كتير مننا للاسف بيحصل عنده مشاكل بسبب وجود سخان الغاز فى الحمام سواء كانت اختناق او حريق او تسريب غاز ، وده نتيجة أخطاء كتير بنقع فيها ومش بنتبع وسائل الامان وقت تركيب سخان الغاز فى الحمام عشان كده هنعرض لكم كل الوسائل اللى لازم تعملها عشان تقدر تركب السخان وانت مطمن.
وكمان عشان متبقاش مضطر انك تعمل تعديلات سواء كانت معمارية فى الحمام او فى تشطيبه النهائى لان فى بعض الاخطاء مش بتوافق عليها شركات الغاز ، و بترفض تركيب السخان فى الظروف دى.
مساحة الحمام
مينفعش يقل حجم الحمام عن 5.6 متر مكعب وطبعا احنا عارفين ان الحجم = (الطول x العرض x الارتفاع) ليه يا ترى ؟ لان دى اقل مساحة بتكون التهوية فيها مناسبة عشان يبقى التنفس بأمان لأن سخان الغاز وهو شغال بيستهلك كمية من الاكسجين فلو المساحة قليلة هتبقى مشكلة كبيرة ممكن تسبب كارثة لا قدر الله.
سقف الحمام
وانت بتشطب حمام بيتك مينفعش تخلى سقف الحمام من الخشب او اى مادة تانية قابلة للاشتعال لان ده ممكن يسبب كارثة.
وعشان تتفادى الموضوع ده بعض شركات الغاز بتطلب انك تجلد السقف بخامة تانية زى الصاج او الاستانلس او شرائح الالومنيوم الموجودة فى بعض البلاد العربية وانا اتذكر واحنا شغالين فى السعودية كان معظم الناس بتخلى سقف الحمام والمطبخ من شرائح الألمنيوم.
لكن خلى بالك بعض الشركات بتاخد فى اعتبارها نسب امان اعلى من كده وترفض تركيب السخان فى الحمام بالوضع ده تماما حتى لو عملت تجليد ، لذلك ابعد عن الخامات القابلة للاشتعال.
ارتفاع حيطة الحمام
لازم المسافة بين الارضية وسقف الحمام متقلش عن 240 سم عشان ينفع السخان يتركب فى ارتفاعه المناسب اللى هو حوالى 180 سم وهو ده المقياس العالمى لمستوى النظر.
وده له سببين مهمين اولهم انك تكون شايف شعلات الغاز اذا كانت شغالة او لا والثانى انه يكون فيه مساحة كافية فوقه لتركيب المدخنة كويس.
سعة سخان الغاز
لو كنت عامل حسابك انك تركب سخان الغاز فى الحمام يبقى لازم تشترى سخان له مدخنة خارجية يعنى سعته اللترية تبدأ من 10 لتر لان السخانات سعة 6 لتر مصممة بدون مدخنة وبالتالي مينفعش تركب فى الحمام نهائى.
لكن ممكن تتركب فى المطبخ و ساعتها مش هيبقى فى مشكلة لأن الأبخرة المتصاعدة بتتشفط بشفاطات المطبخ نفسه وبالتالى مش هيحصل اضرار.
مسافة تركيب سخان الغاز فى الحمام
من اهم النقط اللي لازم ناخدها فى اعتبارنا واحنا بنعمل تأسيس السباكة وبناء حوائط الحمام ان مكان تركيب السخان يكون قريب من المنور أو حائط الحمام المطل على الشارع بمسافة لا تتجاوز 30 سم لضمان خروج العادم والابخرة فى مسافة قريبة بدل ما تكون المدخنة جزء كبير منها فى الداخل و تتراكم الغازات الضارة.
المسافة بينه وبين دش الاستحمام
بردو من النقط المهمة جدا انه يكون السخان بعيد عن الدش نفسه عشان ميتأثرش بنقط المياه اللى بتتطاير أثناء الاستحمام لانها ممكن تطفى شعلات الغاز.
ابتعاد سخان الغاز عن الكهرباء
من اهم النقط اللي لازم تخلى بالك منها هى ابتعاد السخان عن الشفاط لان السخان أثناء فترة عمله تتجاوز حرارته 500 درجة مئوية بسبب اشتعال الغاز ، وطبعا دى حرارة كافية أنها تدمر الشفاط بأجزائه البلاستيك لو كان قريب منه.
وبردو من مميزات النقطة دى انك هتتجنب اي مشاكل ممكن تحصل في السخان لو حصل اى شورت كهربائى فى الشفاط او حتى فى البريزة اللى بياخد منها الكهرباء او اى مفاتيح تانية فى نفس المكان.
إحكام الأماكن الخارجية
لو كنت هتركب السخان فى مكان مفتوح زى بلكونة او منور او حتى فوق سطح البيت يبقى لازم تقفل المكان ده كويس مع مراعاة التهوية طبعا زى ما قلنا.
لانك لو سبت السخان فى مكان مفتوح هتتعرض شعلات الغاز للهواء المستمر والمطر وده ممكن يطفى الشعلات بسهولة جدا ده غير الاتربة اللى ممكن تعمل انسداد فى فونيات الغاز نفسها وتسبب لك مشاكل كتير انت فى غنى عنها.
التهوية فى السخان
مسألة التهوية أثناء تركيب السخان فى الحمام او حتى فى المطبخ دى مسألة حتمية وضرورة مينفعش الاستغناء عنها نهائى عشان كده فى 3 نقط مهمة يجب مراعاتها في موضوع التهوية.
- لازم يكون فيه هواية تتركب سواء فى الحمام او المطبخ بمعرفة الفنيين من شركة الغاز نفسها لان لها حسابات معينة من حيث المسافة بينها وبين الجهاز واتجاه دخول الهواء منها وعادة بتكون اما من الالومنيوم او الصاج عشان تقاوم الصدأ والتآكل.
- لو كنت مضطر و هتركب السخان فى المطبخ يبقى ينصح انك تركب سخان 6 لتر بدون مدخنة ودى بقت من ضمن تعليمات اغلب شركات الغاز حاليا ، وطبعا مع تركيب شفاط معاه لسحب الغازات للخارج مع وجود الهواية وتخلى بالك ان الهواية دايما تكون مفتوحة باستمرار مينفعش تغطيها بقماش او ورق عشان متتراكمش عندك الغازات في الداخل.
- لو فيه منور وراء منطقة تركيب السخان ممكن تركب سخان 10 لتر بمدخنة خارجية افضل ليك وكمان عشان يغطى لك مساحة أكبر لو عندك كذا حمام مع المطبخ.
التهوية فى الحمام نفسه
تعالوا نتكلم عن موضوع التهوية بشكل علمى شوية بدون مصطلحات معقدة ، الغاز الطبيعى ده مكون من غاز ميثان مخلوط معاه هيدروكربونات ومواد تانية ومعمول له عملية اسالة عشان يبقى نقله اسهل فى المواسير.
لما بيحصل تسريب غاز في الحمام ينتج عنه غاز سام هو اول اكسيد الكربون وهو غاز ملوش لون ولا ريحة وهنا تكمن خطورته لانه مش بس ملوش ريحة ، ده كمان بيختلط بالهيموجلوبين في الدم أسرع من الاكسجين بكتير عشان كده محدش بيحس بيه ولا حتى الشخص الموجود فى الحمام بيحس إلا بعد عملية الاختناق نفسها وللاسف بيكون الوقت فات.
تفتكروا زمان فى بيوت اهلنا القديمة كان فيه حيطة فاصلة بين الحمام نفسه والمغسلة اللى فيها الحوض او الغسالة حتى وكانت الحيطة دى مش كاملة لحد السقف ، لكن فيها فراغ من فوق حوالى 50 سم مفتوحين ده كان مفيد جدا عشان ميحصلش اختناق.
طبعا احنا مع التطور الموجود حاليا مبقناش نعمل فراغ فى الحيطة ولكن نحاول نخلى التهوية فى الحمام نفسه بقدر كافى يعنى نخلى فيه كذا شباك بمساحة كويسة مع وجود الشفاط والهواية.
التهوية مش بس هنقول عليها مهمة ، لا دى بنفس اهمية وجود السخان نفسه ، احذر الاستهانة ببند التهوية سواء كانت فتحات او شفاط يكون شغال طول فترة التواجد فى الحمام.
بننصح دائما ان التعامل مع موضوع الغاز يكون بدقة وحذر لانه مش مجرد شوية دهان لو اللون طلع مش حلو مش هتفرق او لمبة هتتكسر ونشترى غيرها لا طبعا الاهمال فى بند الغاز يضيع ارواح.
تجنب حدوث الاختناق
بعد ما عرفنا خطورة غاز اول اكسيد الكربون حتى ان بعض الاحصائيات العالمية أكدت انه يتسبب فى وفاة 200 شخص سنويا واصابة 10000 شخص بمشاكل كتير فى الجهاز التنفسى.
عشان كده العلماء والباحثين اخترعوا لنا الحل وهو عبارة عن جهاز بيتعرف على غاز اول اكسيد الكربون السام لحظة انبعاثه وبيطلق صفارة انذار لو حس بوجوده بنسبة ضئيلة تبدأ من 200 جزء فى المليون وطبعا كل ما حساسية الجهاز زادت سعره بيزيد.
الجهاز ده مش بس مفيد فى عندك فى البيت عشان سخان الغاز فى الحمام ، لكن مفيد فى مكتبك او شركتك او اى مكان تخاف على خطر الاختناق والحريق فيه.
مصادر الصور
الغلاف Budimir Jevtic/stock.adobe
