السنة: 2020

وانت بتختار الشبابيك فى بيتك بتقف فترة محتار فى اختيار الخامة المناسبة ، وبتلاقى خامات كثير ممكن تختار منها زى الخشب والزجاج والالومنيوم و uPVC ، وبتفضل تسأل نفسك اسئلة كثير من ضمن الاسئلة دى اعمل شبابيك الومنيوم ولا uPVC بحكم انهم أشهر خامات موجودة فى السوق النهاردة ، ياترى ايه الافضل بالنسبة لك فى البيت ، فى الموضوع ده هتعرف ايه مميزات وعيوب شبابيك الالومنيوم و uPVC عشان تقدر تختار الخامة والسعر المناسبين لك.

تكوين شبابيك الومنيوم و uPVC

شبابيك uPVC تتكون من خامة تشبه PVC المصنوع منها المواسير ولكن مع الفرق انها غير مرنة ، وصلبة جدا ومصممة لتحمل الحريق واصعب الظروف ، يتم تصنيع الشبابيك من قطاعات من uPVC (Unplasticized Polyvinyl Chloride) ، يتم تقطيع القطاعات دى لعمل الحلق والشباك وبالتالى يظهر الشكل النهائى للشباك زى ما بنشوفه.

بالنسبة لشباك الألومنيوم يتكون الحلق والشباك نفسه من مادة الألومنيوم ، واللى بيتم دهانها عن طريق الدهان الالكتروستاتيك ، او دهان البودرة.

قوة التحمل اكبر فى شبابيك الومنيوم ولا uPVC

اشتهرت خامة uPVC فى صناعة الشبابيك من فترة الثمانينات ، تتميز بقوة تحملها للظروف الصعبة ومقاومتها للتعفن ، وده معناه ان عمرها الافتراضى طويل وتحتاج لصيانة أقل ، ولكنها ممكن تتهالك مع مرور السنين ولكن بمعدل أقل من الشبابيك الخشب ، وتحتاج تغيرها بعد مرور حوالى 20-30 سنة وده طبعا يعتبر عمر افتراضى طويل جدا.

الالومنيوم بردو خامة قوية جدا تقدر تتحمل أصعب الظروف ، عشان كده ممكن يصل عمره الافتراضي الى 45 سنة وبعد كده تفكر في تغييره ، لانه مش بيتهالك بنفس درجة uPVC ، بالاضافة الى ان خامة الالومنيوم غير قابلة للصدأ وده هيخليك مطمئن ان شبابيك بيتك مش هتكون عرضة للصدأ ابدا.

عزل الحرارة افضل فى شبابيك الومنيوم ولا uPVC

من النقط المهمة اللى تخطر فى بالك لما تسأل وتقول شبابيك الومنيوم ولا uPVC هي مسألة عزل الحرارة ودى تعتبر أهم نقطة هتفكر فيها هى عزل الصوت والحرارة ، وده اللى خلى الاتجاه لخامة uPVC اكثر من الألومنيوم الفترة الاخيرة ، لان الالومنيوم خامة موصلة جيدة جدا وبالتالى الحرارة تتسرب من خلالها بشكل كبير ، وده اللى خلاها شبه مستبعدة من الاختيار لما تقرر شبابيك الومنيوم ولا uPVC .

لكن مع التطور اللى حصل اصبحت شبابيك الالومنيوم فى الفترة الاخيرة معدلة بحيث تقاوم الحرارة بشكل أفضل ، لذلك هنلاحظ أنها طردت الجزء الأكبر من الحرارة ومنعته من الوصول لداخل المكان ، حتى أن بعض الشركات المصنعة استخدمت طبقات من مادة (الأيروجيل) وهي مادة شبه شفافة تعزل الحرارة تماما من الأسطح زى المكوك الفضائى وبدل الفضاء ، ودى من ضمن خصائصها أنها تقاوم درجات حرارة تصل الى 400 درجة مئوية ، لكن ممكن خامة الألومنيوم المعزولة متبقاش متوفرة فى بلادنا العربية.

يعنى لو هنتكلم عن عزل الحرارة من المؤكد ان خامة uPVC هتكون الافضل فى البند ده لانها خامة من مشتقات البترول مش معدنية زى الألومنيوم.

وعشان توصل لاداء عالى فى مسألة مقاومة الحرارة والصوت وانت عندك شباك الومنيوم يبقى من المفضل انك تعمله بزجاج دبل (مزدوج) ، عشان تقدر توصل لنفس كفاءة uPVC فى العزل.

وعشان تتأكد من الأداء فى العزل لازم تعرف فئة الخامة اللى هتصنع منها الشباك ، ودى عبارة عن مجموعة فئات تبدأ من ++A ودى اعلى فئة انتهاء بفئة D ودى اقل فئة ، طبعا يفضل انك تختار اعلى فئة لضمان أقصى درجات العزل ، وهتلاقى كل البيانات دى مكتوبة على ماركة الالومنيوم أو uPVC وهى قطاعات سليمة قبل تقطيعها ، وطبعا ده فى الماركات المعروفة هتلاقى لها ورقة خاصة او استيكر عليه كل بياناتها.

الأمان فى شبابيك الومنيوم ولا uPVC

بفضل قوة الخامتين وتحملهم للظروف الصعبة يتمتعوا بقدر كافى من الأمان ، بعكس شبابيك الخشب اللى عمرها الافتراضي قليل وبتكون معرضة لأي كسر وبتتحطم بسهولة ، ويعتمد مستوى الأمان فى شبابيك الالومنيوم و uPVC على جودة الاكسسوارات الموجودة زى المقبض والقفل (الكالون) ، لان ده هو اساس الامان فى اى باب او شباك.

عامة إذا اخترت شبابيك الومنيوم ولا uPVC فاطمئن انك فى درجة عالية من الامان ، لان الخامتين على مستوى جيد جدا.

عزل الصوت أفضل فى شبابيك الومنيوم ولا uPVC

من أهم النقط اللى بتبحث عنها وانت بتختار ما بين شبابيك الومنيوم ولا uPVC هي مسألة عزل الصوت ، لو بصينا للخامتين هنلاقى بعض الاختلافات في مسألة عزل الصوت ، لذلك نلاحظ ان خامة uPVC تتفوق بنسبة أكبر من الألومنيوم فى مسألة عزل الصوت ، لكن ده مش معناه ان الالومنيوم سىء جدا فى العزل أو لايصلح لا طبعا ، لكن uPVC افضل بنسبة أكبر فى عزل الضوضاء الخارجية.

وعشان نوضح الموضوع بتفصيل اكثر ، السبب الرئيسى فى عزل الصوت فى شبابيك الالومنيوم او uPVC هو الزجاج نفسه مش خامة الشباك ، لذلك لو ركبت اى نوع من دول فى الشبابيك ومحتاج تعمل عزل صوتى جيد ، حاول تركب زجاج دبل (مزدوج) ، ولو عايز اداء افضل منه ممكن تركب زجاج ثلاثي الطبقات وده افضل بكثير من المزدوج واغلى فى السعر ، عشان كده يتم تركيبه فى استوديوهات الصوت لانها محتاجة عزل تام.

لو انت مقيم فى منطقة نسبة الضوضاء فيها عالية ، يبقى الاختيار الافضل لك هو uPVC ، ولكن بالنسبة لبيوتنا العادية الفرق بين عزل الصوت اللى يحققه الالومنيوم واللى يحققه uPVC بسيط جدا مش هنلاحظه احنا بسهولة ، عشان كده مسألة عزل الصوت لا تعتبر معيار فى الاختيار بين خامة الالومنيوم و uPVC

الشكل الجمالى افضل فى شبابيك الومنيوم ولا uPVC

شبابيك الالومنيوم

من ضمن الاسباب اللى ادت لانتشار الألومنيوم بقوة فى الايام الاخيرة هى نعومة ملمسها وشكلها ، وعشان كده هنلاقى ان قطاعات الالومنيوم ابسط فى الشكل واقل فى السمك فى قطاعات uPVC ، وده اللى مخلى شكل الشباك ابسط واخف بالنسبة للعين بدون زحمة تفاصيل ، عشان كده هى الاختيار الأول فى البيوت المودرن.
تتميز شبابيك الالومنيوم بوجود كمية الوان كثير جدا لان معظمها يتم دهانه بدهان البودرة وده متوفر منه كمية ألوان كبيرة جدا ، وده يخليها الاختيار الاول لك عشان تناسب اى ستايل ديكور ممكن تركب عليه.

من مميزات قطاعات الالومنيوم انها انحف من قطاعات uPVC وده معناه ان خطوطها اقل ، وده هيخلى شكل الشباك افضل كثير ، لذلك لو انت بتدور على شكل جمالى لواجهة بيتك يبقى الشبابيك الالومنيوم افضل لك.

كمان فيه نقطة تضاف لخامة الألومنيوم وهى برغم من نحافة قطاعاتها الا انها قوية جدا ، وتستوعب تركيب اى زجاج بداخلها ، وده هيخليك لو عندك شباك كبير تقدر تعمله بقطعة زجاج واحدة مش محتاج تقسمه لقطع ، وده هيخلى الاضاءة الطبيعية افضل بكثير فى حالة تركيب شبابيك الومنيوم.

بعض الناس تحب أن الالومنيوم ياخد نفس الوان الخشب بالظبط وده موجود واسمه التجارى (خشمونيوم) ، وده هو الاختيار الافضل للى بيحب شكل الأخشاب الطبيعية وبيدور على قوة تحمل أعلى من الخشب زى الموجودة فى الألومنيوم.

بردو من ضمن إمكانيات الالوان فى شبابيك الالومنيوم انها ممكن تتلون بألوان خاصة زى بعض التشبيحات الفضية اللى تشبه ألوان الرخام او النيكل اللامع ، وده عشان تقدر تعمل تناسق بين كل شباك والغرفة الموجود فيها والشكل العام لمنزلك ، وده مش متاح فى شبابيك uPVC

شبابيك uPVC

اشتهرت شبابيك uPVC فى الفترة الاخيرة ان شكلها ضخم وده بسبب ان قطاعاتها اكبر من الالومنيوم ، ده غير ان الشكل البلاستيكى لها مش مفضل عند كثير من الناس لذلك يفضلوا الألومنيوم أكثر منها.

اغلب البيوت هنلاقى فيها شبابيك uPVC بلون ابيض ده لان سعر اللون الابيض اقل من باقى الالوان وهو ده سبب انتشاره ، لكن فيه منه الوان كثير متاحة لو حابب انك تغير عن الشكل التقليدى ، او اذا كان ستايل بيتك محتاج الوان مختلفة هتلاقى فيه شكل الخشب بتجزيعاته الطبيعية.

اسعار شبابيك الالومنيوم و uPVC

اسعار شبابيك الالومنيوم اعلى من شبابيك uPVC ، وده بسبب ان خامة الألومنيوم اغلى والتصنيع والتقفيل سعره اعلى ، بالاضافة الى ان خامة الألومنيوم اقوى من uPVC وعشان كده عمرها الافتراضي أطول ومعمرة اكثر ، وده اللى بيخلى بعض الناس تتجه لها ، ده غير ان شكل الألومنيوم افضل الى حد كبير من uPVC لان قطاعاته اقل فى السمك وده بيخلى شكلها شيك.

يعنى لو عندنا شباك الومنيوم هيتكلف كام ؟ ده سؤال صعب اجابته لأنه خاضع لاعتبارات كثير ، زى اتساع الشباك نفسه فى الحيطة ، وعدد التقسيمات اللى هيتم تصنيعها ، والزجاج عادى ولا مزدوج ولا ثلاثى ، وجودة القفل نفسه (الكالون) ، ولون الشباك لان تكلفة الالومنيوم اللى بلون خشبى احيانا بتوصل لضعف سعر اللون العادى ، بالإضافة الى خامة الألومنيوم نفسها هل هى فرزة اولى ولا من الخردة (السكراب).

دائما وانت بتقارن بين شبابيك الومنيوم ولا uPVC لازم تخلى فى اعتبارك كل النقط اللى ذكرناها ، الزجاج ولون الشباك نفسه والمقابض والقفل أو الكالون وباقي الاكسسوارات المستخدمة ، لان كل دى عوامل تؤثر على سعر الشباك فى النهاية ، وعامة كل ما تكون مقاومة الشباك للحرارة اعلى ونسبة الامان فيه اكثر يكون سعره اغلى بغض النظر عن خامته إذا كانت الومنيوم او uPVC

الافضل شبابيك الومنيوم ولا uPVC

مش معنى انتشار الخامتين دول فى السوق يبقى مفيش غيرهم ، لكنهم انتشروا بسبب قوة تحملهم واسعارهم المقبولة ، لكن الاختيار يعتمد على متطلباتك انت بالتحديد ، ومن وقت دخول خامة الالومنيوم و uPVC فى تصنيع الشبابيك وتحقيقهم لاغلب المتطلبات الموجودة زى عزل الحرارة وعزل الصوت وتحقيق الشكل الجمالى ، أصبح من الصعب اننا نحكم على خامة منهم انها افضل من التانية.

شبابيك الالومنيوم انتشرت بقوة فى أخر 10 سنوات بسبب قوة تحملها واسعارها اللى فى متناول الجميع ، بالاضافة الى تحملها لدرجات الحرارة وعزل الصوت ، ومن المتوقع أن شعبيتها تزيد اكثر من كده فى الفترة القادمة ، مع وجود فرصة كبيرة لخامة uPVC لان اسعارها اقل من الألومنيوم.

واذا كنت محتار فى الاختيار بين الاثنين ممكن تروح لكذا شركة تصنيع وتاخد مواصفات وعروض اسعار ، وتعرض المواصفات دى على صنايعى او فنى تعرفه عشان تفهم منه تفاصيل اكثر عن كل خامة ، وتقرر ايه هو الأنسب لك.

هل فكرت قبل كده فى شكل شبابيك بيتك من الداخل والخارج ؟ ، هل فكرت تحول شبابيك بيتك لقطعة ديكور ؟ ، طبعا تقدر تعمل كده من خلال شتر الشباك ، اللى ممكن ينقل شباك الغرفة العادى لشكل مختلف تماما عن شكله التقليدي.

وانت بتختار ما بين انواع الشتر الموجودة بتحتار شوية ومش بتكون عارف تبدأ ازاى ، بسبب تعدد الخامات والاشكال اللى هتختار منها ، وزى اى قطعة جديدة بتركبها فى بيتك لازم تكون مستفيد من وجودها وشايف انك اخترته صح ، تعالوا نتعرف مع بعض على الشتر وازاى نقدر نختاره بحيث يناسب احتياجاتنا.

فوائد شتر الشباك

لو بتفكر تركب شتر الشباك ، يبقى عشان سبب من اثنين ، الشكل والأداء الوظيفي الجيد ، هى دى الفوائد الأساسية لإضافة شتر الشباك فى بيتك ، وقبل ما تفكر تركبه شوف إذا كنت عايزه لمجرد تحسين الشكل الجمالى للشباك ولا لأداء وظائف محددة.

عشان كده ننصحك بتركيب الشتر مش لمجرد الشكل الجمالى ولكن لاداء وظائف كثير من ضمنها اضافة مزيد من الخصوصية لبيتك ، او لحمايته من الرياح الشديدة والعواصف وخاصة اذا كنت فى منطقة ساحلية.

على سبيل المثال الشتر الثابت اللى هو الشيش يعتبر إضافة كويسة جدا للشباك لانه هيحسن من شكله كثير ، ايا كان السبب المهم انك لما تركب الشتر تتأكد انه حقق لك كل الوظائف اللى بتدور عليها.

الشتر الداخلي والخارجي

قبل ما تختار اى نوع من النوعين ، لازم تعرف أن كل واحد منهم له مميزاته وعيوبه.

شتر الشباك الداخلي

إذا كانت بتدور على غطاء للشباك يحقق لك مزيد من الخصوصية ، ويعيش معاك فترة أطول ، يبقى الشتر الداخلى هو الحل الانسب لك ، إلى جانب أنه بديل عصرى جدا للستائر الحديثة أو التقليدية ، و يعتبر حل عملى جدا في حجب الضوء الموجود خارج الغرفة ، لكن عيبه الوحيد انه مش بيضيف لمسة جمالية للبيت من الخارج لانه مش ظاهر للرؤية الخارجية.

شتر الشباك الخارجي

الشتر الخارجى فيه منه نوعين الأول نوع ثابت والثاني متحرك ، كل نوع منهم له غرض واستخدامات مختلفة ، الشتر المتحرك يحجب الضوء ، وبيحمى الشباك من عوامل الجو المختلفة من المطر اثناء الشتاء وهواء ومن أي عناصر خارجية ، في حين ان الشتر الثابت دوره الاساسى هو إعطاء مظهر جمالى لواجهة البيت الأمامية ، وبحكم ان النوعين معرضين دائما لظروف الجو المختلفة زى المطر والهواء والشمس ، لازم تتعمل لهم صيانة دورية.

أنواع شتر الشباك من حيث الشكل

الشتر الخشبى

مفيش حد فينا ميعرفش النوع ده من الشتر ، او بمعنى ادق هو مش معروف بالاسم ده لان اسمه الشائع (شيش) ، وموجود في اغلب بيوتنا من زمن طويل ، ونحب نلفت نظرك لنقطة مهمة جدا مش معنى انك ركبت الشيش الخشبى دى يبقى انت مجبر تركب الشباك بالكامل من الخشب ، لا طبعا ممكن تركبه من الألومنيوم او uPVC

اذا كنت حابب الشكل التقليدى لشبابيك بيتك من الخارج ، يبقى الشيش الخشبي هو من أفضل الحلول اللى ممكن تتجه لها ، بالاضافة الى انه يتميز بقابلية الدهان باى لون ، ويصنع من اخشاب كتير زى خشب الصنوبر والأرز.

الشتر المدمج

النوع ده مثالى للديكور الداخلى لان شكله جذاب ، ويعطى مظهر راقى لأى غرفة ، بالاضافة الى انه يحجب الضوء وبيضيف خصوصية للمكان ، وصمم بحيث يتم تركيبه فى إطار الشباك نفسه عن طريق شرائح عريضة تتحرك للأعلى والأسفل ، وده بدل ما شتر الشباك نفسه يتحرك للداخل وللخارج ، وعشان كده هو اضافة متميزة لكل غرفة يتم تركيبه فيها.

شتر الرول

لو هدفك من تركيب شتر الشباك هو حماية بيتك من العوامل الجوية القاسية زى الرياح والعواصف الشديدة ، يبقى شتر الرول هو إختيارك الصحيح ، لأنه بيغطى الشبابيك بالكامل ، وبكده هتحقق الخصوصية والأمان التام ، أما بالنسبة لتكلفة النوع ده ، فتعتمد على نوع الخامة اللى هتختارها ، وعلى حجم الشباك اللى محتاج تغطيه.

الأماكن الملائمة لتركيب الشتر

الشتر فى الشباك يلائم أى غرفة من غرف البيت ، لكن لو كانت ميزانيتك محدودة ، يفضل أنك تركبه فى واجهة بيتك ، لانه هيضيف للواجهة الخارجية منظر جذاب ، ومن الأماكن المثالية لتركيبه غرفة المكتب المنزلية ، لانه مش بس هيوفر درجة حرارة مريحة لغرفة المكتب طول السنة ، كمان بيخفف من حدة ضوء النهار ، عشان يقلل سطوعه على شاشة الكمبيوتر اثناء جلوسك.

شتر الشباك المدمج هو الوسيلة المثالية لتغطية شباك الحمام ، لانه بيمنحك خصوصية ويسمح بدخول الضوء بعكس الستائر القماش التقليدية ، ده غير ان فيه ميزة رائعة وهو انك تقدر تنظفه فى مكانه بدون ما تفكه.

تأكد أن الشتر اللى اخترته مقاوم للرطوبة ، وأنه مدهون بطلاء مناسب أو ورنيش مخصص للبيئة الرطبة ، لأن ده هيمنع تآكله مع الوقت ، وفيه هنا نقطة ممكن نوضحها وهى ان مش معنى انك ركبت شتر للشباك انه مبقاش ينفع تضيف ستائر قماش ، لا طبعا ممكن تضيف ستائر قماش زى الشتر بستايل الكافيه.

خامات الشتر

شتر الشباك متوفر بخامات متعددة عشان يناسب كل الاحتياجات والأشكال ، مثلا الشتر الخشبي بيصنع من أخشاب صلبة من غابات سريعة النمو زى الزيزفون ، و من الأخشاب المصنعة زى MDF ، وفيه منها البلاستيك زى uPVC ودى هى الخامة اللى تقدر تعتمد عليها فى الاماكن الرطبة وانت مطمن لان الرطوبة والمياه مش هتأثر فيها.

اختيارك للخامات يعتمد على كذا عنصر ، من العناصر دى الشكل هل هو مهم بالنسبة لك او لا ، يعنى مثلا لو يهمك شكل الواجهة الأمامية لبيتك ، اختار النوع المصنوع ، لأنه أفضل الأنواع من حيث الشكل ومقاومة العوامل الجوية السيئة.

كمان شكل الغرفة يؤثر على اختيارك للخامة ، يعنى مثلا بعض الخامات احيانا بتكون مناسبة لغرفة معينة أكثر من غيرها ، زى uPVC او الالومنيوم مناسب للحمامات ، عشان مقاوم للرطوبة ولأى تشوه ، والميزانية المتاحة معاك ، هنلاقى الأخشاب الصلبة هى الأعلى سعر فى قائمة الخامات ، فى حين ان الاخشاب المصنعة زى MDF هى الأقل سعر فيهم.

اختيار الشتر الملائم لشكل الشباك

شوف طراز وتصميم الشبابيك الموجودة عندك ، عامة شتر الشباك أكثر مرونة من باقى أنواع أغطية الشبابيك ، وممكن يتركب على أى شباك مهما كان شكله ، حتى لو كان دائرى أو مثلث ، وممكن كمان أنه يطوى عشان يظهر إطار الشباك ، فى حين ان الستائر المصنوعة من الأقمشة ، هتخفى جزء كبير من الإطار ، وده معناه أن الشبابيك المتغطية بالشتر هتكون نقطة تركيز فى الغرفة ، وتغطيه تماما يعنى مفيش اى قلق انك تكون مكشوف وانت داخل الغرفة.

ستايل شتر الشباك

شتر الشباك بارتفاع كامل

بيغطى مساحة الشباك بالكامل ويتفتح كوحدة واحدة ، وفيه قضيب فى المنتصف ، عشان تقدر تشغل الشرائح العلوية بشكل مستقل عن السفلية.

شتر الشباك المدمج طراز كافيه

يغطى الجزء الأسفل من الشباك ، ويسمح بدخول الحد الأقصى من ضوء النهار للغرفة ، وكمان بيعطى بعض الخصوصية ، وميزة النوع ده أنه بيغطى مساحة أقل من الشباك بالكامل ، وبكده التكاليف هتبقى قليلة ، بردو بيكون مناسب للاماكن اللى متقدرش تتجاهلها ، زى غرفة الطعام أو المعيشة ، ويتميز بان شكله اخف كثير من شكل الستائر العادية.

شتر الأدوار

النوع ده يغطى الشباك كله ، لكنه عبارة عن جزئين ، واحد يغطى الجزء العلوى من الشباك ، وآخر منفصل للجزء السفلى منه ، بحيث يكونوا مستقلين عن بعض ، عشان تقدر تفتح أى جزء منهم بشكل مستقل عن الآخر.

الشتر السحاب

النوع ده من الشتر مثالى جدا للابواب الجرارة أو السحابة زى مثلا بعض ابواب البلكونات او باب الليفنج المطل على لاند سكيب خارجي للبيت ، لأنه يتميز بوجود قضيب منزلق يمشى عليه وتفتحه وقت ما تكون عايز الضوء الطبيعى يدخل لك ، ويفضل مطوى على جوانب الباب ، لكنه لا يناسب الشبابيك.

شتر الشباك الأوتوماتيكي

لاضافة مزيد من الراحة فى بيتك ممكن تخلى شتر الشباك يعمل بالكهرباء سواء كان رول او مفصلى ، وايا كان خامته خشب او الومنيوم او PVC او اى نوع تانى ، كمان ممكن تخليه بسلك او لاسلكى و بريموت كنترول او بتايمر ، كل الاختيارات دى متوفرة ، تعالى نشوف ازاى نحسب مقاسات الشباك ونعرف من خلالها الموتور المطلوب.

شتر الشباك اللى ممكن تخليه يعمل بالكهرباء هو الرول والمفصلى ، لكن مفيش قوانين تحكم نوع الموتور اللى ممكن تختاره ولكن الموضوع متعلق بوزن شتر الشباك نفسه ، وبمجرد معرفة الوزن الكلى للشتر اللى يشمل (الشرائح مع الجزء العلوي والسفلي) تقدر تعرف قدرة الموتور اللى يكفى لتحريك الشتر ده.

حساب وزن الشتر

يعتمد اختيار الموتور اللازم لتحريك الشتر على مجموعة عوامل منها نوع ووزن الخامة المستخدمة فى صناعة الشتر.

وزن الشتر الخشب

يعتبر أثقل خامة فى وزنها ، المتر المربع منه وزنه حوالى 11 كيلو جرام.

وزن الشتر الــ PVC

أقل الخامات فى الوزن ، المتر المربع منه يزن 4 كيلو جرام لشرائح بسمك 8 مم و 5.5 كيلو جرام لشرائح سمكها 14 مم.

وزن الشتر الألومنيوم

شتر الالومنيوم أثقل في الوزن من PVC ، المتر المربع يزن 4.5 كيلو جرام لشرائح بسمك 8 مم و 6 كيلو جرام لشرائح سمكها 14 مم.

عشان كده مهم جدا انك تقيس عرض الشباك من اليمين لليسار وتضربه فى الارتفاع مع زيادة 20 سم لحساب القطعة اللى يتم دخولها فى البكرة الموجود بها الموتور.

مثال على طريقة الحساب

نفترض اننا هنركب شتر PVC بسمك 8 مم على شباك عرضه 120 سم وارتفاعه 115 سم يبقى الحساب كالتالى

(115+20) *120 = 162 سم

كده احنا عرفنا كمية الشرائح اللى محتاجينها باقى نضرب الرقم ده فى وزن الخامة اللى هنستخدمها

1.62*4 = 6.48 كيلو جرام يعنى نقدر نقول أن وزن الشتر هيكون 6.48 كيلو جرام.

حساب عزم الموتور

يختلف عزم الموتور المستخدم فى رفع شتر الشباك بناء على وزن الخامة اللى هيتم رفعها ، يتم التعبير عن العزم ده بوحدة نيوتن/متر ، وطريقة حسابها سهلة جدا عن طريق حاصل ضرب وزن شتر الشباك بالكامل فى 0.7 ، يعنى لو حسبنا على الشباك اللي اخذناه كمثال

6.48*0.7 = 4.53 نيوتن/متر

يعنى الحد الادنى للموتور اللى ممكن تركيبه لسحب الشتر على الشباك PVC ده هو موتور بعزم 4.53 نيوتن/متر ، وبصفة عامة المواتير المتوفرة فى السوق تبدأ من 10 نيوتن وتزيد باضافة 10 كل مرة.

الموتور فى شتر الرول

عشان تقدر تركب موتور فى الشتر الرول لازم تكون عارف قطر الانبوبة اللى فى اعلى الشتر من فوق لانها هتكون المكان اللى هيتم تخزين الشتر فيها ، وبالتالى لازم تكون اكبر من قطر الموتور نفسه ، مع مراعاة اختيار شكل محول الكهرباء المناسب بناء على شكل انبوبة الشتر نفسه إذا كانت اسطوانية أو سداسية أو مسننة.

نصيحة عامة : فى شتر الشباك الطويل بيكون عزم الموتور المستخدم فيه عالى عشان يقدر يعوض الوزن اللى بيسحبه ، حاول تبعد ايدك عن الشرائح أثناء سحبها لتجنب الاصابة.

الموتور فى الشتر المفصلي

فى النوع ده من الشتر الموضوع ابسط الى حد كبير ، لان معدات السحب والرفع مرفقة مع الشتر نفسه ، ومش محتاجة منك اى حسابات عشان تقدر تحدد الموتور المناسب ، كل شتر معروف انه متوافق مع مقاس شباك معين ، بيكون جاهز من الشركة المصنعة ، والفنى بيجى يركبه تحت عتبة الشباك نفسه.

وسائل التحكم فى شتر الشباك

شتر الشباك بريموت كنترول

لمزيد من الراحة والرفاهية ضيف للشتر ريموت كنترول ، كل المواتير اللى لها وحدة تحكم عن بعد ممكن خلالها تفتح الشتر وتقفله أو تتحكم فى كمية الضوء اللى داخلة ، وبعض الأنواع المتقدمة النهاردة بقى يمكن التحكم فيها من خلال الهاتف المحمول SmartPhone ، فيه بعض انواع الريموت ممكن تتحكم بيه فى كذا موتور مع امكانية تغيير القناة.

التحكم فى شتر الشباك بتايمر

كلنا عارفين اى اغلب اجهزة المطبخ الموجودة فى بيوتنا لها تايمر (مؤقت) للتشغيل والاطفاء على الوقت اللى تظبطها عليه ، نفس الموضوع موجود فى الشتر الاتوماتيك تقدر تظبط وقت معين بعدها يقفل ، وممكن تخليه يوميا او اسبوعيا او شهريا ، وده مفيد بالنسبة لك فى حالة السفر او الاجازات.

ممكن كمان تضيف وحدة استشعار كمية الضوء اللى داخلة من الشتر للغرفة ، عشان تشوف هل ده مناسب لك او لا ، وطبعا ده فى الانواع اللى سعرها غالى.

التنظيف والصيانة

مواعيد الصيانة الدورية تقدر تحددها بناء على عنصرين مهمين فى شتر الشباك اللى انت ركبته ، العنصرين دول هم مكان الشباك نفسه والخامة المصنوع منها ، بمعنى ان الشتر الداخلى يحتاج إلى صيانة أقل كثير من شتر الشباك الخارجى ، ممكن يقتصر على التنظيف الأسبوعي فقط وتكون الصيانة والإصلاحات وقت ما يحصل فيه مشكلة فقط.

أما بالنسبة لصيانة الشتر الخارجي ، دى اللى يحددها المادة الخام المصنوع منها ، زى مثلا الشتر المصنوع من uPVC تقدر تنظفه بنفس طريقة تنظيف شباك uPVC عن طريق المياه والخل او الصابون عشان تشيل منه الأوساخ الملتصقة.

بالنسبة للشتر الخشبي يختلف فى طريقة تنظيفه عن النوع السابق ، لأنه مصنوع من الخشب وطبيعى انه يمتص الرطوبة والمياه الموجودة حوله ، وده هيخليه عرضة للانحناء و الاصابة بالتعفن والتلف ، لذلك يجب التعامل معه بحرص إذا كان في أماكن رطبة ، عشان كده بننصح انك تدهنه باستمرار كل كام سنة ، لان زى ما احنا عارفين ان الشتر الخشبى اللى هو الشيش إذا لم يتم دهانه بصفة مستمرة يصبح لونه باهت ويتهالك وساعتها تحتاج تغيره.

وانت شغال فى تشطيب شقتك او تجديدها حتما وضرورى هتلاقى نفسك تعرضت لاستخدام ألواح الكونتر ، لأنها واحدة من أكثر الخامات المنتشرة جدا فى أعمال البناء والمقاولات والديكور وصناعة الاثاث ، فى البداية يبدو الموضوع سهل بالنسبة لك على سبيل المثال لما تيجى تعمل مكتبة لشاشة التلفزيون هتقول هاشترى الواح كونتر بسمك 2 سم عشان يتحملوا واقطعهم على حسب المقاسات وابعتهم لفنى الدهانات يخلصهم.

فى الحقيقة المسألة مش بالبساطة دى لان مع التنوع الكبير الموجود حاليا بتلاقى نفسك محتار وهتسأل نفسك اسئلة كثير جدا ، اشترى من اى مكان ؟ واسأل على ايه بالظبط ؟ هل انا محتاج كونتر طبقات المكونة من القشرة ولا كونتر القطع الخشبية ؟ واى فئة بالظبط ؟ و ايه انواع الحشو الداخلى ؟ وهل الأطراف هتتشقق لو ربطت فيها مسمار ؟ وهل طبقة القشرة الخارجية رفيعة جدا لدرجة انها ممكن تتآكل لو تمت صنفرتها من اول مرة ؟

اول سؤال لازم تعرف إجابته هو هل انت بتبحث عن الواح الكونتر اللى شكلها جميل جدا زى الموجودة فى قطع الأثاث ، ولا اهم نقطة بالنسبة لك هى الوظيفة ؟ الواح الكونتر اللى شكلها رائع زى المعمولة من خشب الكرز او الارو او الجوز تصنف ويتم تسعيرها بناء على الجودة وعلى سمك طبقة القشرة الخارجية للوح نفسه.

انواع الواح الكونتر من حيث طريقة التصنيع

الواح الكونتر بحشو القشرة

الواح الكونتر المصنوعة من القشرة هى عبارة طبقات من قشرة الأخشاب الصلبة اللى تم لصقها مع بعض عن طريق مكابس تحت ضغط وحرارة معينة ، تم تجميع الطبقات دى باتجاهات معكوسة لكل طبقة عن اللى تحتها ، وتسمى العملية دى النطاقات المتقاطعة ، ده بينتج ألواح قوية وصلبة وخفيفة الوزن وفى نفس الوقت مثالية بالنسبة لتركيب المسامير فيها ، لذلك تعتبر ألواح الكونتر المصنوعة من القشرة هى من افضل الانواع فى السوق.

الواح الكونتر بحشو MDF

الواح الكونتر بحشو MDF لها مميزات قليلة جدا عن كونتر القشرة وهى ان سمكها وتخانتها ثابتة وحوافها متساوية وكل وجه من اوجه اللوح متساوى تماما ، لذلك هو افضل الانواع فى الدخول للتصنيع على ماكينات التقطيع CNC والليزر لأنه مسطح تماما ، ومع ذلك مش قوى بنفس قوة الواح الكونتر المصنوعة من القشرة ، ومش بيتحمل الربط بالمسامير بالاضافة الى ان وزنه ثقيل ، لكنه يفضل استخدامه عند صناعة باب قطعة واحدة لأنه مسطح تماما بدون اى عيوب فى سطحه.

الواح الكونتر الحبيبى

ده يعتبر اقل الانواع فى السعر ، ويشبه ألواح MDF فى استواء السطح ونظافته وطبعا تخانته معروفة وثابتة ، ولكن من ابرز عيوبه انه اسوأ الانواع فى عملية ربط المسامير به لأنه بيتفكك تماما من الداخل ، وأحيانا بيكون مش متوفر فى مستودعات الخشب ويتم تصنيعه بالطلب ، عكس ألواح MDF موجودة باستمرار.

الواح الكونتر المختلطة

النوع ده من الألواح جمع بين مميزات الواح القشرة مع ألواح MDF ، لو شفنا تركيبه الداخلى نلاحظ في منتصف التكوين الداخلى وجود القشرة تم ترتيبها بحيث كل طبقة عكس اتجاه الطبقة اللى تحتها لضمان المتانة وخفة الوزن والكفاءة العالية اثناء ربط المسامير ، ولو شفنا أطراف التركيب الداخلى هنلاقى MDF لضمان السطح المستوى الناتج من تعرجات القشرة الطبيعية ، ومع ذلك يعتبر حل وسط بين الاثنين لانه مش بنفس قوة الواح الكونتر المصنوعة من القشرة وخاصة أثناء ربط المسامير ولا بنفس استواء سطح لوح MDF الكامل.

الواح الكونتر المصنوعة من الخشب

ودى الواح مصنوعة من قطع خشب تم لصقها بجوار بعضها مكونة اللوح كامل وتسمى فى لغة السوق “لاتيه” ، وعلى كل جانب من جوانب الحشو الداخلى فيه طبقات متقاطعة من القشرة وفوقها طبقة القشرة الخارجية ، تشبه الواح الكونتر من القشرة فى القوة والصلابة وتحمل ربط المسامير فيها ، لذلك تعتبر الالواح دى ممتازة لعمل الرفوف الطويلة ، لكن اسعارها اغلى شوية من الواح كونتر القشرة واحيانا وجودها اقل منها فى السوق فى بعض الأحيان.

الواح الكونتر المصنوعة من البتولا

ودى تعتبر اشهر الانواع فى البلاد العربية وخاصة مصر وافضل نوع فى الواح كونتر القشرة اللى ممكن تلاقيها فى مستودعات الأخشاب ، تتميز ألواح الكونتر من البتولا بالصلابة الشديدة والشكل الجمالى الرائع ، عشان كده نلاحظ كثير من الفنيين والمصممين يستخدموا حوافها فى صناعة شكل جمالى لقطع الموبيليا والديكور.

تعتبر هى الحل المثالى لعمل وحدات التخزين والرفوف ، وبعض الأدوات المساعدة لفنيين النجارة يصنعوها من الالواح دى نظرا لقوتها ، متوفرة فى الاسواق بمقاس 152*152 سم وثخانته تتراوح من 3 – 18 مم وله مقاس تانى 122*244 سم بتخانات تتراوح من 12 – 25 مم.

طرق تقطيع القشرة

التقطيع الاسطوانى

يتم تقشير جذع الشجرة بطريقة تشبه فك المنديل الورقى من بكرة ورق التواليت ، وينتج طبقة قشرة خارجية ويتم بعد ذلك تقطيعها وتجفيفها ، من مميزات الطريقة دى انها تنتج قشرة تجزيعاتها أكبر وغنية بالتفاصيل.

تقطيع الشرائح

فى الطريقة دى يتم تقطيع القشرة فى اتجاه قطر الشجرة ، عشان كده بيكون شكل القشرة وتجزيعاتها متكررة.

تقطيع الأرباع المستقيم

هنا يتم تقطيع القشرة من الشجرة بعد تقطيعها لاربع اجزاء ويتم تقطيع كل جزء منهم لشرائح مستقيمة ، وده ينتج قشرة تجزيعاتها بخطوط ضيقة ومستقيمة.

تقطيع الأرباع المائل

يتم تقطيع القشرة من الشجرة بطريقة تشبه طريقة الأرباع السابقة ، ولكن بدل التقطيع لخطوط مستقيمة يتم التقطيع بخطوط مائلة وينتج عنها خطوط ضيقة ومستقيمة مع ظهور علامات تشبه علامات اجنحة اشعة اكس على يمين ويسار الخطوط.

درجات الواح الكونتر من حيث الفئات

معظم الألواح المستخدمة فى الديكور المنزلي والأثاث هي من النوع الناعم ، بمعنى ان الوش والظهر مصنوعين من أخشاب لينة زى فئة الأخشاب الصنوبرية زى الصنوبر والتنوب ، وتصنف الواح الكونتر الى مجموعة درجات كل درجة لها اسم عبارة حرفين كل واحد منهم لاوجه اللوح الكونتر بداية من A وهو اعلى درجة الى D وهو اقل درجة.

الواح الكونتر فئة A (فرزة اولى)

ودى الواح مصنوعة بعناية شديدة وبتبقى ناعمة وقابلة للدهان باى مادة ، مع مراعاة ان الدهان والمعالجة تكون فى اتجاه الألياف ، ودى الواح هتلاقى سطحها نظيف جدا وخالى من العيوب.

الواح كونتر فئة B (فرزة ثانية)

مصنعة بكفاءة ولكن بها بعض العقد الخشبية بمقدار بسيط لايتجاوز 2.5 سم ويعتبر مسموح به ، وهتلاقى فيها بعض التشققات البسيطة يمكن معالجتها اثناء عملية الدهان.

ألواح فئة C (فرزة ثالثة)

ودى اقل كفاءة من النوعين اللى فاتوا ، بيكون فيه تشققات تصل الى 3مم ، وفيه عقد خشبية اكبر بحجم 6 مم وتصل الى 1 سم ، مشكلة النوع ده انك ممكن تلاقى فيه اجزاء مكسورة ، وفيه من الفئة دى أنواع أقل جودة يصل حجم العقدة فيها 3.5 سم ، النوع ده من الواح الكونتر مش ناعم اوى لانه مصنفر مش بنفس جودة الانواع اللى فاتت ولكنها مش مؤثرة على قوة اللوح ، من ضمن عيوب الدرجة دى انك هتلاقى فيها تشققات واحيانا غرز عشان تلحم الألواح مع بعضها.

ألواح فئة D (فرزة رابعة)

ودى هى الألواح الاقل فى الجودة من جميع الأنواع السابقة ، بها عقد خشبية كبيرة جدا تصل الى 6 سم بطول أليافها ، وبها بعض التشققات وغرز لمعالجتها وضمها مع بعض.

بعض الفئات الموجودة هنلاقى لها اسم مكون من حرفين زى مثلا CD ، وده معناه ان لها وجه بقشرة من فئة C ووجه آخر من فئة D ، واذا كان اللوح مخصص للاستخدام الخارجى يزيد عليه حرف ويبقى CDX وهنا حرف X يرمز الى Exterior rated glue يعنى الغراء المخصصة لتحمل الظروف الخارجية.

الفرق بين الواح الكونتر المستخدمة داخليا وخارجيا

بعد تقطيع القشرة الى قطع يتم دهانها بمواد لاصقة تحت حرارة وضغط عالى عشان يتم كبسها وينتج منها لوح كامل ، مثلا الواح الكونتر المستخدمة فى الشغل الخارجى زى عمل الرووف او التجليدات الخارجية ، ودى يتم لصقها بغراء تعرف كيميائيا باسم “فينول فورمالدهيد” ، وبالنسبة للالواح المستخدمة فى الداخل يستخدم فيها غراء من نوع “يوريا فورمالدهيد” ودى اقل فى السعر من النوع السابق ، لأنه بطبيعة الحال الواح الكونتر المستخدمة خارجيا تحتاج مواد لاصقة عالية الجودة لتحمل الشمس والرطوبة.

نصائح عامة

اختر الواح الكونتر اللى سطحها مستوى

وانت بتختار الخشب دائما لاتتوقع انك هتلاقى قطعة مثالية لانك احتمال متلاقيهاش من الاساس ، حاول انك تختار افضل الموجود فى مجموعة الألواح المرصوصة أمامك ، وقف لوح الكونتر على سيفه على ارضية المكان وانظر له بعينيك لو فيه اى انحناء هيظهر ، واحيانا هتلاقى الانحناء من كذا اتجاه أشبه بشريحة البطاطس وهى مموجة.

لو انت بتشترى لوح ابلكاش بسمك 3 مم متقلقش من أى تموجات فيه لأنه فى النهاية يتم تركيبه على شاسيه خشب سواء كان لتصنيع الاثاث او لتجليد حوائط وهيتشكل بشكلهم يعنى هيكون مستقيم.

افحص أطراف لوح الكونتر

وانت بتشترى الواح الكونتر افحص الحواف كويس وشوف طبقات القشرة الداخلية الموجودة حاول تختار المستوية والموحدة التخانة ، وتكون خالية من العيوب والتلف او على الاقل تكون عيوبها قليلة ، ولو كانت عيوبها كتير يبقى ممكن تخلى الجزء المعيب ده فى الأطراف اللى هتتقطع مع استخدامك.

تجنب اللحامات والوصلات ، فى الواح الكونتر اللى جودتها عالية بتكون قطعة القشرة واحدة سليمة لكل طبقة ، وفى الأقل جودة بتكون قطعتين واحيانا اكثر للطبقة الواحدة ، ولتغطية اللحامات هيتم تركيب قطع القشرة فوق بعض Overlap وده مع تجمع الطبقات هينتج عنه تموجات فى الواح الكونتر.

الواح الكونتر بمقاسات خاصة

احيانا بتكون محتاج الواح كونتر بمقاسات خاصة عشان تجليدات معينة او قطع اثاث بمقاسات كبيرة مثلا ، ساعتها هتروح لاى مصنع يعمل لك الكمية اللى هتحتاجها واكيد هيكون فيه حد ادنى للطلبية المخصوصة بالمواصفات المطلوبة ، زى الحشو اللى هتطلبه والمقاس اللى انت محتاجه وشكل القشرة اذا كنت مرتبط بتنفيذ تصميم ديكور معين ، ولكن خلى بالك ان الكمية المطلوبة دى هتكون خاصة بك انت يعنى هتضطر تدفع ثمنها ، ومش هتقدر تعملهم استرجاع او ترفض استلامها إلا إذا كان فيهم عيوب واضحة.

اختر الواح الكونتر المتينة بسعر معقول

تعتبر ألواح الكونتر الطبقات افضل الانواع الموجودة فى السوق ، مثلا اللوح سمك 18 ملم بمقاس 152*152 سم يحتوى على 13 طبقة من القشرة سعره حوالي 40 دولار ، وفيه بعض التجار يبيعوا منه ألواح مختلفة بنفس التخانة ولكن بمقاس 122*244 وداخله 10 طبقات قشرة بسعر اقل شوية.

تعتبر الالواح دى هى افضل نوع من حيث القوة والصلابة وتحمل ربط المسامير وفى اعمال التقطيع وغيره ، عشان كده هو من افضل الانواع الموجودة إن لم يكن هو افضلهم ، يستخدم فى صناعة علب التخزين والادراج والرفوف.

ولو هتختار ألواح من نوع تانى حاول تختار الشكل المناسب للمكان اللى هتركبه فيه ، ولون القشرة اللى تتماشى معاه ، مع الوضع فى الاعتبار ان القشرة الخارجية لالواح الكونتر بتكون متقطعة بطريقة التقشير الاسطواني أو تقطيع الشرائح ، وبالنسبة للسعر حاول تشترى من مستودع الخشب نفسه لأنه المصدر الرئيسي لاستيراد الخشب من الخارج ، وده هيفرق معاك فى التكلفة خاصة لو كنت هتشترى كمية.

دهان الواح الكونتر

بعد ما شغل النجارة يخلص أول شيء هيخطر على بالك هو الفنش النهائى للشغل اللى انت خلصته ، افضل الانواع اللى يظهر فيهم الدهان هم ألواح MDF وكونتر الطبقات من الفرزات الاولى والثانية واحيانا الفرزات الاقل ممكن تبقى كويسة مع معالجة العقد والعيوب الموجودة فيها ، واحيانا هتلاقى الواح الكونتر مكتوب عليها paint grade اى مصنف للدهان.

لو بصينا على الواح كونتر الطبقات هتلاقى ان تجزيعاته ضيقة وملمسه ناعم لو تم دهانه بمادة شفافة مش هيظهر لها شكل جمالى ، لذلك هنلاقى النجارين بيصنفروه بعد ما يخلصوا تركيب ، عشان يكون ملمسه خشن ويقبل طبقة الدهانات اللى هتضاف عليه ، بعكس الواح الكونتر المصنوعة من الارو او حتى قشرتها من الارو يظهر فيها الدهان كويس جدا.

ألواح MDF بدون اى تجزيعات على السطح ولها مسامات تتشرب اى مادة لذلك هى افضل نوع يقبل مواد الدهان ، وده يعتبر ميزة وعيب فى نفس الوقت لان لو وصل لها اى كمية من المياه تتلف بسرعة.

صنفرة الواح الكونتر

جميع انواع الواح الكونتر لازم يتم صنفرتها قبل الفنش النهائى ، لكن احيانا لما تشترى لوح معين وتصنفره تلاقى أن طبقة القشرة الخارجية رقيقة جدا لدرجة انها بتتآكل وتظهر لك الغراء اللاصقة لها ، لذلك الواح الكونتر اللى قشرتها الخارجية صلبة زى كونتر الطبقات تتحمل الصنفرة بدرجات مختلفة ، لكن ينصح انك تستخدم صنفرة 220 عشان تحافظ على السطح ، ولو انت شاكك ان الطبقة الخارجية ممكن تكون رقيقة ابعد عن الصنفرة الكهربائية واستعمل الصنفرة اليدوية.

إلغاء التقوس والانحناء فى لوح الكونتر

اى حد فينا لما يشترى الواح كونتر بيلاقى فيها بعض الانحناء والتقوس وبتفضل تحاول محاولات كثير للتغلب على النقطة دى ، اما بوضع وزن ثقيل على اللوح من المنتصف ورفعه من الأطراف ، وفيه حيلة بيعملها بعض المحترفين انه بيلزق الجانب البارز بالانحناء بقشرة ، وساعتها بتقوم الغراء بعمل شد للوح فتخفف من التقوس الموجود.

عامة الحل الوحيد عشان تخرج من الموقف ده انك تخلى الألواح السليمة للمقاسات الكبيرة نفسها وتخلي الالواح المنحنية للمقاسات الصغيرة عشان متعطيش فرصة للانحناء أنه يظهر عيوب الشغل المصنوع ، لان كده هتقلل من ظهور الانحناءات بقدر الإمكان.

احذر الألواح التالفة

لو ميزانيتك محكومة واضطريت تشترى ألواح فرزة قليلة وسعرها رخيص ، يبقى من المؤكد انك هتلاقى عيوب كبيرة فى الواح الكونتر اللى هتشتريها ، زى بعض التشققات والعقد والشروخات او تلف أطراف اللوح ، او بعض البقع السوداء نتيجة تحميل الواح الكونتر على المعدات المعدنية وتتأثر بعض الألواح بالمسألة دى ، واحيانا تجد تكسير فى بعض الاماكن ، ممكن فى الوقت ده لو كان الجزء التالف فى طرف اللوح تقدر تقطعه وتستغني عنه ، لانه من الصعب جدا معالجته سواء اثناء التصنيع او الدهان ، ولو حاولت تصنفر بعمق كبير هتلاقى الحشو الداخلى للوح ظهر وكده يبقى اللوح تلف تماما ، لذلك مش بننصح حد انه يشترى من الفرزات الرديئة تجنبا لكل المشاكل دى.

بعد سيطرة لمبات اديسون التقليدية على سوق الاضاءة لمدة قرن من الزمان ، كان لابد من ظهور تقنية جديدة تحل محلها ، أحدث التقنيات دى حاليا هى اللمبات الليد ، اللى احدثت ضجة كبيرة جدا فى العالم وده طبعا كان له اسبابه.

لان اسعارها كل يوم فى انخفاض تدريجى رغم ان سعرها اغلى كثير من اللمبات التقليدية الا ان الاقبال عليها كبير جدا ، لانها موفرة للطاقة بشكل غير مسبوق ، تعالوا نعرف ازاى نختار اللمبات الليد من حيث الشكل المناسب وطريقة التركيب وايه هى الالوان اللى تناسب كل غرفة فى البيت.

شكل اللمبات الليد

تغيير اللمبة يعتمد على التجهيزات الموجودة عندك بالفعل ، فتقدر تغير اللمبة العادية إلى ليد وكمان هتكون بنفس شكلها ، بسبب توفر الأشكال اللى ممكن تختار منهم الملائم لاحتياجاتك ، وكمان عشان متبقاش محتاج تجهيزات خاصة او تكسير في الحوائط او السقف عشان تركب لمبات ليد.

اللمبة الكمثرى العادية Classic Globe

وده من أشهر الأنواع ، ومعروفة باسم A type ، وتستخدم فى السقف ، أو فى اضاءة الترابيزات ، وفى الاباليك فى الحوائط واحيانا فى الأرضيات.

النسخة المصغرة من لمبة الكمثرى Mini Globe

تناسب اضاءة الترابيزات ، وابليك الحوائط والأرضيات ، ومعروفة باسم G type .

اللمبة الشمعة Candle

وأحيانا تسمى في لغة السوق اللمبة البلحة ، ودى مصممة خصيصا عشان النجف وابليك الحوائط ، ومعروفة باسم C type ، ومتوفر منها نوعين ، نوع بزجاج شفاف ونوع زجاج مصنفر لتنعيم شدة الإضاءة.

اللمبة Spotlight

ظهر النوع ده امتداد لنفس الشكل التقليدى منه واللى كان يسمى الهالوجين ، مع الفرق ان هنا داخله لمبات Led وده مخصص للتركيب فى السقف وتم ابتكار نوع منه مخصص للارضيات.

اللمبة Panel Light

ظهر الشكل ده فى اللمبات الليد تحديدا كتطوير لنفس شكل السبوت المعروف ، ولكن لتغطية مساحة اكبر لان المعروف ان السبوت له زاوية تغطية معينة ، لكن البانل تغطيته اوسع بكثير ، لذلك انتشر النوع ده بكثرة فى الفترة الاخيرة لاضاءه الاسقف اكثر من السبوت.

مقاسات قاعدة اللمبات الليد

أما بخصوص قاعدة اللمبات الليد ، فلازم تختار القاعدة اللى تركيبها لايق ومظبوط ، لأن مقاسات قواعد اللمبات تختلف عن بعضها ، ودى اشهر المقاسات المتوفرة.

المسمار الكبير B22

يتم تركيبها عن طريق الضغط واللف بدوران ، مقاس قطرها 22 مم ، ودى منتشرة فى المملكة المتحدة.

المسمار الصغير B15

قطرها 15 مم وطريقة تركيبها هى نفس طريقة تركيب B22 ، لكن مش منتشرة زى B22 ، و موجودة فى بلاد معينة حول العالم.

لمبة أديسون الحلزونية E27

قطرها 27 مم ، وتستخدم على نطاق واسع فى مصابيح السقف ، و ابليك الحائط والأرضية ، وتعتبر هى النوع الاشهر على الاطلاق.

لمبة أديسون الحلزونية الصغيرة E14

ودى قطرها 14 مم هنلاقيها موجودة فى اللمبة الشمعة المخصصة للتركيب فى النجف ، وفى ابليك الحوائط.

لمبة المسمار المزدوج الملفوف GU10

ودى بتكون مثبتة بمسامير ثنائية قطرهم 10 مم ، يتم تركيبها بطريقة اللف و القفل ، وهنلاحظها موجودة فى اللمبات المتوافقة مع الجهد الكهربى 220 فولت ، ولو دققت النظر هتلاحظ تشابه كبير بينها وبين قاعدة لمبة من نوع تانى وهى MR16 اللى بتشتغل على 12 فولت.

لمبة المسمار المزدوج الضاغط MR16

النوع ده من اللمبات اللى بيستخدم فى تركيبها مسمارين ، وتركيبها بيكون بضغطة فى التجويف المخصص لها ، وتستخدم فى لمبات 12 فولت وفى الدوائر منخفضة الجهد ، واللى احيانا بيكون فيها محول او مفتاح ديمر ، وفيه بعض الصعوبات واجهت النوع ده من اللمبات زى تقنياتها القديمة اللى كانت بتحول التيار من 240 فولت الى 12 وكان طبعا لازم اخذ مفتاح الديمر فى الاعتبار ، لكن حاليا أصبح اللمبات الليد تعمل على 240 فولت ، فكان لازم يظهر حل تقنى وهو استبدال اللمبات من النوع ده بلمبات بقاعدة GU10 وإلغاء المحول للعمل على التيار مباشرة.

ركز على الليومن وانت بتشترى اللمبات الليد

الواط بيكون وحدة لقياس الطاقة اللى تستهلكها اللمبة ، مش وحدة قياس اضاءة اللمبة ، لأن المفهوم اللى كان متعارف عليه طول السنين الماضية انه كلما يزيد الواط تزيد قوة اضاءة اللمبة يعنى مثلا كانت اللمبات 100 واط اضاءتها اعلى من 60 واط وان 150 اعلى منهم كلهم ، وهكذا.

تصنف اللمبات الليد بالواط ولكن مع الاختلاف الشاسع بينها وبين اللمبات التقليدية ، فمثلا اللمبة التقليدية اللى كانت تستهلك 60 وات ، تقدر تحصل على نفس اضاءتها بلمبة ليد 6 وات ، عشان كده معيار قياس اللمبات الليد مش بيكون بيكون بالواط ولكن بالليومن وهى وحدة قياس شدة اضاءة اللمبة نفسها ، كلما كان الليومن أعلى تكون إضاءة اللمبة أعلى.

يعنى تقدر تستبدل لمبة تقليدية 150 واط ، بأخرى ليد 2600 ليومن ، وهيكون استهلاك اللمبة الليد من 25 إلى 28 واط ، وهنا جدول لتوضيح استهلاك اللمبات التقليدية فى مقابل اللمبات الليد وشدة اضاءة اللى تقدر تحققها كل واحدة منهم.

اللمبة التقليدية	اللمبة الليد	الليومن (شدة الاضاءة)
25 واط	3 – 4 واط	250 ليومن
40 واط	4 – 5 واط	450 ليومن
60 واط	6 – 8 واط	800 ليومن
75 واط	9 – 13 واط	1100 ليومن
100 واط	16 – 20 واط	1600 ليومن
125 واط	21 – 23 واط	2000 ليومن
150 واط	25 – 28 واط	2600 ليومن

لون اضاءة اللمبات الليد

من المعروف أن ضوء الشمس بيعطينا طاقة ، ولكن هل تعلم ان اللمبات بتقوم بوظيفة مشابهة لضوء الشمس ؟ ، يعنى مثلا اللمبات اللى بيخرج منها موجات ضوء أزرق دى بتنتج مادة السيروتونين ، اللى بتخليك مستيقظ ، أما اللمبات اللى مش بتنتج الضوء الأزرق تسمح لعقلك أنه ينتج مادة الميلاتونين ، اللى بتخليك تحس بالراحة والنعاس وبالتالى تكون مستعد للنوم.

لو انت حسيت بالملل من اضاءة اللمبات الليد البيضاء الساطعة طول الوقت ، فمن حسن الحظ انه اصبح فيه خيارات كثير متوفرة امامك ، لان اللمبات الليد أتاحت كمية كبيرة من الالوان بداية من الاضاءة الدافئة باللون الابيض المصفر الى اللون الابيض النقى وحتى الأبيض المختلط بالازرق.

اقرأ المكتوب على علبة اللمبة عشان تعرف لون الاضاءة واللى بيسمى حرارة الضوء ، و هتلاقيها مكتوبة برقم على مقياس كلفن ، كلما تقل ارقام كلفن K ، ده معناه أن الضوء دافئ ، وكلما ارتفعت أرقام كلفن ، كلما زادت درجة اللون الازرق فى الضوء.

الضوء الأصفر من 2700 – 3000
الضوء الأبيض من 3500 – 4100
الضوء الأزرق من 5000 -6500

قياس كفاءة اللمبات الليد

أحيانا بتكون ادعاءات الشركات المصنعة بخصوص كفاءة اللمبات الليد غير دقيقة بهدف التسويق ، وأفضل طريقة لمعرفة الكفاءة ، هي بقياس فعالية الليومن “شدة ضوء اللمبة” فى الواط الواحد ، وده معناه كمية الضوء اللى بتحصل عليه لكل واط من الكهرباء المستهلكة ، وفى أوائل سنة 2010 كانت كفاءة اللمبات الليد ما بين 20 و 60 ليومن في الواط ، ومن المتوقع أنها تزيد لحوالى 80 أو 100 ليومن فى كل واط خلال السنوات القادمة ، وده بالمقارنة مع 10 إلى 15 ليومن فى كل واط فى اللمبات التقليدية ، و50 إلى 100 ليومن فى لمبات الفلورسنت.

الحرارة الناتجة عن اللمبات الليد

اللمبات الليد بيخرج منها حرارة قليلة نوعا ما ، عشان كده هنلاحظ حرارة ناتجة من السبوتات وكشاف البانل أكثر من اللمبات الليد العادية ، لذلك هنلاحظ وجود مشتت حراري فى كل سبوت او كشاف بانل فى الجزء الخلفى ، عشان يشتت الحرارة الناتجة ، ويخلى درجة حرارة التشغيل مستقرة.

عمر اللمبات الليد الافتراضي

العمر الافتراضي للمبات الليد هو من أكثر الخصائص اللى بتميزها ، واللى بيتراوح ما بين 20,000 إلى 50,000 ساعة ، وده يساوى من 20 إلى 50 ضعف العمر الافتراضي للمبات التقليدية ، عشان كده اللمبات الليد مثالية للاستخدام في الأماكن اللى بتكون فيها الصيانة صعبة ، أو لو كان العمر الافتراضى للمبة مهم بالنسبة لك.

اختيار اللمبات الليد بناء على غرف منزلك

لمبات غرفة النوم

طبيعى أن غرفة نومك لازم تكون مريحة وهادئة ، تجنب الضوء الأزرق فى الغرفة ، لان ده هيخلى ساعتك البيولوجية منتظمة ومش هيحصل فيها اى خلل ، ولا تقدر تخلط بين الضوء في غرفتك والضوء الطبيعي خارج الغرفة ، وده هيسمح لعقلك أنه ينتج مادة الميلاتونين اللى هتساعدك على النوم المريح.

ولو كنت من هواة القراءة الليلية ، وعندك لمبادير بجانب السرير ، أو قررت أنك تشترى واحد ، فاختار مصباح ضوءه أزرق خفيف أو ابيض ، لأن الضوء الأبيض هيعمل تباين عالى مع صفحات الكتاب وهتقدر تقرأ وانت مستريح.

ينصح باستخدام اضاءة تتراوح قوتها ما بين 1500 – 4000 ليومن وحرارة تتراوح من 2700 – 3000 كلفن.

لمبات غرفة المكتب المنزلية

لما تيجى تعمل إضاءة غرفة المكتب المنزلية ، لازم تختار اضاءة تحقق لك اقصى درجات الفاعلية والنشاط ، عشان كده ننصح بتركيب لمبات بلون أبيض يحاكى ضوء النهار فى غرفة المكتب ، لان ده هيزود إنتاج السيروتونين ، ويخليك تحافظ على تركيزك وانتباهك.

من المهم بردو مراعاة أماكن اللمبات الليد فى غرفة المكتب ، بحيث تتجنب السطوع على شاشة الكمبيوتر ، بالاضافة لوجود اباجورة مكتبية تساعدك على القراءة والكتابة ، واللى تعتبر أهم وحدة إضاءة وظيفية فى المكتب ، مع إمكانية تبديل درجة حرارة الضوء حسب الطلب.

ينصح باستخدام إضاءة تتراوح قوتها ما بين 3000 – 6000 ليومن وحرارة تتراوح من 3000 – 5000 كلفن.

لمبات غرفة المعيشة

غرفة المعيشة هى مكان استقبال الضيوف والترفيه وقضاء أطول وقت من اليوم ، وسواء كنت بتتفرج على فيلم ، أو بتدردش مع أصحابك ، لازم يكون فى الغرفة خليط من مصادر الإضاءة المختلفة ، عشان تهيئ غرفة المعيشة مع أى مناسبة عندك ، و زى ما فى غرفة النوم حاول تبعد عن اللمبات اللى بتعطى ضوء أزرق عشان هتنتج السيروتونين وبالتالى هيعطيك نشاط وتركيز ، واستبدلها بكشافات سبوت موجهة للحائط للتركيز على لوحة فنية او صور عائلية ، و لتقليل سطوع الضوء على شاشة التليفزيون.

ينصح باستخدام إضاءة تتراوح قوتها ما بين 1500 – 3000 ليومن وحرارة تتراوح من 2200 – 3000 كلفن.

لمبات غرفة الطعام

الاضاءة فى غرفة الطعام يفضل انها متكونش ساطعة اوى لدرجة تضايقك ولا خافتة جدا لدرجة انك متقدرش تكشف تفاصيل المكان ، عشان كده الحل المثالى لاضاءة غرفة الطعام طوال اليوم هى الوحدات المتدلية اللى يتم التحكم فيها من خلال مفتاح ديمر سواء فى الوقت ما بعد الظهر أو حتى فى وقت الليل.

ينصح باستخدام اضاءة ذات ألوان محايدة زى الابيض لعمل اضاءة مثالية ، بردو من اللمبات الليد اللى ممكن تستخدمها فى غرفة الطعام هى لمبات الشمعة المستخدمة فى النجف الموجود فى الغرفة وتقدر تختار منه شدة الاضاءة المناسبة بناء على العدد المتاح فى النجفة ، وحرارة الضوء اللى تكون مستريح فيها.

ينصح باستخدام إضاءة تتراوح قوتها ما بين 3000 – 6000 ليومن وحرارة تتراوح من 2200 – 3000 كلفن.

لمبات المطبخ

بما أن المطبخ غرفة فى حد ذاته ، فأنت هتبدأ فيه يومك بتناول وجبة الافطار ، عشان كده ينصح باستخدام اللمبات الليد اللى لون اضاءتها ازرق فوق كاونتر المطبخ ، عشان تعطيك مزيد من النشاط والحيوية فى بداية يومك.

كمان لو انت عندك ترابيزة فى مطبخك ، فأنسب إضاءة لها هى وحدة متدلية من السقف بلون دافىء مع امكانية التحكم فيها بمفتاح ديمر ، لعمل توازن مثالي بينها وبين اللمبات الزرقاء الموجودة فوق الكاونتر ، بالاضافة الى انك ممكن تستفيد من تثبيت كشافات السقف العادية او السبوتات.

ينصح باستخدام إضاءة تتراوح قوتها ما بين 4000 – 8000 ليومن وحرارة تتراوح من 2700 – 5000 كلفن.

لمبات الحمام

كلنا بنستخدم الحمام فى جميع احتياجاتنا الشخصية سواء قبل الشغل أو المدارس وفى كل اوقات اليوم ، ومن أكثر المناطق المستخدمة بشكل متكرر هى المرايا ، عشان كده مهم جدا ترتيب اضاءة المرايا ، انها تكون على محيط المرايا وده افضل كثير من وجودها فى السقف ، عشان كده ينصح باستخدام اضاءة قوية ، لان ده هيسهل رؤية التفاصيل فى الحلاقة وترتيب المكياج ، لذلك هنلاقى مرايا الحمام المتوفرة فى السوق مدمج فيها اللمبات الليد اما بشكل الكمثرى العادية او بشكل الشمعة.

كثير مننا فى بداية يومه الصبح لازم ياخد شاور عشان يجدد نشاطه ، عشان كده ظهر مساطر للدش بها لمبات ليد مدمجة فيها لاضافة شكل جمالى مع تدفق المياه منها.

ينصح باستخدام إضاءة تتراوح قوتها ما بين 4000 – 8000 ليومن وحرارة تتراوح من 3000 – 5000 كلفن.

صعب تخيل البيوت المودرن فى عصرنا الحالى من غير البين باج ، وخاصة مع التطور الكبير اللى حصل فى شكل ووظيفة الاثاث والفرش ، واللى بيكون سهل تحريكه من مكان لآخر ، و كمان فى وقت قصير انتشر جدا فى البيوت المودرن واصبح مفضل لدى ناس كتير ، لأنه من قطع الأثاث اللى اصبحت تقريبا شبه اساسية فى البيوت المودرن.

ورغم كده بعض الناس لسه بتختار أنواع سيئة ، وبالتالى بيكون عمرها الافتراضى أقصر ومش بتعيش معاه ، قبل ما تشترى أى نوع ، لازم تعرف الخامات سواء فى الكسوة الخارجية او الحشو الداخلى او حتى السوست الموجودة وعوامل تانية كتير لازم ناخدها فى اعتبارنا اثناء الاختيار تعالوا نتعرف عليها.

البطانة الداخلية فى البين باج

أولا تأكد من وجود غطاء داخلى له ، عشان فى بعض الأحيان الغطاء الخارجى بيتلف فى وجود حيوانات اليفة في البيت ، ولو مفيش غطاء داخلى ، الحشو هيقع على الأرض ، وده خطأ ناس كتير تقع فيه عشان كده اختار نوع له 2 غطاء ، الداخلى بيبقى محشو بحبات الفوم ، والخارجى بيكون غطاء لحفظه من الأوساخ ، لأنك هتشيله وتغسله.

و مهما كان نوع الحشو الموجود ، تعتبر البطانة من المكونات الأساسية ، و اللى بتكون بين الحشو والغطاء ، وظيفتها توفير الحماية للحشو من الرطوبة والغبار والوبر ، و من مثيرات الحساسية الأخرى ، بالاضافة لكونها تحتوى على الحشو ، كمان بتسمح لك بتغيير الغطاء كل فترة للتنظيف ، وبكده مش هتضطر من وقت للتانى تغير الحشو بسبب ضياع اجزاء منه او تلفه.

خامات الكسوة الخارجية

من اكبر الاخطاء اللى ممكن تقع فيها وانت بتشترى البين باج هى النظر للشكل العام واتخاذ قرار الشراء بناء على كده فقط ، لكن لازم تعرف الاول ايه هى الخامة المصنوع منها الكرسي ، غالبا يتم تصنيع الكسوة الخارجية من البوليستر الناعم المستخدم فى المساحات الداخلية ، أو من الجلد الصناعى والمستخدم فى المساحات الداخلية والخارجية.

عشان تكون مستريح وانت بتستخدم البين باج لازم تكون خامات الغطاء الخارجى جيدة ، زي القطن والتويل (من مشتقات القطن) والجلد المدبوغ ، ودى خامات مناسبة للاستخدام الداخلي ، وسهل تنظيفها ، وكمان تقدر تغسلها فى الغسالة ، ومن مميزات الخامات دى انها مناسبة للأطفال.

أما خامات الجلد الطبيعى والصناعى كغطاء تناسب البين باج فى غرفة المعيشة ، واذا كنت من هواة استخدام البين باج فى الحفلات أو المناسبات فى حديقة منزلك او البلكونة ، فأفضل غطاء خارجى له اما النايلون أو الاقمشة الصناعية زى البوليستر ، لان الخامات دى مقاومة للبقع و للطقس السيء ، مع مراعاة اختيار بطانة متينة ومقاومة للحرائق ، عشان تضمن أنه يعيش أطول فترة ممكنة.

البين باج المصنوعة من الجلد مناسبة جدا للناس اللى عندهم حيوانات اليفة ، لان شعر الحيوانات صعب تشابكه مع الجلد بالاضافة الى انه سهل التنظيف ، عامة حاول تختار البين باج بقماش مرن ومطاط من الداخل عشان يستوعب قطع الفوم وقماش سهل التنظيف من الخارج.

شكل وحجم البين باج

من المعروف ان الحشو الداخلى هو المتحكم الأول فى الراحة والغطاء الخارجى هو المتحكم الأول فى الشكل ، لذلك نجد ان الشكل والحجم هم اللى يحددوا مكان واستخدام البين باج.
بداية من الشكل الدائري التقليدي إلى ظهور الكنبة وكراسى القراءة ، والحجم الصغير المناسب للاطفال الى الاحجام الكبيرة والمصنوعة من الجلد ، تم ابتكار كل التنوع ده ليناسب جميع الاحتياجات والظروف والاماكن.

لما تيجى تختار البين باج المناسبة حدد الاول مين اكثر شخص هيستخدمها باستمرار ، لانه مش من المناسب انك تجيب كرسي دائري مخصص للاطفال وتخليه فى غرفة اشخاص بالغين ، بردو مش منطقى انه يكون الكنبة الكبيرة او الكراسى الضخمة موجودة فى غرفة الاطفال الصغيرة.

من المهم جدا انك تاخذ فى الاعتبار الاستخدام الرئيسي للبين باج ، هل هتحتاج تحويلها لسرير فى البيت مثلا سواء لك او للضيوف بغرض النوم ، ولا هتستخدم للجلوس فقط ، هل هتستخدم الكرسي للجلوس على طاولة ولا هتخليه فى ركن من أركان البيت للاسترخاء ، بالاضافة الى عدد الاشخاص اللى بيستخدموا الكرسى فى نفس الوقت.

حاول تختار الشكل البسيط المناسب لاحتياجاتك ، لو كنت ناوى تنقل البين باج لأماكن كتير فى منزلك ، يبقى من الأفضل أن تختار البين باج المزود بمقابض ، عشان تقدر تنقله من مكانه بكل سهولة.

معظم الأنواع المنتشرة شكلها يشبه كرسى الانتريه ، ويطلق عليها شكل حرف L ، وانسب مكان لها هى غرفة المعيشة والمكتب لانها مناسبة جدا للجلوس والاسترخاء.

وفيه انواع تانية زى الكنبة واللى شكلها يشبهها بالظبط وتقوم بنفس وظيفتها ، ولو كنت حابب قطعة متاخدش مساحة كبيرة يبقى ممكن تجيب القطعة اللى تشبه الباف لانها حجمها صغير وعملية فى استخدامها.

استخدامات البين باج

استخداماته كثير وميزته انه مريح فى الاستعمال ، ممكن تستخدمه فى حديقة منزلك ، أو البلكونة ، و كمان تقدر تستعمله على الشاطىء اثناء المصيف ، او امام حمام السباحة ، ومن الأفضل أن تختار نوع يكون مريح فى الجلوس وتلاقى فيه مكان للمأكولات اللى بتحبها.

لو هتستخدم البين باج للمساحات الخارجية ، يفضل أنك تكثر من العدد ، لأن شكلهم هيكون أفضل ، عشان هيخلى المساحات الفاضية تبدو وكأنها ممتلئة ، ولو هتستخدمه داخل البيت ، لازم تشوف مساحة الشقة ، إذا كانت واسعة كفاية ، ولا هتبقى مزدحمة بوجوده ، ولا يشترط انك تحدد بالظبط مكانه هيكون فين لانه من السهل تحريكه لاى مكان فى الغرفة.

من ضمن استخداماته انه ممكن يكون بديل مثالي للفرش التقليدى ، فتقدر تحوله لسرير خاصة لو المساحة عندك صغيرة ، وبكده تستفيد من وجوده بدون ما يزحم لك المكان ، ده غير أنه يتحمل أوزان البالغين الثقيلة لأنه بدون هيكل خشبى بعكس كراسى الانتريه.

حشو البين باج

مهم جدا أنك تأخد بالك من نوع الحشو ، ممكن يتم حشو البين باج بقطع اسفنج مفروم ، أو حبيبات القمح ، أو حبيبات الفوم البوليسترين المصنعة تعالوا نعرف كل نوع منهم وايه الافضل فيهم.

حبيبات القمح الداكنة

أثقل الانواع فى الوزن والاغلى فى السعر هو النوع المحشو حبيبات القمح ، وده مش منتشر كتير فى الاسواق لانه مكلف جدا.

الفوم (البوليسترين)

معظم الانواع حاليا ممتلئة بــ حبيبات البوليسترين ، عشان كده هتلاقيه بيتشكل بشكل جسمك وانت جالس عليه ، وده اللى مخليه مريح جدا ، ومن اهم مميزاته انه مقاوم للحريق والرطوبة ، يعنى مش هتلاقيه مع الوقت هبط بسبب رطوبة او عرق ، وده راجع لانها مصنوعة من مواد معاد تدويرها ، زى زجاجات المياه الغازية البلاستيك ، والنوع ده بيعطى عمر أطول للبين باج ، وكمان يضيف دعم أكبر للجالسين.

عشان كده ينصح الخبراء بشراء الأنواع الموجود بداخلها حبيبات الفوم ، وتأكد من انها مقاومة للحريق وده بيكون مكتوب على شهادة الضمان المرفقة بها وانت بتشترى.

الاسفنج

وفيه بعض انواع كراسي البين باج ممتلئة بقطع الإسفنج مفرومة او مقطعة لقطع صغيرة ، ودى تشبه المراتب الاسفنجية مع اختلاف ان هنا الاسفنج مفروم مش لوح سليم ، ولأنها مصنوعة من الاسفنج المرن يتم شحنها من بلد المنشأ فى اكياس بلاستيك ويتم ضغطها بالكامل بواسطة مكابس شفط قوية ، وبعد كده ترجع لشكلها الأصلي بعد ما توصل.

لكن عيبها الوحيد انها تهبط مع مرور الوقت ، لذلك لايفضل شراؤها ، لانك هتضطر تغير لها الاسفنج بعد هبوطه مباشرة بعد ما تحس انه اصبح غير مريح.

سوست التقفيل

آخر نقطة ناخدها فى اعتبارنا واحنا بنشترى هى السوست ، عشان البين باج يكون متين لازم غرز الخياطة تبقى قوية ، لانها لو كانت ضعيفة الخيوط تتفكك مع الوقت ، وبالتالي يتمزق كرسى البين باج و هتحتاج تخيطه من جديد.

مهم جدا أن الغرز تكون مزدوجة و على مسافات متساوية ، وحواف القماش المستعملة فى صنع البين باج تكون متخيطة بطريقة محكمة ، والثنيات الموجودة فى منطقة السوستة تكون متينة وده تقدر تشوفه بنفسك ، عشان انسجة القماش متفكش من بعضها ، وتضمن أن المنتج جودته عالية.

مع مراعاة أن سوست الكسوة الخارجية لازم تكون قوية وأسنانها واسعة ، عشان تضمن لك نعومة الكرسى ، ولو كان الكرسى صلب مش هيتقفل بالسوستة يبقى الحشو هيخرج منه ، بردو من النقط اللى لازم تاخد بالك منها ان السوستة تكون مخفية فى قطعتين القماش الموجودين حولها ، لأنها لو ظاهرة هتتلف من احتكاكها المستمر بالأرض.

نصائح عامة

• البين باج متوفر فى السوق المحلى ولكن مش بنفس الوفرة الموجودة على الانترنت ، عشان كده الافضل أنك تشتريه اونلاين ، وعليك اختيار موقع معروف وموثوق فيه ، مش مجهول ومنتجاته مش مجربة ، عشان التكلفة هتكون مضاعفة لو كان المنتج سيء.
• قبل ما تشترى البين باج ، لازم تاخد فى بالك مجموعة اعتبارات ، عشان يكون عملى لك ولأسرتك ، وأول الاعتبارات دى ، أن لازم يكون له ضمان ، عشان المصنع مسؤول عن جودة المنتج ، لان فى الأسواق أنواع كثير بدون ضمان ، أما عن مدة الضمان فتختلف حسب الشركة المصنعة ، فيه ضمان لمدة سنة ، وفيه لمدة 3 سنوات و 5 سنوات ، إلى جانب وجود ضمان مدى الحياة ، وتأكد أن الضمان ومدته مذكورين بوضوح فى الشهادة المرفقة ، ومتوفر رقم للاتصال بخدمة العملاء لو لزم الأمر.
• لو كان الغطاء مخيط بحيث لايتم نزعه نهائى او بدون سوستة ، فعمر الكرسى ده هيكون قصير ، ده غير انه هيتسخ ومش هتقدر تغسله.
• اختار مواد خام عالية الجودة ، يعنى لازم تفحص المواد الخام المصنوع منها ، وتقدر تطلب عينة من القماش ، عشان تتأكد من المتانة لو كنت بتشترى من السوق المحلى ، وإذا كنت بتشترى من الانترنت بيكون مكتوب خامة القماش للبطانة الداخلية والكسوة الخارجية.
• التأكد من أن حجم البين باج مناسب بدرجة كافية للشخص الجالس ، مثلا كلما كان الشخص طويل ، يحتاج البين باج الأكبر ، عشان جسمه يكون مستريح ، وده نفس الموضوع فى بين باج الأطفال ، فلازم تقيس المساحة عندك ، لأن أكبر خطأ هو اختيار نوع كبير جدا أو صغير جدا عن المساحة المتاحة.