ناس كثير تعرف مراحل تشطيب الشقة وبتشتغل فيها لوحدها بدون ما ترجع لمهندس متخصص ، ويظن انه كده بيوفر الأتعاب اللى بياخدها المهندس او الشركة المتخصصة ، لكنه ميعرفش ايه اللى ممكن يقابله وهو شغال في الشقة ويفاجىء بعد ما يخلص انه محتاج يركب التكييف فيضطر يكسر فى الحيطة ، عشان يقدر يركب الوحدة الداخلية وتوصيلات الكهرباء اللازمة لجهاز التكييف ويرمم التكسير اللى اتعمل باسمنت او جبس ويبقى الشكل سيء جدا ، لكن اللى غايب عنك فى الموضوع ده مرحلة من ضمن مراحل التشطيب بنعتبرها أساسية وهي تأسيس التكييف الاسبليت واللى بيتم فيها كل التجهيزات اللازمة لتركيب التكييف مستقبلا اذا حبيت تركبه فى اى وقت.
كلنا عارفين اكثر نوع تكييف مستخدم فى بيوتنا وحتى الشركات والمكاتب بيكون من النوع سبليت Split وهو عبارة عن وحدة داخلية بتكون داخل الغرفة اللى احنا فيها ، ووحدة خارجية بتكون خارج الغرفة واللى فيها الكمبريسور ، واللى بيوصل الهواء البارد بينهم مجموعة مواسير نحاس ، وطبعا فيه كابلات كهرباء عشان جهاز التكييف يشتغل.
عشان تشغل التكييف وتكون مستريح فيه الموضوع مش هيبقى قاصر على اختيارك لنوع تكييف جيد واختيار احسن مكان مناسب له فى الغرفة وبس ، لا الموضوع له ابعاد تانية كثير تؤثر على ادائه وهو شغال من ضمن الأبعاد دى هى مراحل عملية تأسيس التكييف الاسبليت ، واللى أصبحت جزء مهم من مراحل تشطيب الشقة.
ايه هى عملية تأسيس التكييف الاسبليت
تأسيس التكييف الاسبليت هى عبارة عن عملية تشبه تأسيس السباكة وتأسيس الكهرباء من حيث تكسير محارة الحوائط ودفن المواسير بداخل الحيطة ، لكن يزيد على كده دفن نوع تانى من المواسير وهى مواسير تبريد التكييف المصنوعة من النحاس النقى ، واللى بتوصل الهواء البارد ما بين الوحدة الخارجية والداخلية.
مكان الوحدة الداخلية
يتم تركيب الوحدة الداخلية على قاعدة معدنية ، يفضل انك تركب القاعدة المعدنية بمسامير ربط قوية لحد ما تكون ثابتة تماما ، مع مراعاة انها تكون مستوية تماما وده تقدر تختبره بميزان المياه العادى او الديجيتال لضمان تركيبها بمستوى افقى ، وخلى بالك لو مكانتش القاعدة مستوية وكان فيها ميول هتلاقى مياه الصرف مش هتخرج مظبوط.
اختيار مكان الوحدة الخارجية فى تأسيس التكييف الاسبليت
ثانى جزء من اجزاء التكييف هو الوحدة الخارجية ، ودى لازم تعمل حسابك انها تكون متركبة فى مكان بعيد تماما عن اى جزء من الغرفة ، زى البلكونة او المنور لأنها تصدر اصوات وينتج عنها اهتزازات تختلف من كل نوع للثانى ، لذلك ننصح بوضع قطعة من الفوم تحتها بينها وبين الحامل المعدنى لدعمها عشان تقلل من الاهتزازات وهى شغالة.
من اهم النقط اللي لازم تراعيها أثناء تركيب الوحدة الخارجية أن يكون قدامها مسافة كافية لتحريك الهواء الساخن الناتج عن تبريد الكمبريسور الداخلى ، على الاقل 60 سم من قدام المروحة لطرد الهواء الساخن و 30 سم من وراء المروحة ، عشان دائرة التهوية تشتغل بشكل مظبوط ميكونش فيها اى اعطال.
فيه مجموعة نقط كثير لازم تراعيها أثناء مرحلة تأسيس التكييف الاسبليت ، من ضمن النقط دى بالنسبة للوحدة الخارجية وخاصة لو كنت ساكن فى شقة سكنية فى عمارة مع سكان تانيين ، يبقى الحل الوحيد بالنسبة لك فى الحالة دى هو أن الوحدة الخارجية تتركب فى البلكونة ، وطبعا لازم تعرف مقاسات البلكونة عندك كام بالظبط وتشوف مقاسات الوحدة الخارجية كام عشان تشوف تتناسب معاها او لا ، وده هتلاقيه مكتوب على مواصفات التكييف على الانترنت او فى موقع الشركة المصنعة أو الكتالوج الخاص به.
المحافظة على الوحدة الخارجية
أهم نقطة تخلى بالك منها انك تحذر جدا من تغطية المروحة الخاصة بتبريد الكمبريسور ، لان لو ده حصل ممكن يحرق الكمبريسور الداخلى لانه بيكون سخن جدا اثناء الشغل ومحتاج تبريد مستمر ، وده طبعا بيظهر فى التكييفات العادية أكثر من الانفرتر ، لانها بتشتغل مدة اطول وعشان كده استهلاكها فى الكهرباء أعلى.
كمان من النقط المهمة اللى لازم تراعيها هو إنك تحافظ على سلامة الوحدة الخارجية ، بمعنى انك طالما هتركبها فى البلكونة يبقى ممنوع نهائى تخلى فوقها اى اوعية زرع او شوايات لو كنت بتحب تعمل الباربكيو فى البلكونة ، لإن ده مش بس هيضيع لك ضمان الجهاز لكن ده ممكن يتلفه ، كمان مينفعش انك تغطى المروحة لأنها وسيلة التبريد الوحيدة للكمبريسور الداخلى ، واحنا كنا بنأسس اماكن لبعض التكييفات فى بيوت اكتشفنا ان اصحاب البيت كانوا مغطيين مروحة التكييف وللاسف الجهاز اتحرق.
مواسير صرف المياه فى نظام تأسيس التكييف الاسبليت
تخيل معايا انك مركب تكييف سبليت وانت قاعد فى بيتك او مكتبك هتلاقى نقط مياه بدأت تنزل من فتحة خروج المياه الموجودة في الوحدة ساعتها بتوصل توصيلة او خرطوم بلاستيك داخلي يملا علبة او زجاجة فارغة ولحظة ما تمتلىء بالمياه تفرغها وهكذا.
تخيل كمية المعاناة دى مع الوحدة الداخلية أو الوحدة الخارجية لما تلاقى ماسورة صرف المياه خارجة فى الشارع بترمى المياه بالطريقة دى ، طبعا دى طريقة عشوائية ، لكن فيه حل هندسي بسيط جدا بيتعمل فى تأسيس التكييف الاسبليت وهو ماسورة صرف بلاستيك يتم تركيبها فى الحيطة مع التأسيسات اللى بتتعمل زى ماسورة التبريد وزى تمديدات الكهرباء ، ونقطة نهايتها بتكون فى الصرف الرئيسى للمكان سواء كانت بلاعة او اى وسيلة تانية لتجميع مياه الصرف.
زى ما احنا عارفين المياه تتجه ناحية الاتجاه المائل ، لذلك مهم جدا انك تحدد اتجاه ميول الماسورة اللى هيمشى فيها مياه صرف التكييف ، يعنى مثلا خلى المسافة العمودية بينها وبين الوحدة الداخلية على الأقل 40 سم لضمان عدم ارتجاع المياه ناحية الوحدة الداخلية مرة ثانية إذا كانت المسافة قريبة ، بعد المسافة العمودية يتم عمل ميول للماسورة لضمان خروجها بأمان ناحية الاتجاه اللى هتصرف فيه المياه.
فيه نقطة مهمة جدا أثناء تأسيس التكييف الاسبليت وتحديدا فى تركيب ماسورة الصرف انك لازم تعمل لها اختبار قبل مرحلة الفنش وتغطية الحيطة بالمحارة ، وده إجراء أغلب الشركات اللى بتركب التكييفات بتعمله لضمان عدم تسرب اى كمية مياه ، لان لو حصل تسرب للمياه أثناء الصرف هتبقى كارثة لانها هتعمل تلف فى خرسانة السقف والأرضيات.
توصيل تمديدات الكهرباء فى تأسيس التكييف الاسبليت
زى اى جهاز كهربائى لازم يكون فيه عندك كابلات لتغذية التكييف بالكهرباء ، ودى من الحاجات اللى هتعمل حسابك عليها أثناء عمليات تأسيس التكييف الاسبليت ، هتكسر جزء من الحيطة لتمديد ماسورة الكهرباء اللى هيتم فيها تمديد السلك المناسب اللى هيشغل الجهاز بعد كده.
عشان تقدر تحسب كمية الكهرباء اللازمة لتشغيل التكييف تقدر بحسبة بسيطة تحسبها او تقرأ موضوع كابلات الكهرباء ، ومن خلاله هتعرف بالظبط ايه هى كثافة السلك المطلوبة اللى تقدر تركبه بعد كده عشان التكييف يشتغل بأمان.
وهنا نحب نقدم لك نصيحة من الخبراء ، وهى أنه يفضل انك تخلى كهرباء التكييف على مفتاح اتوماتيك مستقل ميكونش محمل على نفس المفتاح المخصص للغرفة اللى انت فيها عشان لو حصل له اى مشكلة زى شورت كهربائي مثلا او حصل فيه عطل ومحتاج صيانة ، تقدر تفصله براحتك بدون ما تطفى الاضاءة وباقى اجهزة المكان اللى انت موجود فيه.
مواسير التبريد فى تأسيس التكييف الاسبليت
هنا بقى النقطة المهمة جدا واللى من غيرها مش بس شكل المكان عندك بيكون سيء جدا ، لا دى كمان من اسباب ضعف التبريد في جهاز التكييف وهى مواسير التبريد الخاصة بالتكييف ، و اللى بتشوفها فى الاماكن اللى مكنش معمول لها تخطيط من البداية ، وبتلاقيها عبارة عن مواسير نحاس مع كابلات كهرباء ملفوفين بشريط لاصق ابيض او اى لون واصلين من الوحدة الخارجية للوحدة الداخلية لتوصيل الهواء الخاص بالتبريد وهو غالبا بيكون غاز الفريون.
عشان يكون شكل بيتك أو مكتبك انيق مينفعش ابدا تكون المواسير دى ظاهرة فى الخارج بالشكل ده ، ده بالاضافة ان كده خطر جدا لان لو حصل اى صدمة للمواسير دى او اتخبطت بأي طريقة ممكن تسرب غاز الفريون وده ملوث جدا للبيئة ، وكمان هيقلل العمر الافتراضى للتكييف لأن غاز التبريد بيتسرب للخارج مش بتستفيد منه فى تبريد المكان.
مكان تركيب مواسير التبريد
عشان تعمل تأسيس التكييف الاسبليت بشكل صح لازم تكون المواسير دى مدفونة داخل الحيطة مع مراعاة انها تكون باقل مسافة ممكنة ، وهنا نقدر نقولك على نصيحة مهمة وهى انك تحاول تخلى المسافة بين الوحدة الخارجية والداخلية قريبة عشان متجبرش جهاز التكييف انه يشتغل لفترة أطول فترة ممكنة وبكامل قوته عشان يقدر يبرد المكان ، وده هيقصر عمر التكييف الافتراضي لانه كده هيشتغل فترات كثير ، لكن لو بقت مسافة المواسير اقل هيعطى فرصة للتكييف انه يفصل.
من النقط المهمة جدا اللي لازم تراعيها أثناء عملية تأسيس التكييف الاسبليت هى ان ميكونش فيه انحناءات كثير فى الماسورة النحاس لتوصيل غاز التبريد بكل طاقته ، بالاضافة الى وجود الفوم العازل سليم ومش مقطوع من اى جزء فيه.
لو كنت مضطر لتمديد مواسير النحاس الخاصة بالتبريد لمسافة طويلة تزيد عن 120 سم ، يبقى حاول انك تضيف دعم للماسورة كل 120 سم عشان تضمن انها تفضل مستوية معاك ميحصلش فيها انحناءات طول المسافة وهي ممدودة.
جودة مواسير التبريد
عشان تحصل على تبريد مثالى من جهاز التكييف عندك ، لازم تتأكد من جودة المواسير النحاس اللى بتوصل الهواء البارد من الوحدة الخارجية للداخلية ، ودى مش بس مستخدمة فى التكييف لكن كمان مستخدمة فى الثلاجة واى جهاز له منظومة تبريد عموما.
لازم تكون المواسير من نوع جيد جدا عشان تضمن سلامة وصول غاز التبريد بين مكونات الجهاز ، والا يتسرب للخارج ويبقى كل اللى انت بتعمله بدون فائدة ، او يدخل بعض المؤثرات الخارجية جوة نظام التبريد زى الرطوبة او الاتربة ، ودى ممكن تسبب ضعف في اداء التكييف او ممكن تتلفه.
أثناء تصنيع المواسير النحاس ، يتم تنظيف الطبقة الداخلية للمواسير وتجفيفها قبل ما يتم عزلها عشان تفضل بنفس حالتها لحد ما تشتريها وتركبها بين أطراف وحدات التكييف ، كمان من النقط اللى لازم تراعيها انك تستخدم غاز تبريد ميتفاعلش مع المواسير النحاس زى الأمونيا ، ده ممنوع استخدامه نهائى لانه يتفاعل مع النحاس.
انواع المواسير النحاس
نوع صلب
النوع ده من المواسير صلب جدا وقوى ويتحمل الضغط الشديد ، مش من السهل انه يتشكل وتعمل فيه انحناءات ولا ينصح اصلا انك تعمل فيه كده ، متوفرة بأطوال تتراوح بين 3 – 6 متر ، ومتوفر منه 3 أوزان مختلفة كل نوع منهم له اسم بحرف انجليزي يمثل درجة سماكته وتخانته.
اكثر نوع سميك هو K ، يليه L ثم M ، لو كنت بتدور على ماسورة كثافتها عالية لتحمل الضغط العالى يبقى النوع اللى كثافته K هو الأنسب لك ، وبالنسبة للنوع L تتراوح أقطارها ما بين 1.25 – 8 سم لتناسب كل أغراض التبريد.
نوع مرن
النوع ده مرن جدا وسهل فى تشكيله له رمز كودى ACR وده يعتبر هو النوع المثالي لكل أغراض التبريد والتكييف ، وده يعطيه ميزة رائعة لأنه هيتشكل بسهولة وهيمشى داخل الحوائط ، من ضمن مميزاته يتم تنقيته وتجفيفه تماما من اى نسبة رطوبة موجودة فيه ، بعد كده يتم تعبئتها بالنيتروجين قبل ما تتقفل ، يتوفر منه لفات باطوال تتراوح ما بين 7.5 – 15 متر وباقطار ما بين 0.3 – 4 سم لتناسب كل أغراض التبريد.
نصائح عامة فى تأسيس التكييف الاسبليت
عشان تتفادى اى اخطاء ممكن تحصل بعد كده لتأسيس التكييف الاسبليت اللى انت عملته ، يفضل انك تحتفظ بنسخة من الرسومات الهندسية المعمولة لخطوط التبريد والكهرباء وصرف المياه ، لان لو مش معاك المخططات دى ، ممكن بمنتهى البساطة أثناء الصيانة فى الحوائط او تخريم بالشنيور ممكن الفنى بدون ما يعرف يخرم اى ماسورة فيهم ، ساعتها هتلاقى الغلطة دى تكلفك كثير ، وعشان تتفادى المشاكل دى ممكن تستخدم جهاز الاستشعار اللى بيحدد لك مكونات الحائط من الداخل سواء مواسير نحاس او بلاستيك او كابلات كهرباء.
مصادر الصور
الغلاف phonrat/shutterstock
