غرفة النوم هى غرفة الراحة والهدوء النفسى ، ينام الناس ويرتاحوا فيها بعد يوم طويل من العمل والمشقة ، وعشان هى مخصصة للهدوء والراحة يبقى لازم تتميز بالبساطة وكمان الشياكة ، وفى الوقت الحالى نظرا لان مساحة معظم الشقق صغيرة فبتكون غرفة النوم الضيقة تحدى كبير ومش بنعرف ازاى نستغل مساحتها كويس.
ناس كتير بتحتار يا ترى ايه الدهان المناسب للمكان عشان يعطى احساس اكبر بالاتساع ، كمان الحيرة بالنسبة للارضية نفرشها سجاد ولا موكيت ولا تكون باركيه ولا نسيبها على السيراميك ، طب ترتيب الفرش والاثاث هيكون ازاى ؟؟
اسئلة كتيرة بتدور فى دماغنا فى الوقت ده وبنفضل ندور ونبحث عن طرق وأفكار جديدة وشيك تساعدنا فى ترتيب غرفة النوم الضيقة بشكل مريح وعملى اكتر ، وعشان كده هنتكلم فى الموضوع ده عن استغلال مساحة الغرف الضيقة.
دهان غرفة النوم الضيقة
غرفة النوم الضيقة ممكن تبان انها واسعة لو استخدمنا الوان دهان فاتحة او الالوان الترابية زى الرمادى لانها بتعكس الاضاءة بشكل كبير بعكس الالوان الغامقة اللى بتعمل على امتصاص الاضاءة فتبان الغرفة ضيقة وصغيرة.
لازم نركز فى اختيار اللون للحوائط ونستخدم لون واحد بدرجاته عشان غرفة النوم تبان اوسع ، لان دهان الغرفة بأكثر من لون بيجهد العين و يشتتها فتنظر للغرفة كأقسام حسب لون الحيطة.
نعمل خدعة بصرية صغيرة ودى بتكون عن طريق دهان حدود الحوائط العلوية بدهان افتح من لون الحيطة نفسه ، وده بيعطى احساس بعمق الحائط فبتخليك تبص للحيطة على انها ابعد من بعدها الحقيقى.
خدعة تانية عشان غرفة النوم الضيقة تبان واسعة وهى دهان السقف العلوى بلون أغمق من لون الحوائط وده بيساعد انك تشوف السقف عالى وبالتالى تشوف الغرفة واسعة.
الأثاث في غرفة النوم الضيقة
من البديهى ان طالما غرفة النوم ضيقة يبقى مفيش داعى للاثاث الكبير والضخم ، وكمان مش لازم نجيب غرفة كاملة بكل مستلزماتها ، كل لما القطع تقل أكيد الغرفة هتبان اوسع وكمان هتبقى اشيك وبسيطة.
الأثاث متعدد الاستخدام بيكون عملى ومريح فى نفس الوقت فى غرفة النوم الضيقة ويعتبر هو الحل المثالى ليها ، يعنى ممكن تجيب سرير يتحول كنبة للجلوس عليه وقت النهار ، او سرير بأدراج تقدر تخزن فيه اى لوازم ، كمان التسريحة تقدر تستغلها كمكتب وتعمل فيها ارفف لوضع المستلزمات الشخصية بدل ما تكون موجودة بشكل عشوائى.
لو غرفة النوم ضيقة اوى تقدر تستغنى عن كومود واحد وتعمل واحد بس ، اما لو المساحة تسمح بالاتنين تقدر تعمل الكومود الداخلى على شكل الدولاب بالامتداد لآخر الحيطة.
بالنسبة للدولاب يفضل ان ابوابه تكون جرارة او سحابة عشان الحركة ، كمان لو المساحة ضيقة جدا فى الغرفة تقدر تعمل الدولاب على جانبى الحيطة يمين وشمال وفى المنتصف التسريحة وبكده تكون استغليت الحيطة بشكل مثالى وشيك.
يفضل أن ظهر السرير ميكونش عالى وكمان ميبقاش فى الغرفة كراسى وترابيزات عالية لان الفرش القصير بيعمل مساحة اعلى فوقه ويخليك تشوف الحوائط بشكل اكبر وبالتالى يعطى احساس ان السقف مرتفع وغرفة النوم الضيقة تبان أوسع.
تقدر تستخدم الاثاث الشفاف زى كرسى التسريحة مثلا ، فالكرسى الشفاف هياخد نفس مساحة الكرسي الخشب او اى نوع تانى ، لكن النظر له وهو شفاف يعطي احساس ان المساحة اللى اخدها صغيرة وبالتالى الغرفة تبان أوسع.
استخدام الأثاث المكشوف بيعطى احساس اكبر بالاتساع ، يعنى لو السرير بارجل وكمان الكرسى والتسريحة والدولاب وبالتالى الارضية تحتهم هتظهر وكده الغرفة تبقى اوسع.
كمان تقدر تعمل مكتبة حول السرير وهو يدخل فيها بحيث انك تستغل مساحة الحائط وراه وبجانبه يمين وشمال.
الإضاءة
الاضاءة عامل مهم جدا وله تأثير فعال وكبير فى غرفة النوم الضيقة وده طبعا عن طريق استخدامها بشكل صح عشان تتوزع على كامل الغرفة بشكل مظبوط ، تنقسم الاضاءة الى 3 اقسام :
الإضاءة الطبيعية
دى مصدر الحيوية والنشاط وطبعا لا غنى عنها فى غرفة النوم ، عشان كده لازم موقع الغرفة يبقى كويس تدخلها الشمس وكمان الهواء ، لأن الاضاءة الطبيعية والتهوية الجيدة بيعطوا دائما إحساس بالراحة والاتساع.
الإضاءة المباشرة
دى اللى بتكون فى وسط الغرفة و متوزعة على النقط الاساسية فيها وطبعا لازم يكون التوزيع كويس و مناسب وكافى لمساحة المكان عشان غرفة النوم الضيقة تبقى مضيئة اكثر وتبان احسن.
الإضاءة الغير مباشرة
دى اللى بتتوزع فى اركان الغرفة بشكل بسيط عشان تعطى جو هادى ومريح ، زى الاضاءة المخفية ورا السرير او التسريحة او عن طريق الاباجورات بالوان دافئة وهادية او عن طريق الابليك.
ديكورات غرفة النوم الضيقة
تقدر تعمل ارفف فوق السرير تحط عليها كتب او اى اكسسوارات بتحبها ، بس خلى بالك ان الارفف تكون قريبة من السقف عشان تعطى احساس بالاتساع.
كمان ممكن تجيب براويز فوق السرير او فوق التسريحة لاعطاء منظر جمالى للغرفة ، بس مكانهم يكون في أسفل الثلث الثالث من الحيطة عشان تعمل خداع بصرى ان الحيطة اطول وبالتالى توسع غرفة النوم الضيقة.
لو عندك فى الغرفة حيطة فاضية او باب الدولاب كبير مثلا تقدر تعمل فيه مراية كبيرة ، لان المراية مش بس بتعكس الاضاءة لا كمان بتعطى احساس بالاتساع وشعور بعمق وارتفاع أكبر للمكان من اللى هو عليه فى الواقع.
ركز وانت بتختار الألوان بحيث يكون فى تناسق ما بين الوان الحوائط والديكورات وطبعا المخدات والستائر والسجاد لان ده بيعمل ترابط ما بين كل حاجة وبالتالى تبان الغرفة منظمة ومرتبة وشكلها أوسع.
يفضل استخدام ستائر بيضاء او ألوان فاتحة وتكون مصنوعة من الدانتيل او الشيفون لاعطاء احساس اكبر بالاتساع ونفس الموضوع بالنسبة للسجاد.
نصائح عامة
- قبل اى حاجة لازم تاخد بالك من المقاسات عشان متشتريش حاجة مش مناسبة ، كمان بلاش الأشكال الكبيرة والضخمة ولا الألوان الكثيرة والمشبعة لان ده هيكون اختيار سيء جدا فى غرفة النوم الضيقة.
- يفضل أن الغرفة ميبقاش فيها تلفزيون لان المفروض انها مخصصة للراحة والهدوء والاسترخاء ، ممكن تستبدله بركن للقراءة تحت الشباك وتقعد فيه تهدى اعصابك من زحمة اليوم.
- يفضل ترتيب الغرفة باستمرار وبلاش كل حاجة تكون منتشرة بشكل فوضوي وعشوائي لان ده بيظهر ان الغرفة صغيرة وضيقة.
- حاول تتخلص من الأشياء الزائدة عن احتياجك كل فترة وبلاش كراكيب فى الغرفة على الفاضى عشان تكون منظمة ومرتبة وشكلها جميل.
- لو كنت هتعمل غرفة ملابس ملحقة بغرفة النوم بدل وجود الدولاب العادى ، خلى غرفة الملابس لها باب اكورديون بدل الباب العادى لتوفير المساحة ، ولإتاحة أكبر فرصة للتخزين.
مصادر الصور
الغلاف Tomasz Markowski/stock.adobe
شكرا على الموضوع الجميل بخصوص ديكورات غرفة النوم
اعجبتني غرفة التي تظهر بالون الاخضر البارد انها فعلا جميلة وموقع رائع يقدم هذه الافكار
وايضا عندي موضوع لمن احباب زيارته حول تنسيق الالوان في غرف النوم
نشكرك جدا على زيارتك لموقعنا ونمتمنى أن ينال إعجابك دائما