نصائح لعمل ديكور فى غرفة المعيشة

نصائح لتغيير ديكور غرفة المعيشة
  • Save

ما بين لمة العائلة ومشاهدة التلفزيون بنقضى اطول وقت لينا فى البيت فى غرفة المعيشة دى حاجة مفيش اتنين يختلفوا عليها وعشان كده تعتبر أهم غرفة في البيت كله لما تيجى تجهزها وتعمل فيها ديكور.

غرفة المعيشة فى أغلب الأحيان هي أول غرفة بنهتم بالديكور فيها واول غرفة بتشوفها الضيوف لما يدخلوا البيت زيارة ، عشان كده لما تهتم بديكورها هتلفت نظرك و تجبرك انك تقضى فيها أطول وقت ممكن.

حتى ان معظم مصممين الديكور الداخلى بياخدوا وقت طويل فى مناقشة العملاء عشان يوصلوا لتصميم مميز يستريح له العميل ويعجبه وده مجهد جدا بالنسبة للعميل والمصمم.

وبرغم كده فيه مجموعة أساسيات معروفة من ضمنها ان الليفنج لازم يكون فيها كراسى أو أماكن للجلوس ومكان للترفيه اللى هو طبعا شاشة التلفزيون وطبعا لازم يكون فيها راحتك وغير الاساسيات فيه مجموعة نقط ممكن تخلى غرفة المعيشة فى بيتك تحفة فنية.

سواء كنت لسه بتجهز من البداية او بتجدد غرفتك القديمة فمجموعة النقط الاسترشادية دى هتعرفك ازاى تحقق الشكل والوظيفة مع بعض فى غرفتك.

اختار الفرش الصح

الفرش المناسب فى غرفة المعيشة
  • Save
Photographee.eu/stock.adobe

سواء كنت بتجهز غرفة المعيشة من البداية او بتجددها لو كانت قديمة لازم تشوف الفرش هل هو فعلا ينفع معاك ولا لقيته مش مريح مثلا او مضيق المكان ع الفاضى عشان كده تجديد الغرفة دى تعتبر فرصة كويسة جدا عشان تعرف ايه القطع المهمة بالنسبة لك.

يعنى مثلا لو انت عندك حاليا بارتيشن فاصل فى الغرفة فى بيتك وشايف ان وجوده ضرورى يبقى علشان تعمل تجديد فى الديكور لازم تعمل بارتشن فاصل بنفس وظيفة الموجود حاليا لانه اصبح جزء لا يتجزأ من ملامح المكان.

لو كنت بتستخدم كنب قديم تنجيده مبقاش نافع او بقى غير مريح او كرسى اصبح متهالك او ترابيزة دهانها بهتان ومتآكل يبقى آن الاوان انك تغير وتعمل نقلة بفرش جديد لان الفرش المناسب فى لونه ومقاساته بيعطى للمكان روح مختلفة.

اعمل نقطة تركيز فى غرفة المعيشة

نقطة التركيز مهمة فى غرفة المعيشة
  • Save
bmak/stock.adobe

نقطة التركيز دى هى أول نقطة عينك انت وكل افراد الاسرة بتقع عليها اول ما تدخل غرفة المعيشة فلو مكانش عندك نقطة تركيز طبيعية موجودة زى مثلا دفاية كبيرة او شباك اعمل انت واحدة تكون عبارة عن مرايا ضخمة أو لوحة فنية كبيرة او بيانو مثلا لو المساحة مساعدة.

وخلى بالك طبعا لما تعمل نقطة تركيز او حتى كانت موجودة عندك لازم تخلى الديكور يساعد على ظهور النقطة دى عشان وحدة وترابط المكان.

يعنى لو مثلا عندك دفاية على حيطة معينة ممكن تجدد شكلها شوية بأي افكار جديدة وده فى حد ذاته هيغير شكل الغرفة تماما.

اختار الوان جذابة

الالوان المتناسقة فى غرفة المعيشة
  • Save
Lifestyle Travel Photo/shutterstock

سواء كنت من محبى النظام أحادي اللون او الألوان المكملة فأكيد الالوان المتناسقة هى المفتاح الرئيسى لإظهار ديكورات غرفة المعيشة فى بيتك.

يعنى هنا مثلا فى صورة غرفة المعيشة الموجودة هنلاقى ان المصمم اختار اللون الاوف وايت والابيض كالوان اساسية فى المكان كله وهنلاحظهم فى الكنبة والارضية والحيطة واستعمل الازرق بدرجاته مع الاصفر كنوع من الألوان المكملة كنوع من الاظهار.

مع استخدام الخشب الطبيعى كخلفية للكنبة وفيها جزء لونه ازرق باضاءة مخفية.

يعنى تقدر تقول انك لو عملت تنسيق الوان بشكل مظبوط فى غرفتك هتضمن انها تكون فى قمة الراحة والانسجام بالنسبة لك.

التوازن بين الشكل والوظيفة

التوازن بين الشكل والوظيفة فى الفرش
  • Save
FluxFactory/gettyimages

لو شفنا الغرفة الموجودة في الصورة هنلاحظ تكامل بين الشكل والوظيفة وده يعتبر أهم شرط اساسى لعمل غرفة معيشة رائعة.

لازم تستغل مساحة غرفة المعيشة عندك الاستغلال الامثل عشان تبقى مكانك المفضل مش مجرد مكان شكله حلو وخلاص يعنى مثلا لو انت من هواة الجلوس على الكمبيوتر المحمول (لابتوب) فترات كبيرة يبقى لازم يكون عندك رف جانبى فى الكنبة عشان تقدر تحط الجهاز عليه.

لو كنت بتدور على مكان تخزن فيه اغراضك ولوازمك سواء كانت كتب أو سيديهات او مجلات يبقى انت محتاج وحدة تخزين اضافية تخفى كل الكلام ده بعيد عن عينك وانت قاعد عشان ميكونش فيه كركبة ولخبطة ، بردو من ضمن الافكار اللى هتساعدك فى تخزين أغراضك الكنبة اللى فيها سحارة تخزين.

من أحسن قطع الأثاث اللى تخدمك وانت في الليفنج ترابيزة Coffee table الموجودة ادام الانتريه اللى بتتحول لترابيزة سفرة دى من احدث الابتكارات فى مجال الاثاث عشان تخدم الشقق اللى مساحتها ضيقة ومينفعش يكون فيها ترابيزة سفرة مستقلة.

لو عندك كنبة شكلها تحفة وقماش تنجيدها خامته كويسة جدا ولكنها مش مريحة بالنسبة لك هيبقى قيمتها اد ايه ساعتها بالنسبة لك ؟

زى ما اتكلمنا فى المقدمة أن غرفة المعيشة دى هى اكتر مكان بتقضى فيه وقت من يومك يعنى لازم تكون مريحة جدا وتؤدى كل الاغراض اللى انت محتاجها فيها.

الاهتمام باضاءة غرفة المعيشة

الاضاءة فى غرفة المعيشة لتناسب راحتك
  • Save
asbe/gettyimages

عشان تعمل اضاءة مثالية فى غرفة المعيشة عندك ده يعتبر تحدى ومسألة محتاجة تفكير وتخطيط لانها من اهم العناصر اللى تبرز جمال المكان ومش بس كده و هتريحك وانت موجود فيه.

ينصح بانك تعدد مصادر الاضاءة يعنى مثلا يكون عندك شباك بحجم كبير عشان يدخلك اضاءة طبيعية ويكون فيه اضاءة من السقف عن طريق كشافات وإضاءة عن طريق الحيطة زى ابليك عشان يظهر لوحة فنية موجودة عندك.

وممكن تضيف لامبدير على اى جانب من جوانب الكنبة او الركنة اللى انت بتقعد عليها عشان وقت القراءة مثلا او وانت بتتصفح فى موبايلك ، وفيه كمان اضافة روعة وهى الاضاءة المخفية فى السقف نفسه أو الحوائط لو كنت حابب تعمل جو هادى فى فترة الليل بدل ما تستخدم إضاءة مباشرة.

اللى هيخليك تختار اى نوع من الانواع دى هو احتياجاتك فى غرفة المعيشة شوف احتياجاتك ايه بالظبط فى المكان وساعتها هتقرر نوع الاضاءة اللى هتركبه.

متخليش غرفة المعيشة مملة

تنويع مصادر الفرش والاكسسوارات
  • Save
asbe/gettyimages

سهل اوى وانت بتجهز بيتك وبتشترى الفرش انك تنزل اى معرض بيعجبك الشغل اللى فيه وتشترى كل الفرش والاكسسوارات منه عشان تحطهم فى غرفة المعيشة عندك.

ده مش غلط ولكن لو عملت كده هتتفاجئ انك حولت غرفة معيشتك الى جزء من المعرض ده وكده مش حلو بصريا بالنسبة لك ولا لافراد اسرتك وانتوا قاعدين لأنه هيخلى شكل المكان ممل لانه ذوق واحد وفكر واحد و استايل واحد.

مهم جدا انك تغير مصادر شراء الفرش والاكسسوارات لو كنت حابب تحط كذا لوحة مثلا لكن طبعا مينصحش بعدد كبير.

وهنا بقى بنقدم لك نصيحة من الخبراء لو كنت حابب تعمل شكل غير تقليدى فى غرفتك يبقى تاخد شوية وقت فى شراء الفرش والاكسسوارات من كذا مصدر مختلف ولكن تراعى ان كلهم يكونوا متناسقين مع بعض مع شكل الغرفة فى النهاية لما تبص عليهم هتحس انك عملت ديكور مختلف تماما وجذاب مش هتلاقى شبهه فى كتالوج او فى النت.

مصادر الصور

الغلاف ExperienceInteriors/gettyimages

مواضيع ذات صلة

Leave a Comment