اختيار باب الحمام جزء أساسي من ديكور البيت لازم تهتم بيه وتركز فى كل تفاصيله ، زى ما هيكون فى دماغك ان شكله هيكون جميل ومتناسق مع ديكور المكان وايه هى الخامة اللى هتعمله منها يبقى لازم كمان تراعى شوية حاجات مهمة زى انه لازم يكون مقاوم للرطوبة، مش بيتأثر بتغير درجات الحرارة، مش بيتأثر بتراكم المكثفات وطبعا لازم يحافظ على الخصوصية.
اختيار الخامة
الابواب الخشب
دى اكتر نوع منتشر بس المشكلة انه بيتشوه بسرعة بسبب المياه والرطوبة وعشان كده لو عايز تعمل باب من الخشب يبقى لازم يكون خشب صلب زى الزان أو البلوط او الارو.
وتبعد خالص عن الصنوبر والحور والكرز لانهم مش بيقاوموا الرطوبة والباب هيتلف بسرعة وطبعا الخشب اللى قولنا عليه هيكون مغلف بالشمع او الورنيش وبكده يكون مقاوم للمياه.
مزاياه ان عمره الافتراضي طويل وملمسه طبيعى ده غير ان شكله انيق وجذاب وخامة موثوق منها ومعروفة وعيبه أن تكلفته عالية.
ابواب MDF
خامة MDF هى خامة شعبية لإنتاج الأبواب وميزته ان له الوان كتير وخاصة الألواح الجاهزة المتوفرة بطبقة القشرة وسعره مقبول ولكن عيوبه انه بيجمع الرطوبة وبكده الباب هيتلف بسرعة جدا.
ابواب القماش المكسى
اسمه كده لانه بديل للابواب الخشب وهو عبارة عن لوح ليفي ملصق عليه طبقة رقيقة من القشرة وده بيعطى احساس انه خشب طبيعى بس الهيكل بيكون اخف فى الوزن وكمان سعره اقل لكن مشكلته أن طبقة القشرة بتكون حساسة جدا للتغير في درجة الحرارة وكمان بتتأثر بالرطوبة.
ابواب PVC
دى ابواب مصنوعة من مادة البولى فينيل كلوريد PVC وهى من مشتقات البترول ودى اللى بيتعمل منها حوض الاستحمام (البانيو) و كابينة الشاور ف بتكون ممتازة ومقاومة للرطوبة ، مقاومة للعفن والفطريات وكمان وزنها خفيف و بتعزل الصوت وغير قابلة للاشتعال ، وفي منه الوان كتيرة جدا وكمان ممكن تدخل فيه الزجاج لعمل شكل جمالى.
وده اختيار كويس جدا للحمامات اللى الرطوبة فيها عالية اوى لانها خامة مش بتتأثر بالمياه.
الأبواب الزجاج
بتكون شكلها انيق جدا ومقاومة للرطوبة والتلف، مش بتتشوه من البخار وارتفاع درجة الحرارة، وبتعمل عزل جيد للحرارة والصوت ، وكمان تعزل الرطوبة عشان متخرجش بره الحمام ، وتصاميمها متنوعة بس خلى بالك لازم تطلى السطح الخارجى عشان يكون ضد التكثيف وبردو عشان يوفر الخصوصية.
مشكلته ان تكلفته عالية لان خامة الزجاج غالية ده غير عملية تصنيعه.
الأبواب الالومنيوم
بتتميز بالجمال والدقة في التصميم ، ومش بتحتاج دهان ومش بتتأثر بالمياه ولا الرطوبة وتنتفخ زى الابواب الخشب وبكده هتحتفظ بمظهرها الجميل طول الوقت ومش مكلفة زى الابواب الخشب والزجاج وتقدر تستخدم المياه فى الحمام سواء باردة او سخنة براحتك لانها مش بتتأثر بدرجة الحرارة.
كمان مش بتصدى وغير قابلة للاشتعال ووزنها خفيف ومش بتتكسر زى البلاستيك أو الزجاج ده غير انها عازلة للصوت بنسبة كبيرة.
شكل الباب وطريقة فتحه
الباب المفصلي
ده شكل الباب العادى اللى بيكون بمفصلات وده الاكثر شعبية وله مزايا كتير زى الحجم المناسب وسهولة التركيب وتقدر تشطبه وتركب له الاكسسوار اللى يعجبك وكمان سعره مناسب، لكن مشكلته لو المكان ضيق ومفيش مساحة كفاية مش هينفع النوع ده من الأبواب عشان امكانية الفتح والقفل.
الباب الجرار او السحاب
باب الحمام الجرار شكله جميل وانيق ويوفر مساحة بس بتحتاج مكان فاضي جنب مدخل الحمام لكن مشكلة النوع ده من الأبواب انها غالبا مش بتطلع بنفس التصميم المطلوب عشان كده محتاجة فنى محترف جدا عشان يقدر يصنعها مش اى حد.
باب قابل للطى
بيكون له شكلين شكل الأكورديون (3 اجزاء او اكثر) او شكل الكتاب (جزئين) من مميزاته انه بيوفر المساحة يعنى مش هتحتاج لمكان اضافى نفتح فيه زى المفصلى لكن هتحتاج عرض الحلق يكون كبير عشان تقدر تدخل بعد عملية الطى ويكون فيه مساحة لك تعدى منها.
ديكور باب الحمام
لما تخلص اختيار الخامة واللون المناسب لديكور حمامك ممكن تفكر فى زخرفة اضافية عشان تعمل منظر جمالى للباب ميبقاش مجرد باب سادة وخلاص.
وده هيعتمد على خامة الباب نفسه يعنى مثلا ممكن تستعمل زخارف خشب سواء محفورة CNC او باى طريقة تانية على باب خشبى او قطع بلاستيك على الباب المصنوع من PVC بدل لوح الفايبر التقليدى.
وممكن بردو تستخدم بعض قطاعات الالومنيوم او اى معدن تانى فى الباب الالومنيوم او حتى الباب الخشبى.
وطبعا لو عندك باب زجاج سيكوريت يبقى قدامك الرسم أو الحفر بالرمل مع استخدام الالوان او الطباعة UV وده بيعطى مساحة ابداع كبيرة لانه هيخليك تطبع اى شكل على الباب بمقاس الباب نفسه.
وهنا فيه نقطة كويسة جدا للناس اللى مش بتحب باب الحمام يظهر ممكن تدهنه بنفس لون حيطان الممر او ترسمه مع الحيطة برسمة واحدة بورق حائط مثلا او رسم يدوى
اضافات ممكن تعملها فى الباب نفسه
لو كانت التهوية الطبيعية فى الحمام مش كفاية فممكن تضيف جزء خاص بالتهوية في الباب نفسه زى شبكة او الشيش المعروف فى الشبابيك الخشب من تحت او من فوق او ممكن تكون من الدوائر وده هيسمح بتبادل الهواء وحركته.
