدمي الكرسى المتحرك ، فيبقى من الضروري انها تتصنع بمقاسات مخصصة للغرض ده.

وبعد اضافة الكاونتر ، ارتفاع معظم العلب الارضية يتراوح مابين 89 – 91 سم ، والارتفاع ده بيتعمد على الخامة المصنوع منها الكاونتر ، فشركة Dupont الامريكية تسمح بتركيب 1.3 سم من الكوريان مباشرة على الشاسيه الداعم له ، وده بدون الطبقة التحتية الواصلة ، ولو زودت الطبقة التحتية ممكن يزيد الارتفاع 1.3 غير سمك الكاونتر نفسه.

وزى ما الخبراء دائما ينصحوا ان الكاونتر لازم يكون مناسب للمستخدم بناء على الاحتياجات الشخصية له ، واللى بتختلف من بيت للتانى ، أوقات مقاسات الكاونتر ينخفض إلى 81 سم ، وأوقات يصل ارتفاعه إلى 96 سم ، وكل ده يتم مراعاته أثناء التصنيع.

عمق العلب الأرضية

قياس عمق العلب الارضية بيتاخد من الحافة الخارجية لها لحد ما توصل للحائط ، وعامة عمق العلب بيكون 60 سم ، والعمق ده مش متضمن بروز الكاونتر الرخام اللى بنشوفه عشان يحجز المياه ، ولكن ده المقاس الافتراضى ، لانها لو زادت عن كده هتبقى العلب عميقة وده يصعب عليك الوصول لاخر العلبة من الداخل ، أو توصيل الاجهزة بالكهرباء.

ولو لقيت صعوبة أنك توصل للأشياء فى النقطة العمياء وهى نقطة تلاقى علبتين تخزين فى زاوية قائمة ، هتعرف وقتها أن العمق اللى بيزيد عن 60 سم أصعب اكتر فى مقاسات علب المطبخ.

وبما ان الكاونتر بيتركب فوق العلب الارضية ، لذلك يزيد العمق الاجمالى عن 60 سم ويصبح من 63 – 65 سم شامل الكاونتر مع العلب ، ويعتمد المقاس ده على تفصيل الحافة نفسها.

عرض علب المطبخ الأرضية

ده يعتبر هو البعد الوحيد اللى مش ثابت ولا له اى قاعدة ودائما متغير ، ويتم تحديد عرض كل علبة بناء على وظيفتها و احتياجات الشخص المستخدم لها ، والمحتوى اللى هيتم تخزينه بداخلها.

مقاسات علب المطبخ العلوية

علب الحائط تستخدم لتخزين الطعام وأدوات المطبخ الخفيفة ، وبتتعلق بالمسامير مباشرة فى الحائط ، وممكن تعلق العلب الحائطية فوق الكاونتر الموجود فى منتصف المطبخ فى السقف مباشرة ، وبعض الناس بتركبه فى السقف المعلق وده طبعا فى حالة ان السقف من الخشب مش اى خامة تانية.

النوع ده من العلب هى اكتر علب مرئية فى المطبخ ، وممكن تظهر وكأنها قطعة فنية ، حتى أن بعض الناس حاليا اتجهت لعمل العلب السفلية بشكل عادى ، واهتمت بالعلب العلوية وجعلتها قطعة ديكور بالزجاج والرسم او الطباعة واحيانا الاضاءة داخل العلبة نفسها.

بيان المقاس	المقاس
ارتفاع علب الحوائط	تبدأ من 30 – 105 سم
عمق العلب	تتراوح من 30 – 60 سم
عرض العلب	بدون قاعدة ثابتة ولكن الذي يحدده هو استخدامك

مقاسات علب المطبخ العلوية – الارتفاع

ارتفاع علب الحائط محدد بسبب وجودها بين الكاونتر والسقف عشان كده لازم تكون فى وضع مناسب ، لذلك هنلاقى ان الارتفاع الافتراضى للعلب 75 سم عشان يكون فيه مسافة بينها وبين السقف واحيانا يصل الى 90 سم وده طبعا بخلاف الاطار أو الكورنيشة اللى بتكون فوق العلب.

لو كان ارتفاع 75 سم قليل بالنسبة لاحتياجاتك ممكن تزود حجم العلب وتوصله الى 120 سم وساعتها هيكون ملامس للسقف.

عمق العلب العلوية

اقصى عمق لعلب الحائط هو 60 سم ، وده عشان متكونش اكبر من عمق العلب الارضية ، لكن المقاس الافتراضى المتعارف عليه للعمق هو 30 سم ، عشان تقدر تستفيد من الفراغ اللى على الكاونتر وتخليه منطقة عمل جيدة بالنسبة لك.

لو كنت هتخزن المايكرويف فوق الكاونتر الرخام مباشرة إذا كان استخدامه متكرر بالنسبة لك ، ممكن تزود عمق العلب العلوية من 40 -45 سم على حسب عمق الجهاز عشان يكون مغطى تحتها ، وبالنسبة للعلبة الموجودة فوق الثلاجة هتاخد نفس عمق الثلاجة وفى الغالب بتكون 60 سم.

عرض العلب العلوية

عرض علب الحائط ملوش اى قاعدة ثابتة ولكن تقدر تحدده بناء على احتياجاتك فى تخزين الاطعمة او بعض الاكسسوارات زى مصفاة الاطباق (الرشاقة) او غيرها.

مقاسات علب المطبخ الطولية

كثير من المطابخ تحتوى على الاقل على علبة واحدة طولية وعادة بكون موجودة بجانب الثلاجة لتخزين اغراض كثير او اكسسوارات مهمة زى التروللى الاستانلس ، وممكن تتصنع بابعاد مختلفة توصل لملامسة السقف مباشرة ، ولكن لا يفضل انك تعمل كده.

بيان المقاس	المقاس
ارتفاع علب المطبخ الطولية	تتراوح ما بين 215 – 245 سم
عمق العلب	30 او 60 سم
عرض العلب	30 او 60 او 90 سم

ارتفاع علب التخزين الطولية

يتوفر ارتفاع علب المطبخ الطولية ما بين 215 او 245 سم واحيانا تصل للسقف لو كان مطبخك سقفه منخفض ولكن طبعا لا يفضل انك توصلها للسقف ، عشان يكون فيه مساحة للتهوية فوق العلبة ، وتعطيك فرصة لعمل اطار كورنيش على محيط العلب العلوية.

عمق علب التخزين الطولية

علب التخزين الطولية متوفرة عادة بعمق 30 سم أو 60 سم ، العلب اللى عمقها 30 سم تستخدم للمعلبات ، أما العلب اللى عمقها 60 سم فتكون مفيدة لتخزين المكانس وأدوات المسح والتنظيف والاجهزة ، وممكن تضيف لها اكسسوار استانلس متحرك زى التروللى لسهولة الوصول لمحتوياته بمجرد فتحه تخرج المحتويات كلها وتختار اللى بتبحث عنه.

عرض علب المطبخ الطولية

مقاسات علب المطبخ الطولية متوفر منها 3 مقاسات 30 و 60 و 90 سم.

علب تخزين طولية بعرض 30 سم :

هى علب تخزين ضيقة تستخدم لتخزين مأكولات ومعلبات ، و على الرغم من مساحتها الضيقة إلا أنها تحتفظ بكميات طعام أكبر مما تتخيل ، وخصوصا لو كانت مجهزة باكسسوارات التخزين زى التروللى ، و من ناحية تانية صغر حجمها يساعدها على التخزين فى الأماكن الصغيرة.

علب تخزين طولية بعرض 60 سم :

هى اختيار جيد تناسب معظم البيوت لتخزين كافة الاغراض زى ادوات التنظيف وبعض الاجهزة الكبيرة.

علب تخزين طولية بعرض 90 سم :

لو كنت من هواة اكسسوارات التخزين الاستانلس سواء تعمل على جرار او سحاب لسهولة الوصول لمحتوياته ، او بتحب التخزين فى أبواب العلب من الداخل ، يبقى المقاس ده هو الأنسب بالنسبة لك.

كاونتر المطبخ حلم لكل شخص اشترى شقة أو منزل جديد ويبحث عن الاختلاف والتميز فى مطبخه. إذا كانت مساحة مطبخك متسعة بشكل كافى ، فسيصبح وجود الكاونتر فكرة رائعة. أما إذا كان المطبخ ضيقا لايفضل ان تقوم بعمل الكاونتر لأن فى هذه الحالة سيصبح استخدام المطبخ مرهق للغاية وستكون الحركة أصعب بكثير.

وهذا خطأ يقع فيه كثير من الناس وهو عدم تصميم المطبخ من البداية على أساس صحيح. لذلك سنجد أنه من الممكن أن يكون الكاونتر أكبر من حجمه الطبيعى. وهذا يؤدى إلى صعوبة الحركة داخل المطبخ. بخلاف أن المطبخ سيبدو ضيقا لأن الكاونتر سيطر على معظم المساحة.

وقد يكون اختيار مكان البوتجاز المسطح Built-in خطأ. أو تم تجاهل الشفاط او مراوح التهوية ، أو تأسيسات السباكة كانت غير دقيقة. أو أماكن توصيل الكهرباء ليست فى أماكنها الصحيحة لتناسب الاستخدام.

ولكى نتفادى كل هذه الأخطاء تعالوا لنعرف كيف نقوم بعمل الكاونتر ونختار مقاساته بشكل دقيق. بحيث لا يحدث تعارض بينه وبين الخدمات الموجودة معه.

حجم كاونتر المطبخ

حجم كاونتر المطبخ فى الوضع الاعتيادى لا يزيد عن 10% من مساحة أرضية مطبخك. وأى زيادة عن تلك النسبة تجعله يستحوذ على المساحة ويكون هناك صعوبة فى الحركة.

فمثلا إذا كانت المساحة الكلية لمطبخك 3 متر × 4 متر (12 متر مربع). و مساحة الكاونتر الخاص به 1.2 متر × 2.1 متر حوالى (2.6 متر مربع). هنا ستكون مساحة الكاونتر كبيرة جدا أكثر من 20 % من مساحة الأرضية. وفى هذه الحالة لابد أن تنخفض مساحته إلى 1.1 متر مربع. وذلك لتحقيق سهولة الحركة فى المكان. أى يصبح طوله 120 سم ، وعرضه 90 سم.

ولكى تعرف حجم الكاونتر الذى يناسب مطبخك. هناك تجربة بسيطة يمكنك إجراؤها ، وهى أن تأتى بطاولة وتجعلها مكان فراغ الكاونتر وتتركها لمدة أيام. ثم الصق عليها قطعة ورق كرتون أكبر من الطاولة لكى يزيد حجمها أمامك. وبذلك تكون قد نفذت نموذج لمحاكاة كاونتر المطبخ وهو موجود فعليا.

ولضمان أن المحاكاة صحيحة 100% ممكن أن ترفع الطاولة قليلا. لأن الكاونتر أعلى من الطاولة. ولكى تتأكد بنفسك من وجود مساحة كافية لوضع الوجبات عليه إذا تم تركيبه وتشطيبه بالرخام مثلا.

وضع موقد على سطح كاونتر المطبخ

يفضل أغلب الناس وجود موقد مسطح فوق سطح كاونتر المطبخ. لأنه يساعد على إنجاز العمل المطلوب. أيضا يعد وسيلة تواصل اجتماعى بين الشخص الموجود داخل المطبخ والموجودين فى منطقة المعيشة إذا كان المطبخ مفتوح. أو إذا كان هناك كراسى للجلوس حول الكاونتر.

بعض الناس تعتبر أن الموقد فى وسط المطبخ وتحديدا فى منطقة الكاونتر ليس أساسيا بالنسبة لهم. وأن الموقد الأساسى هو الموجود على محيط المطبخ نفسه مع علب التخزين. ويمكن اعتباره للوجبات الخفيفة أو عند وجود تجمع لكل أفراد العائلة لتناول الطعام.

ولتوفير الأمان بنسبة كبيرة سواء كان الموقد فى كاونتر المطبخ يعمل بالكهرباء أو الغاز أو حتى الفرن. لابد أن تكون تمديدات الكهرباء أو الغاز بعيدة تماما عن منطقة المرور لتجنب حدوث أى اصطدام بها. وبما أن أرضيات كل منازلنا وأسقفها من الخرسانة المسلحة. فمن الأفضل أن يتم دفن قنوات توصيل الكهرباء بداخلها. لكن اجعل تمديدات الغاز ظاهرة على السطح لسرعة معالجة أى تسريب إذا حدث.

شفاط البوتاجاز أعلى كاونتر المطبخ

بالطبع لايوجد موقد يمكنه الاستغناء عن وجود شفاط لأن روائح الطبخ والزيت تنتشر انتشار كبير جدا. وإذا فكرت فى شراء جهاز حساس للدخان فلن يكون كافيا لهذا الغرض. بخلاف أنه سيطلق صوت الإنذار مرات متعددة وهذا بالطبع ليس مطلوب لأنه من البديهى انبعاث أبخرة من الموقد أثناء الطهى.

الحل الامثل فى تلك الحالة تركيب شفاط أعلى الموقد مباشرة لسحب الروائح والأبخرة لأعلى او لأسفل ومنها إلى المدخنة الخارجية إذا كانت موجودة. أو إلى الفلاتر إذا كان بفلاتر مدمجة. وهنا لن تحتاج لتركيب شفاط المروحة على الحائط لأن هذا يقوم بدوره.

شفاط يمتص الروائح لأعلى

تركيب شفاط بمدخنة أعلى موقد الكاونتر أصبح ضرورة وخاصة فى المطابخ العصرية. وذلك لسحب الأبخرة لأعلى وبعد ذلك يتم طردها خارج المنزل. وهذا بالطبع أفضل الحلول بالنسبة للزيوت وبخار المياه وروائح الطعام نفسه أثناء الطهى. لكن يعيب هذا النوع من الشفاطات أن المدخنة الخاصة به ستكون واضحة فى منتصف المطبخ وبالتالى ستضطر لتغطيتها بأي وسيلة لتزيين الشكل العام.

شفاط يمتص الروائح لأسفل

ظهر هذا النوع من الشفاطات لتأدية نفس الغرض لأى شفاط آخر ، ولكن الاختلاف الوحيد فيه أنه يتم تركيبه على الجانب الأمامى للموقد نفسه فى جسم كاونتر المطبخ. ويقوم بسحب الروائح والأبخرة خارج المنزل عن طريق أنابيب التهوية الموجودة تحت الأرضية ، والتى تكون نهايتها نافذة صغيرة فى طرف المنزل.

استغلال مساحة تخزين كاونتر المطبخ

فى الغالب يستخدم الكاونتر فى التخزين أكثر منه للطهى ، لذلك سنجد أغلب الناس عند تحضير الطعام تعتمد على المحيط الرئيسى للمطبخ وهو المكان المعتاد. وعند تجمع العائلة بأكملها يلجئوا لمساحة للكاونتر.

ولكى تستفيد منه أفضل استفادة للتخزين ، من الممكن أن تستخدم إضافات تنظم عملية التخزين بداخله. مثل الأدراج او الرفوف او بعض القطع الاستانلس الجاهزة فى السوق بدلا من تركه خاليا.

بشكل عام عندما تترك جزء من مساحته الداخلية فارغة بدون تقسيم ، ستجد أنها أقل قيمة بالنسبة لك. وبالتالى فلن تستفيد منها جيدا. وإذا لم تستطيع أن تصنع بنفسك رفوف او أدراج للتخزين ، يمكنك أن تستعين بـ نجار محترف لعمل تقسيم لمساحة الكاونتر الداخلية لتحقيق أفضل استغلال.

دمج كاونتر المطبخ بآخر

إذا كان الكاونتر أصغر من المساحة المطلوبة ، هنا يجب عليك أنك تفكر خارج الصندوق. فأسهل طريقة أن تقوم بدمج الكاونتر الأساسى الأقل فى الحجم بكاونتر آخر قائم بذاته. أو تختار كاونتر يشبه الطاولة وهذا يعطيك المساحة التى ترغب فيها للكاونتر. وإذا لم تفضل أن يكون الاثنين قريبين من بعضهما ، من الممكن أن تضع الكاونتر المتنقل فى مكان آخر فى المطبخ ، أو حتى فى مكان آخر من المنزل.

تظهر أهمية الكاونتر المتنقل عندما يكون سطحه مستوى مع الكاونتر الاساسى ، فكل واحد منهم له وظيفة معينة. فمثلا يمكنك أن تضع لوح لتقطيع اللحوم والخضروات على المتنقل ، وتستخدم سطح الكاونتر الأساسى فى وضع الأجهزة الصغيرة مثل الخلاط او خفاق البيض وبعض التجهيزات البسيطة.

ومن المهم ألا تنسى إمداده بالكهرباء اللازمة ، بمعنى أن يكون على الأقل به 2 مخرج توصيل كهرباء لتشغيل اجهزة المطبخ ، حتى لا تضطر لتركيب توصيلات إضافية.

ترتيب اجهزة المطبخ يعتبر تحدي كبير بالنسبة لنا واحيانا بتكون معاناة واحنا واقفين فى المطبخ ، كام مرة والام واقفة بتطبخ و حد من أفراد الأسرة حاول يوصل للثلاجة ومقدرش ، أو وهى بتغسل الاطباق على الحوض تناثرت مياه على البوتجاز وهو شغال ومواقف غير كده كتير تبين معاناة الاسرة بسبب سوء ترتيب اجهزة المطبخ.

وعشان ميكونش فيه ارتباك لازم نحدد احتياجاتنا وبعد كده نعرف ازاى نرتب الأجهزة ، وهنا هنعرض لك بعض النصائح اللى هتمشى عليها وأنت بترتب اجهزة مطبخك ، والنصائح دى منقسمة لجزئين ، جزء منهم أثناء مرحلة تأسيس المطبخ و تصميمه من البداية والجزء الثانى اثناء الاقامة فى البيت.

الجزء الاول اثناء تأسيس المطبخ

واحنا فى مرحلة التأسيس ، اجهزة المطبخ اللى يهمنا ترتيبها هى الاجهزة الكبيرة لانها اجهزة الاستخدام اليومى والمسيطرة على المطبخ كله زى التلاجة والبوتجاز وغسالة الملابس والأطباق ، واللى بتحدد أماكن باقى الأجهزة ، وفيه بعض الطرق اللى تضمن لك اماكن مثالية للاجهزة دى.

تقسيم المطبخ لمناطق رئيسية

من المهم جدا أن تصميم المطبخ يكون متقسم تقسيم صح عشان يبقى أكثر كفاءة وفعالية ، والتقسيم ده بيكون مكون من 5 مناطق رئيسية:

1. منطقة تخزين الطعام.
2. منطقة تجهيز الطعام.
3. الأوعية والأواني.
4. مواد التنظيف و سلة القمامة.
5. الاطباق وادوات الطهى.

اجهزة المطبخ المدمجة Built-in

اثناء تقسيم المناطق الرئيسية هتلاقى الأماكن المناسبة لاجهزة المطبخ الكبيرة ، مثلا البوتجاز هيكون افضل مكان له هو منطقة تجهيز الطعام.

خلى فى اعتبارك دائما الاجهزة المدمجة Built-in في مناطق المطبخ ، لأنها تضيف لمسة جمالية رائعة للمطبخ ده غير توفير فى مساحة كاونتر المطبخ مش هتلاقيه لو الأجهزة عادية.

ومش بس كده دى هتضيف شكل مودرن وعصرى لمطبخك ، زى البوتجاز المسطح بدل البوتجاز التقليدى ، والفرن Built-in المحاط بعلب تخزين من فوق و تحت.

مثلث الحركة بين اجهزة المطبخ

لو كنت راضي عن تقسيمة مناطق المطبخ ، تقدر فى الوقت ده ترتب الاجهزة الصغيرة بناء على افضل مكان يؤدى الغرض بالنسبة لها.

اثناء مرحلة تأسيس المطبخ او حتى تجديده لازم تخلى بالك من مثلث الحركة ، واللى يشير الى اهم 3 نقط في المطبخ وهم (البوتجاز – الثلاجة – حوض الغسيل) لازم يكون فيه اتصال بين الثلاث نقط دى بسهولة.

مقاسات الاجهزة

مقاسات الاجهزة من أهم النقط اللى لازم توضع فى الاعتبار عشان سهولة الحركة ، لو كانت صغيرة أكثر من اللازم مش هتؤدى الغرض منها ، ولو كانت اكبر من اللازم هتضيع مساحة المطبخ ومش هنقدر نستغل باقى المساحة لبقية الاغراض.

افضل طريقة لتحديد أنسب الأجهزة بالنسبة لك هو مدى استخدامك للجهاز ، على سبيل المثال لو كان أفراد عائلتك من هواة المشويات والمخبوزات يبقى يلزمك فرن حجمه كبير ، ولو كان فيه حد بيشرب عصير كل يومين أو ثلاثة يبقى عصارة صغيرة تؤدى الغرض ، وهكذا.

اختيار مكان البوتجاز

من أهم النقط اللى ناخدها فى الاعتبار هو اختيار مكان البوتجاز المثالى بحيث ميكونش متعارض مع مكان إمداد الغاز الطبيعى ، يعنى نحاول نخلي مسافة بينه وبين ماسورة الغاز على الاقل 15 سم عشان الحرارة متكونش مباشرة على الماسورة لان فيها خطورة كبيرة جدا.

كمان نختار له مكان جيد التهوية قريب من شباك وطبعا مننساش الشفاط سواء كان هرمى فوق البوتجاز او حائطى عادى ، ونخلى بالنا ان البوتجاز ميكونش تحت الشباك مباشرة لان كده الشفاط الهرمى مش هينفع يتركب.

اختيار مكان غسالة الملابس والاطباق

عشان تكون الاجهزة دى راكبة فى مكانها الصح لازم تراعى أماكن تغذية وصرف المياه ، وده لازم يتم تخطيطه كويس جدا فى شغل تأسيس السباكة ، وخاصة لو كان عندك غسالة اتوماتيك لها باب علوى ، وكلنا عارفين ان بعض الموديلات فى النوع ده من الاجهزة مفيش لها سخان ، يبقى من الضروري انك تركب لها توصيلة مياه سخنة من السخان مباشرة.

الجزء الثانى بعد اقامتك فى المنزل

ترتيب اجهزة المطبخ حسب الاستخدام

أول خطوة لتفادي الفوضى والكركبة فى اجهزة المطبخ هو هو انك تكون عملى وترتبها حسب الاستخدام ، يعني شوف ايه الاجهزة المستخدمة باستمرار والاجهزة اللى استخدامها قليل والأجهزة الغير مستخدمة.

وهل انت فعلا محتاجة توستر للسندوتشات وماكينة الوافل موجودة واللى ممكن تؤدى نفس الغرض ، ولو بصينا على الحلة الاستانلس العميقة المتخصصة فى طهى الارز هل ممكن نحتاج الحلة الكهربائية لطهي الأرز واللى بدأت تنتشر فى بيوت كتير حاليا ، بالتأكيد لا.

وهنا نقدم لك نصيحة مهمة : حاول تشترى اجهزة مطبخ متعددة الاستخدامات لتوفير أكبر مساحة من علب التخزين او كاونتر المطبخ ، ولو هتشترى اجهزة لها استخدام واحد فيكون عددهم قليل.

تخزين اجهزة المطبخ المستخدمة باستمرار

مفيش قاعدة واحدة مسلم بها لتخزين اجهزة المطبخ ، ولكن ده يعتمد على طريقة الطبخ والأجهزة المستخدمة بكثرة ، وحجم علب التخزين الموجودة.

طيب بعد ما عرفنا الاجهزة اللى احنا محتاجينها طول الوقت ممكن نخزنها فين وايه انسب مكان لاستخدامها ، فيه 3 قواعد ممكن تسهل علينا الموضوع.

• الاجهزة المستخدمة باستمرار يفضل انها تكون موجودة على الكاونتر الرخام او فى الرفوف السفلية ، بحيث تكون فى متناول ايدك مباشرة.
• الاجهزة نادرة الاستخدام يفضل انك تخزنها فى العلب العلوية.
• الاجهزة الغير مستخدمة تبرع بها او ممكن تبيعها على الانترنت او لحد تعرفه.

هو طبعا من الافضل انك تخلى الكاونتر فاضى ونظيف طول الوقت ، ولكن مش هتكون مشكلة لو انك خليت بعض الاجهزة فوق الرخام ، ترتيب المطبخ شامل بنود كتير زى علب التخزين و الثلاجة و التروللى او الدولاب المنفصل.

ولو فيه اجهزة مستخدمة يوميا زى الخلاط او الميكرويف او التوستر ، يبقى افضل حل انك تخليهم مكان استخدامهم على الرخامة ، عشان تقدر توصل لهم بسهولة بدل ما كل يوم تطلعهم وتخزنهم تانى.

الأجهزة نادرة الاستخدام

ودى هى الاجهزة اللى بتستخدمها مرة كل 3 أو 4 شهور ، زى ملحق الخلاط الخاص بعمل عصير الاسموزى مثلا ، وآلة صنع الوافل ، ومكنة الايس كريم ، وبردو العجانة لو كانت الام بتعمل كيكة او تورتة وده بيكون فى المناسبات فقط.

كل اجهزة المطبخ دى مش منطقى انك تخزنها على أهم مساحة وهى الكاونتر الرخام او حتى فى العلب السفلية لان فيه اجزاء اهم منها ممكن تتخزن فيها ، ولكن تقدر تخزن الاجهزة دى فى أعلى رف في المطبخ.

خلى بالك ان الاجهزة دى هتتغير أماكنها موسميا ، يعنى مثلا حلة الطبخ بالبخار ممكن تستخدم بكثرة وقت الشتاء ، في حين أن ماكينة صنع الايس كريم هيكون وقتها موسم الصيف ، عشان كده مينفعش الاجهزة دى تكون فى اماكن رئيسية.

استفيد من اجهزة المطبخ الغير مستخدمة

اخفاء اجهزة المطبخ الغير مستخدمة خطوة صعبة لناس كتير رغم أنها مش محتاجة تفكير ، فبعض الاجهزة مش هنستخدمها ، ومش مهم وقتها إن كنا مرتبطين بوجودها فى المطبخ.

يعنى لو بصينا على وعاء سلق البيض ، والعصارة ، وحلة طبخ الأرز الكهربائية ، لو كنا بنستخدم الاجهزة دى فعلا يبقى خليهم موجودين ، أما لو محصلش انك استخدمت الاجهزة دى قبل كده يبقى مفيش فرصة فى المستقبل ان ده هيحصل.

اجهزة المطبخ الغير مستخدمة تشكل عبء على مساحة التخزين عندك ، فى الوقت ده عندك كذا حل ، ممكن تتبرع بها لشخص محتاج أو لمؤسسة خيرية ، أو تبيعها على الانترنت وحاليا بقى فيه مواقع كتير تعرض السلع المستعملة فى بلادنا العربية.

ترتيب علب التخزين العشوائية

بعد ما قللنا من عدد الأجهزة ، ونزلنا المهم منها على الكاونتر الرخام ، من المهم أننا ننظم العلبة ، عشان نقدر على الاقل نشوف محتوياتها بسهولة ، وعشان نعمل كده فيه مجموعة نصائح ممكن نتبعها :

• حاول تلف السلك الخاص بكل جهاز قبل ما تخزنه فى العلبة ، لان ده هيخلى الشكل العام جميل جدا ومرتب.
• اشترى سلم صغير هيخدمك فى اغراض كثير منها انك ممكن تخزن الأجهزة في الأرفف العلوية.
• احفظ دليل استعمال اجهزة المطبخ على الانترنت على بريدك الشخصى أو أى موقع رفع ملفات ، مفيش داعى اننا نحتفظ بكمية من الورق فى المطبخ تزيده عشوائية.
• عشان نتجنب الزحمة الناتجة عن ملحقات الخلاط ممكن نخزنها في أكياس بلاستيك ونخليهم فى رف او علبة تخزين عندنا ونكتب عليهم محتوياتهم بملصق صغير.

ترتيب اجهزة المطبخ باستمرار

كل ما كان ترتيب اجهزة المطبخ على فترات متقاربة كل ما هيكون اسهل بالنسبة لنا ومش هياخد معانا وقت اطول فى المرة اللى بعدها يعنى مثلا لو جربت تنظم المطبخ مرتين فى السنة هتلاقى الموضوع ابسط كثير ، ولو عايز الموضوع ابسط ممكن تكتب ملصق بمحتويات كل علبة وتلزقه عليها.

المطابخ الضيقة واللى تصميمها سىء غير عملية ومتعبة جدا لست البيت مش بتقدر تاخد راحتها فيها ، عشان كده تصميم المطابخ لازم يكون بطريقة مدروسة ، عشان تكون عملية والتواجد فيها محبب للجميع ، سواء فى تحضير وجبات ، أو فى تجهيز حفلات أعياد ميلاد ، أو عزومات للعائلة.

قبل ما تبدأ فى تغيير أو تجديد مطبخك ، وتغامر بمبلغ مالى كبير ، أولا اختار شكل المطبخ اللى دايما بتحلم به ، وتقدر تعمل تعديلات بسيطة فى التصميم ، و عن طريقها تستغل المساحة وتظبطها على حسب استخدامك ، ده لو الميزانية مش هتكفى كل تجهيزات المطبخ.

فلو كانت مساحة مطبخك 9 متر مربع وهو المقياس المعياري بالنسبة لمطابخ البيوت الصغيرة ، أو 40 متر مربع وهو أكبر مساحة للمطابخ فى البيوت الحديثة ، فأساسيات تصميم المطابخ واحدة لكل البيوت.

تخطيط المطابخ

غالبا إعادة تصميم المطابخ بتكون عبارة عن تحديث الأجهزة وتجديد علب التخزين و تبديل الكاونتر ، و لعمل تجديد شامل للمطبخ ، لازم تحافظ على الانسيابية ، يعنى سهولة الحركة والتعامل فيه ، وعشان كده هنعرف طرق تصميم المطابخ ، و هم خمس طرق :

تصميم المطابخ ذات حائط واحد

وفيها يتم وضع كل الأجهزة والكاونتر وعلب التخزين بطول حائط واحد ، وده بينفع فى مطابخ البيوت الواسعة جدا والضيقة جدا لقلة عدد الحوائط المتاحة.

مميزاته

• يسمح بالحركة دون عوائق فى المطبخ لان مساحته مفتوحة نتيجة أن مفيش حواجز فيه.
• ومن أسهل مطابخ البيوت فى التصميم والتخطيط والتنفيذ ، وسهل فى الإنشاء ومش مكلف زى الأنواع الأخرى ، عشان كل تأسيساته سواء تأسيس السباكة أو تأسيس الكهرباء متجمعة على حائط واحد وده موفر جدا فى إمداد الخطوط.

عيوبه

• مساحة الكاونتر بتاعه محدودة لأنه حيطة واحدة.
• أقل كفاءة من المخططات التانية بسبب أنه مش بيسمح باستخدام مثلث حركة المطبخ التقليدى.
• كمان مساحته المحدودة دى مش هتسمح بمنطقة جلوس.

تصميم المطابخ الطولية

لما تكون المساحة ضيقة أو محدودة فى الشقق أو البيوت الصغيرة ، فغالبا تصميم مطابخ طولية هو النوع الممكن ، وهنلاحظ فى النوع ده حائطين متقابلين بيكون فيهم كل خدمات المطبخ ، وممكن يكون مفتوح من الجانبين الآخرين ، وكأنه ممر بين المساحات ، أو يكون واحد من الحوائط المتبقية يحتوى على شباك أو باب خارجى ، أو يكون مسدود .

مميزاته

• عملى جدا لأنه يستخدم طريقة المثلث فى تصميم المطابخ عن طريق توفير مساحة أكبر لعلب التخزين فى الجانبين.
• إتاحة مساحة أكبر للكاونتر.

عيوبه

• ازدحام المكان خاصة أن ممر المطبخ ضيق.
• مش هيكون مريح لو فيه أكتر من اثنين بيستخدموا المطبخ فى نفس الوقت.
• كمان الحائط الرابع عديم الفائدة لأنه مش هيستخدم.
• المساحة الضيقة مش هتسمح بمنطقة جلوس لتناول وجبات سريعة.

تصميم المطابخ على شكل L

وده أشهر تصميم فى المطابخ ، ويتميز بحائطين متقابلين بزاوية قائمة شاملين علب التخزين والكاونتر وبقية خدمات المطبخ ، مع اثنين آخرين من الحوائط المتجاورة  والمفتوحة.

مميزاته

• النوع ده من التصاميم يحقق استفادة من مثلث حركة المطبخ.
• يعطى مساحة أكبر للكاونتر وده لو قارناه بمطبخ الحائط الواحد.
• وتقدر تضيف فيه كاونتر فى المنتصف ، لأن مفيش عندك علب تخزين تضيق لك مكانه.
• من السهل وضع ترابيزة داخل المطبخ لتناول الوجبات لو مش حابب انك تخرج الاكل لغرفة المعيشة او السفرة.

عيوبه

• آخر نقطة من المطبخ تظهر بعيدة الى حد ما لو كان فيها بعض الاجهزة زى الثلاجة او البوتجاز.
• تواجد بعض علب التخزين الارضية والعلوية فى النقطة العمياء ، وهى الزاوية القائمة عند تقابل علب التخزين مع بعض ، فبيكون من الصعب الوصول إليها .

مطابخ مزدوجة على شكل L

المطابخ المزدوجة متطورة جدا فى مجال تصميم المطابخ ، فهى تسمح بمنطقتين للعمل ، وجمعت مميزات مطبخ حرف L مع مطبخ الحائط الواحد ، واللى بيكون فيها كاونتر متكامل يحتوى على بوتجاز وحوض ، أو الاثنين مع بعض.

مميزاته

• قرصة المطبخ بتوفر لك مساحة كبيرة لإعداد الطعام ، لأنها تساوى محيط المطبخ مضروب فى عمق 60 سم.
• ومن المميزات بردو أن المساحة هتكون مريحة لأكثر من اثنين بيستعملوه مع بعض لان مناطق العمل منفصلة.
• مساحته الكبيرة تسمح باضافة 2 حوض ، وأماكن لأجهزة اضافية زى ثلاجة تانية أو غسالة أطباق جديدة.

عيوبه

• يستهلك الكثير من مساحة الأرضية  ، عشان يستوعب علب التخزين والاجهزة.

تصميم مطابخ على شكل U

مطابخ حرف U تشبه المطابخ الطولية ، ماعدا الحائط الثالث لأن فيه باقى علب التخزين وخدمات المطبخ ، والحائط  المتبقى مفتوح ، عشان يسمح بحرية الحركة فى المطبخ.

مميزاته

• يحافظ على انتظام الشغل جوة المطبخ ، وخاصة مع وجود مثلث الحركة.
• يوفر حيطة كاملة لتركيب علب تخزين إضافية.

عيوبه

من الصعب أنك تعمل كاونتر فى المنتصف لان المساحة هتكون ضيقة بالنسبة له ، ولو حاولت تعمله هتضيق الممر وطبقا لقواعد تصميم المطبخ ومقاساته القياسية ، لا يجب أن يقل عرض الممر عن 120 سم.

بحكم وجود علب التخزين والاجهزة على 3 حوائط والحيطة الرابعة لسهولة الحركة ، بالتالى مش هتقدر تجيب طاولة وكراسى فى التصميم ده.

أرضيات المطبخ

فى تصميم المطابخ اختيارك للارضية مش مجرد شكل جمالى ، لكن لازم تختارها بعناية لانها هتتحمل معاك ضغط كثير جدا وعلى مدار سنوات طويلة ، وعشان كده هنعرض لك كل الخيارات المتاحة :

السيراميك

السيراميك من أشهر أنواع الارضيات ، ومش بيمتص الروائح و لا البكتيريا ، ويتحمل الضغط الكبير والحركات الثقيلة ، لكن نظرا لصلابته الشديدة بعض الناس بتركب خامة تانية اكثر مرونة لأنه صلب جدا اثناء الوقوف عليه.

الاخشاب الصلبة

الاخشاب الصلبة وعلى رأسهم خشب الارو يعتبر من افضل انواع الارضيات لو تم الاعتناء به ، ولكنه يتلف من تكرار مشى الحيوانات الاليفة بمخالبها ومن وقوف المياه عليه بشكل مستمر.

خشب البامبو

البامبو له شكل مميز ويشبه الخشب الصلب فى القوة والمتانة ويتلف نتيجة تعرضه لنفس العوامل.

شرائح الباركيه

انتشر الباركيه بكثرة فى الفترة الاخيرة نظرا لسهولة تركيبه وسعره المعقول ، بالاضافة لمقاومته للأوساخ وامكانية تنظيفه فى أى وقت ، ورغم ذلك مش بيقاوم الماء ، و بتتلف الألواح بسبب الرطوبة بسرعة جدا وتنتفخ اطرافها ويبقى مستحيل إصلاحها من تانى ، وفى الحاله دى تضطر تغير الأجزاء التالفة.

المشمع

المشمع هو شكل تقليدى للأرضيات المرنة أثناء المشى عليها ، ظهر قبل استخدام الفينيل ، ولكنه يختلف عنه فى بعض الصفات ، يتميز بمقاومته للبكتريا بالاضافة الى انه مصنوع من مواد طبيعية ، وقادر على تحمل الاستخدام الشاق ، ومتوفر بأشكال وألوان مختلفة.

ألواح الفينيل

انتشرت ألواح الفينيل فى الأرضيات بشكل واسع جدا نظرا لسهولة تركيبه وصيانته ، متوفر منه أشكال كتير بعضها يشبه السيراميك والخشب ، وتعتبر من ارخص المواد لتركيب الارضيات ، حتى الانواع الفاخرة منه تعتبر سعرها معقول بالنسبة لأي مادة اخرى.

تصميم المطابخ وتجديد علب التخزين

وانت بتجدد فى مطبخك ادامك حل من اثنين ، اما انك تشتري علب جديدة من ماركات معروفة وده مكلف ، واما انك تعمل تجديد فى العلب القديمة عن طريق تغيير شكل ابواب العلب بطبقة PVC جديدة وبكده تكون وفرت كتير.

الحل الثانى انك تدهن علب التخزين لكن خلى بالك ان ده مش بسيط زى ما انت متخيل ، لازم تعرف الاول ايه الدهان المناسب لخامة المطبخ عندك ، لانه مش كل المواد بنفس الاداء ، لازم تشوف مادة تلزق فى جسم العلب نفسها ، وفى الحالة دى ممكن تستخدم دهان الرش هينفع جدا لو كان المطبخ من الخشب الطبيعى.

ولو فشلت كل الحلول دى فى اظهار مطبخك بشكل جذاب ، ابدأ فى البحث عن شركات تصنيع المطابخ ، وعشان متكونش محتار فى اختيارك ، علب التخزين تنقسم لنوعين رئيسيين ، علب أرضية ودى بيكون فوقها الرخام وتجهيز الطعام وكل شغل المطبخ ، وعلب علوية يتم تثبيتها على الحيطة وبيكون فيها الرشاقة ، وأصغر فى الحجم من العلب الأرضية.

لما تيجى تغير علب تخزين المطبخ ، متكونش بخيل فى المساحة عشان توفر الأموال ، واختار علب ارضية كبيرة بأدراج عميقة ، وعلب علوية باقصى ارتفاع تقدر توصل له ، لأن مساحة التخزين فى المطبخ هى كل شىء.

نصائح عامة فى تصميم المطابخ

أساسيات تصميم المطابخ اكبر بكثير من الارضية وعلب التخزين والكاونتر ، عندنا الاضاءة مثلا ممكن تعمل فرق كبير فى المطبخ ، حتى لو كان مضىء طول اليوم بالاضاءة الطبيعية او بضوء خافت من لمبات هادية.

عشان تكون اضاءة مطبخك متوازنة ، ركب اضاءات مختلفة ، زى اضاءة أسفل علب التخزين ، والوحدات المتدلية ، وكشافات السقف.

بالاضافة لذلك المطبخ يحتاج لمصادر تغذية بالكهرباء فى اماكن متنوعة بطول الحيطة الظاهرة فوق الكاونتر مباشرة لتوصيل اى اجهزة اثناء تحضير الطعام.

كل غرفة فى بيتك محددة لغرض ما ، زى المطبخ للطهى ، و الحمام للاستحمام ، وغرفة النوم للراحة ، إلا غرفة المعيشة تشمل أنشطة كتير لكل فرد فى البيت ، ممكن تسترخي على الكنب أو كرسي الاسترخاء وتقرأ كتاب عجبك ، بالاضافة لمشاهدة الأفلام المفضلة وتناول الطعام من وقت للتانى ، وعشان كل الأنشطة دى تتم صح ، لازم تختار اضاءة غرفة المعيشة بدقة ، بداية من وضع  كشافات السقف والنجفة فى المنتصف لعمل شكل جمالى ، لحد الابليك على الحيطة لإضاءة تابلوهات فنية رائعة ، بالإضافة للاضاءة المخفية فى السقف.

انواع اضاءة غرفة المعيشة

إضاءة وظيفية

أهم خطوة فى اضاءة غرفة المعيشة ، هى مساحة الغرفة ، وتركب اضاءة تساعدك فى القراءة أو الاسترخاء ، لو بصينا لمكان التلفزيون فى غرفة المعيشة ، لازم تتأكد أن ضوء الغرفة مش متعارض مع مكان الشاشة ، عشان ميكونش فيه ضوء مسلط مباشرة على الشاشة يضايقك.

السطوع ممكن يكون من مجموعة متنوعة من مصادر الإضاءة زى كشافات السقف أو النجفة ، او الضوء النازل والموجه من الشبابيك ، فلازم تاخد بالك من مكان التلفزيون والاضاءة.

الاضاءة الخلفية هى الأنسب لتجنب سطوع الضوء على الشاشة ، و لتقليل اجهاد العين الناتج عن طول تعريضها للشاشة فى الغرف المظلمة ، الاضاءة دى ممكن تكون شريط LED خلف التلفزيون ، عشان تحقق رؤية اكتر وضوحا حول الشاشة ، من غير ما يسلط ضوء مباشر على عين الجالس.

عشان يكون عندك ضوء مناسب للقراءة ، فلازم تختار إضاءة مميزة تعطي نور كافى ، واللى مش هتوفره لك إضاءة الديكور ، يبقى تدور على مصدر تانى للضوء زى الأباجورات المكتبية أو اللمبادير ، عشان ضوئهم الساطع والمركز يقلل من إجهاد العين ، ويسلط الضوء أكثر على أوراق الكتاب بدل ما يفرش اضاءته فى مكان اكبر.

إضاءة الديكور

النوع ده من اضاءة غرفة المعيشة وظيفتها تسليط الضوء على اللوحات والديكور ونقط الجمال فى الغرفة ، ولو أنت بتعيد تصميم غرفتك أو بتبنيها من جديد ، ممكن تختار اسبوتات متغيرة الاتجاه او Track light ، هتؤدى الغرض ده بشكل جيد جدا ،  فى الحالة دى لازم تراعى طول السقف لو كان 250 سم ، يفضل أن اضاءة السقف تكون بعيدة عن الحائط بحوالى 60 سم ، عشان تكون فى مستوى النظر.

ممكن تركب شريط LED من فوق بيت الستارة لتركيز الاضاءة على الستائر ، او ممكن تركبه فوق جزء من السقف المعلق (بيت النور) لعمل اضاءة خافتة لو تعبت من سطوع الضوء العالى.

ولو عايز تعمل اضاءة تمييز على تمثال أو قطعة فنية معينة او حيطة فيها ديكور مبتكر ، اختار اضاءة أرضية Uplight من تحت التمثال ، او سبوت موجه ناحيته ده يعطيه ظل ونور فى منتهى الروعة.

فيه أساليب أخرى للاضاءة تقدر توظف بها الاضاءة الاساسية ، وتخفف من شدتها عن طريق استخدام مفتاح ديمر للتحكم فى شدة الضوء ، ولكن خلى بالك لازم تكون الكشافات قابلة للتحكم مش اى نوع يصلح للمهمة دى.

اضاءة غرفة المعيشة الاساسية

مهمة النوع ده هى اظهار ملامح المكان الرئيسية ، وليس اظهار بعض التفاصيل الدقيقة او اجزاء معينة.

كشافات السقف المعتادة تمثل اختيار مثالى للنوع ده ، وخاصة لو يمكنك تركيبها بنفسك  اذا كانت فى الخرسانة مباشرة او فى سقف معلق ، لكن خلى بالك من نقطة مهمة ، وهى أنك تنوع  فى اختيار أشكال النوع ده من الاضاءة.

يعنى مش من المنطقى انك تخلى كل اضاءة السقف كشافات ضوء ابيض ، لكن لازم يكون فيه جزء منهم ضوء دافى او حتى ذهبى لعمل جو نفسى مختلف فى المكان او اذا كنت تستخدم غرفة معيشتك فى عمل حفلات لاعياد ميلاد او غيرها.

بعض الناس تستخدم بيوت النور او الاضاءة المخفية بديلة لكشافات السقف ، كنوع من الخروج عن المألوف ، لكن عشان ده يحقق الغرض منه لازم يكون فيه كمية اضاءة كبيرة من شرايط LED عشان تغطى اضاءة غرفة المعيشة بأكملها.

من ضمن انواع الاضاءة الاساسية ابليك على الحوائط وده من مميزاته انه مش بيعمل ظل غامق على الحوائط ، وده سبب انه مفضل من ناس كتير لان الظلال الغامقة هى اللى بتعطى احساس بالضيق ، عشان كده النوع ده بيعطى احساس بالاتساع وخاصة لو كان فى اجزاء سفلية من الحيطة يعطيك احساس بالارتفاع.

اخر نوع من اضاءة السقف واللى بنهتم بيها اكثر من اى نوع تانى هى النجفة او الوحدات المتدلية ، ودى تعتبر مصدر ديكور السقف كله فى غرفة المعيشة ، عشان كده لازم تتأكد ان اضائتها كافية بالنسبة لك وتشوف عدد الاذرع او اللمبات الموجودة فيها ، لان مهما كانت كشافات السقف كثيرة ومغطية المكان مش هتغنى عن وجود النجفة.

تقنيات اضاءة غرفة المعيشة

تأثير الاضاءة على حياتنا اليومية

جزء من ساعتنا البيولوجية ، أنه تمت برمجتنا على الاستيقاظ فى الصباح على درجات الأزرق اللامع الموجود مع شروق الشمس ، ونميل للاسترخاء على الضوء الأصفر الدافى الخاص بغروب الشمس ، عشان كده خبراء صناعة الاضاءة طوروها بحيث تتوافق مع ايقاعنا اليومى.

عشان كده التكنولوجيا تطرقت لموضوع ده اكثر من اى وقت قبل كده ، وده بيسميه الخبراء الاضاءة المتمركزة حول الانسان ، واثبتت الدراسات الحديثة الخاصة بالطاقة ان الاضاءة تلعب دور مهم جدا فى حياة الانسان اليومية ، ولها بعض الفوائد للصحة والحالة المزاجية.

شدة الاضاءة ودرجة حرارة اللون لهم دور فعال فى ضبط الحالة المزاجية وفيه طرق متنوعة عشان تحقق كل ده.

تطور اللمبات LED

فى الأيام دى اللمبات LED هى الأشهر ، بسبب السعر المنخفض وتوفر حرارة الضوء بكذا درجة ، لاعطاء حالات مزاجية مختلفة مع كل لون ، وكمان جودتها أصبحت اعلى ،  إلى جانب عمرها الافتراضى الطويل ، عشان كده بقت الوسيلة المثالية فى اضاءة غرفة المعيشة .

جزء من تطور لمبات LED أنها اصبحت تحتوى على مفاتيح تحكم فى شدة الاضاءة Dimmer وكمان مفاتيح للتحكم فى لون الاضاءة ودى تقنيات جديدة ولكن سعرها اغلى من لمبة اللون الواحد ، وتم ابتكار النوع ده عشان تقدر تحاكى الضوء الأزرق الخفيف وقت الصباح عشان ، والضوء الابيض طول وقت النهار لمزيد من النشاط ، والضوء الاصفر الدافىء وقت الغروب او وقت الليل لاضفاء جو من الراحة والهدوء.

غرفة المعيشة هى اللى بتجمع كل عائلتك وأصحابك ، فلازم تختار فرشها بدقة ، وبالتحديد الكنبة أو ما تسمى فى السوق الركنة لو كان لها زاوية ، فأساس أى اختيار بيكون المتانة وخاصة أن ركنة غرفة المعيشة بتستخدمها كل يوم ، وبسبب تكلفتها العالية بتغيرها كل فترة طويلة ، واحيانا مش بتغيرها ، عشان كده جمعنا لك معلومات كاملة عن اختيار افضل ركنة فى غرفة المعيشة بحيث تعيش معاك وتناسب ستايل بيتك.

مقاس ركنة غرفة المعيشة

تحديد مقاس ركنة غرفة المعيشة مسألة بسيطة تعرفها من مقاس الحائط اللى هتحط امامه الكنب ، وده عشان تعمل فرش مناسب للمساحة المتاحة عندك ، وفى غرفة المعيشة المفتوحة يفضل أنك تستخدم الركنة وتدمج فى نهايتها puff ، عشان تحدد لك منطقة الجلوس.

ولشكل أنيق أكتر رتب الكنب بشكل زاوية بحيث يكون لك قعدة جماعية جيدة بحيث يتواصل كل الموجودين ، وفى نفس الوقت يكون لكل واحد منهم فرصة لمشاهدة التلفزيون.

ولو بتدور على قعدة شكلها رسمى بدل القعدات الجماعية ممكن تخلى الكنب مواجه لبعضه وده مناسب لمشاهدة التلفزيون اكتر واللعب.

لو غرفة المعيشة عندك ضيقة هيكون الكنب اللى ظهره صغير ممتاز بالنسبة لك ، لانه يبدو للعين انه مش مستهلك مساحة كبيرة ، ويفضل انه يكون قطع منفصلة ، فى حين ان قطع الكنب المتكاملة الغير منفصلة تناسب الأماكن الواسعة.

الفوتيه (كرسى)

بجانب وجود كنبة فى الغرفة ، فممكن تجيب الفوتيه (كرسى) وتعمل بيه جلسة منفردة ، ويمكنك وضعه فى ركن هادى زى ركن القهوة عشان تشرب مشروباتك المفضلة ، ولو المساحة عندك متاحة حط كرسيين فوتيه ، وممكن لو بتدور على شكل مختلف وجديد تخلى الكرسيين مش متطابقين.

خامة كسوة ركنة غرفة المعيشة

لازم تختار قماش تنجيد كنب الغرفة بحيث يكون ملائم لذوقك ، ويكون ملمسه مريح ، اول خطوة تعملها تتأكد من جودة القماش ، عشان مع مرور الوقت هيتعرض لحاجات كتير تؤثر فيه زى الأطفال ، وطريقة استخدامك لغرفة المعيشة ، وحتى وجود حيوانات أليفة ، بالإضافة لتعرضه لأشعة الشمس يوميا.

خامة الجلد متينة وبتعيش كتير ، و لكن مع الوقت هيحصل فيها تجاعيد وممكن تقشر لو جودتها سيئة ، لو بصيت مثلا على النوع المصبوغ هتلاقيه بيقاوم الاوساخ ، لكن شكله مش طبيعى يشبه جلد الانيلين ، فالجلد المصبوغ مرن لكن مصنوع باضافات تحميه ، أما جلد الأنيلين ناعم لكن له قدرة على تحمل كثرة الاستخدام ، وحاليا متوفر بألوان كثير.

الكنب المصنوع من الكتان لونها مش بيبهت مع الوقت ، ولكن بيحصلها تجعيد وده طبعا بعد سنين من الاستخدام ، والكنب المصنوع من القطن صعب أنه يبلى أو يتآكل عشان كده بيعتبر من افضل الخامات ، اما بالنسبة للصوف فهى مريحة على مدار السنة ، و كمان طاردة للأوساخ بشكل طبيعى ، لكن يعيبها انها ممكن تحتفظ بالحرارة اثناء الجلوس.

أما عن قماش الحرير فشكله شيك ، ولكن يتأثر بأشعة الشمس ويحتاج للتنظيف بعناية ، عشان كده لو قررت تشتريه خليه فى مكان بعيد عن الاستخدام الكثيف.

اختار القماش المفضل لك وعشان تتأكد من ملمسه وتعرف انه متين مرر عليه ايدك هتحس بيه ، و لاحظ أن كل ما ضاقت الانسجة وزادت عدد الخيوط فيها بتزيد قوة القماش ويصعب تآكله زى ما قلنا فى اختيار المرتبة.

وعشان تحمى الكسوة الخارجية لكنب غرفة المعيشة يفضل انك تشترى لها كسوة لحماية الكنب من عبث الاطفال وكمان لو فيه حيوانات أليفة فى البيت.

خامة تنجيد ركنة غرفة المعيشة

لو عايز الراحة أثناء جلوسك على الكنب ، يبقى تختار تنجيد ريش خفيف وده مش منتشر اوى فى بلادنا العربية لكنه موجود وسعره اغلى من الخامات التانية ، وخد بالك أنك هتحتاج إعادة  تنجيد كل فترة عشان يرجع للكنبة شكلها الأصلي.

طبعا احنا عارفين ان القطن افضل حشو على الاطلاق سواء فى المخدات او فى بطانة المراتب لكن لو فكرت تعمل ركنة غرفة المعيشة من القطن ، هتتجنب السخونة اثناء الجلوس ، لكن هتلاقى ان وزن الركنة اصبح ثقيل جدا وعشان كده تنجيد القطن مش منتشر للكنبة.

ولكن نفضل انك تختار الخامة الاكثر انتشارا وهى الاسفنج لو عايز جلستك على الكنب تكون مريحة ، وتجنب شراء الأنواع الرخيصة لأنه هيهبط مع كثرة الاستخدام ، وبالنسبة للمخدات او ما تسمى التكاوى دى لها خامات حشو كتير منها المايكروفايبر او قطع الاسفنج المفروم واحيانا البعض يفضل القطن عشان تخفيف الحرارة.

الكنبة الجيدة هتخليك ما تحسش بهيكلها الخشبى وأنت جالس على الحشوة ، أما الجودة السيئة فالعكس تماما هتحس ان ظهرك هيتعب من صلابة الخشب لان مفيش وسط مرن تسند عليه اللى هو التنجيد السىء ، ولو كانت الميزانية معاك مفتوحة اكثر ، فاختار اللى بتكون بسلك معدنى مربوط يدويا من الجزء السفلى ، فالأسلاك اللى على شكل S  تخلي الكنب أقوى وكمان أكتر مرونة وامتن بكثير من شريط الكتان اللى نعرفه.

جودة المخدة مهمة ، لازم تبقى محتفظة بشكلها حتى وأنت جالس عليها ، ومتكونش منحنية لأعلى ، ولو كنت بتدور على مخدات تعيش معاك اطول فترة ممكنة ، ممكن تنجدها باسفنج كثافة عالية مع اسفنج كثافته منخفضة.

خشب الركنة

طريقة صناعة هيكل الركنة هى اللى هتحدد قوة التحمل الخاصة بها ، وبما أنك مش هتشوف هيكلها الداخلى ، يفضل انك تسأل صنايعى محترف عن الخشب المستخدم لو كنت بتشتريها جاهزة.

لازم تتأكد أنها مصنوعة من خشب صلب زى الزان او الارو او الجوز ، ومدقوق بمسامير وغراء قوية مش مجرد تدبيس زى ما بنشوف دلوقتى وعشان تعرف ركنة غرفة المعيشة اللى جودتها عالية هتلاقى وزنها أثقل وده لانها مصنوعة من خشب صلب ، وهنا بقى نعطيك نصيحة من الخبراء انك حاول تختار خشب مجفف ومعالج فى الافران وخالى من العقد لضمان صلابته ، وهنا نصيحة تانية بخصوص التصنيع وحتى لو كنت بتشترى جاهز ، حاول تختار كنب أرجله جزء من الهيكل ، ومش مدقوقة أو ملزوقة فيه.

اختيار شكل الكنب

اختيار الركنة المناسبة يتم تحديدها على أساس احتياجاتك وعشان كده ظهر 3 أنواع رئيسية لاشكال الكنب :

الكنبة العادية

النوع ده من الكنب يستخدم لمزيد من الراحة لأنه يتميز بعمق اكبر من اى نوع اخر وعشان كده هنلاحظ وجود مخدات مرنة بكثرة فى الظهر ، وظهر لها أشكال مختلفة منها بمسند فى اليمين والشمال ومنها نوع يستخدم لقعدات رسمية وغير رسمية.

كنبة ظهر الجمل

تتميز بشكل ظهرها المنحني والغير تقليدى ومتانة الظهر نفسه ولكن يعيبها ان مساحة الجلسة فيها مش كبيرة وتستخدم فى القعدات الرسمية وبعض الاستخدامات المنزلية.

ركنة قطع

ودى تعتبر اشهر الانواع فى السوق ، من اهم مميزاتها تعدد القطع الموجودة وده اللى بيخلى لها استخدامات كثير ، احيانا تعملها كنبة يجلس عليها افراد الاسرة ، او تاخد قطعة منها وتسترخى عليها بطول جسمك ، او تاخد قطعة صغيرة تجلس عليها فى مكان تانى.

الوان ركنة غرفة المعيشة

الوان محايدة أم قوية

لو كنت بتفرش شقة جديدة ، يفضل أنك تشترى الكنب الأول ، وده عشان تدهن الحوائط  بألوان تليق عليه ، وكمان فى وجودها تقدر تظبط بقية الفرش ويكون شكل غرفة معيشتك شيك ، وممكن تنجد الكنب بقماش فاخر ، أو قماش مطبوع بألوان زاهية ، لأن ركنة غرفة المعيشة هى اهم عنصر فيها ، عشان كده شوف هتختار لها ألوان محايدة ولا قوية.

بعض مصممين الديكور الداخلى يفضلوا أن تتوافق ألوان الكنب مع ألوان الحوائط ، عشان تعطي الغرفة مساحة أكبر ، وتحقق تناغم فى المكان ، ولو اخترت النمط ده ممكن فى المستقبل تقابلك مشكلة تغيير لون الحوائط لو حبيت تغير ديكور المكان ، عشان كده الاختيار السائد هي الألوان المحايدة لأنها تتماشى مع عدد ألوان أكثر زى البيج ، والرمادى ، والرمادي الداكن ، واللون الكريمي.

كنب فاتح أم غامق

بعد ماتحدد اللون سواء كان محايد أم قوى تحدد درجة اللون فاتح أو غامق ، قبل ما تشترى الكنبة شوف هل هتليق بأرضية الغرفة ، ولا هيحصل تنافر مع الأرضية وخصوصا لو كانت من الباركيه الغامق أو السجاد ، وده لأن الكنب حجمه كبير وأقمشته المنجدة تمتص اللون ، و تغمق لك لون الغرفة كلها.

لو جبت ركنة غامقة على أرضية غامقة مش هتظهر تفاصيلها ، ولو مصمم على الألوان الغامقة ممكن تغير  فى تفاصيل الركنة ، بأنك تختارها بأرجل معدنية أو خشبية ألوانها فاتحة ، وبكده يكون عندك اختلاف يميز لك الركنة من الأرضية ، وممكن تضيف ترابيزة خشب تميز وجود الركنة بردو ، او سجادة فاتحة تحت اطراف الركنة هتبينها أصغر وتفصل ما بين الألوان الغامقة.

الركنة الفاتحة الوانها هادية لكن عيبها أنها تمتص الأوساخ بسرعة ، عشان كده لازم تفكر فى طريقة استخدام الغرفة خاصة مع وجود أطفال ، ولو كنت من هواة الالوان الفاتحة فى الركنة ، ممكن تختار لها غطاء قابل للغسيل.

لو كانت الغرفة بتستعمل طول اليوم ، يفضل أنك تختار قماش مشجر ، وده عشان يخفى البقع الصغيرة أو الأوساخ البسيطة.

إضافة اللمسات النهائية

لا يشترط انك تشترى كراسى متطابقة مع ركنة غرفة المعيشة ، يعنى مش ضرورى أن الكراسي تماثل الكنبة تماما ، لكن ممكن يتشابهوا في الملمس ولون الرسومات ، فاختيار كراسى غير متطابقة مع الركنة ، يعطيك الفرصة  لاضافة مزيد من الفرش المتنوع وده الاتجاه الحديث فى الديكور.

أما لو كنت بتجدد فرش الغرفة ، من الضرورى انك تراعى الوانها وباقى الفرش الموجود فيها ، قبل ماتختار لون الكنب وقماشه ، فالألوان المحايدة تناسب كل الغرف ، وعشان تكسر حدة اللون المحايد سواء فى الركنة نفسها او حتى فى الحوائط ، ممكن تضيف تكاوى ومخدات بألوان مشبعة على الركنة والارض.