التصنيف: اكسسوارات

هل فكرت قبل كده فى شكل شبابيك بيتك من الداخل والخارج ؟ ، هل فكرت تحول شبابيك بيتك لقطعة ديكور ؟ ، طبعا تقدر تعمل كده من خلال شتر الشباك ، اللى ممكن ينقل شباك الغرفة العادى لشكل مختلف تماما عن شكله التقليدي.

وانت بتختار ما بين انواع الشتر الموجودة بتحتار شوية ومش بتكون عارف تبدأ ازاى ، بسبب تعدد الخامات والاشكال اللى هتختار منها ، وزى اى قطعة جديدة بتركبها فى بيتك لازم تكون مستفيد من وجودها وشايف انك اخترته صح ، تعالوا نتعرف مع بعض على الشتر وازاى نقدر نختاره بحيث يناسب احتياجاتنا.

فوائد شتر الشباك

لو بتفكر تركب شتر الشباك ، يبقى عشان سبب من اثنين ، الشكل والأداء الوظيفي الجيد ، هى دى الفوائد الأساسية لإضافة شتر الشباك فى بيتك ، وقبل ما تفكر تركبه شوف إذا كنت عايزه لمجرد تحسين الشكل الجمالى للشباك ولا لأداء وظائف محددة.

عشان كده ننصحك بتركيب الشتر مش لمجرد الشكل الجمالى ولكن لاداء وظائف كثير من ضمنها اضافة مزيد من الخصوصية لبيتك ، او لحمايته من الرياح الشديدة والعواصف وخاصة اذا كنت فى منطقة ساحلية.

على سبيل المثال الشتر الثابت اللى هو الشيش يعتبر إضافة كويسة جدا للشباك لانه هيحسن من شكله كثير ، ايا كان السبب المهم انك لما تركب الشتر تتأكد انه حقق لك كل الوظائف اللى بتدور عليها.

الشتر الداخلي والخارجي

قبل ما تختار اى نوع من النوعين ، لازم تعرف أن كل واحد منهم له مميزاته وعيوبه.

شتر الشباك الداخلي

إذا كانت بتدور على غطاء للشباك يحقق لك مزيد من الخصوصية ، ويعيش معاك فترة أطول ، يبقى الشتر الداخلى هو الحل الانسب لك ، إلى جانب أنه بديل عصرى جدا للستائر الحديثة أو التقليدية ، و يعتبر حل عملى جدا في حجب الضوء الموجود خارج الغرفة ، لكن عيبه الوحيد انه مش بيضيف لمسة جمالية للبيت من الخارج لانه مش ظاهر للرؤية الخارجية.

شتر الشباك الخارجي

الشتر الخارجى فيه منه نوعين الأول نوع ثابت والثاني متحرك ، كل نوع منهم له غرض واستخدامات مختلفة ، الشتر المتحرك يحجب الضوء ، وبيحمى الشباك من عوامل الجو المختلفة من المطر اثناء الشتاء وهواء ومن أي عناصر خارجية ، في حين ان الشتر الثابت دوره الاساسى هو إعطاء مظهر جمالى لواجهة البيت الأمامية ، وبحكم ان النوعين معرضين دائما لظروف الجو المختلفة زى المطر والهواء والشمس ، لازم تتعمل لهم صيانة دورية.

أنواع شتر الشباك من حيث الشكل

الشتر الخشبى

مفيش حد فينا ميعرفش النوع ده من الشتر ، او بمعنى ادق هو مش معروف بالاسم ده لان اسمه الشائع (شيش) ، وموجود في اغلب بيوتنا من زمن طويل ، ونحب نلفت نظرك لنقطة مهمة جدا مش معنى انك ركبت الشيش الخشبى دى يبقى انت مجبر تركب الشباك بالكامل من الخشب ، لا طبعا ممكن تركبه من الألومنيوم او uPVC

اذا كنت حابب الشكل التقليدى لشبابيك بيتك من الخارج ، يبقى الشيش الخشبي هو من أفضل الحلول اللى ممكن تتجه لها ، بالاضافة الى انه يتميز بقابلية الدهان باى لون ، ويصنع من اخشاب كتير زى خشب الصنوبر والأرز.

الشتر المدمج

النوع ده مثالى للديكور الداخلى لان شكله جذاب ، ويعطى مظهر راقى لأى غرفة ، بالاضافة الى انه يحجب الضوء وبيضيف خصوصية للمكان ، وصمم بحيث يتم تركيبه فى إطار الشباك نفسه عن طريق شرائح عريضة تتحرك للأعلى والأسفل ، وده بدل ما شتر الشباك نفسه يتحرك للداخل وللخارج ، وعشان كده هو اضافة متميزة لكل غرفة يتم تركيبه فيها.

شتر الرول

لو هدفك من تركيب شتر الشباك هو حماية بيتك من العوامل الجوية القاسية زى الرياح والعواصف الشديدة ، يبقى شتر الرول هو إختيارك الصحيح ، لأنه بيغطى الشبابيك بالكامل ، وبكده هتحقق الخصوصية والأمان التام ، أما بالنسبة لتكلفة النوع ده ، فتعتمد على نوع الخامة اللى هتختارها ، وعلى حجم الشباك اللى محتاج تغطيه.

الأماكن الملائمة لتركيب الشتر

الشتر فى الشباك يلائم أى غرفة من غرف البيت ، لكن لو كانت ميزانيتك محدودة ، يفضل أنك تركبه فى واجهة بيتك ، لانه هيضيف للواجهة الخارجية منظر جذاب ، ومن الأماكن المثالية لتركيبه غرفة المكتب المنزلية ، لانه مش بس هيوفر درجة حرارة مريحة لغرفة المكتب طول السنة ، كمان بيخفف من حدة ضوء النهار ، عشان يقلل سطوعه على شاشة الكمبيوتر اثناء جلوسك.

شتر الشباك المدمج هو الوسيلة المثالية لتغطية شباك الحمام ، لانه بيمنحك خصوصية ويسمح بدخول الضوء بعكس الستائر القماش التقليدية ، ده غير ان فيه ميزة رائعة وهو انك تقدر تنظفه فى مكانه بدون ما تفكه.

تأكد أن الشتر اللى اخترته مقاوم للرطوبة ، وأنه مدهون بطلاء مناسب أو ورنيش مخصص للبيئة الرطبة ، لأن ده هيمنع تآكله مع الوقت ، وفيه هنا نقطة ممكن نوضحها وهى ان مش معنى انك ركبت شتر للشباك انه مبقاش ينفع تضيف ستائر قماش ، لا طبعا ممكن تضيف ستائر قماش زى الشتر بستايل الكافيه.

خامات الشتر

شتر الشباك متوفر بخامات متعددة عشان يناسب كل الاحتياجات والأشكال ، مثلا الشتر الخشبي بيصنع من أخشاب صلبة من غابات سريعة النمو زى الزيزفون ، و من الأخشاب المصنعة زى MDF ، وفيه منها البلاستيك زى uPVC ودى هى الخامة اللى تقدر تعتمد عليها فى الاماكن الرطبة وانت مطمن لان الرطوبة والمياه مش هتأثر فيها.

اختيارك للخامات يعتمد على كذا عنصر ، من العناصر دى الشكل هل هو مهم بالنسبة لك او لا ، يعنى مثلا لو يهمك شكل الواجهة الأمامية لبيتك ، اختار النوع المصنوع ، لأنه أفضل الأنواع من حيث الشكل ومقاومة العوامل الجوية السيئة.

كمان شكل الغرفة يؤثر على اختيارك للخامة ، يعنى مثلا بعض الخامات احيانا بتكون مناسبة لغرفة معينة أكثر من غيرها ، زى uPVC او الالومنيوم مناسب للحمامات ، عشان مقاوم للرطوبة ولأى تشوه ، والميزانية المتاحة معاك ، هنلاقى الأخشاب الصلبة هى الأعلى سعر فى قائمة الخامات ، فى حين ان الاخشاب المصنعة زى MDF هى الأقل سعر فيهم.

اختيار الشتر الملائم لشكل الشباك

شوف طراز وتصميم الشبابيك الموجودة عندك ، عامة شتر الشباك أكثر مرونة من باقى أنواع أغطية الشبابيك ، وممكن يتركب على أى شباك مهما كان شكله ، حتى لو كان دائرى أو مثلث ، وممكن كمان أنه يطوى عشان يظهر إطار الشباك ، فى حين ان الستائر المصنوعة من الأقمشة ، هتخفى جزء كبير من الإطار ، وده معناه أن الشبابيك المتغطية بالشتر هتكون نقطة تركيز فى الغرفة ، وتغطيه تماما يعنى مفيش اى قلق انك تكون مكشوف وانت داخل الغرفة.

ستايل شتر الشباك

شتر الشباك بارتفاع كامل

بيغطى مساحة الشباك بالكامل ويتفتح كوحدة واحدة ، وفيه قضيب فى المنتصف ، عشان تقدر تشغل الشرائح العلوية بشكل مستقل عن السفلية.

شتر الشباك المدمج طراز كافيه

يغطى الجزء الأسفل من الشباك ، ويسمح بدخول الحد الأقصى من ضوء النهار للغرفة ، وكمان بيعطى بعض الخصوصية ، وميزة النوع ده أنه بيغطى مساحة أقل من الشباك بالكامل ، وبكده التكاليف هتبقى قليلة ، بردو بيكون مناسب للاماكن اللى متقدرش تتجاهلها ، زى غرفة الطعام أو المعيشة ، ويتميز بان شكله اخف كثير من شكل الستائر العادية.

شتر الأدوار

النوع ده يغطى الشباك كله ، لكنه عبارة عن جزئين ، واحد يغطى الجزء العلوى من الشباك ، وآخر منفصل للجزء السفلى منه ، بحيث يكونوا مستقلين عن بعض ، عشان تقدر تفتح أى جزء منهم بشكل مستقل عن الآخر.

الشتر السحاب

النوع ده من الشتر مثالى جدا للابواب الجرارة أو السحابة زى مثلا بعض ابواب البلكونات او باب الليفنج المطل على لاند سكيب خارجي للبيت ، لأنه يتميز بوجود قضيب منزلق يمشى عليه وتفتحه وقت ما تكون عايز الضوء الطبيعى يدخل لك ، ويفضل مطوى على جوانب الباب ، لكنه لا يناسب الشبابيك.

شتر الشباك الأوتوماتيكي

لاضافة مزيد من الراحة فى بيتك ممكن تخلى شتر الشباك يعمل بالكهرباء سواء كان رول او مفصلى ، وايا كان خامته خشب او الومنيوم او PVC او اى نوع تانى ، كمان ممكن تخليه بسلك او لاسلكى و بريموت كنترول او بتايمر ، كل الاختيارات دى متوفرة ، تعالى نشوف ازاى نحسب مقاسات الشباك ونعرف من خلالها الموتور المطلوب.

شتر الشباك اللى ممكن تخليه يعمل بالكهرباء هو الرول والمفصلى ، لكن مفيش قوانين تحكم نوع الموتور اللى ممكن تختاره ولكن الموضوع متعلق بوزن شتر الشباك نفسه ، وبمجرد معرفة الوزن الكلى للشتر اللى يشمل (الشرائح مع الجزء العلوي والسفلي) تقدر تعرف قدرة الموتور اللى يكفى لتحريك الشتر ده.

حساب وزن الشتر

يعتمد اختيار الموتور اللازم لتحريك الشتر على مجموعة عوامل منها نوع ووزن الخامة المستخدمة فى صناعة الشتر.

وزن الشتر الخشب

يعتبر أثقل خامة فى وزنها ، المتر المربع منه وزنه حوالى 11 كيلو جرام.

وزن الشتر الــ PVC

أقل الخامات فى الوزن ، المتر المربع منه يزن 4 كيلو جرام لشرائح بسمك 8 مم و 5.5 كيلو جرام لشرائح سمكها 14 مم.

وزن الشتر الألومنيوم

شتر الالومنيوم أثقل في الوزن من PVC ، المتر المربع يزن 4.5 كيلو جرام لشرائح بسمك 8 مم و 6 كيلو جرام لشرائح سمكها 14 مم.

عشان كده مهم جدا انك تقيس عرض الشباك من اليمين لليسار وتضربه فى الارتفاع مع زيادة 20 سم لحساب القطعة اللى يتم دخولها فى البكرة الموجود بها الموتور.

مثال على طريقة الحساب

نفترض اننا هنركب شتر PVC بسمك 8 مم على شباك عرضه 120 سم وارتفاعه 115 سم يبقى الحساب كالتالى

(115+20) *120 = 162 سم

كده احنا عرفنا كمية الشرائح اللى محتاجينها باقى نضرب الرقم ده فى وزن الخامة اللى هنستخدمها

1.62*4 = 6.48 كيلو جرام يعنى نقدر نقول أن وزن الشتر هيكون 6.48 كيلو جرام.

حساب عزم الموتور

يختلف عزم الموتور المستخدم فى رفع شتر الشباك بناء على وزن الخامة اللى هيتم رفعها ، يتم التعبير عن العزم ده بوحدة نيوتن/متر ، وطريقة حسابها سهلة جدا عن طريق حاصل ضرب وزن شتر الشباك بالكامل فى 0.7 ، يعنى لو حسبنا على الشباك اللي اخذناه كمثال

6.48*0.7 = 4.53 نيوتن/متر

يعنى الحد الادنى للموتور اللى ممكن تركيبه لسحب الشتر على الشباك PVC ده هو موتور بعزم 4.53 نيوتن/متر ، وبصفة عامة المواتير المتوفرة فى السوق تبدأ من 10 نيوتن وتزيد باضافة 10 كل مرة.

الموتور فى شتر الرول

عشان تقدر تركب موتور فى الشتر الرول لازم تكون عارف قطر الانبوبة اللى فى اعلى الشتر من فوق لانها هتكون المكان اللى هيتم تخزين الشتر فيها ، وبالتالى لازم تكون اكبر من قطر الموتور نفسه ، مع مراعاة اختيار شكل محول الكهرباء المناسب بناء على شكل انبوبة الشتر نفسه إذا كانت اسطوانية أو سداسية أو مسننة.

نصيحة عامة : فى شتر الشباك الطويل بيكون عزم الموتور المستخدم فيه عالى عشان يقدر يعوض الوزن اللى بيسحبه ، حاول تبعد ايدك عن الشرائح أثناء سحبها لتجنب الاصابة.

الموتور فى الشتر المفصلي

فى النوع ده من الشتر الموضوع ابسط الى حد كبير ، لان معدات السحب والرفع مرفقة مع الشتر نفسه ، ومش محتاجة منك اى حسابات عشان تقدر تحدد الموتور المناسب ، كل شتر معروف انه متوافق مع مقاس شباك معين ، بيكون جاهز من الشركة المصنعة ، والفنى بيجى يركبه تحت عتبة الشباك نفسه.

وسائل التحكم فى شتر الشباك

شتر الشباك بريموت كنترول

لمزيد من الراحة والرفاهية ضيف للشتر ريموت كنترول ، كل المواتير اللى لها وحدة تحكم عن بعد ممكن خلالها تفتح الشتر وتقفله أو تتحكم فى كمية الضوء اللى داخلة ، وبعض الأنواع المتقدمة النهاردة بقى يمكن التحكم فيها من خلال الهاتف المحمول SmartPhone ، فيه بعض انواع الريموت ممكن تتحكم بيه فى كذا موتور مع امكانية تغيير القناة.

التحكم فى شتر الشباك بتايمر

كلنا عارفين اى اغلب اجهزة المطبخ الموجودة فى بيوتنا لها تايمر (مؤقت) للتشغيل والاطفاء على الوقت اللى تظبطها عليه ، نفس الموضوع موجود فى الشتر الاتوماتيك تقدر تظبط وقت معين بعدها يقفل ، وممكن تخليه يوميا او اسبوعيا او شهريا ، وده مفيد بالنسبة لك فى حالة السفر او الاجازات.

ممكن كمان تضيف وحدة استشعار كمية الضوء اللى داخلة من الشتر للغرفة ، عشان تشوف هل ده مناسب لك او لا ، وطبعا ده فى الانواع اللى سعرها غالى.

التنظيف والصيانة

مواعيد الصيانة الدورية تقدر تحددها بناء على عنصرين مهمين فى شتر الشباك اللى انت ركبته ، العنصرين دول هم مكان الشباك نفسه والخامة المصنوع منها ، بمعنى ان الشتر الداخلى يحتاج إلى صيانة أقل كثير من شتر الشباك الخارجى ، ممكن يقتصر على التنظيف الأسبوعي فقط وتكون الصيانة والإصلاحات وقت ما يحصل فيه مشكلة فقط.

أما بالنسبة لصيانة الشتر الخارجي ، دى اللى يحددها المادة الخام المصنوع منها ، زى مثلا الشتر المصنوع من uPVC تقدر تنظفه بنفس طريقة تنظيف شباك uPVC عن طريق المياه والخل او الصابون عشان تشيل منه الأوساخ الملتصقة.

بالنسبة للشتر الخشبي يختلف فى طريقة تنظيفه عن النوع السابق ، لأنه مصنوع من الخشب وطبيعى انه يمتص الرطوبة والمياه الموجودة حوله ، وده هيخليه عرضة للانحناء و الاصابة بالتعفن والتلف ، لذلك يجب التعامل معه بحرص إذا كان في أماكن رطبة ، عشان كده بننصح انك تدهنه باستمرار كل كام سنة ، لان زى ما احنا عارفين ان الشتر الخشبى اللى هو الشيش إذا لم يتم دهانه بصفة مستمرة يصبح لونه باهت ويتهالك وساعتها تحتاج تغيره.

تخيل لو بعد ما خلصت تشطيب شقتك عملتها بإضاءة سيئة مش هنقول بدون اضاءة لان ده مستحيل طبعا ، هيبقى شكلها عامل ازاى وقتها ، هتلاقى نفسك تعبان مش مستريح وكل شوية تتنقل من غرفة للتانية ، وده للاسف اللى بيحصل فى بيوت كتير ، عشان كده احنا جمعنا لك كل انواع الاضاءة وأشكالها وازاى تقدر تستخدمها بشكل جيد ، وتخلى ديكور بيتك روعة.

ممكن تكون عامل اثاث فى منتهى الجمال والفخامة والوان الدهان اكثر من رائعة وورق حائط جميل واكسسوارات محصلتش ، وتلاقى الاضاءة ضعيفة تدمر لك كل اللى انت عملته.

اول نقطة بتفكر فيها هى ازاى اختار نجفة شكلها يتماشى مع الديكور الموجود ، ياترى اجيبها كلاسيك بلون ذهبي او برونزى عشان تمشى مع الصالون ، ولا نجيبها بقطع كريستال كتير عشان تعمل ابهار ، ولا نجيبها بأجزاء استانلس عشان تمشى مع المكان المودرن.

للاسف مش ده اللى المفروض تبحث عنه في المقام الاول ، لازم يكون عندك خطة وتصميم لشكل الاضاءة اللى هتلبى احتياجاتك.

عشان تعمل اضاءة بيتك بشكل صحيح لازم تضيف انواع الاضاءة الثلاثة وهما عبارة عن 3 انواع ( الاضاءة الاساسية – اضاءة الوظيفة المحددة – اضاءة التمييز )

انواع الاضاءة الأساسية

احيانا تسمى الاضاءة العامة ، ودى النوع الاساسى اللى لا يمكن الاستغناء عنه نهائى ، وبتكون نوع من اتنين اما الاضاءة الطبيعية او الاضاءة الصناعية اللى بتحل محلها وقت الليل ، وهنا هنتكلم عن الاضاءة الصناعية.

الوحدات اللى بتوفر النوع ده من الاضاءة كثير منها :

النجفة او الثريا

الوحدة دى عامة الناس بتشتريها بغرض تجميل المكان اكثر منها للاضاءة ، ولكن الغرض الرئيسى هو الاضاءة مش التجميل يعنى مش لازم تجيب نجفة بمجموعة كريستالات كتير الا لو كان ده ذوقك الشخصى.

لازم تشوف اذرع النجفة اللى هتشتريها هل تكفى اضاءة المكان او لا ، وكمان تشوف عدد اللمبات الموجودة فيها ، من مميزات النجف التحكم فى الارتفاع عشان ميحصلش اى اصطدام سواء مع الاشخاص او الاشياء الموجودة تحتها.

لكن عيبها الوحيد انها غالية وده طبعا لان داخل فى تصنيعها كذا خامة بداية من المعدن المستخدم وطريقة طلاؤه والحفر الموجود وخاصة لو كانت هاند ميد او صنع يدوى ده غير الكريستال ، وعدد اللمبات ، كل دى تكاليف كتير وده اللى بيخلينا نركبها فى غرفة واحدة فى المنزل وغالبا بتكون الريسبشن او المعيشة.

اضاءة مروحة السقف

وده من انواع الاضاءة المنتشرة فى اغلب انواع مراوح السقف ، بحيث وانت جالس مع اسرتك تحت المروحة تكون الاضاءة شغالة بدل ما تستهلك اضاءة الغرفة بالكامل.

اضاءة المسطرة المتحركة Track Light

ظهر النوع ده من الاضاءة فى فترة السبعينات كشكل جديد لبعض الأغراض ، من مميزات النوع ده انه ترك مساحة فاضية على الارض لوضع وحدات اضاءة ارضية وكمان قلل من وجود الطاولات اللى كانت مخصصة للاباجورات ، وكمان فيه ميزة اساسية وهى التحكم فى اتجاهه.

التراك لايت من انواع الاضاءة اللى ممكن تركبها فى اى مكان فى بيتك ( المطبخ – المعيشة – غرفة الاولاد – الممرات وغيرها ) وطبعا ممكن تتحكم فى اتجاهها على لوحة فنية على الحيطة مثلا او على ديكور لحيطة عايز تظهره وواحد يكون على الارض.

كشافات السقف ( اشهر انواع الاضاءة )

ودى انتشرت فى فترة السبعينات وتقريبا دخلت كل البيوت وخاصة اللى كانت بتتبنى فى الفترة دى ، تسمى فى لغة السوق كشافات دفن ، لان الجزء الغاطس منها بيتم دفنه اما فى السقف المعلق او فى السقف الخرسانة نفسه.

يتكون الكشاف من الجزء المعدنى (العلبة) واللمبة نفسها ، وبيتم دفن الجزئين مع بعض داخل السقف ، وده من اشيك انواع الاضاءة اللى ممكن تركبها عندك وهو ده سبب انتشاره لحد الان ان مفيش اجزاء بارزة منه تحت السقف.

الاضاءة الارضية Torchiere

تعتبر واحدة من انواع الاضاءة المنتشرة جدا ، ترجع تسميتها بالاسم ده نسبة لكلمة Torch الفرنسية ولان طريقتها فى الاضاءة تشبه اضاءة كشاف Torch من حيث خروج الضوء من الشكل المخروطى العلوى لها.

ميزة النوع ده انه مش بيحتاج مساحة كبيرة على الأرض ويعطي اضاءة كبيرة جدا للسقف تنعكس على الغرفة كلها ، وطبعا يتوفر منه كل الاستايلات اللى تناسب اى ديكور سواء كلاسيك او مودرن او غيره.

اضاءة الحوائط الابليك ( اقدم انواع الاضاءة )

ده يعتبر اقدم نوع موجود ، وهو من الانواع اللى بيتم تركيبها على الحوائط وممكن تتحكم فيها بمفتاح مدمج بدل ما تتحكم فيها بمفتاح على الحيطة نفسها.

من مميزات النوع ده ان له استخدامات كتيرة وده طبعا على حسب نوع الغرفة او المكان الموجود فيه وكمان شدة اضاءته ، ده غير انه يختلف عن باقى الانواع زى اضاءة السقف او الاباجورات لانه مش بيشغل اى مساحة من السقف او الارضية او حتى الطاولات.

استخدامات الابليك كتير جدا ، ممكن مثلا تستخدمه فى الممرات لعمل اضاءة رائعة على اللوحات ، وممكن تستغلها فى ركن للقراءة فى غرفة المعيشة ، وممكن يستخدم كاضاءة جانبية لغرفة النوم وده يفيد جدا انك تترك الكومود فاضى لاى اغراض تانية او اذا كانت غرفة نومك ضيقة ومش مستوعبة وجود كومود بجانب السرير فيها.

بالاضافة كمان انك ممكن تستخدمه فى المدخل بحيث يعطى اضاءة على طاولة المفاتيح ، او على حوائط المدخل نفسها او اللوحات الفنية الموجودة فيها.

كتير من الناس فاهمة وظيفة الاضاءة الاساسية ، ولكن بتقف عند النوع ده ومتفكرش فى اى نوع غيره ، فى حين انه الاساس فقط ومن الضرورى انك تضيف باقى انواع الاضاءة عشان يكتمل ديكور بيتك.

انواع الاضاءة الوظيفية

من اسمها نقدر نفهم انها صممت لأداء وظائف معينة زى القراءة على مكتب او المذاكرة او تجهيز الطعام فى المطبخ او تناوله على السفرة او عمل المكياج على التسريحة ، كل دى من ضمن الوظائف اللى ممكن تؤديها بالنوع ده من الاضاءة.

لو بصينا على الوحدات اللى ممكن تستخدم لعمل الاضاءة الوظيفية هنلاقى كتير جدا منها :

الاباجورات العادية

ودى من ضمن انواع الاضاءة اللى ممكن تخدم وظيفة معينة زى القراءة مثلا ، ومش بس تعطى اضاءة لا كمان بتعمل شكل جمالى وتظهر ديكور المكان لما تخرج اضائتها من منطقة معينة فى الغرفة.

برغم ان الاباجورات من انواع الاضاءة القديمة ، الا انها يتوفر منها اشكال كتير جدا فى الاسواق منها المودرن والكلاسيك وغيرها اللى تتماشى مع اى ديكور ، ومن مميزاتها انك ممكن تخليها فى غرفة النوم على الكومود او على طاولات جانبية للكنبة فى غرفة المعيشة.

الاباجورات المكتبية

اغلب بيوتنا اللى فيها مكتب للمذاكرة او حتى لتخليص ورق الشغل او الجلوس على الكمبيوتر بيكون فيها مصادر اضاءة من السقف واحيانا ابليك على الحيطة ، ولكن من الخطأ انك تظن ان المصادر دى كفاية ، لان انواع الاضاءة دى مش مخصصة لأداء مهام القراءة والكتابة.

من الضروري انك تجيب اباجورة مكتب لأداء النوع ده من الوظائف لانها تحتاج اضاءة مركزة مش اضاءة الغرفة بشكل عام.

اضاءة علب المطبخ ( من انواع الاضاءة المبتكرة )

تخيل معايا ان مطبخك اضاءته فى السقف كافية جدا لكن لما تيجى تشوف الكاونتر الرخام تلاقى الاضاءة فيه مش كفاية وخاصة اثناء تجهيز الطعام بتكون ست البيت محتاجة اضاءة اكتر ، عشان كده ظهرت اضاءة علب المطبخ كنوع جديد من انواع الاضاءة اللى تساعد على رؤية اوضح.

من مميزات النوع ده انه سهل جدا فى التركيب وله اشكال والوان متعددة ، فيه منه اللمبات الفلورسنت وفيه منه شريط LED وفيه كمان كشافات تشبه كشافات السقف ، وبيتم تركيب اى نوع من دول اما على مصدر الكهرباء الرئيسي أو على بطاريات.

وحدات الاضاءة المتدلية

وتسمى احيانا فى السوق المعلقات ، ودى من انواع الإضاءة المبتكرة حديثا ، وظهرت فى اواخر التسعينات كتطوير لاضاءة السقف العادية ، وبيتم تركيبها من السقف بقضيب معدنى او سلسلة او احيانا 3 سلاسل لو كانت بـ 3 لمبات.

متوفر منها اشكال كتير جدا ، احيانا تلاقى لمبة واحدة واحيانا تلاقى اتنين واحيانا اكتر من كده وتصاميم بكميات ماهولة تناسب كل الاذواق ، واللى بيميز النوع ده من الاضاءة انها ممكن تتركب فى المطبخ او الممرات او فوق طاولة السفرة واحيانا فوق المكتب ، لانها من انواع الاضاءة الوظيفية يعنى المركزة بهدف معين.

اضاءة الزينة

ودى تشبه الى حد كبير الابليك ولكنه مخصص لاضاءة مرايا الحمام او التسريحة فى غرفة النوم ، وبما ان المرايا وكاونتر الحمام هما اهم نقطتين فكان لازم يبقى فيه اضاءة تركز على المنطقة دى وتظهرها.

متوفر منها فى الاسواق اشكال ومقاسات والوان كتير جدا بحيث تتناسب مع جميع اشكال الحمامات ، وهنلاحظ فى الفترة الاخيرة ظهرت بعض المرايات المدمج فيها لمبات كتير زى الموجودة فى كواليس السينما ، النوع ده من الاضاءة هو تحديث للشكل ده.

الاضاءة الارضية Lampadaire

طبعا دى من انواع الاضاءة المنتشرة جدا فى بيوت كتير ولو لاحظنا هنلاقيها تشبه الى حد كبير اضاءة Torchiere ولكن بتغيير فى الاتجاه بدل ما كانت لفوق وتنعكس من السقف لكل انحاء الغرفة دى بتكون مركزة فى اتجاه معين.

وزيها زى الاباجورات الجانبية ممكن تخليها على اى جانب من جوانب الكنبة فى غرفة المعيشة لو كنت مثلا من هواة القراءة أو الجلوس أمام الكمبيوتر الخاص بك.

اضاءة التمييز

بعض الناس تظن ان النوع ده من الاضاءة متخصص لاضفاء جو معين زى الجو الرومانسى او التحفيزى لنشاطات معينة ، لكنه فى الحقيقة أكثر من كده.

السر وراء النوع ده من الاضاءة هو اظهار بعض التفاصيل المعمارية والعناصر المهمة فى المكان ، وعشان كده سميت اضاءة التمييز لأن وظيفتها تجذب انتباهك من النقط العادية الى النقطة المهمة.

وبرغم ان دى من اهم انواع الاضاءة فى اخفاء الاخطاء والثغرات الموجودة فى الديكور ، الا انها مهملة بشكل كبير جدا فى الثلاث انواع المذكورين ، ويتوفر منها انواع كتير جدا هنذكر منها بعضها :

الاضاءة الارضية السفلية Uplight

اول حاجة كانت تخطر على بالنا لما نحب نظهر اى جزء مهم سواء كان لوحة فنية او حيطة فيها تصميم جديد ، كنا نركب عليها ابليك ، ولكن ظهرت فكرة جديدة ان الاضاءة تكون طالعة من الارضية نفسها مش من الحوائط ولا السقف ودى تعتبر فكرة مبتكرة جدا وزاوية محدش فكر فيها قبل كده.

وعشان كده هنلاحظ فى واجهات مبانى كتير المهندس المعماري او المصمم بيخلى بعض أجزاء الواجهة مضيئة من تحت مش من فوق بشكل تقليدى ، لذلك هنلاقى شكل الواجهة اصبح مختلف تماما بتغيير اتجاه الاضاءة.

اضاءة الشموع

ودى طبعا اكتر نوع مشهور جدا فى خلق اجواء رومانسية وهادية فى بعض المطاعم او الكافيهات او على طاولات السفرة فى بيوتنا.

الاضاءة الموجهة

ودى فيه منها اشكال كتير زى بعض الاسبوتات الموجهة لنقطة معينة ، وهنلاحظ واحنا بنشترى النوع ده ان فيه محور داخلى واللمبة بتلف مع اتجاه المحور ده ، وفيه كمان إضاءة مساطر Track Light موجهة لزوايا معينة ، ودى بردو تستخدم لنفس الغرض ، يعنى ممكن مثلا توجهها لحيطة معينة عندك او لوحة شكلها جميل او لمكتبة الشاشة.

اضاءة البانوهات

طبعا كلنا شفنا النوع ده من الاضاءة فى البانوهات للمدخل او الغرف ، وده بهدف اظهار المحتوى الموجود داخل المربع او الدائرة للبانوه سواء كان دهان جديد او لوحة مرسومة او ملمس مختلف بارز للحيطة.

تعتبر اضاءة البانوهات من انواع الاضاءة المميزة جدا واللى انتشرت بشكل واسع فى كل ستايلات الديكور.

من انواع الاضاءة ( المخفية )

وده من انواع الاضاءة اللى تم استحداثها فى الفترة الاخيرة واستخدمت فى اماكن كتير جدا منها المطابخ ، وهنلاحظ وجودها فى كاونتر المطبخ سواء كان رخام او خشب فى الاطار الخارجى له وفى علب التخزين من الداخل ، لذلك هنلاحظ انتشارها عند محلات بيع اكسسوارات المطبخ لأنها تخدم الغرض ده.

من ضمن استخدامات النوع ده طبعا بيت النور فى السقف لعمل جو هادى بدل استخدام الإضاءة الأساسية والمباشرة ،  فلو كنت بتدور على شكل جمالى يبقى النوع ده من الاضاءة يناسبك جدا وخاصة مع توفر الوان كتير جدا منه.

دى باختصار انواع الاضاءة الموجودة ، وهنا ممكن نقولك ملاحظة ، ممكن نوع واحد منهم يؤدى كذا وظيفة ، يعنى مثلا كشافات إضاءة السقف واضاءة المسطرة Track ممكن يؤدوا وظيفة الثلاث انواع وده على حسب ما انت توجههم.

لما تيجى تضيف اضاءة التمييز لازم تسأل نفسك سؤال ، انت محتاج الجو العام لكل غرفة يكون ازاى ؟ وايه العناصر اللى تحب انك تظهرها وايه العناصر اللى تحب انك تخفيها.

وخلى دايما فى اعتبارك القطع المهمة زى لوحة فنية او كرسى شكله جميل أو حيطة فيها تجليد شكله جديد وعايز تظهره او ستارة مبتكرة او بلاطات 3D ، كل دى عوامل تخليك تختار افضل اضاءة عشان تبين ديكور بيتك.

اختيار مقابض ابواب الغرف فى بيتك ممكن يحول الباب من مجرد قطعة خشب من الاحتياجات الأساسية لتحفة فنية فى كل غرفة.

هنتعرف مع بعض فى الموضوع ده على على الانماط والاشكال المختلفة لمقابض الابواب والاكر وازاى تقدر تكمل بيهم ديكور بيتك سواء كانوا فى غرفة او فى الباب الرئيسى فى المدخل.

طبعا مفيش باب يكتمل شكله النهائى بدون مقبض يعطى له رونق ، لأنه بجانب وظيفته فى الفتح والقفل يعتبر بمثابة قطعة جوهرة فى الغرفة وده من خلال ربط شكل الباب مع بعضه كوحدة واحدة فى التصميم.

لان الباب لو اصبح قطعة واحدة من الخشب هيكون شكله ممل ، ومن هنا ظهرت اهمية مقابض ابواب الغرف فى التصميم ، ومش بس كده ده هو الوسيلة الوحيدة اللى هتساعدك فى المرور بين الغرف وبعضها.

برغم ان مقابض ابواب البيت هى قطع صغيرة ومش كتير بيركز عليها الا انها محتاجة تأنى فى الاختيار عشان تتناسب مع شكل الباب الخشب.

بالاضافة الى انها تؤدى الغرض المطلوب وتعيش أطول عمر افتراضي ممكن وتناسب المهمة اللى اتعملت عشانها و تناسب الاستخدام اليومي المتكرر.

في اختيارات كتير جدا موجودة من حيث الشكل والنوع والمقاس واكيد وانت بتدور فى السوق على مقابض ابواب هتختار الشكل اللى يكمل لك ديكور الباب نفسه ، هى دى اهم نقطة هتدور عليها ، لكن تبدأ منين ؟

عشان كده احنا هنعرض لك فى الموضوع ده الاشكال والانماط الموجودة وايه اشكال الابواب اللى ممكن تناسبها المقابض دى مع بعض النصائح اللى هتفيدك وانت بتختار.

مقابض ابواب عادية ولا اكرة رافعة

هنا بقى يجى الاختيار المهم اللى لازم تاخد فيه قرار وهو هل تختار مقابض ابواب عادية ولا اكرة بشكل الرافعة وخاصة أنه أصبح متوفر منهم اشكال كتير منها البسيط والمزخرف و اللامع والمطفي بكل اشكاله.

مقابض الابواب

هى الاقدم تاريخيا وتعتبر الاختيار الشائع والمنتشر إذا كنت بتدور على العمر الافتراضى لانها أجزائها الميكانيكية اقل من الاكرة الرافعة عشان كده عمرها طويل وده اللى خلى القائمين على تطويرها يحسنوا من أشكالها من حيث الخامة والشكل والتصميم عشان تتناسب مع اشكال وتصاميم الابواب سواء كانت مودرن او كلاسيك او اي نمط تانى.

الاكرة الرافعة

النوع ده تم ابتكاره عشان يعطيك مساحة أكبر من التحكم فى القفل والفتح لانها من روافع النوع التانى وده يعتبر اقوى انواع الروافع عشان كده سميت اكرة رافعة بسبب ميكانيزم شغلها.

تتميز اكر الروافع أن شكلها يبدو موردن وحديث اكتر من المقابض العادية حتى مع تطور شكل المقابض الثابتة لكن ده شكله افخم وجديد.

الاختيار راجع ليك ولذوقك الشخصى وكمان شكل الباب وتصميمه و ده اللى هيخليك تحدد اذا كنت هتشتري المقبض التقليدى ولا اكرة الرافعة.

اشكال مقابض الأبواب والاكر

اكرة بوش خلفى

النوع ده من الاكر يناسب الأبواب الكلاسيكية اكتر لانه شكله معتاد وموجود بقاله فترة طويلة فى السوق.

اكرة على وش دائرى

النوع ده كان موجود من فترة كبيرة وكان له نفس الوش الدائري او المربع وبيسمى في لغة السوق روزتة وبدأ يرجع تانى بقوة بعد ما حصل له تطوير كبير وده بسبب ان شكله بسيط وينفع يتركب فى اماكن كتير يعنى له استخدامات متعددة.

يختلف شكل الروزتة على حسب تصميم الاكرة نفسها ممكن يبقى مربع او دائرة عشان يتناسق مع شكل الاكرة إذا كانت مودرن او كلاسيك او حتى اى نمط تانى.

مقبض كلاسيكى

غالبا النوع ده بيستخدم فى الأبواب التقليدية و فى الاستايلات القديمة كانت هى الاكرة نفسها مكانش شكل الاكرة المعروفة حاليا يعنى كان لازم تلف المقبض يمين او شمال عشان تفتح او تقفل.

مقبض مودرن

وده طبعا شكله مستحدث كتير عن الشكل القديم عشان يناسب الابواب المودرن وهنلاحظ أن الزخرفة والحفر فيه قليل ومش بس كده ده كمان خامتها تطورت جدا مبقاش قاصر على المعدن ولكن اتعملت اليد من الزجاج او العاج واحيانا البورسلين والخشب.

ازاى تختار مقابض الابواب

عشان تختار مقابض ابواب صح فيه مجموعة نقط مهمة لازم تاخدها فى اعتبارك عشان متلاقيش نفسك صرفت على البند ده كتير وفى النهاية محصلتش على الشكل والوظيفة المرغوبة ، تعالى نشوف ايه العوامل دى.

تصميم و شكل الباب

شكل الباب نفسه والفنش المعمول فيه من أهم العوامل اللي بتأثر على اختيار المقابض والاكر.

باب الحشوات

النوع ده من الابواب موجود بكثرة فى بيوتنا القديمة وده بسبب انتشار طريقة التصنيع دى فى الوقت ده ، وهنلاحظ منها النوع اللى فيه 4 حشوات أو ستة واحيانا بيختلف عن كده على حسب شكل وتصميم الباب نفسه ، ولما نيجى نختار مقبض أو اكرة للنوع ده من الابواب نحاول نختار شكل كلاسيكى عشان يتناسق معاه.

باب القوائم الخشبية

وده بيختلف المسمى الخاص بيه على حسب البلد الموجود فيها ، ميزة النوع ده من الابواب انه يمشى على الاماكن المودرن والكلاسيك يعنى ممكن تلاقى الاستايل ده من الابواب في البيوت القديمة وممكن تلاقيه فى اماكن مودرن ودى احنا نفذناها عند بعض العملاء في مطعم كان ستايله مودرن.

الباب المكبوس

النوع ده من الابواب بيكون له طبقة خارجية تغلف خشبه الداخلى اما من الكونتر او الأبلكاش أو MDF على حسب التصنيع وهى اللى بتعطى الشكل الجمالى للباب نفسه لانها بتكون ملزوقة بطبقة من القشرة.

من ضمن انواع القشرة هنلاقى الارو ، الماهوجني ، الأبنوس و بيتش باين وانواع غيرهم كتير ودول بيكونوا متناسقين مع المقبض اليدوى اكتر من الاكر باختلاف شكل القشرة نفسها وطريقة الفنش المعمولة بيها.

الباب المدهون

الأبواب المدهونة ظهرت كشكل بديل عن شكل القشرة لان لها مظهر عصرى مودرن جدا وفى نفس الوقت تعتبر حل اقتصادي لأن تكلفة القشرة ولزقها وتركيبها بيكون مكلف فى بعض الاوقات.

هنلاقى منه الابيض والرماديات والكحلى بدرجات كتير جدا سواء لامع او مطفى وفى الحالة دى اللى ينفع معاه اكتر هى الاكرة المودرن.

الأشخاص المستخدمين

اختيار مقابض الأبواب بيعتمد على استخدام كل باب فى بيتك وطبعا الشكل والاستايل المناسب لذوقك ، بعض الناس بتفضل المقابض العادية اكتر.

وبعض الناس بتفضل الاكر لان فيها ميزة مهمة وهي انها مناسبة للاستخدام بالنسبة لكبار السن والاطفال لان لو ركزنا أكثر هنلاقى ان المقبض العادي عبارة عن نص كرة عشان تفتح الباب او تقفله محتاج تلفه وبالتالى انت محتاج قوة عضلية اكتر ، لكن الاكرة مش محتاجة نفس المجهود ده.

طبيعة المكان والبيئة الموجود فيها الباب

لو لفيت السوق او حتى بتدور على الانترنت هتلاقى مقابض ابواب واكر باشكال وانواع كتير جدا وطبعا كل نوع من دول له الباب اللى يناسبه والمكان اللى يناسبه عشان كده ممكن الاختيار ياخد معاك وقت اطول.

يعنى مثلا لما تلاقى مقبض باب لونه برونزي يشبه قطعة الانتيكة يبقى علطول من غير ما تفكر ده يناسب الباب الكلاسيكى فى مكان الوانه دافية زى النبيتى والاحمر  ، فى حين ان لو بيتك الوانه باردة زى الاخضر او الازرق يبقى انت محتاج مقابض أبواب من النيكل او الاستانلس او البورسلين.

لو انت موجود فى اماكن حارة أو استوائية او مكان مطل على البحر يبقى لازم تختار قطع تتحمل الظروف الموجودة زى الرطوبة والحرارة والمياه المالحة ، يعنى مش من المنطقى انك تشترى مقبض له يد خشب وانت بيتك مطل على البحر وفيه نسبة رطوبة لأنه بالتالى مش هيعيش كتير.

عشان كده بننصح باختيار القطع الاستانلس بالتحديد لانها الاكثر مقاومة للعوامل الجوية وكمان فى المساحات والغرف الداخلية اختار الاستانلس اللى له لمعة عالية جدا وهنا بقى نحب نوجه نصيحة مهمة ، ركز على ان الخامة تكون من الاستانلس مش حديد و مطلى نيكل لان الحديد المطلي هيتآكل ويصدى مع مرور الوقت.

الميزانية

آخر عنصر هتاخده فى اعتبارك هو الميزانية لان الاهم منه هى العوامل اللى قلناها ، عشان كده وانت بتجدد فى بيتك فى بند مقابض ابواب وشبابيك البيت هتلاقى نفسك بدأت تعمل حساب المعلومات الجديدة اللى قلناها فى الاول وتصرف عليها اكتر.

لازم تخلى بالك ان مقابض الابواب دى حاجة هتستخدم مئات المرات فى الشهر ، عشان كده لو فكرت فى منتج رخيص هتوفر فى الوقت الحالى شوية فلوس لكن بعد كده تأكد انك هتدفع اكتر لانه مش هيكون معمر بالنسبة لك و هتضطر تغيره.

بردو من النقط المهمة اللى تخليها فى اعتبارك انك لو اشتريت ابواب جاهزة من براند غالى مثلا يبقى مفيش داعى انك تشترى لها مقابض رخيصة لان ده هيقلل من قيمة وشكل الباب ، وزى ما هو معروف ان مدخل البيت او المكان اللى انت فيه بيزيد من قيمته بنسبة حوالي 10% إذا تم الاهتمام بيه بشكل كويس.

من اكثر الأشياء التى تؤثر على الشعور بالراحة أثناء جلوسك فى المنزل هى فرش الارضية بالسجادة المناسبة. سنتعرف في هذا الموضوع على النقاط التى سوف تساعدك وانت تختار احسن سجادة لمنزلك بدون ان الحيرة بين الألوان والخامات والاشكال الموجودة في السوق. السجادة هي قطعة ديكور جميلة في غرفتك سواء في المنزل او المكتب ، فهى تحدد ملامح الغرفة وتعطى منظر جميل.

الأنواع الرديئة تبلى بسرعة و تتآكل وليس هذا فقط فكل بقعة ستظهر عليها حتى بعد كل محاولات التنظيف الممكنة. لذلك سوف نتحدث عن الارشادات والنصائح التى يجب ان تراعيها أثناء اختيار احسن سجادة لمنزلك.

المكان الذى سوف توضع فيه السجادة

كل مكان في المنزل أو المكتب له السجادة التى تناسبه وتتماشى مع مدى استخدامه وايضا تتناسق مع التصميم الخاص به. على سبيل المثال: الممر وغرفة المعيشة من اكثر الاماكن التى تستخدم في المنزل حتى اكثر من غرف النوم. لذا يحتاجون دائما الى سجاد يتحمل كل هذا الضغط والحركة ويكون أيضا سهل التنظيف.

وينصح دائما باستخدام سجادة داكنة سواء كانت سادة او مزخرفة بنقش حتى تخفف من شكل التراب عليها إذا كانت في مكان به الكثير من الضغط.

اختيار مقاس احسن سجادة لمنزلك

وانت تشترى و تختار احسن سجادة لمنزلك لابد ان تأخذ المقاس الصحيح ، ولا ينبغى ان تقوم بافتراضه او تشتري بالتقريب. يجب ان يكون القياس صحيح تماما حتى تحصل على أفضل سجادة مناسبة للمكان ويكون المنظر العام للغرفة جميل ومتناسق ، ولتحقيق ذلك لابد ان تراعى هذه النقاط:

لا تجعل السجادة عائمة

كلمة السجادة العائمة اطلقها الخبراء على السجادة عندما تكون صغيرة على أرضية الغرفة الموجودة فيها.

مثال توضيحى: فى غرفة النوم لا تجعل المسافة بين طرف السجادة وحوائط الغرفة تزيد عن 50 سم، لان اكثر من ذلك سيكون المنظر سىء جدا. ولذا سميت بالعائمة لانها تشبه القطعة الصغيرة العائمة في البحر.

الهدف من السجادة ليس مجرد لون ونقش جميل على الأرض فقط. ولكن السجادة لها بعد تصميمى للمكان وهو تناسق القطع الموجودة لانها تقوم بربط بصرى بين قطع الأثاث وبعضها. لذلك لا يجب ان تكون بمفردها في وسط الغرفة بدون ملامسة قطع الاثاث الموجودة. بل على الاقل تلامس بعض اجزاء منها حتى يكون المنظر العام جذاب.

تجربة المقاس قبل الشراء

اذا كنت لا تستطيع تخيل شكل المقاس، فيمكنك ان تقوم بتجربة بسيطة وبدون اى تكلفة. وهى ان تقوم بفرش ورق جرائد لديك مكان الجزء الذي ستقوم بفرش السجادة به وتري هل المقاس مناسب ام لا.

وبالطبع لابد ان تراعى انه كلما زادت مساحة السجادة فإن لونها سيكون مسيطر على الغرفة بشكل كبير.

أهمية الشكل عند اختيار احسن سجادة لمنزلك

لا يوجد سبب او مؤثر يلزمك بشراء سجادة مربعة او مستطيلة، فإذا كان شكل الغرفة مربع او مستطيل والحوائط خطوط مستقيمة ليس من الضرورى ان يكون شكل السجادة مستطيلا.

اذا كنت تمتلك ترابيزة سفرة دائرية فستحتاج الى سجادة دائرية حتى يحدث تكامل فى الشكل، او اذا قمت بتركيب سقف معلق على شكل بيضاوى فيجب ان تكون السجادة بنفس الشكل.

لون السجادة

وهنا سنتحدث عن النقطة التى يحتار فيها الكثير عند الاختيار ، وهى لون السجادة.

لابد ان تري ما هى الالوان المفضلة لديك وتحب وجودها امامك باستمرار وتشترى السجادة بها ، لانك بالتأكيد ستراها يوميا اذا لم تكن تقضى يومك كله معها.

لون السجادة ينعكس على منظر الغرفة و لذا فهو قرار هام جدا لابد ان تقرره بعناية واهتمام.

الاثاث والمفروشات لكى تختار احسن سجادة لمنزلك

اذا كنت تمتلك الكثير من الاثاث والمفروشات ، او اذا كانت دهانات الغرفة بألوان مختلفة وكذلك ورق الحائط ان وجد ، فبالتالي ستكون الغرفة مليئة بالالوان ولذلك فستحتاج الى اختيار سجادة بلون هادئ ولا تحتوى على الكثير من الزخرفة، حتى يكون المنظر العام مريح وانيق وغير مزعج.

أما اذا كان منزلك ليس به الكثير من الاثاث فهنا يكون اختيار احسن سجادة لمنزلك على اساس الوان الدهانات والسقف وكذلك لون الأرضية، ستحتاج الى اختيار الوان تتماشى مع الوانهم وليس نفس الالوان حتى يحدث تكامل ويكون الشكل العام متناسق.

بمعنى اذا كانت الحوائط او المفروشات بالوان ثابتة ، فيجب ان يحتوى السجاد على نقوشات وزخرفة لكى تحصل على شكل جميل فى الغرفة او المنزل. والعكس اذا كنت تمتلك مفروشات مزخرفة او كاروهات فستكون السجادة بلون ثابت.

القاعدة هنا عبارة عن توازن بصري لابد ان يكون هناك اختلاف بين الوان الاثاث او المفروشات والسجاد حتى يحدث تكامل وتناسق ويصبح الشكل عام انيق.

خامة السجادة

خامة السجادة او نوع السجادة او بمعنى اخر ملمس السجادة اسفل قدميك ومدى عمرها الافتراضى. لذا لابد ان تركز عند اختيار احسن سجادة لمنزلك على الانواع الجيدة لكى تناسب احتياجاتك ولا تهلك بسرعة.

وفى النقاط التالية سنوضح لك انواع الخامات التى يصنع منها السجاد، وتنقسم الى قسمين رئيسين:

خامات طبيعية

الخامات الطبيعية مثل الصوف والقطن والحرير وهى تستخدم دائما في السجاد اليدوى (هاند ميد) ويتم تصنيعه من اجود خامات الغزل ولذا فهو اقوى واعلى فى السعر من السجاد المميكن.

وتتميز الخامة الطبيعية بطول عمرها الافتراضى وايضا لا ينبعث منها اى مواد ضارة مع مرور الزمن، ولكن لا يقوم بشرائها الكثير من الناس بسبب سعرها المرتفع، ولذا فهى غالبا ما تكون فى منازل الطبقات العالية.

الصوف

هو الاختيار الشائع لدى بعض الناس لانه من الخامات القوية التى تتحمل الضغط ولذا فهو منتشر.ومن أسباب انتشار هذه الخامة انها متعددة الاستخدامات، بمعنى انها لا ترتبط بمكان معين فيمكنك ان تقوم بشرائها لأكثر من غرفة ، كما يوجد منها الكثير من الالوان المتنوعة لانها خامة سهلة الصباغة وأيضا عمرها الافتراضى طويل بدون ان يختفى لونها او يتغير.

ومن مميزات الصوف انه لا يمتص السوائل بسهولة وبالتالى ستكون سجادة مناسبة جدا لغرفة المعيشة والاولاد. لكنها تمتص الرطوبة ولكن بعد مرور وقت طويل وهذا يعطي الفرصة للقيام بتنظيفها قبل ان تتلف.

القطن

يتوفر هذا النوع من السجاد بالوان كثيرة وذلك لانه سهل الصباغة والتلوين ايضا، ويعتبر البديل الناعم للجوت والسيزال او ما يطلق عليه (خيش).
ويتميز هذا النوع بقدرته على التحمل و سهولة تنظيفه حيث يتم ذلك بسهولة فى مغسلة السجاد دون ان يتلف او يسوء.
هذا النوع يتميز عن الصوف بانخفاض سعره وشكله العصرى، وهذا ما يجعل اغلب الناس تقوم باختياره.

الجوت والسيزال (الخيش)

الجوت او ما يسمى (القنب) نسبة للنبات المستخرج منه والسيزال من الخامات القوية جدا التى تجعل من السجاد قوى ومتماسك.
يتيح هذا النوع من الخامات طرق نسج وتفصيل غير متاحة في الخامات الاخرى بسبب القوة التى يتميزون بها.
وهذا النوع مناسب جدا لمن يعانون من الحساسية لانه لا يخرج منه الالياف الصغيرة (الوبر) المعروفة بالنسبة للانواع الاخري.
ولكن يجب ان تعلم عند الشراء ان هذه الخامات قوية وبالتالى سيكون ملمسها خشن على عكس الصوف والقطن. كما انها تمتص الرطوبة وهذا يجعلها عرضة للاتساخ ولا تستطيع تنظيفها من البقع بسهولة.

الحرير والفسكوز

خامات ناعمة وسهلة الصباغة لانها خامات تمتص السوائل بسهولة ، لكنها خامات غير قوية على حده. ولكن تستمد قوتها من الخامة الموجودة معها كالصوف، وهذا يعطيها الكثير من السمك والفخامة واللمعان.

خامات صناعية

تصنع هذه الخامات على ماكينات ونول كهربائى على عكس الخامات الطبيعية (الصناعة اليدوية). ويتميز هذا النوع بانك تستطيع التحكم في اللون والنقش والمقاس ، عن طريق ادخال البيانات إلى جهاز الكمبيوتر ويتم تفصيل السجادة بهذه البيانات.

النايلون

النايلون خامة صناعية يوجد منها عدد لا نهائى من الالوان، مقاوم للاتساخ الى حد ما وسهل التنظيف.يتحمل الضغط والظروف الشاقة لذا يستخدم في الكثير من المنازل وله مظهر ناعم ولامع يشبه نعومة الحرير. مشكلة هذا النوع انه مصبوغ باصباغ حمضية لذلك تختفى الوانه بسرعه اذا تعرض للشمس.

البولى بروبيلين

خامة مصنوعة من مواد هيدروكربونية من مشتقات البترول وهذه من اشهر الخامات المستخدمة في تصنيع السجاد.
سبب انتشار هذه الخامة ان ملمسها ناعم مثل الصوف وتتميز بمقاومة البقع والاتساخ. وتحتفظ باللون لمدة طويلة جدا كما ان سعرها في متناول الجميع.
من ضمن المميزات ايضا انها تتحمل الرطوبة والشمس ولذا يتم استغلالها في الأماكن الخارجية.
عيوبها انها غير مرنة يعنى على سبيل المثال: اذا تم وضع قطعة اثاث فوقها فستترك بها علامة ولا تستطيع ازالتها بسهولة.

البوليستر

هذه من اكثر الخامات التى تتحمل الضغط وكثرة الحركة وتحتفظ بألوانها،كما انها معروفة جدا في الأسواق العربية والعالمية.تعتبر صباغته بالألوان مهمة صعبة الى حد ما ولذا لا يوجد منه الكثير من الالوان.
من اكثر عيوبه انه يختلط بالزيوت بمعنى اذا وقعت علبة من الزيت علي الارضية سيحدث بقعة كبيرة غير قابلة للتنظيف لان البوليستر يتفاعل مع الزيت.

طول الالياف

عندما تقرر ان تشترى وتختار احسن سجادة لمنزلك لازم لابد ان تضع بعين الاعتبار طول الالياف او ما يعرف بالشعر او خيوط النسيج.

ستجد خيط قصير وخيط طويل ، يتميز الخيط القصير بأن السجادة تكون اقوى وامتن من النوع الطويل كما انها سهلة التنظيف بالمكنسة ، على عكس الشعر الطويل وتتميز ايضا بانخفاض السعر عن النوع الاخر.

سجاد الشعر الطويل يعطى احساس بالراحة والرفاهية اكثر عندما تقوم بملامسته بقدميك كما انه يعطى منظر انيق جدا للغرفة.

الخلاصة انك ترى ما هو المناسب لاستخدامك وتختاره للشراء. المكان الذى يتميز بكثرة الحركة والضغط فيكون الافضل لك السجاد ذو الشعر القصير. واذا كان الضغط قليل سيكون الشعر الطويل هو الاختيار الامثل وستحصل على منظر جميل وجذاب.

تعد الستائر من أكثر الاكسسورات المكملة لديكور المنزل، ولها لمسة جمالية مميزة، هي جزء مهم جدا يتم اختياره بعد اختيار الفرش والاثاث واكيد ان اختيارك الصحيح سينعكس تأثيره على جمال المنزل، لذا لابد ان نعرف ازاى نختار ستائر المنزل بعناية ودقة.

حيث ان لها استخدامات اخري مثل: حجب ضوء الشمس ومنع دخول الاتربة واعطاء خصوصية للمكان وايضا الشعور بالدفء والراحة.

واختيار الستائر له تفاصيل كثيرة جدا سوف نتحدث عنها في هذا الموضوع وسنعرف ما هى العوامل التى تؤثر على اختيارنا وتوجهنا الى الشكل النوع المطلوب تماما.

تصميم المنزل مودرن ام كلاسيك

اول عامل لابد ان يكون فى الاذهان عندما نفكر ازاى نختار ستائر الشقة هو تصميم الشقة، حيث ان كل نظام له تفاصيله الخاصة المختلفة عن الاخر تماما،  المنزل المودرن يتطلب نوع قماش خفيف والوان هادئة وعصرية وايضا لابد ان تتكون من طبقة واحدة وليس عدة طبقات.

اما المنزل الكلاسيك حيث التفاصيل الكثيرة والتى تكون فى الغالب عبارة عن زخارف ونقوشات فلابد ان يكون شكل الستارة كلاسيك بكامل اكسسواراته حتى يتناسب مع الذوق ويكون مكمل له بنفس النظام.

تحديد مكان الستارة

كل مكان له الخصوصية التى تعبر عنه وهذا لابد ان ينعكس ايضا على شكل الستارة ونوع قماشها وطريقة تفصيلها وهنا سنعرف ازاى نختار ستائر لكل مكان على حده.

غرفة النوم

تحتاج الى ستارة قوية حتى تحجب اشعة الشمس وتعطى شعور بالخصوصية والدفء، وينبغى ان تكون الوانها فاتحة وهادئة ويفضل ان يكون مفرش السرير والستارة بنفس القماش والالوان او الوان متقاربة وايضا نفس التصميم او النقش فهذا له لمسة جمالية خاصة.

غرفة الأطفال

هى اكثر غرفة معرضة للاتساخ، ولذا لابد ان نراعى ونحن نختار ستائرها ان تكون مكونه من طبقة واحدة، و من خامة خفيفة ونوع القماش يكون سهل التنظيف ، وتختلف طبيعة الالوان على حسب نوع الأطفال بنات ام أولاد.

غرفة المعيشة

تعد اكثر مكان تتجمع فيه العائلة ولذلك لابد ان تكون بالوان مبهجة حيث الشعور بالطاقة والحيوية، ونتجنب تماما الألوان الداكنة او الثقيلة حيث الإحساس بالملل. كما لابد ان تكون الستارة بسيطة ورقيقة وهادئة بدون زخارف ونقوشات كثيرة حتى لا ترهق العين وتشتت الانتباه والتركيز.

ويفضل ان تكون خفيفة حتى تستطيع ايصال اشعة الشمس وتعطى فرصة لدخول الضوء الطبيعى.

غرفة الاستقبال او الصالون

من اكثر الأسئلة التى تحير المقبلين على الزواج اثناء تجهيز منزلهم:كيف نختار ستائر الصالون؟.

يحتاج الصالون الى ستارة قيمة لانه مكان استقبال الضيوف وغالبا ما يكون شكل الستائر على هيئة براقع مكونة من طبقات ثقيلة، ويكون نوع القماش مثل القطيفة سواء سادة او منقوش حيث انه من الاقمشة الفاخرة.

ويختلف شكل البرقع بتفاصيله على حسب نوع الأثاث والفرش الموجودين في المكان، على سبيل المثال يمكنك عمل برقع مكون من طبقة واحدة ونزالة وتكمل الشكل بالاكسسوارات (الكلفة) الخاصة بالستارة.

او يمكنك عمل برقع مكون من اكثر من طبقة و2 نزالة وباقى الاكسسوارات الخاصة به.وفى الاونة الاخيرة هناك اتجاه لعمل البرقع من قماش القطيفة او اى خامة اخرى مع لصق ما يسمى ب(بلاست اويما) عليه حتى تعطى انطباع بالفخامة والرقى.

غرفة المكتب

يحتاج الى ستائر عملية ورسمية اكثر حتى تكون مناسبة لجو العمل مثل: شرائح قماش البوليستر المقاوم للاشتعال او شرائح من المعدن او ستائر الرول.

المطبخ

غالبا يحتاج الى قماش خفيف سهل التنظيف، لا يمتص البخار ولا روائح الطبخ،وايضا مهم جدا ان يكون غير قابل للاشتعال، اما عن شكله فيمكن ان يكون سادة او مزخرف على حسب شكل المطبخ نفسه وطبيعة تصميمه.

الحمام

غالبا يكون فيه ستارتين.

1. ستارة للشباك

   تكون عبارة عن طبقة واحدة سادة اذا كان الحمام مزخرف، ومزخرفة بنقش اورسم بسيط اذا كان الحمام سادة. وبالطبع لابد ان تكون سهلة التنظيف وعازلة للمياه.

2. ستارة للبانيو

عبارة عن ستارة بلاستيكية تمنع وصول المياه الى الارضية حيث الشكل الجذاب للمكان.

 طبيعة المكان

بالطبع كل مكان في المنزل له عوامل مختلفة تؤثر عليه مثل ضوء الشمس والرطوبة ودرجة الحرارة. ولذا يعتبر عامل مهم لابد من التركيز عليه ونحن نفكر ازاى نختار ستائر المنزل بكل اركانه.

على سبيل المثال اذا كان المكان اكثر عرضة لمواجهة الشمس فسوف تحتاج الى ستائر تقلل من تسرب الاشعة اليك. ويجب ان تكون الوانها هادئة وفاتحة كالأخضر والازرق والأبيض والفيروزى وهذا على عكس المكان البعيد عن اشعة الشمس.

اما اذا كان المكان بارد جدا فسوف يحتاج الى ستائر ثقيلة من الصوف او القطيفة حتى تساعد فى تدفئة المكان وتعطىك إحساس بالحرارة.

اذا كان المكان ضيق سنحتاج الى ستارة قريبة من السقف لكى تعطى إحساس بالاتساع. وينبغى ان تكون الوانها زاهية ومبهجة وليست من  الألوان الغامقة لانها تعطى احساس بضيق المكان.

عندما يكون سقف المكان مرتفع فسوف نحتاج الى النزول قليلا عن السقف ثم نركب الستارة. ويفضل ان تكون الستارة على شكل كرانيش حيث الايجاء بانخفاض ارتفاع المكان، والعكس صحيح اذا كان السقف منخفض.

ألوان الدهانات والاثاث

يجب ان تقوم باختيار الستائر قبل دهان الحوائط واثناء اختيار الاثاث، وليس من الضرورى ان تكون نفس اللون بل ينبغى ان تكون مكملة ومتناسقة معهم.

مثلا, اذا كان الحائط اوف وايت او بيج فيمكن ان تكون الستارة بنى او نبيتى او زيتى. او اى لون يتماشى مع هذا اللون وليس شاذا بالنسبة له.

واذا كان السجاد مزخرف او الحوائط او السرير فلابد ان تكون الستائر سادة او خفيفة والعكس صحيح.

كما يمكنك ان تجعل لون الستارة نفس لون المخدات في الانتريه او ركنة الليفنج، او نفس الزخرفة والنقش في غرفة المعيشة فهذا يعطى جمال واناقة للمكان.

اذا كانت مساحة الشباك كبيرة فينبغى ان نختار الستائر بنقش كبير وعريض ، لان ذلك يوحى باتساع بصرى للمكان، واذا كان الشباك صغير فيكون نقش بسيط وهادىء، ويكون مقاس الستارة اكبر من مساحة الشباك.

اختيار شكل الستارة

بعد مراعاة كل هذه  العوامل اللى ذكرناها يحين وقت اختيار شكل الستارة. هل ستكون بلون واحد ام مزخرفة ام طبقة واحدة ام اكثر؟ وهل ستكون عبارة عن شكل برقع ام ستارة فقط على مواسير او أعمدة؟ وهل ستكون طويلة ام قصيرة؟ كل ذلك يكون على حسب تفضيلاتك الخاصة بعد بحثك سواء فى الكتالوجات او على الانترنت. ويمكنك ايضا ان تشارك أرائك مع من سيقوم بتفصيل الستائر الخاصة بك لكى تستقر على الشكل المناسب للمكان ولك شخصيا.

نوع القماش مهم لكى نختار ستائر المنزل

اخر نقطة سننتحدث عنها بالنسبة لموضوع ازاى نختار ستائر الشقة هو نوع القماش.

الشيفون

قماش شفاف الوانه كثيرة يمكن ان تقوم بتركيبه بمفرده، او فوق بطانة من التل او القطن او الشيفون لكى يكون اكثر سماكة وايضا لاظهاره بشكل افضل، وغالبا ما يستخدم في الأماكن المودرن.

الاورجانزا

قماش قيم وسعره مرتفع وله لمعة خاصة بشكل جميل تزيد من اظهار الزخارف المرسومة عليه ليصبح مظهره خلاب. ويفضل ان يكون اسفله طبقة بطانة حتى تمنع دخول الضوء الخارجي ويحجب الرؤية. ولكن عيبه انه غير عملى ومرهق فى الاستخدام وصعب التنظيف بسبب ملمسه ومسامه الناعمة التى تسوء اثناء الغسيل.

الحرير

من ارقى وافخم الاقمشة حيث انه قماش ناعم وشديد التأثر بأى شيئ يحدث له. لذا فإنه يحتاج الى عناية خاصة، كما ان سعره مرتفع جدا لذلك لا يفضله الكثير من الناس ويسبعدونه اثناء الاختيار.

الساتان

قماش لامع ولكنه اقل من لمعة الاورجانزا يوجد منه نوع سادة واخر منقوش. ويتميز بانعكاس جميل في الضوء خيث يكون منظر المكان راقى جدا. يتميز بانه عملى في الاستخدام وسهل فى التنظيف ولكن بعناية وحذر.

القطيفة

قماش ناعم، سميك وفخم كما ان له اناقة مميزة وجذابة. وكثيرا ما يستخدم في الأماكن الكلاسيك حيث الفخامة والذوق الرفيع.

الكتان او القطن

عبارة عن قماش ناعم وله الوان كثيرة، يسهل الحصول عليه كما انه عملى في الاستخدام وسهل فى التنظيف وسعره مناسب لكل الناس تقريبا.

ازاى نعرف مقاسات الستارة المطلوبة

بالنسبة لقياس العرض سنزيد ضعفين او 3 اضعاف عرض الشباك ، اما الطول فتكون الستارة ملامسة للأرض او اعلى منها بمسافة بسيطة ، وكل المعلومات التى سوف تحتاج الى معرفتها عن مقاسات القماش ستجدها فى موضوع تفصيل الستائر.

عمود الستارة او الماسورة او البلتكانة فستكون اعلى الشباك بحوالي 15-20 سم لكى تعطى انطباع بصري بطول الستارة ، واذا كنت تريد اظهار الشباك بشكل اعرض فيجب ان تكون الماسورة اكبر من عرض الشباك بحوالي 15-20 سم ايضا.

تنظيف الستائر

إزالة الاتربة يوميا باستخدام المكنسة او التنفيض المستمر لها.

غسل الستائر الخفيفة بالمياه كل فترة حتى تكون زاهية. وينصح بعدم عصرها في الغسالة حتى لا تسوء او تنقطع اثناء العصر او ان تجعل درجة العصر منخفضة. وبذلك لاتحتاج الى الكى كل ما عليك ان تقوم بتركها فى الشمس حتى تجف تماما من المياه.

اما الستائر الثقيلة فتحتاج الى التنظيف بماكينة البخار من اعلى لاسفل وليس العكس.